1 Ngan yana, mga hinigugma nga kabugtoan, pamati, ginpapasamwak ko ha iyo nga labot la kun kamo in magbasul an iyo mga panimalay in iyo pamamayaan ngan waray na mangungukoy.

2 Oo, ngan labot kun kamo in magbasul, an iyo mga kababayen-an in magkakaada hin dako nga hinungdan nga magmasamdong ha panahon nga hira in magpapasuso; kay proproybahan niyo pumalagiw ngan waray kamo lugar nga matataguan; oo, ngan kairo nira nga mayada mga anak, kay hira in magigin mabug-at ngan dire makakapalagiw; sanglit, hira in mababayaan agud mamatay.

3 Oo, ngan kairo hine nga mga tawo nga gintatawag nga tawo ni Nephi labot la kun hira in magbasul, kun san-o nira mahikikit-an ine nga mga tigaman ngan mga urusahon nga igpapakita ngadto ha ira; kay kamatuoran, hira in mga pinili nga mga tawo han Ginoo; oo, ngan an mga tawo han Nephi in iya pinaura, ngan iya liwat ginsirotan hira; oo, ngan ha mga panahon han ira karat-an hira in ginsirotan tungod kay pinalangga niya hira.

4 Kundi tinuod mga kabugtoan ko, an mga Lamanite an iya nauuritan tungod nga an ira mga buhat in padayon nga magraot, ngan ine in mahitungod han karaotan han pamatasan han ira kaapoy-apoyan. Kundi tinuod, an katalwasan in maabot ha ira pinaagi han pagpasamwak han mga Nephite; ngan ha sugad hine nga panuyo ginpahalaba han Ginoo an ira mga henerasyon.

5 Ngan karuyag ko nga kaangayan niyo ine nga masabotan nga an dako nga bahin ha ira in aada ha dalan han ira mga katungdanan, ngan hira in hirot nga naglalakat ha atubangan han Diyos, ngan ira ginhihimo nga sundon an iya mga kasugoanan ngan an iya mga balaod ngan an iya mga hukom subay han balaod ni Moises.

6 Oo, ngan nasiring ako ngadto ha iyo, nga kadam-an ha ira an nagbubuhat hine, nga hira in nagtatalingoha hin waray pagkaguol nga pagkamaduroto nga madara an nahisalin ha ira mga kabugtoan ha paghibaro han kamatuoran; sanglit damo an numero han mga tawo nga nahidudugang ha ira adlaw-adlaw.

7 Ngan kamatuoran, maaram kamo ha iyo mga kalugaringon, kay nahikit-an niyo ine, nga mga kadam-an ha ira nga nadara ha pagpahibaro han kamatuoran, ngan nahibaroan an maraot ngan mangil-ad nga pamatasan han ira kaapoy-apoyan, nga madara ha pagtuo han mga baraan nga kasuratan, ngan liwat, an mga panagna han baraan nga mga propeta, nga iginsurat, nga magdadara ha ira ha pagtuo han Ginoo, ngan ha pagbasul, nga diin an pagtuo ngan pagbasul in magdadara ha ira han pag bag-o han abilidad ngadto ha ira —

8 Sanglit, kun ano an kadamo an umabot han sugad hine, nahibabaroan niyo nga an iyo mga kalugaringon in madig-on ngan hugot ha pagtuo, ngan ha nahuna-huna nga diin hira mahimo matalwas.

9 Ngan maaram liwat kamo nga ginlubong nira an ira mga armas han pakig-away, ngan nahadlok hira nga kaptan adto nga bangin ha bisan ano nga paagi hira in makasala na liwat; oo, ngan nakikita niyo nga hira in nahadlok nga makasala — kay tinuod pababay-an nira an ira mga kalugaringon nga mahitamakan ngan mapatay han ira mga kaaway, ngan dire aalsahon an ira mga espada kontra ha ira, ngan ine in tungod han ira pagtuo kan Cristo.

10 Ngan yana, tungod han ira waray pagruha-duha hira in tinmuod hadton nahuna-huna nga ira gintooran, kay tungod kay hira in madig-on hadto hira in malalamragan, kaluoy, an Ginoo in nagbendisyon ha ira ngan ginpahalabaan an ira mga henerasyon, bisan pa man han ira mga sala —

11 Oo, ngan bisan kun hira in nagtikainos ngadto ha kawaray pagtuo an Ginoo in ginpahalaba an ira mga henerasyon, ngada han takna nga umabot nga iginyakan han aton kaapoy-apoyan, ngan liwat han propeta nga hi Zenos, ngan damo pa nga iba nga mga propeta, hiunong han panhibalik han aton mga kabugtoan, an mga Lamanite, liwat ha paghibaro han kamatuoran —

12 Oo, ngan nasiring ako ngadto ha iyo, nga ha urhi nga mga adlaw an mga saad han Ginoo in iginpadangat ha aton mga kabugtoan, an mga Lamanite; ngan ha luyo han damo nga kakurian nga aagian nira, nga bisan pa kun hirain palalayason pakadto o pakanhi ha bawbaw han tuna, ngan pagbubukoron, ngan kakastigohon ngan pagsasarangon ha harayo, nga waray lugar nga mapagtataguan, an Ginoo in magin maloloy-on ngadto ha ira.

13 Ngan ine in subay han panagna, nga hira liwat in madadara ngahaw han tinuod nga gin-adman, kun ano an kinaadman han ira Manurubos, an ira darayawon ngan tinuod nga magbarantay, ngan nahiuupod hadton iya mga karnero.

14 Sanglit nasiring ako ngadto ha iyo, adto in magigin maupay para ha ira kontra ha iyo labot la kun kamo in magbasul.

15 Kay kamatuoran, kun an mga makagagahum nga mga buhat nga iginpakita ha iyo in iginpakita ha ira, ngan liwat, ngadto ha ira nga nawawarayan hin pagtuo tungod han mga pamatasan han ira kaapoy-apoyan, makikita mo ha imo kalugaringon nga dire na hira mawawarayan hin pagtuo.

16 Sanglit, nasiring an Ginoo: Dire ko hira popouhon hin hingpit, kundi akon hihimoon nga ha pinakamaupay ko nga panahon hira in maibabalik liwat ha akon, siring han Ginoo.

17 Ngan yana ungod, nasiring an Ginoo, hiunong han tawo han mga Nephite: Kun dire hira magbabasul, ngan tutumanon an akon kaburut-on, popouhon ko hira hin hingpit siring han Ginoo, tungod han kawarayi nira hin pagtuo ha luyo han damo nga makagarahum nga mga buhat nga ginhimo ko ha kadaman ha ira; ngan sigurado nga samtang nga buhi an Ginoo ine nga mga hitabo in masusugad, siring han Ginoo.