1 Sese, nditɔ eka mi, ndi mbufo itihi nte ekotde mme ikɔ prophet Zenos, emi enye eketiŋde ɔnɔ ufɔk Israel, ete:

2 Ekpaŋutɔŋ, O mbufo ufɔk Israel, enyuŋ ekop mme ikɔ mi, prophet eke Jehovah.

3 Koro sese, ntem ke Jehovah ɔdɔhɔ, ami nyodomo mbufo, O ufɔk Israel, nte eto olive emi etɔde, emi owo ekemende onyuŋ ɔbɔkde ke iŋwaŋ-vine esie; ndien enye esehe, onyuŋ ɔkɔri ɔsɔŋ, onyuŋ ɔtɔŋɔ ndibu.

4 Ndien edikem ete andinyene iŋwaŋ-vine edika do, onyuŋ okut ete ke eto olive esie ɔtɔŋɔ ndibu; ndien enye ɔdɔhɔ ete: Ami nyesep enye, nyuŋntibi isɔŋ ŋkanare enye, nyuŋ mbɔk enye, man enye asiaha mme nsek ye mmem mmem ŋkɔk, man enye idikpa.

5 Ndien edikem ete enye esep enye, onyuŋ etibi isɔŋ akanare enye, onyuŋ ɔbɔk enye nte enye eketiŋde.

6 Ndien edikem ete ke ediwak usen ema ekebe enye ɔtɔŋɔ ndisiaha mkpri, mme nsek ye mmem mmem ŋkɔk; edi sese, ata enyɔŋ esie ɔtɔŋɔ ndikpa.

7 Ndien edikem ete andinyene iŋwaŋ-vine okut enye, onyuŋ ɔdɔhɔ eyen-ufɔk esie ete: Ami mfuhɔ mbaŋa nte ke eto emi ayatak mi; ke ntre, ka nyuŋ kpi mme ŋkɔk to eto olive ikɔt, nyuŋ da mmɔ sɔk mi; ndien nnyin iyikpi mme akpan ŋkɔk oro iduɔŋɔ emi etɔŋɔde ndisat, ndien nnyin iyi top mmɔ isin ke ikaŋ man ata mmɔ.

8 Ndien sese, Etubom iŋwaŋ-vine ɔdɔhɔ ete, ami nsio ediwak nsek ye mmem mmem ŋkɔk emi mfep, ndien ami nyebahare mmɔ nsin ke ebiet eke ami nduakde; ndien idige akpan ŋkpɔ edieke edide ete ke oruŋ eto emi ayakpa, ami nyetim mfri esie nnim nnɔ idem mi; ke ntre, ami nyemen mme nsek ye mmem mmem ŋkɔk emi, ndien ami nyebahare mmɔ nsin ke ebiet ekededi ami nduakde.

9 Afo men mme ŋkɔk eto vine ikɔt, enyuŋ ebahare mmɔ esin, ke ebiet oro; ndien mmɔ emi ami mkpide nsio ami nyotop nsin ke ikaŋ nyuŋ mfɔp mmɔ, man mmɔ ekubiat isɔŋ iŋwaŋ-vine mi.

10 Ndien edikem ete eyenufɔk Etubom iŋwaŋ-vine anam nte asaŋade ye ikɔ Etubom iŋwaŋ-vine, onyuŋ abahare mme ŋkɔk eto olive ikɔt esin.

11 Ndien Etubom iŋwaŋ-vine anam etibi isɔŋ ekanare enye, enyuŋ esep, enyuŋ ebɔk, ɔdɔhɔ eyen-ufɔk esie ete: Ami mfuhɔ mbaŋa nte kana eto emi atak mi; ke ntre, manami ntim mme oruŋ esie nnim man mmɔ idikpa, man ami ntim mmɔ nnim nnɔ idem mi, ke ami nnam ŋkpɔ emi.

