Ja’ C’u X-Elan La Jyal Ta Jamal Lequil Vinic Jose Smith

Ja’ smelolal, ti José Smith, ti boch’o ta svu’el, ta stsatsal Riox iloc’ ta saquil osil, yich’ jelubtasel ta ingles c’op ti poco’ ts’ib ti otquinbil ti ja’ slibro Mormone, la spas stuc ti c’usi yich’oj xa ox albele. Ta yac’ubalil jun xcha’vinic (21) yualil septiembre, ta sjabilal (1823) mil vaxaquib ciento xchi’uc oxib xcha’vinic jabil. La sc’anbe Riox ta s-oracion, yu’un yich’oj xa ox jutuc albel c’ux e’lan xu’ ta spas, ti c’usi xu’ ta spase ja’ jech x-elan.

“Ja’ o jech ta jpasilan ta jc’anilanbe ti Rioxe, ja’ o la jquil xc’ataj jech chac c’u cha’al xojob te ta yut jcuarto, te to ep isacub ja’ to ti c’u cha’al sac icom scotol jech chac c’u cha’al o’lol c’ac’al yilele; ja’ to te la jquil vinaj jun vinic te ta xocon jvayab, chechel ti yacane yu’un muyuc stec’oj banamil.

“Slapoj jun natil c’u’il ti batsi jun saquile, yu’un tu j-ech’em saquil, jech muyuc bu quiloj o li ta banamil ti vu’une, mu jch’un me oy to c’usi ech’em mas sac ti li ta banamile xchi’uc ti sacts’ayan to x-elane. Ti sc’obe t’anajtic xchi’uc sbaquil sc’ob te ta yac’ol jutuc snuc’ nuc’ sc’ob, ja’ no’ox jech xtoc ti yacane, jech chac c’u cha’al sbaquil yacane, te ta yac’ol jutuc snuc’nuc’ yacan—ja’ no’ox jech xtoc ti sjole muyuc macal xchi’uc snuc’, ja’ te la jquil ti muyuc ep slapoj sc’u’e ti ja’ no’ox slapoj ti natil c’uile, yu’un jamal ti jech c’uxi la jquilbeo lec ti sti’ yo’ntone.

“Ma’uc no’ox tu jsac ti sc’u’e, yu’un tu jsac sjunlijil jech ech’em sts’aylejal yu’un mu jna’tic c’uxi lec ta alel, xchi’uc ti sbec’tale xc’ataj jech chac c’u cha’al cuxul sacsevul. Yu’un ti jcuartoe sacuben ic’ot yu’un, ma’uc no’ox ta sts’aylejal sbec’tal. Ti c’alal ja’ to sba la jquile, li xi’ yu’un; ti c’alal li xi’ yu’une la sq’uej sba ta jtojolal.

“La sc’opanun ta jbi, te la jyalbun ti ja’ jun yaj almantal Riox tacbiltalele, ti ja’ sbi Moroni; ti yu’un Riox oy yabtel ta jtojolal, xchi’uc ta scotol banamil, cristianoetic, xchi’uc ta scotol c’opetic ta xich’ tsaquel jbi ta sventa lequilal xchi’uc ta sventa chopolilal, me ja’ ta xc’opojic ta lec me ta chopol ta jtojolal ta scotol jteclumetique.

“La jyal ti te oy jun libro, te ts’ibabil ta sba c’anal taq’uin vun, ti ja’ te tsacal ti stalelic ti poco’ viniquetic ti li ta banamil Americae, xchi’uc ti c’uxi italique. Xchi’uc ti ja’ te macal ti lequil c’op ta sventa sbatel osil ti bu Jcoltavanej yalojbeic o no’ox ti quirisianoetic ta vo’neje.

“Ja’ jech no’oxtoc ti te bu’oy ti taq’uin vunetique te jmoj oy xchi’uc chib ton pasbil ta arco saquil taq’uin. Ti ja’ te yicaojic ti ta o’lole, ja’ te pasbil ti Urim xchi’uc ti Tumim sbie, ti ja’ te ts’ibabil ta ton ti c’usi yich’ojic albel ti boch’otic la jyilic ta vo’neje, ti Riox smeltsanoj o no’ox ti c’u cha’al xich’ jelubtasel ta libroe.

