Ikucslah

Puk luhn Mormon pa sie un ma suhmuhslah muhtahl ma oacna Bible uh. Ma inge pa sie ma sihmlac ke mukwikwi luhn God nuh sin mwet omeet ah suc muhta fin acn America ac ma inge nein fohnlah luhn wosasuc kawihl.

Puk se inge tuh sihmihsyucklac sin mwet pahluh pucspucs omeet ah ke nguhn in pahluh ac fwackyuck. Kahs lalos, sihmihsyucklac fin plwet kol, tuh sihmlac oacna ac ahkfototoyeyucklac sin mwet pahluh mahtuh ke pacl omeet ah suc pahngpahng Mormon. Ma sihmlac inge sruhmuhn ke muhtuhnfacl yohk luo. Sie tuhkuh liki acn Jerusalem ke yac 600 Met Liki Kraist ac tohkoh fahsrelihk oraclah muhtuhnfacl luo, suc etweyuck muh mwet Nephi ac mwet Laman. Muhtuhnfacl se sahyac ah tuhkuh na met me ke Leum El tuh ahkfohsyeack kahs uh ke Tower luhn Babel. U se inge etweyuck muh mwet Jared. Tukun fihlin yac tausin, elos nuhkwewa kuhnausyucklac sahyacn mwet Laman, ac elos wi inmahsrlon mwet mahtuh somlah luhn mwet America Indian.

Ma yohk srihpac se emet ma sihmlac ke Puk luhn Mormon pa orekma luhn Leum Jisus Kraist inmahsrlon mwet Nephi tiac paht tukun na moulyak se Lal ah. Ma inge sang mwe luti ke wosasuc, tahkuhnlah plwacn in molwelah, ac fahk nuh sin mwet uh ma elos enenuh in oruh in eis mislac ke moul se inge ac molwelah ma pahtpaht ke moul se fahsruh uh.

Tukun Mormon el ahksahfyelah sihm lal, el sang sramsram inge nuh sel Moroni wen se nahtuhl, suc sang kihtin kahs lal sifacna in weacng ac okanlah plwet inge ke Inging Cumorah. Ke Septempuh 21, 1823, Moroni se pacna inge, tuh in pacl se inge el mwet sifilpac moulyak wolacna, el sikyang nuh sel Mwet Pahluh Joseph Smith ac ahkuhtweyac nuh sel ke ma sihmlac omeet ah ac ke akwuck in luhngaslah nuh ke kahs English.

In pacl pakpucki luhn ma inge plwet inge tuh ituckyang nuh sel Joseph Smith, suc luhngaslah ma inge ke mwe sang ac kuh luhn God. Ma sihmlac inge ingena oreklac nuh ke kahs pucspucs in mwe ahkpwacye sasuc ac siepac mwe ahkpwacye lah Jisus Kraist pa Wen nuhtin God moul ac elos nuhkwewa suc ac fah tuhkuh nuh Yohrohl ac ahkos masap ac akwuck ke wosasuc Lal ac muh kuh in moliyucklac.

Ke ma sihmlac inge Mwet Pahluh Joseph Smith el fahk: “Nga fahk nuh sin mwet lili lah Puk luhn Mormon pa puk se ma pwacye emet sin kuhtwena puk fin facluh, ac pa yot in fihl luhn alu lasr uh, ac sie mwet ac kuh in fototoyang nuh sin God ke el muhta na ke mwe luti luhn ma inge, liki na kuhtwena puk sahyac.”

In weluhlwacng Joseph Smith, Leum El lwelah mwet singucul sie sahyac in sifacna liye plwet kol ac in mwet loh sacohk ke pwacyeiyacn ac wolacna luhn Puk luhn Mormon. Luhlahlfongi kuh lalos ma sihmihsyucklac weacng ma inge oacna “Fahkwack Luhlahlfongi luhn Mwet Loh Tolu” ac “Fahkwack Luhlahlfongi luhn Mwet Loh Alkosr.”

Kuht suli mwet nuh kwewa fin acn nuh kwewa in riti Puk luhn Mormon, in motko ke insiaclos pweng se suc ma inge nein uh, ac na in siyuck sin God, Pahpah Ma Pahtpaht, ke inen Kraist fin puk se inge pwacye. Elos suc ukwe ohiyac se inge ac siyuck ke luhlahlfongi ac fah eis sie luhlahlfongi kuh ke pwacyeiyacn ac wolacna luhn ma inge ke kuh luhn Nguhn Muhtahl. (Liye Moroni 10:3–5.)

Elos suc eis mwe ahkpwacye wolacna se inge sin Nguhn Muhtahl ac fah oacyacpac etuh ke kuh se pacna inge lah Jisus Kraist pa Mwet Lahngo luhn facluh, lah Joseph Smith pa mwet fahkwack ac mwet pahluh Lal ke lwen sahflah inge, ac lah Alu luhn Jisus Kraist luhn Mwet Luhlahlfongi lal ke Lwen-sahflah pa tohkohsrahi luhn Leum suc sifilpac akwucki fin facluh, in ahkolah nuh ke Tuhkuh Ahkluo luhn Messiah.