Enosan Kellkatapa

1. Naya Enosajja, awquijjan asqui jakëtap yat-ta, cunalaycutejj jupajj lajjrapat yatichitu, uqhämaraquiw Tatitun uywañapan ewjjañapan yaticharaquitu. Ucalaycu, Diosajjan sutipajj jachʼar aptatäpan.

2. Jichhasti yatiyämawa cunjämtejj Diosan nayrakatapan mayjtʼascäyäta, juchanacajjat janïr pampachayascasajja.

3. Nayajj chʼumiruw sarta mankʼañatac jiwayiri. Ucan parlapuniricän ucat amtasta cunjämtejj awquijjajj wiñay jacañjjat arsupunïna, kollan jakenacan cusisiñapasti, chuymajjaruw chʼalljjtayitäna.

4. Chuymajjasti awtjayasiwa. Ucat Luririjjan nayrakatapan konkortʼasta; naya quipcataquiw jupar achictʼasiracta jachʼa mayisiñamp walpin achictʼasisa. Ur pakariw jupar artʼasta, jïsa, cunapachatejj arumthapcän ucapachasti, jachʼat artʼasiscactwa, arujjan alajjpachar puriñapcama.

5. Ucat mä aruw nayar jutitu, aqhäm sasa: Enos, juchanacamajj pampachatäjjewa, jumasti qhuyapayataraquïyätawa.

6. Naya Enosasti Diosan janipin cʼarisirïtap yatïyäta, ucat nayan juchat llaquisiñajjajj apakatäjjäna.

7. Nayasti juparojj sistwa: Tatay, cunjämats ucajj lurasi?

8. Jupasti nayarojj sanituwa: Juman Cristor iyawsatamat lurasi, qhitirutejj janipin cunapachas istʼcta, uñjcaracta. Walja maranacaw sarakani jupajj janchin janïr uñstcan ucqhacamajja. Uqhämasti, sarjjam; iyawsäwimaw jumar asquiptaytam –sasa.

9. Ucatsti, uca arunac istʼasin nayajj Nefi jake jilanacajjan sum sarnakañap munañ kalltäyäta. Ucat jupanacataquejj takpach chʼamajjamp chuymajjampiw Diosat mayirapta.

10. Nayajj uqhäm ajayun kʼewtʼascäyät ucqhaw, Tatitun arupajj wasitat amuyujjar manti, aqhäm sasa: Jilanacamaruw tumpä, jupanacan camächitanacajjar phokhañaparjama. Nayaw jupanacarojj aca orak churjjta; aca orakesti kollan orakewa. Janiraquiw aca orakerojj ñankhachcäti, jaken ñankh luratap laycuquiw ñankhachatäni, Ucat nayan arsüwijjarjamaw jilanacamar tumpä. Jupanacan juchanacapatsti llaquisiñampiw quipca pʼekenacapjjar apjjatä.

11. Naya Enosasti uca arunac istʼasinjja, Tatitur iyawsañajjajj jan pächasiriw tucüna. Ucatsti jan inactʼasaw jupat mayiracta Laman jake jilanacajjataqui.

12. Ucatsti, nayan take chʼamamp mayisitajj khepata, wali amuyump achictʼasitajj khepatarac Tatitojj nayar situ: Iyawsatam laycuw, munatamarjam churäma.

13. Acän jupat catokañ munatajjajja: Nefi marcajjatejj juchar purispa, ucat cunjämats tʼunjataspa ucajja, Laman jakenacasti janirac tʼunjatäcaspat ucqhajja, Dios Tatitun Nefi jakenac sata marcajjan sarnakäwipjjat kellkatanac imañap munayäta, kollan amparapan chʼamapampiquisa. Uca kellkatanac khepürun Laman jakenacan ucar apañataqui, inas uqhämat jupanacajj khespiyasiñ toker irpatäpjjchispa.

14. Cunalaycutejj jichhacamajj jupanacar chekpach iyawsañar cutjtayañatac chʼamachasipjjatajjajj inamayaquiwa. Kʼapisisaw jupanacajj arsupjjäna nanacan sarnakäwi kellkatanacajjar tʼunjañataqui, nanacar jiwarayañataqui, uqhämaraqui awquinacajjan jichuntat luräwinacapar chhaktayañataqui.

15. Uqhämasti kellkatanacajj imañatac Diosan chʼamanïtap yatisin nayajj jupar artʼascapunïyäta, cunalaycutejj jupajj nayrapachajj sitänwa: Cuntejj iyawsañamp nayat mayisïta, Criston sutipjjaru catokañam iyawsasajja, ucjj catokätawa.

