Ang Basahon ni Helaman

1 Ug karon tan-awa, nahitabo nga sa pagsugod sa ikakap-atan nga tuig sa pagmando sa mga maghuhukom sa katawhan ni Nephi, dihay nagsugod nga usa ka makuyaw nga kalisdanan taliwala sa katawhan sa mga Nephita.

2 Kay tan-awa, si Pahoran namatay, ug gilubong na sa yuta; busa dihay nagsugod nga usa ka grabe nga panagbingkil tali sa mga igsoong lalaki, nga mga anak ni Pahoran mahitungod kon kinsa ang moangkon sa hukmanan.

3 Karon mao kini ang ilang mga ngalan kinsa nanagbingkil alang sa hukmanan, kinsa mao usab ang hinungdan sa panagbingkil sa katawhan: si Pahoran, si Paanchi, ug si Pacumeni.

4 Karon kini sila dili lamang mao ang tanan nga anak nga lalaki ni Pahoran (kay siya adunay daghan), apan kini sila mao ang nanagbingkil sa hukmanan; busa, sila ang hinungdan nganong dunay tulo ka pundok taliwala sa katawhan.

5 Bisan pa niana, nahitabo nga si Pahoran ang natudlo pinaagi sa tingog sa katawhan nga mahimo nga labaw nga maghuhukom ug usa ka gobernador sa katawhan ni Nephi.

6 Ug nahitabo nga si Pacumeni, sa dihang iyang nakita nga dili niya maangkon ang hukmanan, nakighiusa siya sa tingog sa katawhan.

7 Apan tan-awa, si Paanchi, ug kadto nga bahin sa katawhan nga nagmatinguhaon nga siya ang mahimo nilang gobernador, nasuko sa hilabihan; busa, ulog-ulogan na unta niya ang katawhan aron moalsa sa pagbatok sa ilang kaigsoonan.

8 Ug nahitabo nga samtang himoon na unta niya kini, tan-awa, gidakop siya, ug gihusay sumala sa tingog sa katawhan, ug gisilotan og kamatayon; kay siya mialsa sa pagbatok ug nagtinguha sa pagguba sa kalingkawasan sa katawhan.

9 Karon sa dihang kadtong katawhan kinsa nagmatinguhaon nga siya gayod ang mahimo nga ilang gobernador nakakita nga gihukman siya og kamatayon, busa nasuko sila, ug tan-awa, mipadala sila og usa nga si Kishkumen, gani ngadto sa hukmanan ni Pahoran, ug gipatay si Pahoran samtang naglingkod siya sa hukmanan.

10 Ug gigukod siya sa mga sulugoon ni Pahoran; apan tan-awa, kusog kaayo ang pagdagan ni Kishkumen nga walay tawo nga nakaapas kaniya.

11 Ug iyang giadto sila nga nagpadala kaniya, ug silang tanan misulod sa usa ka pakigsaad, oo, nanumpa sa ilang walay kataposang Magbubuhat, nga sila dili mosulti ni bisan kinsa nga tawo nga si Kishkumen ang nagpatay ni Pahoran.

12 Busa, si Kishkumen wala mailhi taliwala sa katawhan ni Nephi, kay nagtakoban siya niana nga higayon sa iyang pagpatay ni Pahoran. Ug si Kishkumen ug ang iyang pundok, kinsa misulod sa pakigsaad uban kaniya, miipon sa ilang kaugalingon uban sa katawhan, sa paagi nga silang tanan dili masakpan; apan kutob sa nasakpan gihukman og kamatayon.

13 Ug karon tan-awa, si Pacumeni mao ang natudlo, sumala sa tingog sa katawhan, aron mahimong labaw nga maghuhukom ug gobernador sa katawhan, nga magmando puli sa iyang igsoong lalaki nga si Pahoran; ug kini sumala sa iyang katungod. Ug kining tanan nahitabo sa ikakap-atan nga tuig sa pagmando sa mga maghuhukom; ug kini adunay kataposan.

14 Ug nahitabo sa ikakap-atan ug usa nga tuig sa pagmando sa mga maghuhukom, nga ang mga Lamanita nagtigom og daghan kaayong mga lalaki nga kasundalohan, ug misangkap kanila og mga espada, ug mga sundang ug mga gapasan, ug mga panâ, ug mga panagang sa ulo, ug mga taming sa lawas ug tanan nga klase sa mga panagang sa matag matang.

15 Ug milugsong sila pag-usab aron sa pagpakig-away batok sa mga Nephita. Ug gipangulohan sila sa usa ka tawo kansang ngalan mao si Coriantumr; ug kaliwat siya ni Zarahemla; ug usa siya ka supakan gikan sa mga Nephita; ug siya dako ug kusgan nga tawo.

16 Busa, ang hari sa mga Lamanita, kansang ngalan mao si Tubaloth, nga anak ni Ammoron, nagtuo nga si Coriantumr, isip kusgan nga tawo, makabarog batok sa mga Nephita, gamit ang iyang ka kusgan ug usab ang iyang hilabihan nga kaalam, nga pinaagi sa pagpadala kaniya maubos na sa iyang gahom ang mga Nephita—

17 Busa siya misulsol kanila aron masuko, ug gipundok niya ang iyang kasundalohan, ug gitudlo niya si Coriantumr nga mahimo nga ilang pangulo, ug misugo nga sila momartsa ngadto sa yuta sa Zarahemla aron makig-away batok sa mga Nephita.

