1 Ug nahitabo sa ikakalim-an ug upat nga tuig dihay daghan nga panagsumpaki sa simbahan, ug usab dihay panagbingkil taliwala sa katawhan, nga niana dihay daghang dugo nga miagas.

2 Ug ang masupilon nga bahin gipatay ug giabog gikan sa yuta, ug miadto sila sa hari sa mga Lamanita.

3 Ug nahitabo nga naningkamot sila sa pagsulsol sa mga Lamanita aron makiggubat sa mga Nephita; apan tan-awa, ang mga Lamanita hilabihan ka hadlok, nga sa ingon sila dili na maminaw sa mga pulong niadtong mga masinupakon.

4 Apan nahitabo nga sa ikakalim-an ug unom nga tuig sa pagmando sa mga maghuhukom, dihay mga masinupakon kinsa gikan sa mga Nephita miadto sa mga Lamanita; ug milampos sila sa pagsulsol sa uban aron masuko batok sa mga Nephita; ug silang tanan niana nga tuig nangandam alang sa gubat.

5 Ug sa ikakalim-an ug pito nga tuig gisulong nila ang mga Nephita aron makig-away, ug gisugdan nila ang buhat sa pagpamatay; oo, nga sa ingon niana sa ikakalim-an ug walo nga tuig sa pagmando sa mga maghuhukom milampos sila sa pag-angkon sa kamandoan sa yuta sa Zarahemla; oo, ug usab sa tanang yuta, bisan sa yuta nga duol sa yuta sa Mabungahon.

6 Ug ang mga Nephita ug ang kasundalohan ni Moronihah giabog gani ngadto sa yuta sa Mabungahon;

7 Ug didto nagpalig-on sila batok sa mga Lamanita, gikan sa kasadpang dagat, gani ngadto sa silangan; nga mokabat og usa ka adlaw ang panaw niini alang sa usa ka Nephita, sa utlanan nga ilang napalig-on ug gibutang ang ilang kasundalohan aron mopanalipod sa ilang amihanang nasod.

8 Ug sa ingon niana kadtong mga masinupakon nga mga Nephita, uban sa tabang sa daghan nga kasundalohan nga mga Lamanita, nakaangkon sa tanang ginsakopan nga yuta sa mga Nephita nga anaa sa yuta sa habagatan nga bahin. Ug kining tanan nahitabo sa ikakalim-an ug walo ug siyam nga tuig sa pagmando sa mga maghuhukom.

9 Ug nahitabo nga sa ikakan-oman nga tuig sa pagmando sa mga maghuhukom, si Moronihah milampos uban sa iyang kasundalohan sa pag-angkon sa daghang bahin sa yuta; oo, nabawi nila ang daghan nga siyudad nga nailog sa mga Lamanita.

10 Ug nahitabo sa ikakan-oman ug usa nga tuig sa pagmando sa mga maghuhukom milampos sila sa pagbawi gani sa katunga sa tanan nilang ginsakopan nga mga yuta.

11 Karon kining dako nga kapildihan sa mga Nephita, ug ang hilabihan nga pagpamatay taliwala kanila, wala unta mahitabo kon dili pa tungod sa ilang pagkadaotan ug sa ilang pagkasalawayon nga diha taliwala kanila; oo, ug kini anaa usab taliwala niadtong nangangkon nga sakop sa simbahan sa Dios.

12 Ug kini tungod sa garbo sa ilang mga kasingkasing, tungod sa ilang hilabihan nga kaadunahan, oo, tungod kini sa ilang pagpanglupig sa mga kabos, wala manghatag sa ilang mga pagkaon ngadto sa mga gigutom, wala manghatag sa ilang mga sapot ngadto sa mga hubo, ug misagpa sa ilang mapainubsanong mga kaigsoonan, mibiaybiay niana nga sagrado, milimod sa espiritu sa pagpanagna ug sa pagpadayag, mipatay, nanglungkab, namakak, nangawat, nanapaw, ug nagpasiugda og dako nga mga panagbingkil, ug mibiya palayo ngadto sa yuta sa Nephi, taliwala sa mga Lamanita—

13 Ug tungod niining hilabihan nga pagkadaotan, ug sa ilang mga panghambog sa ilang kaugalingon nga kusog, misalig sila sa ilang kaugalingon nga kusog; busa wala sila mouswag, apan gisakit ug gihampak, ug giabog sa atubangan sa mga Lamanita hangtod nga nawala kanila ang kamandoan sa hapit tanan nila nga yuta.

