1 Ug nahitabo nga niining mao nga tuig, tan-awa, si Nephi mitugyan sa hukmanan ngadto sa usa ka tawo nga ang ngalan mao si Cezoram.

2 Tungod kay ang ilang mga balaod ug ang ilang mga gobyerno natukod pinaagi sa tingog sa katawhan, ug sila kinsa mipili sa daotan mas daghan kay kanila kinsa mipili sa maayo, busa nagkahinog na sila alang sa kalaglagan, kay ang mga balaod dili na makiangayon.

3 Oo, ug dili kadto mao ang tanan; mga tikig sila og liog nga katawhan, mao nga sila dili kamandoan sa balaod ni sa kaangayan, gawas nga kini mosangpot sa ilang kalaglagan.

4 Ug nahitabo nga si Nephi naluya tungod sa ilang kadaotan; ug iyang gibiyaan ang hukmanan, ug gidawat niya ang katungdanan sa pagsangyaw sa pulong sa Dios sa tanan nga nahibilin sa iyang mga adlaw, ug ang iyang igsoon nga lalaki nga si Lehi usab, sa tanan nga nahibilin sa iyang mga adlaw;

5 Kay nahinumdom sila sa mga pulong nga gipamulong sa ilang amahan nga si Helaman ngadto kanila. Ug mao kini ang mga pulong nga iyang gipamulong:

6 Tan-awa, akong mga anak nga lalaki, akong tinguha nga kamo mahinumdom sa pagsunod sa mga sugo sa Dios; ug manghinaot ko nga kamo mopahayag ngadto sa katawhan niini nga mga pulong. Tan-awa, gihatag ko kaninyo ang mga ngalan sa atong unang mga ginikanan kinsa miabot gikan sa yuta sa Jerusalem; ug kini akong gibuhat aron nga sa panahon nga kamo mahinumdom sa inyong mga ngalan kamo mahinumdom kanila; ug sa panahon nga kamo mahinumdom kanila kamo mahinumdom sa ilang mga buhat; ug kon kamo mahinumdom sa ilang mga buhat inyong masayran kon giunsa kana sa pagkasulti ug sa pagkasulat, nga kini mga maayo.

7 Busa, akong mga anak, manghinaot ko nga kamo magbuhat niana nga maayo, nga kini mao ang isulti bahin kaninyo ug usab ikasulat, gani ingon nga kini mao ang gisulti ug gisulat bahin kanila.

8 Ug karon akong mga anak nga lalaki, tan-awa ako adunay dugang pa nga hangyo kaninyo, kana nga hangyo mao nga, kamo dili magbuhat niini nga mga butang aron kamo manghambog, apan nga kamo magbuhat niini nga mga butang aron kamo makaangkon sa inyong mga kaugalingon og usa ka bahandi didto sa langit, oo, nga mahangtoron, ug dili molubad; oo, nga kamo makaangkon nianang bililhon nga gasa sa kinabuhi nga dayon, diin may katarongan kitang magdahom nga nahatag ngadto sa atong mga amahan.

9 O hinumdomi, hinumdomi, akong mga anak nga lalaki, ang mga pulong nga gipamulong ni Hari Benjamin ngadto sa iyang katawhan; oo, hinumdomi nga walay laing paagi ni pamaagi diin ang tawo maluwas, lamang pinaagi sa maulaon nga dugo ni Jesukristo, kinsa moanhi; oo, hinumdomi nga siya moabot aron sa pagtubos sa kalibotan.

10 Ug hinumdomi usab ang mga pulong nga gipamulong ni Amulek ngadto ni Zeezrom, didto sa siyudad sa Ammonihah; kay miingon siya ngadto kaniya nga ang Ginoo sa pagkatinuod moabot sa pagtubos sa iyang katawhan, apan dili siya moabot sa pagtubos kanila diha sa ilang mga sala, apan sa pagtubos kanila gikan sa ilang mga sala.

