Mormonan Arunacapa

1. Jichhajja, naya Mormonajj lurcäyät uca kellkatanac Moroni yokajjan amparapar niy catuyañampïsaw Nefi jake marcajjan takpachjam tucqhatäñap uñjta.

2. Uqhämaraqui Criston jutäwipatjja, walja patac mararaquiw sarakjjäna. Aca kellkatanacsti yokajjan amparaparuw catuyta; jupajj marcajjan kʼala tucqhatäñapjja, uñjasamachaniwa. Ucampis Diosajj juparojj tʼunjäw taypit mistuñapatac jacäw churpan, jupan mä kawkhanac jupanacjjat kellkañapataqui, Cristots mä kawkhanac kellkañapataquiraqui, uca kellkäwinacan mä urojj marcajjan asquïñapataquiwa.

3. Jichhasti cuntejj kellkcta ucjjat mä jucʼ arstʼä, cunalaycutejj nayajj Nefin tʼalpha lekʼetanacapat jiscʼar apsusin Benjamin pʼekechirin marcar sarayatapcama, qhitit-tejj Amalequejj parlcäna, uca luratajj khepatjja, cuna kellkatanacatejj nayan amparajjar catuyatäcän ucanac taypin thakta. Ucat aca tʼalpha lekʼetanac jicjjataracta. Acansti arjirinacjjat mä kawkha kellkat jicjjat-ta, Jacob arjirita, aca Benjamin pʼekechircama. Uqhamaraquiw Nefin walja arunacapajj utjaraquitayna.

4. Cunalaycutejj uca tʼalpha lekʼetanacancqui ucanacajja, nayar wal cusisiyitu, uca kellkatanacan Criston jutäwipat yatiyatap laycu; awquinacajjan ucanacat waljanac phokhasitap yatïwip laycuraqui; uqhämaraqui kawkha cunanacatejj nanacat jichhürcamajj yatiyatäcän take ucanacan phokhasïwip yatiracta; kawkhatejj jutir urunacan phokhasiñapajj utjqui ucanacajja, phokhasipuniraquiniwa.

5. Ucat aca arunac ajllta nayan kellkatajj tucuyañataqui. Uca jiltʼa kellkatajjsti nayajj Nefin tʼalpha lekʼetanacapat apsü; janiw marcajjan sarnakäwipatjj takpach kellkcaraquirist-ti.

6. Ucampis aca tʼalpha lekʼetanacjja, nayan kellkatajjamp chic apthapï, cunalaycutejj ucanacajj wali munataw nayataquejja; acanjja jutir urunacat yatiyäwinacampi, Diosat yatiyäwinacapampiw utji. Uqhämaraquiw nayajj yatiracta jilanacajjataquejj uqhäm wali munataraquïniwa.

7. Acsti yatit amtäwirjamaw lurta, cunalaycutejj uqhäm chuymajjar amuyayitu, nayancqui uca Tatitun Ajayupan luräwiparjama. Janiw nayajj take cun yatcti, ucampis Tatitojj take cunatejj jutcan uc yati; ucat jupajj munañaparjam lurañataquiw naya tok luri.

8. Nayan Diosar achicasïwijjajj jilanacajjataquiwa, jupanacan Diosan utjatap wastat yatiñar cut-tapjjañapataqui; jïsa, Criston jupanacan wastat suma munat jakëpjjañapataqui.

9. Jichhasti naya Mormonajja, cuna kellkatatejj Nefin tʼalpha lekʼetanacapat apscta uc tucuyä; uca kellkatajjsti cuna yatïwimp amuyumptejj Diosajj churquitu ucarjamaw luraracta.

10. Ucat Amalequejj aca tʼalpha lekʼetanac Benjamin pʼekechirir catuyqui uca khepatpach Benjaminajj acanacamp yakha tʼalpha lekʼetanacamp chic uscüna. Uca yakha tʼalpha lekʼetanacasti pʼekechirit pʼekechirir Benjamin pʼekechirin urunacapcam catuyatänwa.

11. Ucat ucanacajj Benjamin pʼekechirit kalltasin, yakhat yakhar catuyatänwa, nayan amparajjar puriñapcama. Naya Mormonasti jichhat ucsarojj ucanacan imatäñapataquiw Diosat mayista. Ucanacan imatäñapjj yatiractwa; cunalaycutejj jachʼa cunaymananacaw ucan kellkata. Uca jachʼa cunaymananacat marcajjamp jilanacapampejj Diosan kellkat aruparjamaw khep khepa jachʼa urun taripatäpjjani.

12. Jichhasti uca Benjamin pʼekechirit parlasajja, mä kawkha chʼajjwanacaw jupan quipca marcap taypin utjaraquïna.

13. Uqhämaraquiw Laman jakenacan nuwasiri tamanacapajj Nefi oraket Benjaminan marcapamp nuwasirejj jutapjjaraquïna. Ucampis Benjamin pʼekechirejj nuwasiri tamanacaparojj mayaruw mayachthapïna ucat Laman jakenacaru saytʼasïna, jupasti quipca amparapan chʼamapampiw Labanan espadapamp nuwasiraquïna.

14. Tatitun chʼamapampiw jupanacajj timanacapamp walja warank Laman jakenacar jiwarayañcam nuwasipjjäna; uqhämaraquiw Laman jakenacaru uc-chʼpach tuti orakenacapat tʼiscsuyañcam nuwasipjjaraquïna.

15. Ucatsti cʼari Cristonacan sartatap khepata, lacanacapan jistʼthapitätap khepata, juchanacapatjam mutuyatätap khepataraqui;

16. Uqhämaraqui, cʼari arjirinacan, cʼari yatichirinacan, cʼari yatirinacana, jakenac taypin utjcän ucanac, juchanacapatjam mutuyatäcaraquïn uca khepata; uqhämaraqui walja chʼajjwanac utjatap khepata, Laman jakenacar waljan maqhatjjapjjatap khepatjja, Benjamin pʼekechirejj marcap taypinquir kollan arjirinacan yanapäwipampi.

17. Cunalaycutejj Benjamin pʼekechirejj kollan jakënwa. Marcaparusti cheka cancañampiw sarayaraquïna; walja kollan jakenacaw uca oraken utjäna. Jupanacasti Diosan arup parlapjjäna, chʼamampi munañan cancañampiraqui; uqhämaraquiw jupanacarojj tokesipcaspas uqhäm ewjjapjjaraquïna, jakenacan Dios nayrakatan jan altʼapjjerïtap laycu.

18. Uqhämasti ucanacan yanapäwipampiw Benjamin pʼekechirejj, takpach janchipan chʼamapampi, takpach ajayun amuyupamp chʼamtʼasaw uca oraken sumañcañ wastat ut-tʼayäna. Cunjämtejj arjirinacajj lurapcän uqhäma.