1 Ug karon nahitabo sa kapitoan ug duha nga tuig sa pagmando sa mga maghuhukom nga ang mga panagbingkil nagkadaghan, nga niana dihay mga gubat taliwala sa tanang katawhan ni Nephi.

2 Ug kining tinago nga pundok sa mga tulisan mao ang nagpahigayon niini nga buhat sa kalaglagan ug pagkadaotan. Ug kini nga gubat milungtad nianang tibuok nga tuig; ug milungtad usab kini sa ikapitoan ug tulo nga tuig.

3 Ug nahitabo nga niini nga tuig si Nephi nangamuyo sa Ginoo, nga nag-ingon:

4 O Ginoo, ayaw itugot nga kining katawhan pagalaglagon pinaagi sa espada; apan O Ginoo, tugoti hinoon nga adunay kagutom sa yuta, aron maaghat sila sa paghinumdom sa Ginoo nga ilang Dios, ug tingali maghinulsol sila ug mobalik kanimo.

5 Ug mao nga nahimo kini, sumala sa mga pulong ni Nephi. Ug dihay dakong kagutom sa yuta, taliwala sa tanang katawhan ni Nephi. Ug sa ingon niana sa kapitoan ug upat nga tuig ang kagutom nagpadayon, ug ang buhat sa kalaglagan pinaagi sa espada nahunong apan nahimong mas pait tungod sa kagutom.

6 Ug kini nga buhat sa kalaglagan nagpadayon usab sa kapitoan ug lima nga tuig. Kay ang yuta gitunglo nga kini nauga, ug wala mohatag og mga lugas sa panahon sa tinglugas; ug ang tibuok yuta gitunglo, gani taliwala sa mga Lamanita ug ingon man taliwala sa mga Nephita, nga niana sila gisakit nga sila nangamatay sa tinaglibo didto sa mas daotang mga bahin sa yuta.

7 Ug nahitabo nga ang katawhan nakakita nga sila hapit na mangamatay tungod sa kagutom, ug misugod sila sa paghinumdom sa Ginoo nga ilang Dios; ug misugod sila sa paghinumdom sa mga pulong ni Nephi.

8 Ug ang katawhan misugod sa pagpakiluoy ngadto sa ilang labawng mga maghuhukom ug sa ilang mga pangulo, nga sila moingon ni Nephi: Tan-awa, nasayod kami nga ikaw tawo sa Dios, ug busa ipangamuyo sa Ginoo nga atong Dios nga iyang ipalayo kanamo kining kagutom, basin og ang tanang pulong nga imong gipamulong mahitungod sa among kalaglagan matuman.

9 Ug nahitabo nga ang mga maghuhukom misulti ni Nephi, sumala sa mga pulong nga gitinguha. Ug nahitabo nga dihang si Nephi nakakita nga ang katawhan naghinulsol ug nagpaubos sa ilang mga kaugalingon nga nagsul-ob og panapton nga sako, nangamuyo siya pag-usab sa Ginoo, nga nag-ingon:

10 O Ginoo, tan-awa naghinulsol na kini nga katawhan; ug gipamatay nila ang pundok ni Gadianton taliwala kanila nga niana nangahanaw sila, ug gitagoan nila ang ilang tinagong mga plano ilawom sa yuta.

11 Karon, O Ginoo, tungod niining ilang pagpaubos mahimo bang wagtangon nimo ang imong kasuko, ug ang imong kasuko adto nimo tagbawon sa kalaglagan niadtong mga tawong daotan nga imo nang nalaglag.

12 O Ginoo, mahimo ba nga wagtangon nimo ang imong kasuko, oo, ang imong mapintas nga kasuko, ug mosugo nga kining kagutom mohunong dinhi niini nga yuta.

13 O Ginoo, mahimo ba nga patalinghogan mo ako, ug mosugo nga kini mahimo sumala sa akong mga pulong, ug mopadala og ulan sa ibabaw sa yuta, nga kini makapamunga sa bunga niini, ug sa lugas niini sa panahon sa tinglugas.