11 Ug siya adunay gahom nga gihatag kaniya gikan sa Amahan sa pagtubos kanila gikan sa ilang mga sala tungod sa paghinulsol; busa siya mipadala sa iyang mga anghel sa pagpahayag sa maayong mga balita bahin sa mga kinahanglanon sa paghinulsol, nga magdala sa gahom sa Manunubos, ngadto sa kaluwasan sa ilang mga kalag.

12 Ug karon, akong mga anak nga lalaki, hinumdomi, hinumdomi nga diha sa bato nga mao ang atong Manunubos, nga si Kristo, ang Anak sa Dios, nga kinahanglan kamong motukod sa inyong tukoranan; nga sa panahon nga ang yawa mopadala sa iyang mapintas nga mga hangin, oo, sa iyang mga kilat diha sa alimpulos, oo, sa panahon nga ang tanan niyang gipaulan nga yelo ug ang iyang mapintas nga unos moigo kaninyo, kini walay gahom batok kaninyo sa pagbitad kaninyo ngadto sa bung-aw sa pagkauyamot ug walay kataposan nga pagkaalaot, tungod sa bato diin kamo natukod, nga mao ang tinuod nga tukoranan, usa ka tukoranan diin kon ang mga tawo magtukod dili sila mapukan.

13 Ug nahitabo nga mao kini ang mga pulong nga gitudlo ni Helaman sa iyang mga anak nga lalaki; oo, siya mitudlo kanila og daghan nga butang nga wala masulat, ug usab sa daghan nga butang nga nasulat na.

14 Ug gihinumdoman nila ang iyang mga pulong; ug busa nanglakaw sila, naghupot sa mga sugo sa Dios, sa pagtudlo sa pulong sa Dios taliwala sa tanan nga katawhan ni Nephi, sugod sa siyudad sa Mabungahon;

15 Ug gikan didto ngadto sa siyudad sa Gid; ug gikan sa siyudad sa Gid ngadto sa siyudad sa Mulek;

16 Ug gani gikan sa usa ka siyudad ngadto sa lain, hangtod nga naadto nila ang tanan nga katawhan ni Nephi kinsa anaa sa habagatan nga bahin sa yuta; ug gikan didto ngadto sa yuta sa Zarahemla, taliwala sa mga Lamanita.

17 Ug nahitabo nga nagsangyaw sila uban sa dakong gahom nga sa ingon niana gisumpo nila ang daghan niadtong mga masinupakon kinsa mibiya gikan sa mga Nephita, mao nga miduol sila ug mikompisal sa ilang mga sala ug nabunyagan ngadto sa paghinulsol, ug dihadiha mibalik ngadto sa mga Nephita aron mapaningkamotan ang pagtul-id sa mga kasaypanan nga ilang nahimo.

18 Ug nahitabo nga si Nephi ug si Lehi nagsangyaw ngadto sa mga Lamanita pinaagi sa ingon ka dako nga gahom ug katungod, kay gihatagan man sila og gahom ug katungod nga sila makapamulong, ug gihatag usab kanila ang unsay angay nilang isulti ngadto kanila—

19 Busa, namulong sila nga misangpot sa dakong katingala sa mga Lamanita, ngadto sa ilang pagkakabig, mao nga dihay walo ka libo ka Lamanita nga didto sa yuta sa Zarahemla ug sa naglibot niini ang gibunyagan ngadto sa paghinulsol, ug nakombinser nga daotan ang mga tradisyon sa ilang mga amahan.

20 Ug nahitabo nga si Nephi ug si Lehi mipadayon gikan didto aron moadto sa yuta sa Nephi.

21 Ug nahitabo nga gidakop sila sa kasundalohan sa mga Lamanita ug gibalhog sa bilanggoan; oo, gani sa sama nga bilanggoan diin si Ammon ug ang iyang mga igsoon gibalhog sa mga sulugoon ni Limhi.

22 Ug human nga nabalhog sila sa bilanggoan sulod sa daghang adlaw nga walay pagkaon, tan-awa, nangadto sila sa bilanggoan sa pagkuha kanila aron patyon sila.

23 Ug nahitabo nga si Nephi ug si Lehi giliyokan og sama sa kalayo, mao nga wala sila mangahas sa pagbakyaw sa ilang mga kamot ngadto kanila tungod sa kahadlok basin unya og masunog sila. Bisan pa niana, si Nephi ug si Lehi wala masunog; ug nagbarog sila taliwala sa kalayo ug wala masunog.

