Omnin Libropa

1. Jichhasti naya Omnejja, Jarom awquijjan ewjjap catokta, mä kawkhanac aca tʼalpha lekʼetanacjjar kellkañajjataqui, lakʼa achilanacajjan sutinacap imañataqui.

2. Ucat nayan sarnakäwijjan espadamp wal nuwasta Nefi arquiri marcajjan Laman jake timanacapan amparapar jan puriñapataqui. Ucanac yatiñam munirista. Ucampisa nayaw ñankha jakëtjja, janiw nayajj Tatitun leyinacapsa camächitanacaps phokhcti, cunjämatejj lurañajjajj wactʼquit uqhäma.

3. Pä patac pakallk tunc sojjtan maraw sarakjjäna. Nanacansti walja sumancañ pachanacaw utjäna, uqhämaraqui walja jachʼa nuwasïwi wil wartäwi pachanacas utjaraquïna. Ucat pä patac quimsakallk tunc payan maraw sarakawayjjäna, nayasti aca Tʼalpha Lekʼetanacjja, awquinacajjan camächitaparjamaw imta; Amaron yokajjaruw ucanac catuyawayjjta. Ucampiw tucuyjjaracta.

4. Jichhasti naya Amaronajj cuntejj kellkcta uc awquijjan kellkatanacapar kellkta, ucanacasti jucʼaquiwa.

5. Jichhasti quimsa patac pä tuncan maraw sarakjjäna, jucʼamp ñankha Nefi jakenacasti kʼala tucqhatänwa.

6. Cunalaycutejj Jerusalen marcat apsutapatjja, timanacapan amparapar puriñat khespiyatapatjja, cuna arunactejj lakʼa achilanacajjar parlqui, ucanacan jan phokhasiñap Tatitojj jan muncänti. Jupanacarusti camächitanacajjar jan phokhañamarjamajj janiw uca orakenjj jachʼaptapcätati –sänwa.

7. Ucat Tatitojj jachʼa taripäwimp jupanacarojj taripi; ucampis asqui jakenacarojj janiw takpach tucqhayquiti. Timanacapan amparapat jupanacarojj khespiyi.

8. Ucatsti nayajj Tʼalpha Lekʼetanac Quemis jilajjaruw catuyta.

9. Jichhasti naya Quemisaw kellkta, cuna jucʼanactejj kellkcta pachpa jilajjan kellkatanacaparu, cunalaycutejj cuntejj khepa tokerojj jupajj kellkqui ucjj uñjtwa. Jupasti pachpa amparapampiw ucjj kellke, nayar acanac catuyquitojj ucürpachparaquiw ucanacjj kellke. Uqhämat nanacajj kellkatanac catjjäsipjjta, ucasti awquinacajjan camächitaparjamawa. Uqhämasti nayajj tucuyjjtwa.

10. Jichhasti, naya Abinadomajj Quemisan yokapätwa. Nayasti nanac Nefi jakenacamp Laman jakenacamp nuwasïwinacapa, chʼajjwanacap uñjta. Nayasti quipca espadajjampiw walja Laman jakenacar jiwarayta, jilanacajjar arjjatasa.

11. Aca jakenacan sarnakäwinacapajja, pʼekechirinacans mitat mitar catuyatäqui uca tʼalpha lekʼetanacar kellkatawa. Janiw nayajj Diosat yakha yatiyäwipatjj yatcti, kellkatäc ucac yat-ta. Janiraquiw jutir urunacat jan kellkat yatiyäwitjj yatcaracti; uqhämasti cunatejj kellkatäc ucajja, walïquiwa. Ucampiw tucuyjjta.

12. Nayajj Amalequi Abinadoman yokapätwa, nayasti mä kawkhanac Zarahemla orakjjar pʼekechir tucuyatäcän uca Mosiat parlapjjäma. Cunalaycutejj jupajj Tatitun yatiyatänwa Nefi oraket mistuñapataqui, kawkha jakenacatejj Tatitun arupar istʼapcän yäkapcaraquïn ucanacamp uca oraket wasarar chic mistsuñapataqui.

13. Ucatsti jupajj Tatitun camächitaparjamaw luräna; cawquïrinacatejj Tatitun arupar yäkapcänjja, istʼapcaraquïn ucanacajja, uca oraket wasararuw mistupjjäna. Jupanacajj walja yatiyäwinac toke jutir urunacat yatiyäwinac tokeraquiw irpatäpjjäna. Jupanacasti sapa cutiw Diosan ewjjatäsa, jupan amparapan chʼamapan uca wasaranjam irpatäpjjaraquïna, Zarahemla orak sat oraker sarakañapcama.

14. Ucatsti jupanacajj Zarahemla sat jakenac catjjapjjäna. Zarahemla jakenac taypin wali jachʼa cusisiñaw utjäna. Zarahemla jakesti walpin cusisiraquïna, Tatitun Mosiah jakenacar bronce tʼalpha lekʼetanacamp qhitanitap laycu. Uca bronce tʼalpha lekʼetanacasti judionacan sarnakäwipanïnwa.

15. Ucat Mosiajj Zarahemlanquir jakenacan Jerusalenat jutirïtap yatjjäna; jupanacasti Judan Sedecias sat pʼekechiripajj catuntatäsin Babilonia marcar irpatäcän ucapachaw Jerusalenat mistupjjäna.