12 Ke ntre, ka usuŋ fo; kpeme eto oro, bɔk enye, nte asaŋade ye mme ikɔ mi.

13 Ndien emi ke ami ndinim ke ata usuhore itie ke iŋwaŋ-vine mi, ke ebiet emi ami nduakde, idige akpan ŋkpɔ inɔ fi; ndien ami nnam enye man ami ntim nnim nnɔ idem mi mme ŋkɔk eto emi nte obot edide; ndien ŋko, man ami nnim mfri esie mbaŋa ini idɔk edibede, nnɔ idem mi, koro ami mfuhɔ mbaŋa nte eto emi editakde mi ye mfri esie.

14 Ndien edikem ete Etubom iŋwaŋ-vine akade usuŋ esie, onyuŋ edip mme ŋkɔk eto olive nte obot edide emi etɔde ke mme ata usuhɔre itie ke iŋwaŋ-vine, usuk ke ŋkaŋ kiet ndien usuk ke ŋkaŋ efen, nte asaŋade ye uduak ye inemesit esie.

15 Ndien edikem ete ke anyan ini ama ebe efep, ndien Etubom iŋwaŋ-vine ɔdɔhɔ eyen-ufɔk esie ete: Di, yak nnyin isuhɔre ika esit iŋwaŋ-vine, man nnyin inam utom ke iŋwaŋ-vine.

16 Ndien edikem ete Etubom iŋwaŋ-vine, ŋko ye eyen-ufɔk esie, ema esuhɔre eka esit iŋwaŋ-vine man enam utom. Ndien edikem ete eyen-ufɔk ɔdɔhɔ ete-ufɔk esie ete: Sese, se mi; sese eto oro.

17 Ndien edikem ete Etubom iŋwaŋ-vine ese onyuŋ okut eto emi ekebaharede esin ke mme ŋkɔk olive ikɔt; ndien enye ama etibe onyuŋ ɔtɔŋɔ ndinwum mfri. Ndien enye okut ete ke ɔfɔn; ndien ke mfri esie eketie nte mfri eke nte obot edide.

18 Ndien enye ɔdɔhɔ eyen-ufɔk esie ete: Sese, mme ŋkɔk eto ikɔt enyene mmɔŋ ke oruŋ esie, ndien oruŋ esie enyene ata odudu; ndien ke ntak ata odudu oruŋ esie mme ŋkɔk ikɔt eŋwum nti mfri. Idahaemi, edieke nnyin miki bahakere mme ŋkɔk emi isin, eto oro akpakpa. Ndien idahaemi, sese, ami nyenim ediwak mfri, emi eto oro oŋwumde; ndien mfri oro ami nyenim nnɔ ini idɔk edibede, nnɔ idem mi.

19 Ndien edikem ete Etubom iŋwaŋ-vine ɔdɔhɔ eyen-ufɔk esie ete: Di, yak nnyin ika usuhore itie ke iŋwaŋ-vine, ndien sese edieke mme ŋkɔk eto emi nte obot edide miŋwumke ediwak mfri ŋko, man ami nnim mfri esie nnɔ ini idɔk edibede, nnɔ idem mi.

20 Ndien edikem ete mmɔ eka ebiet emi ete-ufɔk ekedipde mme ŋkɔk eto emi edide nte obot edide, ndien enye ɔdɔhɔ eyen-ufɔk ete: Sese mmɔ; ndien enye okut akpa ete ke enye ama oŋwum ediwak mfri; ndien enye okut ŋko ete ke enye ɔfɔn. Ndien enye ɔdɔhɔ eyen-ufɔk ete: Men mfri esie, nyuŋ nim enye nnɔ ini idɔk edibede, man ami ntim nnim enye nnɔ idem mi; koro sese, enye ɔdɔhɔ, anyan ini emi ke ami mbɔk enye, ndien enye oŋwum ediwak mfri.