“Ta yan xa veltae, la jyalvun ti c’alal me la jquich’ ta jc’ob ti taq’uin vunetic ti bu yalojbun xa o xe—yu’un muyuc c’otem sc’ac’alil ti xu’ xich’ loq’uesele—Ti mu xu’ boch’o xcac’beic yilic, me ja’uc ti c’usi stac’ aq’uel ta sti’ o’ntonale xchi’uc Urim Tumim, ja’ no’ox xu’ xcac’beic—yilic ti boch’o la jyalbicun ca’ay ti xu’ chcac’beic yilique; ti me la jcac ta ilele yu’un xu’ ta soquesic. Ti c’alal chi yalbe ca’ay ti va’ay taq’uin vunetique, ja’ o vul ta jol ti c’usi yac’ojbun xa ox quil ti te bu nac’bile; yu’un lec stac’ q’uelel xchi’uc lec stac’ otquinel ti bu la jquil ti c’alal ay jq’uele.

“Ti c’alal laj xa ox quich’ albele, ja’ to te la jquil ti xojob ta yut jcuartoe lic stsob sba ta stojolal ti vinic yileluc, boch’o la xchi’nun ta lo’ile; te ja’ jech la spas ja’to ti c’uxi ic’ com ti yut jcuartoe, ja’ sac com ta anil no’ox ti vinic yilele, ja’ to te la jquil ta anil jam, jech chac c’u cha’al jun no’ox sbelal yilel ti vinajele, ja’ jech muy batel ja’ to ti c’uxi ich’ay o batele. Ti yut jcuartoe com jech chac c’u cha’al muyuc to’ox ti xojobal Riox ta vinajele.

“Te la jvules ta jol ti c’usi tu jla’bal la jquile, xchi’uc ti tu jlec’ ti c’usi la jyalbun ca’ay ti j-almantale, ti muyuc bu quiloj o jeche, ti c’alal jech ta jnopilane, ja’o la jquil yan velta ti yut jcuartoe cha’ sacub no’oxtoc, ta anil no’ox, ja’ no’oxtoc ti yaj almantal Riox ta vinajele te vinaj ta xocon jvayab yan velta.

“Sjapo no’oxtoc, ja’ no’ox lic xcha’ albun yan velta ti c’usi la jyalbun ta sba velta ay svu’lanune, me jutuc muyuc la sjelta, ja’ to te ta ts’acal la jyalbun ti ta xtal muc’ta meltsanel li ta banamil, xchi’uc muc’ta at o’ntonal ta sventa vi’nal sac’op sventa milbail xchi’uc ta xloc’ cusitic tojtu, ti va’ay at o’ntonal meltsanele ta xc’ot ta pasel li’ ta banamil ta stojolalic—quirisianoetic ti li’ ta orae. Ti c’alal la jyalbun ti c’usitic va’aye, ja’o muy batel yan velta jech chac’ucha’al la spas ta bayuque.

“Ja’ yu’un te xa ep la jcac’ ta muc’ ti c’usi la jca’ybe smelolale, ti jvayele muyuc xca’ay c’uxi bat ta jsat, yu’un ja’ bat ta co’nton ti c’usi la jquile xchi’uc ti c’usi la jca’aye. Ma’uc ch’ayel c’ot co’nton yu’un ti j-almantal ti te ta xocon jvayabe, ti la xcha’al yan velta ti c’usi yaloj xa oxe; oy to c’usi yan la jyal, la jyal yu’un la ti pucuje ta la sc’an ja’ chi spas ta mantal (ta sventa sme’onalic ta snailalic jtot ta vo’nej) yu’un c’alal me la jquich’ ti taq’uin vunetique ta la xi pas ta jc’ulej.

“Ti va’ye mu jechuc la sc’an, te la jyalbun ti me la jquich’ ti va’ay taq’uin vunetique jech muyucuc la c’usi yan te ti bu ta xcaq’ue jech chac c’u cha’al xu’—sts’uiltas ti Rioxe; xchi’uc muyucuc c’usi yan ta jpas, ja’uc no’ox ta spas mantal stuc; ti me mu jechuc ta jpase yu’un mu la xu’ xquich’ ti taq’uin vunetique.

