1 Ug nahitabo sa ikakap-atan ug duha nga tuig sa pagmando sa mga maghuhukom, human nga si Moronihah nakapatunhay na usab og kalinaw tali sa mga Nephita ug sa mga Lamanita, tan-awa walay usa nga makapuli sa hukmanan; busa nagsugod na usab ang mga panagbingkil taliwala sa katawhan mahitungod kon kinsa ang mopuli sa hukmanan.

2 Ug nahitabo nga si Helaman, kinsa anak nga lalaki ni Helaman, natudlo nga mopuli sa hukmanan, pinaagi sa tingog sa katawhan.

3 Apan tan-awa, si Kishkumen, kinsa mipatay ni Pahoran, naghulat usab sa paglaglag ni Helaman; ug gisuportahan siya sa iyang pundok, kinsa misulod ngadto sa usa ka pakigsaad nga walay usa nga masayod sa iyang pagkadaotan.

4 Kay dihay usa nga si Gadianton, kinsa hilabihan ka hanas sa daghan nga pulong, ug usab sa iyang pagpangilad, aron ipadayon ang mga tinago nga buhat sa pagpatay ug pagpanulis; busa siya ang nahimong pangulo sa pundok ni Kishkumen.

5 Busa siya miulog-ulog kanila, ug kang Kishkumen usab, nga kon sila mobutang kaniya sa hukmanan iyang itugot nga kadtong nahisakop sa iyang pundok ibutang sa gahom ug katungod taliwala sa katawhan; mao nga si Kishkumen nagtinguha sa paglaglag ni Helaman.

6 Ug nahitabo samtang nagpaingon siya sa hukmanan sa paglaglag ni Helaman, tan-awa usa sa mga sulugoon ni Helaman, kay nakagawas niana nga gabii, ug pinaagi sa pagtakoban, nakahibalo sa mga plano nga gihimo niini nga pundok sa paglaglag ni Helaman—

7 Ug nahitabo nga nasugatan niya si Kishkumen, ug siya misinyas kaniya; busa si Kishkumen mitug-an kaniya sa tumong nga iyang gitinguha, nagtinguha nga siya modala kaniya ngadto sa hukmanan aron iyang mapatay si Helaman.

8 Ug sa diha nga ang sulugoon ni Helaman nahibalo sa tanan nga katuyoan ni Kishkumen, ug sa iyang tumong nga mao ang pagpatay, ug mao usab ang tumong sa tanan niadtong kinsa nahisakop sa iyang pundok nga mao ang pagpatay, ug pagpanulis, ug pag-angkon og gahom, (ug nga mao kini ang ilang tinago nga plano, ug ilang kalihokan) ang sulugoon ni Helaman miingon kang Kishkumen: Tana mangadto kita sa hukmanan.

9 Karon nakapahimuot kini ni Kishkumen sa hilabihan, kay nagtuo siya nga molampos siya sa iyang plano; apan tan-awa, ang sulugoon ni Helaman, samtang nagpaingon sila sa hukmanan, midunggab kang Kishkumen gani ngadto sa iyang kasingkasing, nga siya namatay nga wala makaagulo. Ug midagan siya ug misulti kang Helaman sa tanan nga butang nga iyang nakita, ug nadungog, ug nahimo.

10 Ug nahitabo nga si Helaman misugo aron sa pagdakop niini nga pundok sa mga tulisan ug tinago nga mga mamumuno, nga sila pagasilotan sumala sa balaod.

11 Apan tan-awa, sa dihang si Gadianton nakakita nga si Kishkumen wala na mobalik nahadlok siya basin pa unya og siya pagalaglagon; busa mimando siya nga ang iyang pundok mosunod kaniya. Ug milayas siya gikan sa yuta, agi sa tago nga agianan, ngadto sa kamingawan; ug sa ingon niana dihang si Helaman misugo sa pagsikop kanila dili na sila makit-an.

12 Ug daghan pa bahin niini nga Gadianton ang pagahisgotan sa umaabot. Ug sa ingon niana natapos ang ikakap-atan ug duha nga tuig sa pagmando sa mga maghuhukom sa katawhan ni Nephi.

13 Ug tan-awa, sa kataposan niini nga basahon inyong makita nga kini nga Gadianton mao ang hinungdan sa pagkapukan, oo, hapit sa kinatibuk-ang pagkalaglag sa katawhan ni Nephi.

14 Tan-awa wala ko magpasabot nga sa kataposan sa basahon ni Helaman, apan ang akong gipasabot mao ang kataposan sa basahon ni Nephi, diin didto nako gikuha ang tanan nga asoy nga akong gisulat.