18 Ug nahitabo nga tungod sa daghan kaayong panagbingkil ug daghan kaayong kalisdanan sa gobyerno, nga wala sila magbutang og igong mga magbalantay sa yuta sa Zarahemla; kay nagtuo sila nga ang mga Lamanita dili mangadto sa kinatung-an sa ilang mga yuta sa pagsulong nianang dako nga siyudad nga Zarahemla.

19 Apan nahitabo nga si Coriantumr mimartsa nga nangulo sa iyang hilabihan ka daghan nga panon, ug gisulong ang mga lumulupyo sa siyudad, ug ang ilang pagmartsa hilabihan ka paspas nga wala nay panahon alang sa mga Nephita sa pagpundok sa ilang mga kasundalohan.

20 Busa gipatay ni Coriantumr ang nagbantay sa ganghaan sa siyudad, ug mimartsa uban sa tibuok niya nga kasundalohan sulod sa siyudad, ug gipatay nila ang matag usa nga misupak kanila, nga sa ingon ilang nailog ang tibuok siyudad.

21 Ug nahitabo nga si Pacumeni, kinsa mao ang labaw nga maghuhukom, miikyas palayo kang Coriantumr, gani ngadto sa mga paril sa siyudad. Ug nahitabo nga gitigbas siya ni Coriantumr samtang napaod siya sa paril, hangtod nga siya namatay. Ug sa ingon natapos ang mga adlaw ni Pacumeni.

22 Ug karon sa dihang nakita ni Coriantumr nga nailog na niya ang siyudad sa Zarahemla, ug nakita nga ang mga Nephita miikyas palayo kanila, ug gipatay, ug gidakop, ug gibalhog sa bilanggoan, ug nga iyang naangkon ang labing lig-on nga kuta sa tanan nga dapit sa yuta, ang iyang kasingkasing nadasig nga sulongon na unta niya ang tibuok yuta.

23 Ug karon wala siya magdugay sa yuta sa Zarahemla, apan mimartsa siya uban sa daghan nga kasundalohan, gani paingon sa siyudad sa yuta nga gitawag og Mabungahon; kay kadto ang iyang tumong nga sulongon ug hawanan ang iyang agianan pinaagi sa espada, aron maangkon niya ang amihanang mga bahin sa yuta.

24 Ug, kay nagtuo nga ang ilang kinalig-onan nga kusog anaa sa tunga-tunga sa yuta, busa siya mimartsa, wala mohatag kanila og panahon nga magkatigom sa ilang mga kaugalingon gawas sa gagmay nga mga pundok; ug niini nga paagi sila misulong kanila ug mipatay kanila ngadto sa yuta.

25 Apan tan-awa, kini nga pagmartsa ni Coriantumr agi sa tunga-tunga sa yuta nakahatag ni Moronihah og dako nga bintaha kanila, bisan pa sa kadaghan sa mga Nephita nga napatay.

26 Kay tan-awa, si Moronihah nagdahom nga ang mga Lamanita dili mosulong sa tunga-tunga sa yuta, kondili sulongon nila ang mga siyudad libot sa mga utlanan sama sa ilang gihimo kaniadto; busa si Moronihah misugo nga ang ilang lig-on nga kasundalohan manalipod niadtong mga bahin libot sa mga utlanan.

27 Apan tan-awa, ang mga Lamanita wala mahadlok sumala sa iyang gituohan, apan misulong sila sa tunga-tunga sa yuta, ug miilog sa labing mahinungdanon nga siyudad nga mao ang siyudad sa Zarahemla, ug mimartsa taliwala sa labing mahinungdanon nga mga bahin sa yuta, mipatay sa katawhan sa hilabihan nga pagpamatay, sa mga lalaki, sa mga babaye, ug mga bata, nga miilog sa daghan nga siyudad ug daghan nga kuta.

28 Apan sa dihang si Moronihah nakamatikod niini, dihadiha dayon iyang gipadala si Lehi dala ang kasundalohan sa palibot aron sa pagsanta kanila sa dili pa sila moabot sa yuta sa Mabungahon.

29 Ug mao kadto ang iyang gihimo; ug sila iyang nasanta sa wala pa sila moabot sa yuta sa Mabungahon, ug nakig-away kanila, nga sa ingon misugod sila sa pagsibog balik sa yuta sa Zarahemla.

30 Ug nahitabo nga si Moronihah misanta kanila sa ilang pagsibog, ug nakig-away kanila, nga sa ingon nahimo kining usa ka hilabihan ka dugoon nga panag-away; oo, daghan ang namatay, ug uban sa mga namatay mao si Coriantumr.

31 Ug karon, tan-awa, ang mga Lamanita dili makasibog bisan asa, ni sa amihanan, ni sa habagatan, ni sa silangan, ni sa kasadpan, kay giliyokan sila sa tanan nga dapit sa mga Nephita.

32 Ug sa ingon niana si Coriantumr mipahasmag sa mga Lamanita taliwala sa mga Nephita, hangtod nga sila ubos na sa gahom sa mga Nephita, ug siya mismo napatay, ug ang mga Lamanita mitugyan sa ilang mga kaugalingon ngadto sa mga kamot sa mga Nephita.

33 Ug nahitabo nga si Moronihah miilog sa siyudad sa Zarahemla pag-usab, ug misugo nga ang nabilanggo nga mga Lamanita mobiya sa yuta nga malinawon.

34 Ug sa ingon niana natapos ang ikakap-atan ug usa nga tuig sa pagmando sa mga maghuhukom.