1. Mä kawkha mar sarakatapatjja, Nefi jakenac taypiruw Serem sat mä jakejj jutäna.

2. Jupasti jakenac taypin yatiyañ kalltaraquïna, janiw cuna Cristos utjcanit –sasa. Walja cunaymaninac jakenacar alek jachʼar aptañataquic yatiyaraquïna; ucsti Criston yatichäwip maysar quipstayañataquiw luräna.

3. Jan karisaw jupajj jakenacan chuymanacap mayjaptayañatac trabajaraquïna, ucat walja chuymanacaruw chekäc ucat irpsuraquïna. Jutcan uca Cristor naya Jacobon iyawsañanïtajj yatiraquïna, ucat wal jupajj nayamp jiquisiñ munäna.

4. Jupajj wali yatiñan jakënwa, jakenacan arupsti phokhatpach yatïna. Ucat supayan chʼamaparjamaw alek jachʼar aptäwinacamp yatiñ arupampejj parläna.

5. Nayan walja ucanacat Diosat yatiyäwipajj utjc-chïnsa, wal uñjcstsa, jupajj nayar iyawsañajjan pächasiñap suyäna. Chekpachapuniw nayajj quitanacar uñjascta, jupanacasti nayaruw yaticharaquitu. Uqhämaraquiw mä kawkhat mä kawkha pachat nayajj Tatitun arupar nayar parlir istʼaracta; ucat nayarojj janiw pächasiyquitaspati.

6. Ucatsti jupajj nayan uc jutitu, aqhäm sasaw parlaraquitu: Jacob jilata, walja cutiw nayajj jumamp parlañjj munäyäta. Cunalaycutejj istʼtwa, yatiractwa Diosan arupaw sisctas ucat wal parlatama, jan ucajj Criston yatichäwipata.

7. Jumajj aca marcatjja, walja jakenacaruw cheka thaquit irpstajja, jupanacasti Diosan cheka thaquip ñankhar tucuyapjje. Jupanacasti cheka thaquïqui uca Moisesan leyipjj janiw phokhapquiti. Ucatsti Moisesan leyipjja, mä jaker yupaychañaruw cutiquipstaytajja, jumasti, uca jakejj acat walja patac mararuw jutani –sasaw sistajja. Jichhasti naya Seremajj jumaruw uca sataman Diosat ñankh parlatätap yatiysma, cunalaycutejj janiw qhitis ucanacat yatquiti; janiw qhitis jutir cunaymaninacat yatcaraquispati. Uqhäm Seremajj nayarojj chʼajjwitu.

8. Ucampis Dios Tatitojj Ajayup chuymajjan phoktʼayi. Ucat takpach Sereman arunacap jupar pejjtunt-ta.

9. Juparusti saractwa: Cristojj jutcan uca Cristorojj janit catokcäta? Ucat jupajj situ: Mä Cristotejj utjaspajja, janiw jan uñtʼirejj tucquirist-ti, ucampis Criston jan utjatapjj yat-twa. Janiw utjcänti, janiraquiw utjcaraquiniti.

10. Nayasti juparuw jisctʼta: Kellkatanacar iyawstati? Jupasti jïsa, situwa.

11. Ucat nayajj juparojj sista: Uqhämajj jumajj janiw kellkatanac amuyctati; ucanacaw Cristotjj chekpach ircatapjje. Nayajj jumaruw sisma: Diosan sapa arjiripajj Cristotac ircati, jupat kellkapjjaraqui.

12. Janiw ucajj takpachäquiti: nayaruw uñstayitu, nayasti istʼtwa, uñjaractwa; Kollan Ajayun chʼamapaw nayar yatiyaraquitu. Ucalaycu, janitejj mä qhitis juchanac lanti tʼakhesiñar uchascaspajja, take jaken chhakañapaw utjaspa.

13. Ucat jupajj nayarojj situ: Cawquïrit-tejj jumajj wal yatcta, uca Kollan Ajayun chʼamaparjam mä uñachayäw uñstayita.

14. Ucat juparojj sista: Qhitïts nayajj Diosar uqhäm yantʼañajjataqui, uñachayäw uñstayam sañajjataquejja? Jumasti ucan chekätapjj yatiracstajjaya, ucampis supayat jutatam laycuw uca yatïwimatjja, janiw yatcti, sät jumajja. Jan nayan munañajjarjam luratäcpanti; ucampis Diosatejj tʼakhesiycätam ucqhajja, jumataquejj uñachayäwïspawa. Uca luräwisti Diosan acapachans alajjpachans chʼamanïtap yatiyi. Ucatsti Criston jutañapat yatiyaraqui. Tatay, juman munañamarjam luratäpan, jan nayan munañajjarjamäpati.