14 Apan tan-awa, si Moronihah misangyaw og daghan nga butang ngadto sa katawhan tungod sa ilang kadaotan, ug si Nephi ug Lehi usab kinsa mga anak nga lalaki ni Helaman misangyaw og daghan nga butang ngadto sa katawhan, oo, ug nanagna og daghan nga butang ngadto kanila mahitungod sa ilang mga kadaotan, ug kon unsa ang mahitabo kanila kon sila dili maghinulsol sa ilang mga sala.

15 Ug nahitabo nga naghinulsol sila, ug tungod kay naghinulsol sila nagsugod sila sa pag-uswag.

16 Kay sa dihang nakita ni Moronihah nga naghinulsol na sila nangahas siya nga mangulo kanila sa pag-adto gikan sa usa ka dapit ngadto sa laing dapit, ug gikan sa usa ka siyudad ngadto sa laing siyudad, gani hangtod nga nabawi nila ang katunga sa ilang kabtangan ug ang katunga sa ilang tanan nga yuta.

17 Ug sa ingon niana natapos ang ikakan-oman ug usa nga tuig sa pagmando sa mga maghuhukom.

18 Ug nahitabo sa ikakan-oman ug duha nga tuig sa pagmando sa mga maghuhukom, nga si Moronihah wala na makaangkon og dugang nga mga yuta gikan sa mga Lamanita.

19 Busa wala na sila magtinguha sa pag-angkon sa nahibilin nilang mga yuta, kay hilabihan ka daghan sa mga Lamanita nga imposible na alang sa mga Nephita ang pag-angkon og dugang pa nga gahom batok kanila; mao nga si Moronihah migamit sa tanan niyang kasundalohan sa pagbantay niadtong mga dapit nga iyang nakuha.

20 Ug nahitabo, tungod sa hilabihan ka daghan nga Lamanita ang mga Nephita nahadlok kaayo, basin pa unya og mabuntog sila, ug tunob-tunoban, ug pamatyon, ug laglagon.

21 Oo, misugod sila sa paghinumdom sa mga panagna ni Alma, ug usab sa mga pulong ni Mosiah; ug ilang nakita nga sila mga tikig og liog nga katawhan, ug nga sila mibaliwala sa mga sugo sa Dios;

22 Ug nga sila miusab ug miyatak sa mga balaod ni Mosiah, o nianang gisugo sa Ginoo kaniya nga ihatag ngadto sa katawhan; ug nakita nila nga ang ilang mga balaod dili na makiangayon, ug nga sila nahimong daotan nga katawhan, nga niana nahimo silang daotan sama sa mga Lamanita.

23 Ug tungod sa ilang kadaotan ang simbahan misugod sa pagkunhod; ug nagsugod sila nga dili na motuo sa espiritu sa pagpanagna ug sa espiritu sa pagpadayag; ug ang mga paghukom sa Dios nakatutok gayod sa ilang nawong.

24 Ug nakita nila nga sila nahimo nga huyang, sama sa ilang kaigsoonan, nga mga Lamanita, ug nga ang Espiritu sa Ginoo wala na manalipod kanila; oo, kini mipahawa gikan kanila tungod kay ang Espiritu sa Ginoo dili mopuyo sa dili balaan nga mga templo—

25 Busa ang Ginoo mihunong sa pagpanalipod kanila pinaagi sa iyang milagroso ug dili hitupngan nga gahom, kay sila nahulog ngadto sa kahimtang sa pagkawalay pagtuo ug makalilisang nga pagkadaotan; ug nakita nila nga ang mga Lamanita mas daghan kay kanila, ug gawas kon sila magpabilin nga matinud-anon sa Ginoo nga ilang Dios dili kalikayan nga sila mamatay.

26 Kay tan-awa, nakita nila nga ang kalig-on sa mga Lamanita sama na sa ilang kalig-on, bisan tawo sa tawo. Ug sa ingon niana nahulog sila niining dako nga kalapasan; oo, sa ingon niana nahimo sila nga huyang, tungod sa ilang kalapasan, sulod sa dili daghan nga katuigan.