14 O Ginoo, gipatalinghogan mo ako sa akong mga pulong dihang ako miingon, himoa nga adunay kagutom, nga ang kamatay pinaagi sa espada mohunong; ug sayod ako nga ikaw, bisan niini nga higayon, mopatalinghog sa akong mga pulong, kay ikaw miingon nga: Kon kini nga katawhan maghinulsol ako moluwas kanila.

15 Oo, O Ginoo, ug nakita nimo nga sila naghinulsol, tungod sa kagutom ug sa kamatay ug kalaglagan nga midangat kanila.

16 Ug karon, O Ginoo, mahimo ba nga wagtangon nimo ang imong kasuko, ug sulayan na usab kon sila moalagad ba kanimo? Ug kon mao, O Ginoo, ikaw makapanalangin kanila sumala sa imong mga pulong nga imong gisulti.

17 Ug nahitabo nga sa kapitoan ug unom nga tuig ang Ginoo miwagtang sa iyang kasuko sa katawhan, ug misugo nga ang ulan mobundak sa yuta, nga niana kini nakapamunga sa bunga niini sa panahon sa tingpamunga niini. Ug nahitabo nga mipabunga kini sa lugas niini sa panahon sa tinglugas niini.

18 Ug tan-awa, ang katawhan nagmaya ug naghimaya sa Dios, ug ang tibuok yuta napuno sa pagmaya; ug wala na sila magtinguha sa paglaglag kang Nephi, apan sila mitamod kaniya isip bantogan nga propeta, ug tawo sa Dios, nga adunay dakong gahom ug katungod nga gihatag kaniya gikan sa Dios.

19 Ug tan-awa, si Lehi, ang iyang igsoong lalaki, dili layo kaniya sa mga butang nga may kalabotan sa pagkamatarong.

20 Ug sa ingon niana nahitabo nga ang katawhan ni Nephi misugod na usab sa pag-uswag sa yuta, ug misugod sa pagtukod sa ilang biniyaang mga dapit, ug misugod sa pagdaghan ug pagkatap, gani hangtod nga nalukop nila ang tibuok yuta, sa amihanang bahin ug habagatang bahin, gikan sa dagat sa kasadpan ngadto sa silangang dagat.

21 Ug nahitabo nga ang kapitoan ug unom nga tuig natapos sa kalinaw. Ug ang kapitoan ug pito nga tuig nagsugod sa kalinaw; ug ang simbahan mikatap ibabaw sa tibuok yuta; ug ang mas daghan nga bahin sa katawhan sa mga Nephita ug mga Lamanita, nahisakop sa simbahan; ug sila nakabaton og hilabihan ka dako nga kalinaw diha sa yuta; ug sa ingon niana natapos ang kapitoan ug pito nga tuig.

22 Ug usab sila adunay kalinaw sa kapitoan ug walo nga tuig, gawas sa pipila ka panagbingkil mahitungod sa mga punto sa doktrina nga gihan-ay sa mga propeta.

23 Ug sa kapitoan ug siyam nga tuig misugod ang daghang panagbangi. Apan nahitabo nga si Nephi ug si Lehi, ug daghan sa ilang kaigsoonan kinsa nasayod mahitungod sa tinuod nga mga punto sa doktrina, tungod kay nakabaton og daghan nga pagpadayag matag adlaw, busa misangyaw sila sa katawhan, nga niana gitapos nila ang ilang mga panagbangi nianang mao nga tuig.

24 Ug nahitabo nga sa kawaloan nga tuig sa pagmando sa mga maghuhukom sa katawhan ni Nephi, dihay nailhan nga pundok sa mga masinupakon gikan sa katawhan ni Nephi, kinsa sa pipila ka tuig nga milabay miadto sa mga Lamanita, ug midala sa ilang mga kaugalingon sa ngalan sa mga Lamanita, ug usab adunay pipila kinsa tinuod nga mga kaliwat sa mga Lamanita, nga ilang gisulsolan aron masuko, o niadtong mga masinupakon, busa nagsugod sila og usa ka gubat batok sa ilang kaigsoonan.