21 Ndien edikem ete eyen-ufɔk ɔdɔhɔ ete-ufɔk ete: Ntak emi afo edide mi editɔ eto emi, mme ŋkɔk eto emi? Koro sese, enye ɔkɔdiɔk itie akan ke kpukpru isɔŋ ke iŋwaŋ-vine fo.

22 Ndien Etubom iŋwaŋ-vine ɔdɔhɔ enye ete: Kunɔ mi item; ami mma mfiɔk nte ke ekedi idiɔk itie isɔŋ; ke ntre, ami ndɔhɔ fi, ke ami mɔbɔk enye ke anyan ini, ndien afo omokut ete ke enye oŋwum ediwak mfri.

23 Ndien edikem ete Etubom iŋwaŋ-vine ɔdɔhɔ eyen-ufɔk esie ete: Sese mi; sese ami mɔtɔ ŋkɔk eto emi efen ŋko; ndien afo ɔmɔfiɔk ete ke ebiet isɔŋ emi ama ɔdiɔk akan akpa. Edi, sese eto oro. Ami mɔbɔk enye ke anyan ini emi, ndien enye oŋwum ediwak mfri; ke ntak oro, taŋ mmɔ, nyuŋ nnim mmɔ nnɔ ini idɔk edibede, man ami ntim enye nnim nnɔ idem mi.

24 Ndien edikem ete Etubom iŋwaŋ-vine afiak ɔdɔhɔ eyen-ufɔk esie ete: Se mi, nyuŋ sese ŋkɔk efen ŋko, emi ami ntɔde; sese ke ami mɔbɔk enye ŋko, ndien enye oŋwum mfri.

25 Ndien enye ɔdɔhɔ eyen-ufɔk oro ete: Se mi nyuŋ sese akpatre. Sese, emi ke ami nkɔtɔ ke eti itie isɔŋ; ndien mɔbɔk enye ke anyan ini emi, ndien ŋkaŋ kiet kpɔt ke eto emi oŋwum eti mfri, ndien ŋkaŋ eken ke eto emi oŋwum mfri ikɔt; sese, ami mɔbɔk eto emi ukem ukem nte mbon eken.

26 Ndien edikem ete Etubom iŋwaŋ-vine ɔdɔhɔ eyen-ufɔk ete: Kpi mme ŋkɔk emi miŋwumke nti mfri sio, nyuŋ top mmɔ sin ke ikaŋ.

27 Edi sese, eyen-ufɔk ɔdɔhɔ enye ete: Yak nnyin isep enye, inyuŋ itibi isɔŋ ikanare enye, inyuŋ ibɔk enye ke ekpri ini, ise mme enye oyoŋwum eti mfri ɔnɔ fi, man afo enim enye ɔnɔ ini idɔk edibede.

28 Ndien edikem ete Etubom iŋwaŋ-vine ye eyen-ufɔk Etubom iŋwaŋ-vine ema ebɔk kpukpru mfri iŋwaŋ-vine

29 Ndien edikem ete anyan ini ama ebe efep, ndien Etubom iŋwaŋ-vine ɔdɔhɔ eyen-ufɔk esie ete: Di, yak nnyin isuhɔre ika esit iŋwaŋ-vine, man nnyin ikinam utom ke iŋwaŋ-vine. Koro sese, ini ke ekpere, ndien utit kɔsɔp edi; ke ntre, ana ami nnim mfri nnɔ ini idɔk edibede, nnɔ idem mi.

30 Ndien edikem ete Etubom iŋwaŋ-vine ye eyen-ufɔk esuhɔre eka iŋwaŋ-vine; ndien mmɔ edisim eto emi ekekpide mme ŋkɔk esie emi edide nte obot edide esio, ye emi ekebaharede mme ŋkɔk ikɔt esin ke mmɔ; ndien sese kpukpru oruk mfri ema ɔyɔhɔ eto oro.