15. Naya Jacobojj uca arunac arsta ucqhaw, Tatitun chʼamapajj jupjjar juti, jupasti orakeruw liwitat-ti. Ucat walja uruw jupajj mankʼayatäna.

16. Ucat jupajj jakenacar säna: Kharür tantachasipjjam, cunalaycutejj nayajj jiwjjäwa; nayasti janïr jiwcasaw jakenacar parlañ munta.

17. Ucat khepürojj walja jakenacaw tantachasipjjäna. Jupasti jupanacarojj khan parlaraquïna: Cuntejj nayajj jumanacar yatichapcsma ucanacajja, cʼariwa –sasaw saraquïna. Ucat jupajj Criston chekätap arsüna, Kollan Ajayun allajjpach quitanacan yanapirïtapat arsusiraquïna.

18. Jupajj khan jupanacar parli, supayan chʼamapaw nayar sallkjjetu –sasa. Seremasti mankhapachat parläna, uqhämarac wiñay pachata, wiñay mutuyäwit parlaraquïna.

19. Jupajj saraquïnwa: Wal ajjsartayasta, jan kʼomachcayäqui uca juch lurquirists uqhäm amuyasta. Nayajj Diosaruw cʼarint-ta, cunalaycutejj Criston chekätapajj cʼariw sistwa, ucatsti kellkatanacaparojj chekaw saractwa. Kellkatanacasti chekpachaw Cristot ircatapjje. Diosar uqhäm cʼarintatajj laycuw nayataquejj sinti ajjsarcañäspa –sasaw ajjsarayasta, ucampis Diosaruw arsusta.

20. Uca arunac arsusinsti, janiw jucʼamp arsuñatac chʼamanïcänti, ucat jiwawayjje.

21. Uca walja jakenacasti jupan ucanac arsusis tucusitap uñjasajja, wal muspharapjjäna. Diosan chʼamapasti jupanacjjaruw sarakanïna, jupanacasti orakeruw liwirtapjjäna.

22. Ucasti naya Jacoborojj cusisiyituwa, cunalaycutejj ucjj alajjpachanquir Awquijjat mayista. Jupasti artʼäwijjaruw istʼitu, mayisïwijjarjamaw luraraquïna.

23. Ucatsti, sumancañamp Diosar munañampejj wastat jakenac taypin cutjtayatäjjäna. Jupanacasti kellkatanac yatjjatapjjäna, janiraquiw uca ñankha jaken arunacaparojj jucʼamp yäkapcaraquïnti.

24. Ucat cunayman toket Laman jakenacar cutjtayañataquiw amuytʼapjjäna. Ucatsti chekäqui uc yatiñar wasitat irpanjjañataquiw amuytʼapjjaraquïna. Ucampis take ucanacajj inamayaquïnwa, cunalaycutejj nuwasïwinacats wil wartäwits Laman jakenacajj cʼuchïquipjjänwa, nanac jilanacaparusti wiñayaw uñisipjjaraquitäna. Armanacapan chʼamapampisti nanacarojj tucqhañ sapa cutiw yantʼapjjaraquitäna.

25. Ucat Nefi jakenacajj nuwasiri jakenacapamp chʼamanacapampejj Laman jakenacaru chʼamañchasipjjäna. Dios khespiyir karkaparuw alcatapjjäna; ucat jupanacajj timanacaparojj ucapachan atipasipcaquïna.

26. Naya Jacobosti chʼama karit awquirquipstjjäyätwa. Aca jakenacan sarnakäwinacap Nefin yakha tʼalpha lekʼetanacapjjar kellkatïpana, aca kellkat yatïwijjarjamaw kellkta –sasin tucuyta. Tiempompi jacäwinacajjampejj samcäcaspas uqhämaw sarakjjäna, cunalaycutejj nanacajj saparstʼat jan arsusir marcäpjjtwa, mä chekat yakha chekar muyuycupjjtwa, Jerusalen marcat alis-sunitäpjjtwa, tʼakhesïw taypin chʼusa wasaran naciri. Jilanacajjan uñisita. Ucaw nuwasïwinacamp chʼajjwäwinacampjj utjayi; ucat urunacajjanjj jaqhusipjjäyäta.

27. Naya Jacobosti sepulturajjar sarakañajjan jacʼätap uñjta. Ucat Enos yokajjar sista: Aca tʼalpha lekʼetanac catjjam. Ucat cuntejj Nefi jilajjajj nayar camächitjam arsquitu, ucanac Enosarojj arsuracta; jupasti uca arunacar phokhañapataquiw arsuraqui. Aca tʼalpha lekʼetanacjjar kellkañ tucuyjjaractwa. Uca kellkatajjasti jucʼaquiwa. Qhitinacatejj acanac leyipcan ucanacarojja, jiquisiñäniw sistwa, walja jilanacajjan nayan arunacajj leeñap suyasa. Jiquisiñcam jilanaca.