“Ta tsacal ti c’alal oxib xa ox velta ay sq’uelune, ja’ o te bat ta vinajel yan velta jech chac c’u cha’al ta bayuque, jech te la jchi’in ta lo’il co’nton ta sventa ti c’usi laval sba la jquich’ albele; ta tsacal ti c’alal oxib xa ox velta ay sq’uelun ti j-almantal ta vinajele, ja’ o o’c’ cots, ja’ o te la jquil ti yu’un tsacub xa osile; ti c’uyepal, li lo’ilajcutique yu’un la jyich’ sjunul ac’ubal ya’eluc.

“Ja’ oxa te li lic ta jvayab, jech chac c’u cha’al chilic ono’oxe, bat jpas ti c’usi stac’ pasel ta c’ac’altique; ti c’alal ta jc’an chi abtej jech chac c’u cha’al chi abtej ono’oxe, ja’ to ca’ay lajem scotol ti jpersae, mu jchuc’uc jch’ulel tajmec. Ti jtote, te nopol ch-abtej ti te bu’oyune, la jyil ti oy c’usi chopol ta xca’aye te la jyalbun ti xu’ xi sut batel ta jnacutique. Jech li loc’ batel, c’alal ta jc’an chi jelo xa batel ta coral ti c’alal yu’un chiloc’ xa batel ta osil ti te buoyuncutique, jech te li alub li yal ta lum, muc’ta jal muyuc jch’ulel li c’ot.

“Ti c’usi ba’yuc vul ta jole oy boch’o la sc’opanun ca’ay, la sc’opanun ta jbi. Te la jtoy jsat, ja’ to te la jquil, te ta stoylejal jol ja’ no’oxtoc ti j-almantale, joybil ta xojobal jech chac c’u cha’al ta bayuque, te la jyalbun no’oxtoc ti c’usi la jyalbun ta yac’ubalile; xchi’uc la stacun batel ti ac’o bat calbe jtot ti c’usi la jquile xchi’uc ti c’usi mantaletic la jquich’e.

“La jch’un; li sut batel ti te bu’oy ti jtot ta osile, te la jcalbe scotol ti lo’iletique. La stac’bun ti ja’ yu’un Rioxe, la jyalbun ti ac’o bat jpas ti c’usi la jyalbun ti j-almantale. Li loc’ batel ti te ta osile, te li bat ti bu la jyalbun ti j-almantal ti te bu nac’bil ti taq’uin vunetique, ja’ jech chac c’u cha’al la jquil be lec smelolal ti bu stuq’uil ti oye, c’alal li c’ot ti te bu oye, te la jcotquin ta ora.

“Te nopol ta jun biq’uit jteclum Manchester sbi, te ta yosilal ontorio Estado yu’un Nueva York, te xlic batel jun vits lec no’ox sba smuc’ul, yu’un ja’ ech’em muc’ yu’nic ti yajval jteclumetique, te ta xocon smaleb c’ac’al, mu tu jnomuc ta sva ti vitse te ta xocon jun ton lec no’ox sba smuc’ul, ja’ te oyic ti taq’uin vunetique, te ac’bilic ta jun caxa ton. Ta o’lol, xchi’uc ta sbae ja’ pim xchi’uc volvol, ja’ joyic ti ta sti’iltaque, ti c’uxi xu’ xquiltic ti ta o’lol ta sba banamile, yu’un ta xocontac ti sti’iltaque macal ta lum.

“C’alal la jloq’ues ti lume, la jsa’ jun luchub te’ ja’ to te la jtabe sti’ ti tone, ta aniltic no’ox la jtoy. La jq’uel ti yut caxae, ta melel te la jquil ti taq’uin vunetique, ti Urim xchi’uc ti Tumim xchi’uc ti c’usi stac’ aq’uel ta sti’ o’ntonale, ja’ uc o jech chac’ucha’al la jyal ti j-almantale, ti caxa ti te bu oye ja’ pasbil ta ton, jech chac c’u cha’al cemento yilel. Ta xchac ti caxae te oy chabej ton c’atajtic, ja’ te ta sba oyic ti taq’uin vunetic xchi’uc ti c’usi yantic comenique.

