1 Ug karon nahitabo nga dihang si Nephi misulti niini nga mga pulong, tan-awa, adunay mga tawo kinsa mga maghuhukom, nga nahisakop usab sa tinago nga pundok ni Gadianton, ug nasuko sila, ug misinggit sila batok kaniya, nag-ingon sa katawhan: Ngano nga dili man kamo modakop niining tawhana ug dad-on siya, aron siya pagahukman sumala sa kalapasan nga iyang nabuhat?

2 Nganong nagtan-aw ra man kamo niining tawhana, ug naminaw kaniya nga nagbiaybiay batok niini nga katawhan ug batok sa atong balaod?

3 Kay tan-awa, si Nephi nakapamulong kanila mahitungod sa pagkadili makiangayon sa ilang balaod; oo, daghan nga butang nga gipamulong ni Nephi nga dili masulat; ug wala siyay gipamulong nga supak sa mga sugo sa Dios.

4 Ug kadto nga mga maghuhukom nasuko kaniya tungod kay namulong siya sa walay lipud-lipod ngadto kanila mahitungod sa ilang tinago nga mga buhat sa kangitngit; bisan pa niana, wala sila mangahas pagdapat sa ilang mga kamot ngadto kaniya, kay sila nahadlok sa katawhan basin pa unya og mosinggit sila batok kanila.

5 Mao nga misinggit sila ngadto sa katawhan, nag-ingon: Ngano nga kamo mitugot man niini nga tawo sa pagbiaybiay batok kanato? Kay tan-awa gipanghimaraot niya kining tanan nga katawhan, gani ngadto sa kalaglagan; oo, ug usab nga kining atong dagko nga mga siyudad pagakuhaon gikan kanato, nga kita walay dapit diha niini.

6 Ug karon nasayod kami nga kini imposible, kay tan-awa, kita may gahom, ug ang atong mga siyudad gamhanan, busa ang atong mga kaaway walay gahom batok kanato.

7 Ug nahitabo nga sa ingon niana nasulsolan nila ang katawhan aron masuko kang Nephi, ug mipasiugda og mga panagbingkil taliwala kanila; kay dihay pipila nga misinggit: Pasagdi kining tawhana, kay maayo siya nga tawo, ug kadtong mga butang nga iyang gisulti mahitabo gayod gawas kon kita maghinulsol;

8 Oo, tan-awa, ang tanan nga paghukom nga iyang gipamatuod modangat kanato; kay kita nasayod nga sakto ang iyang gipamatuod kanato mahitungod sa atong mga kadaotan. Ug tan-awa, daghan kini, ug siya nasayod kaayo sa tanan nga butang nga modangat kanato sama sa iyang pagkasayod sa atong mga pagkadaotan;

9 Oo, ug tan-awa, kon dili pa siya usa ka propeta dili unta siya makapamatuod mahitungod niadtong mga butanga.

10 Ug nahitabo nga kadtong katawhan nga nagtinguha sa paglaglag ni Nephi napugos lamang tungod sa ilang kahadlok, mao nga wala sila mobakyaw sa ilang mga kamot diha kaniya; busa siya misugod na usab sa pagpamulong ngadto kanila, nakita nga nakuha niya ang pag-uyon sa mga mata sa uban, nga niana ang nahibilin kanila nangahadlok.

11 Busa napugos siya sa pagpamulong og dugang ngadto kanila nga nag-ingon: Tan-awa, akong kaigsoonan, wala ba kamo makabasa nga ang Dios naghatag og gahom sa usa ka tawo, gani ni Moises, sa pagbunal sa mga tubig sa Pulang Dagat, ug kini natunga dinhi ug didto, nga sa ingon ang mga Israelita, nga atong mga amahan, miagi nianang uga nga yuta, ug ang mga tubig milamoy sa mga sundalo sa mga Ehiptohanon ug milubong kanila?

12 Ug karon tan-awa, kon ang Dios mihatag niining tawhana sa ingon niana nga gahom, nan nganong kamo kinahanglan man nga maglalis, ug moingon nga siya wala mohatag kanako og gahom aron akong mahibaloan ang mahitungod sa mga paghukom nga moabot kaninyo gawas kon kamo maghinulsol?

13 Apan, tan-awa, kamo wala lamang molimod sa akong mga pulong, apan kamo usab milimod sa tanan nga pulong nga gipamulong sa atong mga amahan, ug usab sa mga pulong nga gipamulong niining tawhana nga si Moises, kinsa adunay ingon ka dakong gahom nga gihatag kaniya, oo, sa mga pulong nga iyang gipamulong mahitungod sa pag-anhi sa Mesiyas.

14 Oo, wala ba siya magpamatuod nga ang Anak sa Dios moabot? Ug sama sa iyang pag-isa sa bitin nga tumbaga didto sa kamingawan, ingon usab niana ang pag-isa kaniya kinsa moabot.

