Jaroman Kellkatapa

1. Jichhasti naya Jaromajja, mä kawkha arunac kellkta, Enos awquijjan ewjjat arunacaparjama, nanacan lakʼa achilanacajjan sutinacap imañajjataqui.

2. Aca tʼalpha lekʼetanacan jiscʼätap laycu, aca arunacan Laman jake jilanacajjan asquinacapatac kellkatätap laycusti, mä jucʼa kellkañajjaw wactʼitu. Ucampis jutir urunacat yatïwinacjj janiw kellkcäti, janiraquiw Diosat yatiyäwinac kellkcaraquïti. Cunamps jucʼamp kellkerist nayajja, lakʼa achilanacajjan kellkatanacapjjaru? Janit jupanacajj khespiyasiñan utjañapjjat yatiyapqui? Yatiyapjjew sist nayajja, ucasti nayataquejj waliquiwa.

3. Lurañajj waliw aca jakenac taypina, chuymanacapan chʼollkhëtapa, jinchunacapan okarätapa, juyqhu amuyunïtapa, pʼekenacapan jan altʼirïtap laycu. Ucampis Diosajj walpin jupanacarojj qhuyapayi, janiraquiw jichhacamajj jupanacar aca oraket pichanucquiti.

4. Uqhämaraqui, waljaniw nanac taypinquirinacajj Diosat walja yatiyäwinac catokapjje, cunalaycutejj jupanacat yakhepajj altʼirïpjjewa. Cawquïrinacatejj altʼapqui, iyawsañanïpcarac ucanacajja, Kollan Ajayumpiw chuymanacapan parlasipjje. Kollan Ajayusti jaken wawanacapar iyawsañanïtaparjamaw yatiyi.

5. Jichhasti pä patac maraw sarakjjätayna. Nefi jakenacasti jachʼa marcaruw uca orakenjj tucupjjäna. Jupanacajj Moisesan leyip phokhañataquiw chʼamachasipjjäna, samarañ ursti kollanjam Tatitutac imapjjaraquïna. Janiw jupanacajj kollanäc ucjja ñankhar tucuyapcänti, janiraquiw Diosat ñankh parlapcaraquïnti. Marcan leyinacapasti wali chʼamän phokhañajja.

6. Jupanacasti uc-chʼpach orakjjar wali chʼekenokatäpjjänwa, Laman jakenacajj uqhäm chʼeketatatäpjjaraquïnwa. Jupanacasti Nefi jakenacat sipan jucʼamp waltʼatänwa; jakenacar jiwarayañ munapjjäna, lakʼonacan wilap umapjjaraquïna.

7. Walja cutiraquiw nanac Nefi jakenacamp nuwasirejj jutapjjäna, ucampis nanacan pʼekechirinacajjamp jilïr jakenacampejj Tatitur jachʼa iyawsäwinïpjjänwa. Jupanacasti jakenacaruw Tatitun thaquinacap yatichapjjäna; uqhämat Laman jakenacampejj kʼewtasipjjta. Orakenacajjatsti alisnucupjjaraquïyätwa. Marcanacajjarojj wal chʼamaniptayapjjaracta, cawqhatejj nanacan tuti orakejjäqui ucanacarusa.

8. Ucatsti walpun miratatapjjta, uc-chʼpach orakjjaruraquiw chʼekentapjjta. Korita, kollketa, cunayman cʼajquirinacata, cʼullut suma qhithutanacata, utanacata, maquinanacata, jiruta, cobreta, bronceta, acerota, take ucanacat kamirïpjjta; take cunayman casta herramientanac lurapjjta, yap yapuchañataqui, nuwasiñataqui; ari pʼeken michʼinaca, michʼi kʼepnakañanaca, dardonaca, wara lawanaca, take waquichasïwinac nuwasiñatac lurapjjaracta.

9. Uqhäm Laman jakenacatac waquichasitïpan jupanacajj janiw nanacarojj atipapquitänti. Ucampis Tatitun arupajj chekätap yantʼasïna; jupajj awquinacajjaruw säna: Camächitanacajjarutejj phokhapjjätajja, orakenjj jachʼaptapjjätawa.

10. Tatitun arjirinacapasti Nefi jakenacaruw ewjjapjjäna, Diosan aruparjama, janitejj jupanacajj camächitanac phokhapcaspajja, uca lant leytejj pʼaquipjjaspa, ac-chʼpach orakjjan tucqhatäpjjäspawa.

11. Ucat arjirinacajj sacerdotenacamp yatichirinacampejj wali amuyump chʼamtʼapjjäna, jan karjasisaw jakenacarojj kʼaphäñapatac ewjjtʼapjjäna. Moisesan leyip yatichapjjäna, uqhämaraqui cunataquitejj uca leyejj churatäcän uc yatichapjjaraquïna. Ewjjapjjaraquïnwa, Mesiasar suyapjjam sasina, jutäwipar niyas jutcaspajj uqhäm iyawsapjjaraquim –sasa. Uqhäm jupanacarojj yatichapjjäna.

12. Ucanac lurasin, yatichirinacajj jakenacar uca orakjjan tucqhatäñapat cutekayapjjäna. Jupanacajj arumpiw jaken chuymanacap chʼalljtayapjjäna, juchat cutiquipstañcam jupanacar amtayasa.

13. Pä patac quimsa tunc quimsakallkon maraw sarakjjäna, chʼajjwanacas tokesiñanacas ucapachajj waliw utjäna.

14. Naya Jaromasti, kellkañ tucuyta, aca tʼalpha lekʼetanacan jiscʼanacätap laycu. Ucampis jilanacajja, Nefin yakha tʼalpha lekʼetanacap thakapjjam, ucanacan kellkataw nuwasïwinacajja, pʼekechirinacan kellkataparjama, jan ucajj cuntejj jupanacajj kellkayapcän ucarjama.

15. Aca tʼalpha lekʼetanacsti Omni yokajjaruw catuyta, lakʼa achilanacajjan arsut arunacaparjam imatäñapataqui.