1 Ug karon, nahitabo nga dihay daghan nga nakadungog sa mga pulong ni Samuel nga Lamanita, nga iyang gipamulong didto sa mga paril sa siyudad. Ug kutob sa mituo sa iyang pulong miadto ug nangita kang Nephi; sa dihang nangabot sila ug nakakita kaniya sila mikompisal kaniya sa ilang mga sala ug wala sila molimod, nagtinguha nga mabunyagan sila ngadto sa Ginoo.

2 Apan kutob sa wala motuo sa mga pulong ni Samuel nasuko kaniya; ug sila mibato kaniya didto sa paril, ug daghan usab ang mipanâ kaniya samtang nagbarog siya sa paril; apan ang Espiritu sa Ginoo nag-uban kaniya, nga niana dili sila makaigo kaniya pinaagi sa ilang mga bato ni pinaagi sa ilang mga panâ.

3 Karon sa dihang nakita nila nga sila dili makaigo kaniya, adunay daghan pa nga mituo sa iyang mga pulong, ug tungod niana miadto sila ni Nephi aron magpabunyag.

4 Kay tan-awa, si Nephi nagbunyag, ug nanagna, ug nagsangyaw, nag-awhag og paghinulsol ngadto sa katawhan, nagpakita sa mga timailhan ug mga katingalahan, nagbuhat sa mga milagro taliwala sa katawhan, aron masayod sila nga si Kristo sa dili madugay moabot gayod—

5 Nagsulti kanila sa mga butang nga sa dili madugay moabot gayod, aron masayod sila ug mahinumdom sa takna sa pag-abot niini nga kini gipahibalo na ngadto kanila, sa tuyo nga sila motuo; busa kutob sa mituo sa mga pulong ni Samuel miadto kaniya aron magpabunyag, kay miabot sila nga naghinulsol ug mikompisal sa ilang mga sala.

6 Apan ang mas daghan nga bahin kanila wala motuo sa mga pulong ni Samuel; busa dihang nakita nila nga siya dili maigo sa ilang mga bato ug mga panâ, misinggit sila ngadto sa ilang mga kapitan, nga nag-ingon: Dakpa kining tawhana ug gaposa siya, kay tan-awa siya adunay yawa; ug tungod sa gahom sa yawa nga anaa kaniya kami dili makaigo kaniya pinaagi sa among mga bato ug sa among mga panâ; mao nga dakpa ug gaposa siya, ug ipalayo siya.

7 Ug sa diha nga milihok sila aron pagdakop kaniya, tan-awa, milukso siya gikan sa paril, ug milayas siya palayo sa ilang mga dapit, oo, ngadto sa iyang nasod, ug misugod sa pagsangyaw ug pagpanagna taliwala sa iyang kaugalingon nga katawhan.

8 Ug tan-awa, wala na siya igdungog pa taliwala sa mga Nephita; ug ingon niana ang kahimtang sa katawhan.

9 Ug sa ingon niana natapos ang kawaloan ug unom nga tuig sa pagmando sa mga maghuhukom sa katawhan ni Nephi.

10 Ug sa ingon niana natapos usab ang kawaloan ug pito nga tuig sa pagmando sa mga maghuhukom, ang mas daghan nga bahin sa katawhan nagpabilin sa ilang garbo ug kadaotan, ug ang mas gamay nga bahin naglakaw nga mas mabinantayon sa atubangan sa Dios.

11 Ug mao usab kini ang mga kahimtang, sa kawaloan ug walo nga tuig sa pagmando sa mga maghuhukom.

12 Ug dihay gamay lamang kaayo nga kausaban sa mga kalihokan sa katawhan, gawas nga ang katawhan misugod sa pagkatig-a diha sa pagkadaotan, ug mihimo og mas labaw ug dugang pa niana nga supak sa mga sugo sa Dios, sa kawaloan ug siyam nga tuig sa pagmando sa mga maghuhukom.