16. Jupanacasti chʼusa wasaranjam sarapjjäna. Jupanacarusti Tatitun amparapajj jachʼa lamar umanacanjam irpasincäna, cawqhantejj Mosiajj jupanacar jicjjatqui uca orakeru. Uca pachatpach uca oraken utjasipjjatayna.

17. Cunapachatejj Mosiajj jupanacar jicjjatcän ucapachajja waljanïpjjataynawa, ucampis walja nuwasïwinacamp jachʼa chʼajjwanacampiw jupanac taypin utjaraquitayna. Yakhep pachajj espadamp jiwayatäpjjaraquitaynawa; arupasti cunaymanar pejjtuntatänwa. Janiraquiw cuna kellkatanacs jupanacamp chicajj apnakapcaraquïnti; Luriripan utjatapjj janiw amuyasipcänti. Mosian jakenacapas janiraquiw jupanacan arup amuyapcaraquïnti.

18. Ucampisa Mosiajj quipca arupat jupanacar yatichayäna. Mosian arup yatichayatap pasatatjja, Zarahemla jakejj amuyuparjam lakʼa achilanacapat khanañchäna; jupanacan sutinacapajj kellkatawa, ucampis janiw aca tʼalpha lekʼetanacancquiti.

19. Ucatsti Zarahemla jakenacamp Mosia jakenacampejj mayaruquiw mayachthapisipjjäna, Mosiasti pʼekechirit ut-tʼayatänwa.

20. Ucat Mosian urunacapan mä jachʼa kal jupar apcatapjjäna, uca kalansti kellkatanacaw utjäna. Diosan chʼamapamp wajjtʼäwipampiw Mosiajj uca kalan kellkatanac arsuyäna.

21. Uca kellkatanacasti Coriantumr sat mä jaketa, jupan marcapan jiwayatanacapat yatiyäna. Zarahemla jakenacasti Coriantumr jakeruw jicjjatapjjäna; jupasti jupanacamp llätunc phajjsiw kamawayäna.

22. Uca kalansti mä kawkha arunacajj, Coriantumr jaken lakʼa achilanacapat kellkataraquïnwa. Cunapachatejj Tatitojj jakenacan arup pejjtuntcän ucapachaw Coriantumran nayra awquinacapajj torret jutapjjäna. Tatitun chʼamätapajj jupanacaruw puri, asqui taripäwinacaparjama; jupanacan chʼaqhanacapasti alay oraken chʼeketatatawa.

23. Jichhasti naya Amalequejj Mosian urunacapan nasta; jupan jiwañapcamaraquiw jacaracta; Benjamin yokapajj jupa lantiw marcar sarayi.

24. Ucat Benjamin pʼekechirin urunacapan mä jachʼa nuwasïwimp walja wil wartäwimp uñjta, Nefi jakenacamp Laman jakenacamp pura. Ucampis Nefi jakenacajj jupanacaruw atipapjje; ucatsti Benjamin pʼekechirejj jupanacarojj Zarahemla oraket alisnucüna.

25. Nayasti chʼama karit awquirquipstascäyätwa. Jan wawanïtajj laycusti, Benjamin pʼekechiriruw aca tʼalpha lekʼetanac catuyä, Tatit nayrakatan asqui jakëtap yatcasa take jakenacar Diosar Israelan Kollanapar jutapjjañapatac ewjjasa, uqhämaraqui jutir urunacjjat yatiyäwinacar iyawsapjjañapataqui, Diosat yatiyäwiparu, jupan qhitanacapan lurañanacaparu, yakha lajjrat parlañ churäwiru, arunac jakoquipañ churäwiru, cunatejj sumäqui take ucanacar iyawsapjjañapataquiraqui; cunalaycutejj take suma asquejj Tatitut juti; cunatejj ñankhäqui ucasti supayat juti.

26. Jichhasti munat jilanaca, nayajj Cristo Israelan kollanapar jutjjapjjañam munta, jupan khespiyäwipar cutsuyäwipan chʼamapar mantapjjañamataqui. Jïsa, jupar jutapjjam, ucat takpach chuymanacam jupar wajjtʼäwjam loktapjjam. Ayunapjjapunim, uqhämaraqui Diosat mayisisipcaquim, tucuycam thurtʼasipjjaraquim. Chekpachaw Tatitojj jaqui, khespiyatäpjjaraquïtawa.

27. Jichhasti nayajj mä jucʼa parlañ munirista, kawkhanitejj chʼusa wasarar maqhatapcän Nefi oraker cut-tiri ucanacjjata, cunalaycutejj waljaniw tuti orakepancañ munapjjäna.

28. Ucat chʼusa wasarar maqhatapjjäna. Jilïripajj jachʼa chʼaman jakënwa, janiw Dios nayrakatanjj altʼirïcänti. Ucat jupajj chʼajjwayän jupanacarojja. Niy takpachanjamaw chʼusa wasaran jiwarayatäna, pheska tuncaniquiw jiltʼi; ucanacasti Zarahemla oraker wastat cut-tapjjäna.

29. Ucat jupanacajj waljaniruraquiw irpapjjäna, wastat chʼusa wasarar sarapjjaraquïna.

30. Naya Amalequisti mä jilanïyätwa, jupasti jupanacamp chicaw saräna; ucqhatpachaw jan jupanacat yatcti. Nayasti jiwirjamäjjtwa; aca tʼalpha lekʼetanacasti phokhatawa. Uqhämasti acqharuw arsuñ tucuyta.