31 Ndien edikem ete Etubom iŋwaŋ-vine ama atabi mfri oro, oruk kiet kiet ke ibat esie. Ndien Etubom iŋwaŋ-vine ɔdɔhɔ ete: Sese, ke anyan ini emi ke nnyin ibɔk eto emi, ndien ami nnim nnɔ idem mi ediwak mfri mbaŋa ini idɔk edibede.

32 Edi sese, idahaemi enye oŋwum ediwak mfri, ndien ndomo kiet ke enye iduhe emi ɔfɔnde. Ndien sese, kpukpru utɔ idiɔk mfri edu; ndien enye idoroke mi ŋkpɔ ndomo kiet, kpa ye kpukpru utom nnyin; ndien idahaemi ami mfuhɔ mbaŋa nte eto emi editakde mi.

33 Ndien Etubom iŋwaŋ-vine ɔdɔhɔ eyen-ufɔk ete: Nso ke nnyin idinam eto emi, man ami mfiak ntim eti mfri esie nnim nnɔ idem mi?

34 Ndien eyen-ufɔk ɔdɔhɔ ete-ufɔk esie ete: Sese, ke ntak emi afo ekebaharede mme ŋkɔk eto olive ikɔt esin mmɔ ebɔk mme oruŋ, ndien mmɔ edu uwem mmɔ inyuŋ ikpaha; ke ntre, afo omokut ete ke mmɔ efɔn.

35 Ndien edikem ete Etubom iŋwaŋ-vine ɔdɔhɔ eyen-ufɔk esie ete: Eto emi idoroke mi ŋkpɔ ndomo kiet, ndien mme oruŋ esie idoroke mi ŋkpɔ ndomo kiet ke adaŋa ini emi enye oŋwumde idiɔk mfri.

36 Edi, ami mɔfiɔk nte ke mme oruŋ esie efɔn, ndien ke ntak uduak mi ke ami ntim mmɔ nnim; ndien ke ntak akwa odudu mmɔ ke mmɔ eŋwum tutu esim emi, eto mme ŋkɔk ikɔt, eti mfri.

37 Edi sese, mme ŋkɔk ikɔt emi ekɔri enyuŋ ewak ekan mme oruŋ oro; ndien ke ntak emi mme ŋkɔk ikɔt ewakde ekan mme oruŋ oro enye oŋwum ediwak idiɔk mfri; ndien ke ntak emi enye oŋwumde ata ediwak idiɔk mfri afo omokut ete ke enye ɔtɔŋɔ ndikpa; ndien enye ɔyɔsɔp nditak, man etop mmɔ esin ke ikaŋ, ibɔhɔke nnyin inam ŋkpɔ inɔ enye man etim enye enim.

38 Ndien edikem ete Etubom iŋwaŋ-vine ɔdɔhɔ eyen-ufɔk esie ete: Yak nnyin isuhɔre ika esit usuhɔre itie ke iŋwaŋ-vine, man ikise mme mme ŋkɔk nte obot edide enyuŋ eŋwumde idiɔk mfri.

39 Ndien edikem ete mmɔ esuhɔre eka esit usuhore itie ke iŋwaŋ-vine. Ndien edikem ete mmɔ ekut ete ke mfri mme ŋkɔk nte obot edide ekabare mbiara ŋko; iŋ, akpa ye ɔyɔhɔ iba ŋko ye akpatre; ndien kpukpru mmɔ ekabare mbiara.

40 Ndien mfri ikɔt eke akpatre ama akan ŋkaŋ eto emi ekeŋwumde eti mfri, tutu ke ŋkɔk oro ama asad onyuŋ akpa.

41 Ndien edikem ete Etubom iŋwaŋ-vine atua, onyuŋ ɔdɔhɔ eyen-ufɔk esie ete: Nso ke ami mkpakanam ŋkan emi nnɔ iŋwaŋ-vine mi?