13 Apan nahitabo nga sa kasiyaman nga tuig sa pagmando sa mga maghuhukom, dihay mahinungdanon nga mga timailhan nga gihatag ngadto sa katawhan, ug mga kahibulongan; ug ang mga pulong sa mga propeta nagsugod na sa pagkatuman.

14 Ug ang mga anghel nagpakita sa mga tawo, maalamon nga mga tawo, ug nagpadayag kanila og malipayong mga balita sa dako nga kamaya; sa ingon niana niini nga tuig ang mga kasulatan nagsugod na sa pagkatuman.

15 Bisan pa niana, ang katawhan misugod sa pagpatig-a sa ilang mga kasingkasing, ang tanan gawas niadto nga labing matinuohon nga bahin kanila, lakip sa mga Nephita ug usab sa mga Lamanita, ug misugod sa pagsalig sa ilang kaugalingon nga kusog ug sa ilang kaugalingon nga kaalam, nga nag-ingon:

16 Ang pipila ka butang tingali ilang matag-anan sa husto, taliwala sa daghan kaayo; apan tan-awa, kami nasayod nga ang tanan niining mahinungdanon ug kahibulongan nga mga buhat dili mahitabo, nga gikapamulong na.

17 Ug misugod sila sa pagpangatarongan ug pagpanaglalis taliwala sa ilang mga kaugalingon, nga nag-ingon:

18 Nga dili makataronganon nga ang usa ka nilalang sama sa giingon nga Kristo moanhi; kay kon mao kana, ug kon siya ang Anak sa Dios, ang Amahan sa langit ug sa yuta, sumala sa gipamulong, ngano nga dili man siya mopakita sa iyang kaugalingon ngari kanato ingon man kanila nga anaa sa Jerusalem?

19 Oo, ngano nga dili siya mopakita sa iyang kaugalingon dinhi niini nga yuta ingon man ngadto sa yuta sa Jerusalem?

20 Apan tan-awa, nasayod kita nga usa kini ka daotan nga tradisyon, nga atong napanunod gikan sa atong mga amahan, aron motuo kita sa uban nga mahinungdanon ug katingalahang mga butang nga mahitabo, apan dili ngari kanato, apan didto sa yuta nga layo, usa ka yuta nga wala nato masayri; busa sila makapabilin kanato diha sa kawalay alamag, kay dili kita makasaksi sa atong kaugalingong mga mata nga kini tinuod.

21 Ug sila, pinaagi sa malipoton ug sa misteryosong mga paagi sa daotan nga tawo, maghimo og pipila ka dagko nga misteryo nga dili nato masabtan, nga makapabilin kanato sa ubos aron mahimo nga mga sulugoon sa ilang mga pulong, ug usab ilang mga sulugoon, kay kita nagsalig lamang kanila nga motudlo kanato sa pulong; ug sa ingon niana pasagdan kita nila nga walay alamag kon kita motugyan sa atong mga kaugalingon ngadto kanila, sa tanang mga adlaw sa atong kinabuhi.

22 Ug daghan pa nga butang ang gihunahuna sa katawhan sa ilang mga kasingkasing, nga binuang ug walay kapuslanan; ug sila nasamok kaayo, kay si Satanas nag-aghat kanila sa pagbuhat og daotan sa kanunay; oo, nagpakatap siya og mga hungihong ug mga panagbingkil sa ibabaw sa tibuok yuta, aron iyang mapatig-a ang mga kasingkasing sa katawhan batok niadto nga maayo ug batok niana nga moabot.

23 Ug bisan pa sa mga timailhan ug mga kahibulongan nga gihimo taliwala sa katawhan sa Ginoo, ug sa daghan nga milagro nga ilang gibuhat, si Satanas adunay dakong gahom sa mga kasingkasing sa katawhan sa ibabaw sa tibuok yuta.

24 Ug sa ingon niana natapos ang kasiyaman nga tuig sa pagmando sa mga maghuhukom sa katawhan ni Nephi.

25 Ug sa ingon niana natapos ang basahon ni Helaman, sumala sa talaan ni Helaman ug sa iyang mga anak nga lalaki.