16. Nayasti iyawstwa, ucat Diosar artʼasiracta kellkäwinacajjar imañapataqui. Ucat jupajj mä arusjäwiruw nayamp manti kellkäwinac Laman jakenacar uñstayañataqui, cunürutejj amuyuparjam waliquïcaspa ucüruna.

17. Naya Enosasti yatïyätwa, cawquïr amtäwtejj jupajj nayamp lurcän ucarjam lurañapa; ucat chuymajjajj samari.

18. Tatitusti nayarojj aqhäm situwa: Awquinacamajj uc lurañajjataquejj mayisipjjaraquitänwa. Jupanacan iyawsañaparjamaraquiw ucajj jupanacatac luratäni, cunalaycutejj jupanacan iyawsañapajj juman iyawsañamjamänwa.

19. Uca khepatsti, naya Enosajja, Nefin jakenacap taypin sarnakawayäyäta, Diosan arjasina, cunanactejj uñjcäyätsa istʼcaraquïyätsa ucanacat ircatasaraqui.

20. Ircataractwa, Nefin jakenacapajja, take chʼamapampiw irnakapjjäna Laman jakenac Diosar cheka iyawsañar cut-tayañataqui. Ucampis chʼam tucupjjatajjajj inamayaquïnwa. Uñisïwipajj jan tucuycayänwa. Jupanacasti ñankha chuymanacapan irpatäpjjänwa, chʼumi lakʼonacjam ajjsarcañ wali wil wartir marcaruw tucupjjaraquïna. Jupanacasti wacʼaru, yakha diosanacaruw yupaychapjjäna, kʼañu luräwinacamp phokhantatäpjjaraquïnwa, ajjsarcañ lakʼonacarac mankʼapjjäna, chʼujllanacan utjasipjjaraquïna. Chʼusa wasaran maysat maysar aywinakapjjäna, jiscʼa lipʼich wacʼamp wacʼantata. Ñicʼutapasti kʼala mururataraquïnwa. Michʼi illaptʼaña, sable, hacha, take ucanac wali sum apnakañ yatipjjäna. Waljaniraquiw jupanacat chʼoke aych mankʼapjjäna. Jupanacasti sapürojj nanacar jiwarayañataquiw thakapjjetäna.

21. Nefin jakenacapasti yapunac yapuchapjjäna; take cunayman yaran achunac achuyapjjäna; uywa tamanac uywapjjaraquïna, take cunayman casta vaca tamanacaraqui; chiwunaca, kollunquir chiwunaca, take cunayman caballonacaraqui.

22. Nanac taypinsti Diosan arjirinacajj sinti waltʼatänwa. Jakenacasti jan altʼir chʼollkhe amuyun jakenacapjjänwa.

23. Janiw cunas jupanacan mäqui tʼunjañ toker jalantapjjañapat jarqʼirejj utjcänti. Jan ucasti, chʼama arunacamp jupanacar parlaña, yatichaña, tʼunjäwinacat yatiyaña, jiwañat amtayaña, wiñay wiñayan jan tucusïwipat amtayaña, taripäwinacat parlaña, Diosan chʼamapat parlaña, take ucanacat parlaña, Tatitun ajjsarañapan saytʼapjjañapatac onjjtayasaquiw tincüwipat jarcʼakañjamäna. Ucatarac nayajj jupanacjjat kellkta.

24. Nayasti Nefi jakenacamp Laman jakenacamp nuwasïwinacap jacäwijjan uñjaracta.

25. Ucatsti nayajj chuymaniptäyätwa. Lehi awquijjan Jerusalenat mistutapatjja, patac pakallk tunc llätuncan maraw sarakjjäna.

26. Amuyasiraquïyätwa, nayan amay imäwir sarakañajjan jacʼäjjatapa. Nayasti Diosan chʼamapan khanañchatäyätwa, aca marcar arjañajjataqui yatichañajjataquiraqui, uqhämaraqui Cristonquir chekätaparjam ar yatiyañajjataqui. Takpach jacäwijjan ucanacjjat yatiyäyäta. Uqhäm lurasaw wal cusisïyäta aca oraken utjquis ucanacat sipana.

27. Jichhasti cawqhantejj samarcäs uca chekarojj niy sarirjamäjjtwa. Uca chekasti nayan Cutsuyirijjamp chicäniwa, cunalaycutejj nayajj yat-twa, jupan samarañ jicjjatä. Walpin cusisiracta cunalaycutejj mä uruw janchijjajj jan jiwquir janchir tucuni, nayasti jupan nayrakatapan saytʼaraquï; ucat ajanuparojj cusisiñampiw uñcatä. Jupasti nayarojj saraquitaniwa: Nayar jutjjam, qhuyapayat jake. Jumataquejj waquichat chekaw utji, Awquijjan khapak utanacapana. Uqhämapan.