1 Ug karon nahitabo nga si Samuel, nga Lamanita, mitagna sa hilabihan ka daghan pang mga butang nga dili na masulat.

2 Ug tan-awa, miingon siya kanila: Tan-awa, ako mohatag kaninyo og timailhan; kay lima pa ka tuig ang moabot, ug tan-awa, unya moabot ang Anak sa Dios aron sa pagtubos sa tanan niadtong motuo sa iyang ngalan.

3 Ug tan-awa, hatagan ko kamo niini nga timailhan sa iyang pag-anhi; kay tan-awa, adunay hilabihan nga mga kahayag sa langit, nga niana nga gabii sa dili pa siya moabot walay kangitngit, nga niana makita sa tawo nga sama og kini adlaw pa.

4 Busa, adunay usa ka adlaw ug usa ka gabii ug usa ka adlaw, nga sama lamang sa usa ka adlaw ug walay gabii; ug mao kini ang usa ka timailhan kaninyo; kay kamo nasayod sa pagsubang sa adlaw ug usab sa pagsalop niini; busa sila gayod masayod nga adunay duha ka adlaw ug usa ka gabii; apan ang gabii dili mongitngit; ug mao kini ang gabii sa dili pa siya matawo.

5 Ug tan-awa, adunay bag-ong bitoon nga mosubang, nga wala pa ninyo makita sukad; ug kini usab ang usa ka timailhan kaninyo.

6 Ug tan-awa, dili kini mao ang tanan, adunay daghan pang timailhan ug mga katingalahan sa langit.

7 Ug mahitabo nga kamong tanan mahibulong, ug matingala, nga niana kamo mangatumba sa yuta.

8 Ug mahitabo nga bisan kinsa nga motuo sa Anak sa Dios, siya makabaton sa walay kataposang kinabuhi.

9 Ug tan-awa, sa ingon niana ang Ginoo misugo kanako, pinaagi sa iyang anghel, nga ako moanhi ug mosulti niini nga butang nganha kaninyo; oo, siya misugo nga ako managna niining mga butanga nganha kaninyo; oo, miingon siya kanako: Isangyaw niini nga katawhan, maghinulsol ug iandam ang agianan sa Ginoo.

10 Ug karon, tungod kay ako usa ka Lamanita, ug nakapamulong kaninyo sa mga pulong nga gisugo sa Ginoo kanako, ug tungod kay kini sakit alang kaninyo, kamo nasuko kanako ug nagtinguha sa pagpatay kanako, ug misalikway kanako taliwala kaninyo.

11 Ug makadungog kamo sa akong mga pulong, kay, mao kini ang katuyoan sa akong pag-anhi sa mga paril niini nga siyudad, aron unta kamo makadungog ug masayod sa mga paghukom sa Dios nga nagpaabot kaninyo tungod sa inyong mga kadaotan, ug usab nga unta kamo masayod sa mga kinahanglanon sa paghinulsol;

12 Ug usab, nga unta kamo masayod sa pag-anhi ni Jesukristo, ang Anak sa Dios, ang Amahan sa langit ug yuta, ang Tiglalang sa tanan nga butang gikan sa sinugdanan; ug nga kamo masayod sa mga timailhan sa iyang pag-anhi, sa tuyo nga kamo motuo sa iyang ngalan.

13 Kay kon motuo kamo sa iyang ngalan kamo maghinulsol sa tanan ninyong mga sala, nga kamo makabaton og kapasayloan niini pinaagi sa iyang maayo nga mga buhat.

14 Ug tan-awa, usab, adunay laing timailhan nga akong ihatag kaninyo, oo, usa ka timailhan sa iyang kamatayon.

15 Kay tan-awa, siya sa pagkatinuod mamatay aron ang kaluwasan moabot; oo, kini angay kaniya ug kinahanglan gayod nga siya mamatay, aron mahitabo ang pagkabanhaw sa mga patay, nga niana ang mga tawo mahimong dad-on sa atubangan sa Ginoo.

16 Oo, tan-awa, kini nga kamatayon mopahitabo sa pagkabanhaw, ug magtubos sa tanang katawhan gikan sa unang kamatayon—kana nga espirituhanong kamatayon; alang sa tanan nga katawhan, tungod sa pagkapukan ni Adan nga gipahimulag gikan sa atubangan sa Ginoo, giila nga patay, mahitungod sa mga butang nga temporal ug sa mga butang nga espirituhanon.

17 Apan tan-awa, ang pagkabanhaw ni Kristo motubos sa katawhan, oo, gani sa tanang katawhan, ug modala kanila balik sa atubangan sa Ginoo.