15 Ug kutob sa motan-aw niana nga bitin mabuhi, maingon man usab sa kutob sa motan-aw sa Anak sa Dios uban sa pagtuo, nga magbaton og mahinulsolon nga espiritu, mabuhi, gani ngadto nianang kinabuhi nga walay kataposan.

16 Ug karon tan-awa, dili lamang si Moises ang nagpamatuod niining mga butanga, apan ang tanan usab nga balaang mga propeta, gikan sa iyang mga adlaw hangtod sa mga adlaw ni Abraham.

17 Oo, ug tan-awa, si Abraham nakakita sa iyang pag-anhi, ug napuno sa kamaya ug naglipay.

18 Oo, ug tan-awa sultihan ko kamo, nga dili lamang si Abraham ang nasayod niining mga butanga, apan dihay daghan pa sa wala pa ang mga adlaw ni Abraham kinsa gitawag pinaagi sa kapunongan sa Dios; oo, sunod sa kapunongan sa iyang Anak; ug kinahanglan nga ikapakita kini ngadto sa katawhan, sa daghang liboan nga katuigan sa dili pa ang iyang pag-anhi, nga gani ang katubsanan kinahanglang moabot ngadto kanila.

19 Ug karon manghinaot ko nga kamo masayod, nga gani sukad pa sa mga adlaw ni Abraham dihay daghang propeta nga mipamatuod niini nga mga butang; oo, tan-awa, ang propeta nga si Zenos mipamatuod nga walay kahadlok; ug tungod niini siya gipatay.

20 Ug tan-awa, usab si Zenock, ug usab si Ezias, ug usab si Isaias, ug si Jeremias, (Jeremias nga mao gihapon nga propeta kinsa mipamatuod sa kalaglagan sa Jerusalem) ug karon nasayod kita nga ang Jerusalem nalaglag sumala sa mga pulong ni Jeremias. O unya ngano nga ang Anak sa Dios wala man moabot, sumala sa iyang panagna?

21 Ug karon makiglalis ba kamo nga ang Jerusalem nalaglag? Moingon ba kamo nga ang mga anak nga lalaki ni Sedekias wala patya, tanan gawas ni Mulek? Oo, ug kamo wala ba makakita nga ang kaliwat ni Sedekias anaa uban kanato, ug gipapahawa sila sa yuta sa Jerusalem? Apan tan-awa, dili lang kini mao ang tanan—

22 Ang atong amahan nga si Lehi gipapahawa sa Jerusalem kay siya mipamatuod niining mga butanga. Ug si Nephi mipamatuod niining mga butanga, ug usab hapit tanan sa atong mga amahan, gani hangtod karon nga panahon; oo, sila mipamatuod sa pag-anhi ni Kristo, ug nagpaabot, ug nagmaya sa iyang adlaw nga moabot.

23 Ug tan-awa, siya Dios, ug anaa siya uban kanila, ug gipakita niya ang iyang kaugalingon ngadto kanila, nga sila gitubos pinaagi kaniya; ug sila mihatag kaniya og himaya, tungod niana nga moabot.

24 Ug karon, kay nakita nga kamo nasayod niining mga butanga ug dili makalimod niini gawas kon kamo mamakak, busa dinhi niini kamo nakasala, kay gisalikway ninyo kining tanan nga butang bisan pa sa daghang kamatuoran nga inyong nadawat; oo, gani kamo nakadawat sa tanan nga butang, sa mga butang sa langit, ug sa tanan nga butang nga ania sa yuta, isip usa ka saksi nga kini tinuod.

25 Apan tan-awa, gisalikway ninyo ang kamatuoran, ug nakigbatok sa inyong balaan nga Dios; ug bisan niini nga panahon, imbes magtigom alang sa inyong kaugalingon og mga bahandi sa langit, nga walay butang nga madunot, ug walay butang nga makaadto nga mahugaw, kamo nagpundok og kapungot alang sa inyong kaugalingon batok sa adlaw sa paghukom.

26 Oo, gani karon nga panahon kamo nagkahinog, tungod sa inyong mga pagpatay ug tungod sa inyong mga gidili nga pakighilawas ug pagkadaotan, alang sa walay kataposang kalaglagan; oo, ug gawas kon kamo maghinulsol moabot kini kaninyo sa dili madugay.

27 Oo, tan-awa anaa na kini karon gani sa inyong mga pultahan; oo, sulod kamo sa hukmanan, ug pangitaa; ug tan-awa, ang inyong maghuhukom gipatay, ug naglunang siya sa iyang dugo; ug gipatay siya sa iyang igsoong lalaki, kinsa nagtinguha sa paglingkod sa hukmanan.

28 Ug tan-awa, silang duha sakop sa inyong tinago nga pundok, kansang tigpasiugda mao si Gadianton ug ang usa nga daotan kinsa nagtinguha sa paglaglag sa mga kalag sa mga tawo.