42 Sese, ami mma mfiɔk nte ke kpukpru mfri iŋwaŋ-vine, ibɔhɔke edi emi, ema ekabare mbiara. Ndien idahaemi mmɔ emi ekeŋwum eti mfri enyuŋ ekabare mbiara; ndien idahaemi kpukpru eto ke iŋwaŋ-vine mi ifɔnke ŋkpɔ ndomo kiet ibɔhɔke edi se ekpide enyuŋ etop esin ke ikaŋ.

43 Ndien sese akpatre emi, emi ŋkɔk esie akasadde, ami nkɔtɔde ke eti ebiet isɔŋ; iŋ, kpa enye emi ami nkemekde ŋkan kpukpru mme isɔŋ eken ke iŋwaŋ-vine mi.

44 Ndien afo omokut ete ke ami ŋko mma nsibe enye emi akabiatde ebiet isɔŋ emi, man ami ntɔ eto emi ke itie esie.

45 Ndien afo ama okut ete ke ŋkaŋ kiet ama oŋwum eti mfri, ndien ŋkaŋ eken oŋwum mfri ikɔt; ndien ke ntak emi ami mme ŋkekpihi mme ŋkɔk esie nyuŋ ntop nsin ke ikaŋ, sese, mmɔ ewak ekan eti ŋkɔk anam enye asad.

46 Ndien idahaemi, sese, kpa ye kpukpru ukama emi nnyin inɔde iŋwaŋ-vine mi, mme eto esie ekabare edi mbiara, ndien mmɔ iŋwumke eti mfri; ndien mmɔ ke ami nke dorienyin nditim nnim, man nnim mfri esie nnɔ ini idɔk edibede, nnɔ idem mi. Edi, sese, mmɔ ekabare etie nte eto olive ikɔt, ndien mmɔ inyeneke ufɔn ibɔhɔke ete ekpi enyuŋ etop esin ke ikaŋ; ndien ami mfuhɔ mbaŋa nte ke mmɔ eyetak mi.

47 Edi nso ke ami mkpakanam ŋkan emi ke iŋwaŋ-vine mi? Ndi ami memem ubɔk mi, tutu ami mbɔkke enye? Iŋ-iŋ, ami mɔbɔk enye, ndien ami ntibi isɔŋ ŋkanare enye, ndien ami nsep enye, ndien ami nduɔŋɔ mbio; ndien ami manyan ubɔk mi ke ofuri usen, ndien utit ke ekpere. Ndien ami mfuhɔ mbaŋa nte ke ana mkpi kpukpru mme eto ke iŋwaŋ-vine mi, nyuŋ ntop mmɔ nsin ke ikaŋ man ata mmɔ. Anie owo ke edi emi abiatde iŋwaŋ-vine mi?

48 Ndien edikem ete eyen-ufɔk ɔdɔhɔ ete-ufɔk esie ete: Idige mmenere iŋwaŋ-vine fo—ndi mme ŋkɔk esie ikanke mme oruŋ emi edide eti? Ndien ke ntak emi mme ŋkɔk ekande mme oruŋ esie, sese mmɔ esɔp ekɔri ekan odudu mme oruŋ, eda odudu enɔ idem mmɔ. Sese, ami ndɔhɔ, ndi emi idige ntak emi mme eto iŋwaŋ-vine fo ekabare mbiara?

49 Ndien edikem ete Etubom iŋwaŋ-vine ɔdɔhɔ eyen-ufɔk ete: Yak nnyin ika inyuŋ ikikpi mme eto iŋwaŋ-vine inyuŋ itop mmɔ isin ke ikaŋ, man mmɔ ekubiat isɔŋ iŋwaŋ-vine mi, koro ami manam kpukpru. Nso ke ami mkpakanam ŋkan emi nnɔ iŋwaŋ-vine mi?