18 Oo, ug kini mopahitabo sa mga kasabotan sa paghinulsol, nga si kinsa kadtong maghinulsol dili siya isalikway ug itambog sa kalayo; apan si kinsa kadtong dili maghinulsol siya isalikway ug itambog sa kalayo; ug adunay moabot usab kanila nga usa ka espirituhanong kamatayon, oo, ang ikaduhang kamatayon, kay gisalikway sila og usab mahitungod sa mga butang nga may kalabotan sa pagkamatarong.

19 Busa paghinulsol kamo, paghinulsol kamo, basin pa unya pinaagi sa pagkasayod niining mga butanga ug dili pagbuhat niini kamo mag-antos sa inyong mga kaugalingon ubos sa panghimaraot, ug kamo dad-on ngadto niining ikaduha nga kamatayon.

20 Apan tan-awa, sama sa akong gisulti kaninyo bahin sa laing timailhan, usa ka timailhan sa iyang kamatayon, tan-awa, nianang adlawa nga mahiagoman niya ang kamatayon, ang adlaw pangitngiton ug dili mohatag sa iyang kahayag nganha kaninyo; ug mao usab ang bulan ug mga bitoon; ug walay kahayag sa ibabaw niini nga yuta, gani gikan sa takna sa iyang pagkamatay, sulod sa tulo ka adlaw, sa takna nga siya mabanhaw og usab gikan sa mga patay.

21 Oo, sa takna nga siya motugyan sa espiritu adunay mga pagpangdugdog ug pagpangilat sulod sa pipila ka takna, ug ang yuta mauyog ug mangurog; ug ang dagkong mga bato nga anaa sa ibabaw niini nga yuta, nga anaa sa ibabaw ug sa ilawom sa yuta, nga nasayran ninyo nga karon tibuok, o ang dakong bahin niini gahi ug solido, kini pagabuak-buakon;

22 Oo, pagabuakon kini, ug human niana makit-an nga mga hup-ak ug mga liki, ug mga tipak nga piraso sa ibabaw sa tibuok yuta, oo, maibabaw man ug mailawom sa yuta.

23 Ug tan-awa, adunay kusog nga mga bagyo, ug daghan nga bukid ang matumpag, mahisama sa usa ka walog, ug adunay daghang mga dapit nga karon gitawag og mga walog nga mahimo nga mga bukid, kansang kataas hilabihan.

24 Ug daghan nga dagkong mga dalan mangaguba, ug daghang siyudad ang mahimo nga biniyaan.

25 Ug daghang lubnganan ang pagaablihan, ug magpaguwa sa ilang mga patay; ug daghan nga santos ang mopakita sa kadaghanan.

26 Ug tan-awa, ingon niana ang gisulti sa anghel kanako; kay misulti siya kanako nga kinahanglan adunay pagpangdugdog ug pagpangilat sulod sa daghang takna.

27 Ug miingon siya kanako nga samtang ang dugdog ug ang kilat magpadayon, ug ang bagyo, kini nga mga butang mahitabo gayod, ug ang kangitngit motabon sa ibabaw sa tibuok yuta sulod sa tulo ka adlaw.

28 Ug ang anghel miingon kanako nga daghan ang makakita sa dagkong mga butang nga labaw pa niini, sa tuyo nga sila makatuo nga kini nga mga timailhan ug kini nga mga kahibulongan mahitabo gayod ibabaw sa tibuok niini nga yuta, sa katuyoan nga walay mahimong hinungdan sa pagkawalay pagtuo taliwala sa katawhan—

29 Ug kini alang sa katuyoan nga si bisan kinsa nga motuo maluwas, ug nga si bisan kinsa nga dili motuo, ang usa ka matarong nga paghukom ikapahamtang kanila; ug usab kon sila mahukman sila modala diha sa ilang mga kaugalingon sa kaugalingon nila nga panghimaraot.

30 Ug karon hinumdomi, hinumdomi, akong kaigsoonan, nga bisan kinsa ang mamatay, mamatay sa iyang kaugalingon; ug bisan kinsa nga mohimo og daotan, magbuhat niini sa iyang kaugalingon; kay tan-awa, kamo gawasnon; gitugotan kamo sa paglihok alang sa inyong kaugalingon; kay tan-awa, ang Dios naghatag kaninyo og kahibalo ug siya naghimo kaninyo nga gawasnon.

31 Siya mihatag kaninyo aron masayod kamo sa maayo gikan sa daotan, ug siya mihatag kaninyo aron kamo mopili sa kinabuhi o kamatayon; ug kamo makabuhat sa maayo ug ibalik kana nga maayo, o aron kana nga maayo ibalik nganha kaninyo; o mahimo kamong mobuhat og daotan, ug ang daotan ibalik diha kaninyo.