1 Mme ikɔ emi Jacob, eyen eka Nephi, eketiŋde ɔnɔ ikɔt Nephi, ke ini Nephi ama akakpa:

2 Idahaemi, ndima nditɔ eka mi, ami, Jaccob, nte asaŋade ye ubiɔŋ utom emi ami nyenede ke idak Abasi, ke ndimenere itie utom mi ke uteŋe, ndien man ami nsio mme idiɔk ŋkpɔ mbufo ke mme ɔfɔŋ mi mfep, ami ndɔk nduk temple mfin emi man ami ndɔhɔ mbufo ikɔ Abasi.

3 Ndien mbufo ke idem mbufo emefiɔk ete ke ami mbemiso ini emi mma nsin ifik ke itie utom ikot mi; edi ami mfin emi ŋkop mmem idem ke ediwak udɔŋ ye ekikere kabaŋa unwam ukpɔŋ mbufo ŋkan nte nkedide mbem iso ini emi.

4 Koro sese, mbemiso idahaemi, mbufo ema esuk ibuot enɔ ikɔ Jehovah, emi ami nnɔde mbufo.

5 Edi sese, ekpaŋutɔŋ enɔ mi, enyuŋ efiɔk ete ke otode unwam enyene odudu Andibot enyɔŋ ye isɔŋ ke ami mekeme nditiŋ mbaŋa ekikere mbufo, nte mbufo etɔŋɔde ndinam idiɔk ŋkpɔ, idiɔk ŋkpɔ emi ebietde ata mbubiam ɔnɔ mi, iŋ, ye mbubiam ɔnɔ Abasi.

6 Iŋ, anam ukpɔŋ mi ɔfuhɔ onyuŋ anam mi mfumi ye but ke iso Andibot mi, ete ke ana ami ntie ntiense nnɔ mbufo mbaŋa ibak esit mbufo.

7 Ndien ŋko anam mi mfuhɔ nte ke ana ami nda ɔkpɔsɔŋ uyo utiŋ ikɔ mbaŋa mbufo, ke iso iban mbufo ye nditɔ mbufo, ediwak emi ekikere esit mmɔ edide mmem mmem ye edisana ye suŋ suŋ ke iso Abasi, emi edide ŋkpɔ emi enemde Abasi esit;

8 Ndien ami nkere nte ke mmɔ edɔk edi mi ndikop inem inem ikɔ Abasi, iŋ, ikɔ emi ɔkɔkde ukpɔŋ emi ekenyenede unan.

9 Ke ntre, edi mbiomo ɔnɔ ukpɔŋ mi ete ke ana ami nyik, ke ntak ɔkpɔsɔŋ ibet emi ami nkɔbɔde nto Abasi, nditeme mbufo nte mme idiɔk ŋkpɔ mbufo edide, nditara mme unan mmɔ emi ema ekeda unan, ke itie ndɔŋ esit ye edikɔk unan mmɔ; ndien mbon emi minyeneke unan, ke itie ndidia usɔrɔ ke inem inem ikɔ Abasi eda ofut enim ndikim ukpɔŋ mmɔ nyuŋ nnɔ suŋ suŋ esit mmɔ unan.

10 Edi, ke misehe nte utom oro okponde, ana ami nnam nte asaŋade ye mme ɔkpɔsɔŋ uyo Abasi, nyuŋ ndɔhɔ mbufo kabaŋa ibak ye mme mbubiam ido mbufo, ke iso mme andisana ke esit, ye mbon emi esit ɔbuŋɔde, ye ke idak ntiŋ enyin nse Abasi Ibom.

11 Ke ntre, ana ami ndɔhɔ mbufo akpanikɔ mbaŋa iŋwaŋ iŋwaŋ ikɔ Abasi. Koro sese, nte ami mbupde Jehovah, ntem ke ikɔ ekedi ɔnɔ mi, ete: Jacob, afo daha dɔk ka temple mkpɔŋ, nyuŋ tiŋ ikɔ emi ami ndinɔde fi nnɔ mbon emi.