50 Edi, sese, eyen-ufɔk ɔdɔhɔ Etubom iŋwaŋ-vine ete: Yak enye ke ekpri ini.

51 Ndien Etubom ɔdɔhɔ ete: Iŋ, nyayak enye ke ekpri ini, koro ami mfuhɔ mbaŋa nte kana mme eto iŋwaŋ-vine mi etak mi.

52 Ke ntre, yak nnyin imen mme ŋkɔk emi ami ntɔde ke mme usuhore itie ke iŋwaŋ-vine mi, ndien yak nnyin ibahare mmɔ isin ke eto mmɔ eketode edi; ndien yak nnyin ikpi mme ŋkɔk eto emi mfri mmɔ odorode akan, inyuŋ ibahare isin ke mme ŋkɔk eto emi edide nte obot edide.

53 Ndien emi ke ami ndinam man eto emi idikpa, man, ndusuk, ami nyetim nnim nnɔ idem mi mme oruŋ esie mbaŋa uduak mi.

54 Ndien, sese, mme oruŋ mme ŋkɔk eto emi edide nte obot edide emi ami ŋkɔtɔde ke ebiet ekededi ami ŋkoyom esuk edu uwem; ke ntre, man ami ntim mmɔ nnim nnɔ uduak mi, ami nyada mme ŋkɔk eto emi, ndien ami nyebahare mmɔ nsin ke mmɔ. Iŋ, ami nyebahare nsin ke mmɔ mme ŋkɔk eka eto mmɔ, man ami ntim mme oruŋ ŋko nnim nnɔ idem mi, man ke ini mmɔ esɔŋde idem ekem ndusuk mmɔ eyeŋwum eti mfri enɔ mi, man ami nyene inemesit ke mfri iŋwaŋ-vine mi.

55 Ndien edikem ete mmɔ eda ke eto emi edide nte obot edide emi akakabare edieke ikɔt, enyuŋ ebahare esin ke mme eto emi edide nte obot edide, emi ekekabade edi eke ikɔt ŋko.

56 Ndien mmɔ ŋko eda ke mme ŋkɔk emi edide nte obot edide emi ekekabade eke ikɔt, enyuŋ ebahare esin ke eka eto mmɔ.

57 Ndien Etubom iŋwaŋ-vine ɔdɔhɔ eyen-ufɔk ete: Kukpi mme ŋkɔk ikɔt ke mme eto oro, ibɔhɔke enye edi mmɔ emi edorode ekan; ndien ke mmɔ ke afo edibahare isin nte asaŋade ye se ami ndɔhɔde.

58 Ndien nnyin iyifiak ibɔk mme eto iŋwaŋ-vine, ndien nnyin iyisep mme ŋkɔk mmɔ; ndien nnyin iyikpi ke mme eto oro mme ŋkɔk emi edadde, emi enade nte ekpa, inyuŋ itop mmɔ isin ke ikaŋ.

59 Ndien emi ke ami nnam, ndusuk mme oruŋ esie eyenyene odudu ke ntak mmɔ efɔnde; ye ke ntak ukpuhɔre ke mme ŋkɔk, man eti akan idiɔk.

60 Ndien ke ntak emi ami ntimde mme ŋkɔk emi edide nte obot edide nnim ye mme oruŋ esie, ye ke ami mebahare mme ŋkɔk emi edide nte obot edide nsin ke eka eto mmɔ, nyuŋ ntim mme oruŋ eka eto mmɔ nnim, ete, ndusuk, mme eto iŋwaŋ-vine mi eyefiak eŋwum eti mfri; ndien man ami mfiak nyene idaresit ke mfri iŋwaŋ-vine mi, ndien, ndusuk, nte ke ami nyadaresit ata eti eti ke ami metim mme oruŋ ye mme ŋkɔk akpa mfri nnim—

61 Ke ntre, ka, nyuŋ kot nditɔ ufɔk, man nnyin isin ifik inam utom ye odudu nnyin ke iŋwaŋ-vine, man nnyin itim usuŋ, man ami mfiak nyene mfri emi edide nte obot edide, mfri emi edide nte obot edide emi ɔfɔnde onyuŋ ɔsɔŋde urua akan kpukpru mme mfri eken.