24 Ug sa pagkakita nila nga giliyokan sila og dako nga gilis sa kalayo, ug nga kini wala makasunog kanila, ang ilang mga kasingkasing nakabaton og kaisog.

25 Kay nakita nila nga ang mga Lamanita wala mangahas sa pagbakyaw sa ilang mga kamot nganha kanila; ni sila nangahas sa pagduol kanila, apan nagbarog ingon og naamang sila tungod sa katingala.

26 Ug nahitabo nga si Nephi ug Lehi mibarog ug misugod sa pagpamulong kanila, nga nag-ingon: Ayaw kahadlok, kay tan-awa, ang Dios ang nagpakita kaninyo niining kahibulongan nga butang, nga gipakita nganha kaninyo nga kamo dili makabakyaw sa inyong mga kamot ngari kanamo aron mopatay kanamo.

27 Ug tan-awa, dihang nasulti nila kini nga mga pulong, ang yuta nauyog sa hilabihan, ug ang mga bungbong sa bilanggoan nauyog ingon og kini hapit na matumba sa yuta; apan tan-awa, wala kini matumba. Ug tan-awa, sila nga anaa sa bilanggoan, mga Lamanita ug mga Nephita kinsa mga masinupakon.

28 Ug nahitabo nga natabonan sila og panganod sa kangitngit, ug ang makalilisang nga hilabihang kahadlok miabot kanila.

29 Ug nahitabo nga dihay miabot nga usa ka tingog nga ingon og gikan kini sa ibabaw sa panganod sa kangitngit, nga nag-ingon: Paghinulsol kamo, paghinulsol kamo, ug ayaw na tinguhaa ang paglaglag sa akong mga sulugoon kinsa akong gipadala kaninyo sa pagpahayag sa maayong mga balita.

30 Ug nahitabo nga diha nga nadungog nila kini nga tingog ug namatikdan nga dili kini tingog sa dugdog, ni kini tingog sa kaguliyang nga hilabihan ang kasaba, apan tan-awa, usa kini ka hinagawhaw nga tingog nga hingpit ang kalumo, sama kini sa usa ka hunghong, ug midulot kini bisan ngadto sa kinahiladman sa kalag—

31 Ug bisan pa sa kalumo sa tingog, tan-awa ang yuta miuyog sa hilabihan, ug ang mga bungbong sa bilanggoan natay-og pag-usab, ingon og kini hapit na matumba sa yuta; ug tan-awa ang panganod sa kangitngit nga mitabon kanila, wala mawala—

32 Ug tan-awa ang tingog mibalik na usab, nga nag-ingon: Paghinulsol kamo, paghinulsol kamo, kay ang gingharian sa langit duol na; ayaw na tinguhaa ang paglaglag sa akong mga sulugoon. Ug nahitabo nga ang yuta nauyog na usab ug ang mga bungbong natay-og.

33 Ug usab sa ikatulong higayon ang tingog miabot na usab, ug namulong ngadto kanila sa kahibulongan nga mga pulong nga dili malitok sa tawo; ug ang mga bungbong mikurog na usab, ug ang yuta nauyog ingon og hapit na kini matungâ.

34 Ug nahitabo nga ang mga Lamanita dili makalayas tungod sa panganod sa kangitngit nga mitabon kanila; oo, ug usab sila dili makalihok tungod sa kahadlok nga miabot nganha kanila.

35 Karon dihay usa taliwala kanila kinsa natawo nga usa ka Nephita, kinsa sa makausa nahisakop sa simbahan sa Dios apan mibiya gikan niini.

36 Ug nahitabo nga milingi siya, ug tan-awa nakita niya taliwala sa panganod sa kangitngit ang mga nawong ni Nephi ug ni Lehi; ug tan-awa, sila misanag sa hilabihan, sama sa mga nawong sa mga anghel. Ug nakita niya nga naghangad sila sa langit; ug makita nga ingon og nakigsulti sila sa kusog nga tingog ngadto sa pipila ka binuhat nga ilang nakita.