12 Ndien idahaemi sese, nditɔ eka mi, emi edi ikɔ emi ntiŋde nnɔ mbufo, nte ke ediwak mbufo emetɔŋɔ ndiyom gold, ye silver, ye kpukpru utɔ nsɔŋ urua ukwak, emi isɔŋ emi, emi edide isɔŋ eŋwɔŋɔ ɔnɔ mbufo ye ubon mbufo, ɔyɔde ata eti eti.

13 Ndien ubɔk ukpeme ama asak imam ye mbufo ata eti eti, ndien mbufo ema ebɔ ediwak inyene; ndien ke ntak emi usuk mbufo ekebɔde awak akan eke nditɔ eka mbufo mbufo emenere ke ntaŋidem esit mbufo, ndien esɔŋ ibuot enyuŋ etaŋidem ke ntak ŋsɔŋ urua edisine ŋkpɔ mbufo, ndien ekɔbɔ nditɔ eka mbufo koro mbufo ekerede ke mbufo emefɔn ekan mmɔ.

14 Ndien idahaemi, nditɔ eka mi, ndi mbufo ekere ete ke Abasi etebe mbufo ikpe ke ŋkpɔ emi? Sese, ami ndɔhɔ mbufo nte, Iŋ iŋ. Edi enye etip mbufo ikpe, ndien edieke mbufo eyirede ke mme ŋkpɔ emi ubiere ikpe esie ana ɔsɔp edi ɔnɔ mbufo.

15 O ete ke enye oyowut mbufo ete enye ekeme ndikim mbufo, ndien ye ndise enyin kiet enye amia mbufo enim ke ntan!

16 O ete ke enye oyosio mbufo ke ukwaŋ-ŋkpɔ ye mbubiam ido emi. Ndien, O ete ke mbufo eyekpaŋ utɔŋ enɔ mme uyo esie, ndien iyakke ntaŋidem esit mbufo emi osobo ukpɔŋ mbufo!

17 Ekere ebaŋa nditɔ eka mbufo nte idem mbufo, ndien emehe ye kpukpru owo enyuŋ etat ubɔk ye inyene mbufo, man mmɔ enyene ŋkpɔ nte mbufo.

18 Edi mbemiso mbufo eyom inyene, mbufo eyom obio ubɔŋ Abasi.

19 Ndien ke ini mbufo ema ebɔ idorenyin ke Christ mbufo eyebɔ inyene, edieke mbufo eyomde mmɔ; ndien mbufo eyeyom mmɔ ke ntak uduak ndinam eti ŋkpɔ—ke ndisine owo emi asaŋade iferi ɔfɔŋ, nyuŋ nnɔ owo ɔbiɔŋ udia, nyuŋ ntad owo ŋkpɔkɔbi nyak, nyuŋ nnɔ owo udɔŋɔ ye owo ukut unwam.

20 Ndien idahaemi, nditɔ eka mi, ami metiŋ nnɔ mbufo kabaŋa ntaŋidem; ye mbufo emi enɔmɔde mbɔhiduŋ mbufo, enyuŋ ekɔbɔde enye ke ntak emi mbufo etaŋde idem ke esit mbufo, ebaŋa mme ŋkpɔ emi Abasi ɔnɔde mbufo, nso ke mbufo etiŋ ebaŋa enye?

21 Nte mbufo ikereke ite ke mme ŋkpɔ emi edi mbubiam ɔnɔ enye emi okobotde kpukpru obukidem? Ndien ke owo kiet kiet edi ŋkpɔ uto ke iso esie nte eken. Ndien ke kpukpru obukidem edi ntan; ndien ke ukem ukem ntak oro ke enye okobot mmɔ, ete mmɔ enim ibet imɔ enyuŋ etoro enye ke nsinsi.

22 Ndien idahaemi ami ntre nditiŋ ikɔ nnɔ mbufo kabaŋa ntaŋidem. Ndien edieke mikpidige ete ke ana ami ntiŋ ikɔ nnɔ mbufo kabaŋa idiɔk ŋkpɔ emi okponde akan, esit mi ekpenem ata eti eti ke ntak mbufo.