62 Ke ntre, yak nnyin ika inyuŋ inam utom ye odudu nnyin ke akpatre ini emi, koro sese utit ekpere, ndien emi edi akpatre ini emi ami ndidiɔŋde iŋwaŋ-vine mi.

63 Ebahare mme ŋkɔk esin, etɔŋɔ ke akpatre man mmɔ edi akpa, ndien man akpa edi akpatre, enyuŋ etibi isɔŋ ekanare mme eto, ŋkani ye mbufa mbiba, akpa ye akpatre, ye akpatre ye akpa, man efiak ebɔk kpukpru mmɔ ke akpatre ini.

64 Ke ntre, etibi isɔŋ ekanare mmɔ, enyuŋ esep mmɔ, enyuŋ efiak eduɔŋɔ mbio ke mmɔ, ke akpatre ini, koro utit ekpere. Ndien edieke edide ete ke mme akpatre mbahare nsin emi eyekɔri, enyuŋ eŋwum mfri nte obot edide, idaha oro ke mbufo editim usuŋ enɔ mmɔ, man mmɔ ekɔri.

65 Ndien nte mmɔ etɔŋɔde ndikɔri ke mbufo ediduɔŋɔ mme ŋkɔk emi eŋwumde idot mfri, nte asaŋade ye odudu eti ye idaha esie; ndien mbufo ididuɔŋɔke idiɔk esie kpukpru ini kiet, man mme oruŋ esie idisɔŋ odudu ikan se eke ebaharede esin, ndien se ebaharede esin ke enye atak, ndien mme eto iŋwaŋ-vine mi etak.

66 Koro ami mfuhɔ mbaŋa nte ke ana mme eto iŋwaŋ-vine mi etak mi; ke ntre mbufo eyeduɔŋɔ idiɔk nte eti edikɔride, man oruŋ ye enyɔŋ edi ukem ukem ke odudu, tutu eti akan idiɔk, ndien ekpi idiɔk enyuŋ emen esin ke ikaŋ, man mmɔ ekubiat isɔŋ iŋwaŋ-vine mi; ndien ke ntre ke ami ndikwɔk idiɔk nsio ke iŋwaŋ-vine mi.

67 Ndien mme ŋkɔk eto emi edide nte obot edide ke ami ndifiak mbahare nsin ke eto emi edide nte obot edide;

68 Ndien mme ŋkɔk eto emi edide nte obot edide ke ami ndibahare nsin ke eto emi mme ŋkɔk edide nte obot edide; ndien ke ntre ke ami ndifiak nda mmɔ ndian kiet, man mmɔ eŋwum mfri emi edide nte obot edide, ndien mmɔ edi kiet.

69 Ndien idiɔk ke edimen isio, iŋ, kpa ke kpukpru isɔŋ iŋwaŋ-vine mi; koro sese, ini kiet emi ikpɔŋ ke ami ndidiɔŋ iŋwaŋ-vine mi.

70 Ndien edikem ete Etubom iŋwaŋ-vine ɔdɔŋ eyen-ufɔk esie; ndien eyen-ufɔk aka onyuŋ anam nte Etubom ɔkɔnɔde enye uyo, onyuŋ ada nditɔ ufɔk eken edi; ndien mmɔ ikiwakke.

71 Ndien Etubom iŋwaŋ-vine ɔdɔhɔ mmɔ ete: Eka, enyuŋ enam utom ke iŋwaŋ-vine, ye odudu mbufo. Koro sese, emi edi akpatre ini emi ami ndibɔkde iŋwaŋ-vine mi; koro utit ekperede, ndien ini emi ini idɔk ama ekebe kɔsɔp edi; ndien edieke mbufo enamde utom ye odudu mbufo ye ami mbufo eyenyene idaresit ke mfri emi ami ndinimde nnɔ idem mi kabaŋa ini emi edisɔpde idi.