25 Ug gihimo nila ang pagpatay ug pagpanglungkab; ug dayon mosibog sila balik sa kabukiran, ug ngadto sa mga kamingawan ug sa tagoanang mga dapit, gitago ang ilang mga kaugalingon aron dili sila madiskobrehan, nakadawat sa matag adlaw og dugang sa ilang gidaghanon, kutob sa masupilon nga miadto kanila.

26 Ug sa ingon niana sa paglakat sa panahon, oo, gani sulod sa dili daghang katuigan, nahimo silang hilabihan ka daghan nga pundok sa mga tulisan; ug gipangita nila ang tanan nga tinagong mga plano ni Gadianton; ug sa ingon niana nahimo silang mga tulisan ni Gadianton.

27 Karon tan-awa, kini nga mga tulisan mihimo og dakong kadaot, oo, gani dakong kalaglagan sa katawhan ni Nephi, ug usab sa katawhan sa mga Lamanita.

28 Ug nahitabo nga kinahanglang ihunong kini nga buhat sa kalaglagan; busa mipadala sila og kasundalohan nga mga tawo nga kusgan ngadto sa kamingawan ug ngadto sa kabukiran sa pagpangita niining mga pundok sa mga tulisan, ug sa pagpukan kanila.

29 Apan tan-awa, nahitabo nga sa mao gihapon nga tuig gipapahawa sila balik sa ilang kaugalingong mga yuta. Ug sa ingon niana natapos ang kawaloan nga tuig sa pagmando sa mga maghuhukom sa katawhan ni Nephi.

30 Ug nahitabo nga sa pagsugod sa kawaloan ug unang tuig misulong na usab sila batok niini nga pundok sa mga tulisan, ug milaglag og daghan; ug sila usab nag-antos og daghan nga kalaglagan.

31 Ug napugos na usab sila sa pagbalik gikan sa kamingawan ug gikan sa kabukiran ngadto sa ilang kaugalingong mga yuta, tungod sa hilabihan ka daghan nga mga tulisan nga midagsang sa kabukiran ug sa kamingawan.

32 Ug nahitabo nga sa ingon niana natapos kini nga tuig. Ug ang mga tulisan nagpadayon sa pagdaghan ug nag-anam ka lig-on, nga niana sila nakigbatok sa tibuok nga kasundalohan sa mga Nephita, ug usab sa mga Lamanita; ug nakamugna sila og dako nga kahadlok ngadto sa katawhan nga anaa sa ibabaw sa tibuok yuta.

33 Oo, kay giduaw nila ang daghan nga bahin sa yuta, ug mihimo og dakong kalaglagan ngadto kanila; oo, mipatay og daghan, ug midala sa uban nga bihag ngadto sa kamingawan, oo, ug ilabi na gayod sa ilang mga babaye ug sa ilang mga bata.

34 Karon kining dako nga kadaotan, nga miabot sa katawhan tungod sa ilang pagkadaotan, nakaaghat na usab kanila sa paghinumdom sa Ginoo nga ilang Dios.

35 Ug sa ingon niana natapos ang kawaloan ug usa nga tuig sa pagmando sa mga maghuhukom.

36 Ug sa kawaloan ug duha nga tuig nagsugod na usab sila sa pagkalimot sa Ginoo nga ilang Dios. Ug sa kawaloan ug tulo nga tuig nagsugod nga misamot ang ilang pagkadaotan. Ug sa kawaloan ug upat nga tuig wala sila mag-usab sa ilang mga paagi.

37 Ug nahitabo nga sa kawaloan ug lima nga tuig mas misamot kadako ang ilang garbo, ug ang ilang pagkadaotan; ug sa ingon niana sila nagkahinog na usab alang sa kalaglagan.

38 Ug sa ingon niana natapos ang kawaloan ug lima nga tuig.