23 Edi ikɔ Abasi odobi mi ke ntak mme idiɔk ŋkpɔ emi okponde akan. Koro sese, ntem ke Jehovah ɔdɔhɔ: Mme owo emi etɔŋɔ ndikɔri ke ukwaŋ-ŋkpɔ; ŋwed Abasi iŋwaŋake mmɔ, koro mmɔ eyom ndisio idem mmɔ mfep ke ndinam mme use, ke ntak mme ŋkpɔ emi ekewetde kabaŋa David, ye Solomon eyen esie.

24 Sese, David ye Solomon ke akpanikɔ ema enyene ediwak iban ye iban esa, emi ekedide mbubiam ŋkpɔ ke iso mi, Jehovah ɔdɔhɔ.

25 Ke ntre, ntem ke Jehovah ɔdɔhɔ, ami mada mbon emi ŋwɔrɔ ke isɔŋ Jerusalem, ke odudu ubɔk mi, man ami mmenere nnɔ idem mi nnen nnen ŋkɔk nto mfri idem Joseph.

26 Ke ntre, ami Jehovah Abasi ndiyakke nte mbon emi enam nte mmɔ ke eset.

27 Ke ntre, nditɔ eka mi, ekop mi, enyuŋ ekpaŋutɔŋ enɔ ikɔ Jehovah: Koro owo ndomo kiet ididuhe ke otu mbufo emi edinyenede ibɔhɔke ŋwan kiet; ndien iban esa enye inyeneke ndomo kiet;

28 Koro ami, Jehovah, nnemde esit mbaŋa mfara ke idem iban. Ndien mme use edi mbubiam ke iso mi; ntem ke Jehovah mme Udim ɔdɔhɔ.

29 Ke ntre, mbon emi eyenim ibet mi, Jehovah mme Udim ɔdɔhɔ, midige ntre esuŋi isɔŋ ke ntak mmɔ.

30 Koro edieke ami nduakde, Jehovah mme Udim ɔdɔhɔ, nyemenere ubon nnɔ idem mi, ami nyɔnɔ ikɔt mi uyo; midige ntre mmɔ eyekpaŋ utɔŋ enɔ mme ŋkpɔ emi.

31 Koro sese, ami, Jehovah, mokut ukut, nyuŋ ŋkop eseme nditɔ iban ikɔt mi ke isɔŋ Jerusalem, iŋ, ye ke ofuri mme isɔŋ ikɔt mi, ke ntak ibak ye mme mbubiam ebe mmɔ.

32 Ndien ami ndiyakke, Jehovah mme Udim ɔdɔhɔ, ete mme eyet ndiye nditɔ iban ikɔt mi emi ami ŋkadade ŋwɔrɔ ke isɔŋ Jerusalem, ɔdɔk edi etiene mi ke abaŋa iren-owo ikɔt mi, Jehovah mme Udim ɔdɔhɔ.

33 Koro mmɔ ididaha iwɔrɔ nte mbon ŋkpɔkɔbi nditɔ iban ikɔt mi ke ntak mmɔ ememde, ibɔhɔke ami ndise mmɔ ye idiɔk isuŋi, tutu esim nsobo; koro mmɔ idinamke mme use, nte mmɔ ke eset, Jehovah mme Udim ɔdɔhɔ.

34 Ndien idahaemi sese, nditɔ eka mi, mbufo emefiɔk ete ke ibet emi ke ekenɔ ete nnyin, Lehi; ke ntre, mbufo ema efɔfiɔk mmɔ; ndien mbufo emeda akamba ubiom ikpe enɔ idem mbufo; koro mbufo emenam mme ŋkpɔ emi mbufo mikpinamke.

35 Sese, mbufo emenam mme akwa ukwaŋ-ŋkpɔ ekan mme Lamanite, nditɔ eka nnyin. Mbufo emebuŋ mmem mmem esit iban mbufo, nditɔ mbufo enyuŋ enana mbuɔtidem ke idem mbufo, ke ntak idiɔk uwut-ŋkpɔ mbufo ke iso mmɔ; ndien mme eyet esit mmɔ edɔk esim Abasi kabaŋa mbufo. Ndien ke ntak emi ikɔ Abasi ɔsɔŋde, emi ɔsuhɔre edi kabaŋa mbufo, ediwak esit ekpa, eto akamba unan emi ekimde.