72 Ndien edikem ete nditɔ ufɔk eka enyuŋ enam utom ye odudu mmɔ; ndien Etubom iŋwaŋ-vine anam utom ŋko ye mmɔ; ndien mmɔ enim ibet Etubom iŋwaŋ-vine ke kpukpru ŋkpɔ.

73 Ndien mfri emi edide nte obot edide efiak etɔŋɔ ndidu ke iŋwaŋ-vine; ndien mme ŋkɔk emi edide nte obot edide etɔŋɔ ndikɔri nyuŋ nsehe ata eti eti; ndien etɔŋɔ ndikpi mme ŋkɔk ikɔt nsio nyuŋ mmen nsio; ndien mmɔ enim oruŋ ye enyɔŋ esie ukem ukem, nte asaŋade ye odudu esie.

74 Ndien ntem ke mmɔ ekenam utom, ye kpukpru ifik, nte asaŋade ye ibet Etubom iŋwaŋ-vine, tutu emen idiɔk esio ke iŋwaŋ-vine, ndien Etubom ama etim enim ɔnɔ idem esie man mme eto efiak eŋwum mfri emi edide nte obot edide; ndien mmɔ ekabare edi idem kiet; ndien mme mfri edi ukem ukem; ndien Etubom iŋwaŋ-vine ama etim enim ɔnɔ idem esie mfri emi edide nte obot edide, emi ɔsɔŋde urua akan ɔnɔ enye tɔŋɔ ke eritɔŋɔ.

75 Ndien edikem ete ke ini Etubom iŋwaŋ-vine okutde ete ke mfri esie ɔfɔn, ndien ke iŋwaŋ-vine esie ibiarake aba, enye okot nditɔ ufɔk esie, onyuŋ ɔdɔhɔ mmɔ ete: Sese, ke akpatre ini emi ke nnyin ibɔk iŋwaŋ-vine mi; ndien mbufo emekut ete ke ami menam nte asaŋade ye uduak mi; ndien ami metim mfri emi edide nte obot edide nnim, man enye ɔfɔn, kpa nte eketiede ke eritɔŋɔ. Ndien ɔfɔfɔn ɔnɔ mbufo; koro ke ntak emi mbufo esinde ifik ke ndinam utom ye ami ke iŋwaŋ-vine mi, enyuŋ enimde ibet mi, enyuŋ efiak enɔ mi mfri emi edide nte obot edide, man iŋwaŋ-vine mi okubiara aba, enyuŋ emen idiɔk esio, sese mbufo eyedaresit ye ami ke ntak mfri iŋwaŋ-vine mi.

76 Koro sese, ke anyan ini ke ami ndinim mfri iŋwaŋ-vine mi nnɔ idem mi mbaŋa ini emi ini idɔk edibede, emi ɔsɔpde edi; ndien ke akpatre ini emi ke ami mbɔk iŋwaŋ-vine mi, nyuŋ nsep enye, nyuŋ ntibi isɔŋ ŋkanare enye, nyuŋ nduɔŋɔ mbio ke enye; ke ntre ami nyenim mfri esie nnɔ idem mi, ke anyan ini, nte asaŋade ye se ami ntiŋde.

77 Ndien ke ini ama edi emi idiɔk mfri edifiakde iduk iŋwaŋ-vine mi, ke ini oro ke ami ndinam eti ye idiɔk eboho; ndien eti ke ami nditim nnim nnɔ idem mi, ndien idiɔk ke ami ndimen nsio nsin ke itie esie. Ndien ke ini oro ke ini emi ini idɔk ama ekebe ye utit edidi; ndien iŋwaŋ-vine mi ke ami ndifɔp ye ikaŋ.