37 Ug nahitabo nga kini nga tawo misinggit ngadto sa pundok sa katawhan, aron sila molingi ug motan-aw. Ug tan-awa, dihay gahom nga mipalingi ug mipatan-aw kanila; ug nakita nila ang mga nawong ni Nephi ug ni Lehi.

38 Ug gisultihan nila ang tawo: Tan-awa, unsa ang gipasabot sa tanan niini nga butang, ug kinsa man ang gikaistorya niining mga tawhana?

39 Karon ang ngalan sa tawo mao si Aminadab. Ug si Aminadab misulti kanila: Nakig-istorya sila sa mga anghel sa Dios.

40 Ug nahitabo nga ang mga Lamanita misulti kaniya: Unsa ang atong buhaton, aron kining panganod sa kangitngit nga nagtabon kanato matangtang?

41 Ug si Aminadab misulti kanila: Kamo kinahanglan nga maghinulsol, ug molitok sa pagpangamuyo, gani hangtod nga kamo makabaton og pagtuo kang Kristo, kinsa gitudlo nganha kaninyo pinaagi ni Alma, ug ni Amulek, ug ni Zeezrom; ug kon buhaton ninyo kini ang panganod sa kangitngit nga nagtabon kaninyo pagatangtangon.

42 Ug nahitabo nga silang tanan misugod sa pagpangamuyo ngadto sa tingog kaniya kinsa mao ang miuyog sa yuta; oo, sila nangamuyo bisan hangtod nga ang panganod sa kangitngit nawala.

43 Ug nahitabo nga sa dihang mitan-aw sila sa palibot, ug nakita nga ang panganod sa kangitngit nawala gikan sa pagtabon kanila, tan-awa, nakita nila nga sila giliyokan, oo, matag kalag, sa dako nga gilis sa kalayo.

44 Ug si Nephi ug si Lehi anaa sa ilang taliwala; oo sila giliyokan; oo, nga ingon og sila anaa taliwala sa nagdilaab nga kalayo, apan wala sila masakiti niini, ni kini misunog sa mga bungbong sa bilanggoan; ug napuno sila nianang kamaya nga dili ikapamulong ug puno sa himaya.

45 Ug tan-awa, ang Balaang Espiritu sa Dios mikunsad gikan sa langit, ug misulod sa ilang mga kasingkasing, ug sila napuno nga sama og may kalayo, ug namulong sila og kahibulongan nga mga pulong.

46 Ug nahitabo nga dihay miabot kanila nga usa ka tingog, oo, maanindot nga tingog, sama og usa kini ka hunghong, nga nag-ingon:

47 Ang kalinaw, ang kalinaw maanaa kaninyo, tungod sa inyong pagtuo sa akong Labing Pinalangga, kinsa diha na sukad pa sa katukoran sa kalibotan.

48 Ug karon, diha nga nadungog nila kini, gipunting nila ang ilang mga mata nga ingon og nagtan-aw kon diin ang tingog naggikan; ug tan-awa, nakita nila nga miabli ang kalangitan; ug ang mga anghel nanaog gikan sa langit ug nangalagad kanila.

49 Ug dihay mga tulo ka gatos ka kalag kinsa nakakita ug nakadungog niini nga mga butang; ug gihangyo sila sa paglakaw ug dili matingala, ni sila magduhaduha.

50 Ug nahitabo nga nanglakaw sila ug nangalagad sa katawhan, nagpahayag libot sa tibuok nga mga rehiyon sa tanan nga butang nga ilang nadungog ug nakita, nga sa ingon ang mas daghan nga bahin sa mga Lamanita nadani pinaagi kanila, tungod sa ka daghan sa kamatuoran nga ilang nadawat.

51 Ug kutob sa mga nadani wala na mogamit sa ilang mga hinagiban sa gubat, ug miwagtang usab sa ilang pagdumot ug sa tradisyon sa ilang mga amahan.

52 Ug nahitabo nga ilang gitugyan ngadto sa mga Nephita ang mga yuta nga ilang gipanag-iya.