“Ta jc’an ox ta loq’ues, jech muyuc xac’ loq’ues ti j-almantale; ja’ to te la jyalbun ti muyuc to c’otem sc’ac’alil ti xu’ xich’ loq’uesele, mu to xu’—xich’ loq’uesel, ja’ to me ech’ chanib jabil, jech chac c’u cha’al c’ac’al li’e; te la jyalbun ti ac’o xi c’ot ta yan jabil ti tee, yu’un te chi smalun ti stuque; ti ja’ jech ta jpasilan o ja’ to me c’ot sc’ac’alil ti xu’ xquich’ ta jc’ob ti taq’uin vunetique.

“Jech chac c’u cha’al quich’oj mantale, chi c’otilan ta slajeb jujun jabil, jech te xa chc’ot jtaanan ti j-almantale, ta jujuten ti c’alal ta jchi’in jbacutic ta lo’ile ja’ te ta jna’o ti c’usi xu’ ta jpas xchi’uc ti c’usi xu’ ta jna’ ti c’usi tsc’an ta spas ti Cajvaltic, xchi’uc ti c’u x-elan xchi’uc ti c’uxi xu’ ta xc’ot ta pasel ti bu spas mantal stuc ta slajebal c’ac’ale.

“Ja’ to ti c’alal c’ot ti sc’ac’alil ti la jquich’ ti taq’uin vunetique, ti Urim xchi’uc ti Tumim xchi’uc ti c’usi stac’ aq’uel ta sti’ o’ntonale. Ta sc’ac’alil chib xcha’vinic (22) septiembre ta sjabilal mil xchi’uc vaxaquib ciento xchi’uc vucub xcha’vinic (1827) jabil, ta slajeb xa yan jabil, jech chac c’u cha’al ta jpasilan o no’oxe, te ti bu nac’bilique, ja’ no’oxtoc ti j-almantal ta vinajele te la jyac’bun xchi’uc jech la jyalbun; Ti vu’un cajal ta cac’ol sq’uelele; ti me oy c’uxi ch’ay cu’un me ch’ay ta co’nton sq’uelele, yu’un xu’ chich’—soquesel; ti me la jcac’ persa sq’uelel ti me la jcac’ ta co’nton sq’uelele ja’to ti (j-almantal) me tal yich’bune, ja’ to te lec chabibil chc’ot.

“Ja’ to te la jna’ c’u yu’un ti tsots la jquich’ albel ti ta jnaq’ue, c’u yu’un la jyalbun ti j-almantal ti me la jpas ti c’usi chquich’ c’anbele, ti ja’ o chtal yich’bun sutele. Yu’un muyuc la sna’ic lec me vu’un quich’oj, ti c’alal tsots la spasic ti yu’un tsc’an chi smilic ta sventae. Te ep la snopic ti c’usi xu’ chi spasbicun ta sventa ti yu’un c’otuc ta pasel ti c’usi tsc’an ta spasique, ech’em to tsatsub chac c’u cha’al vo’nej ti slo’ilique, epal viniquetic stsoboj sbaic ti yu’un tsc’an chi spojbeique, ti yu’nuc stac’uque. Ja’ sna’oj stuc Riox ti c’uxi lec q’uelbil ta jc’obe, ja’ to me la jpas ti c’usi chquich’ c’anbele. C’alal ti j-almantale, jech chac’uyepal xa ox jpasoje, ja’ o c’ot yich’ vun, te la jcac’be; jech ja’ te yich’oj tana ti li’ ta orae, chib (2) yual mayo ta sjabilal mil xchi’uc vaxaquib ciento xchi’uc vaxaclajuneb xcha’vinic (1838) jabil.”

Ti c’uxi cha na’ o leque q’uelo ta vun sbi La Perla de Gran Precio, José Smith—Historia, xchi’uc History of The Church of Jesus Christ of Latter-day Saints, ta sba pocal ta ba’yuc capítulo ja’ to ta svaquibal capítulo.

Ti poco’ lo’il ta vo’nej ti ja’ jech loc’ ta banamil chac c’u cha’al ya’yej jun jteclum ti bu lo’ilaj ta spucucale, yich’ jelubtasel ta ach’ c’op ta—stsatsal xchi’uc ta svu’el Riox, jech chac c’u cha’al yich’ alel ta lequilale, yich’ puquel ta sba velta ta sbejel banamil ta sjabilal mil xchi’uc vaxaquib ciento xchi’uc lajuneb xcha’vinic (1830) jabil Ja’ Chac C’u Cha’al Slibro Mormon.