1. Cuna arunactejj Nefin Jacob sat jilapajj Nefin jiwäwip khepat Nefi jakenacar parlcän ucanacawa:

2. Jichhasti, munat jilanaca, naya Jacobojj Diosatac lurañ wactʼatajjarjama, chachjam jawsäwijjar jachʼaptayañataqui, uqhämaraqui juchanacam isijjat kʼomachañajjataquiw jichhürojj kollan utar maqhat-ta, Diosan arup jumanacar yatiyiri.

3. Jumanac pachpaw yatipjjta Diosan mä jawsäwipan jan karis trabajañajja; ucampis jichhürojj almanacaman waliquïñapatac munañasa, llaquisiñasa, jichhajj nayrat jucʼamp jathjitu.

4. Cunalaycutejj jichhacamajj Tatitun cuna aruptejj nayajj jumanacar churapcsma, ucanacarojj yäkapjjtawa.

5. Ucampis nayar istʼapjjeta, yatipjjaraquim, take chʼaman alajjpach acapach Luririn yanapapampiw nayajj lupʼïwinacam khanstayapjjerisma; cunjämtejj niy juch lurañ kalltapcta uca. Uca juchanacajj wali ajjtascañaw nayataquejja, Diosataquis ajjtcañaraquiwa.

6. Ucanacajj chuymajjaruw tʼakhesiyi; Luririjjan nayrakatapansti pʼenk ajjsarthapiyaraquitu, chuymanacaman ñankhätapat ircatañajj waquisitapata.

7. Uqhämaraquiw llaquisiyitu, aqhäm jan ajjsartas parlatajjata warminacamampin wawanacamampin nayrakatapana. Jumanacat waljanin chuymanacapaw wali jallallanqha, kʼomaraqui. Diosan nayrakatapansti, qhuyapayasiriraqui. Ucanacasti Diosaruw cusisiyi.

8. Jupanacasti Diosan cusisiyir arup istʼir jutapjjatapawa. Jïsa, chhojjriñchat chuymar kollir ar istʼiri.

9. Ucalaycu, ajayojjajj llaquisiwa llactʼat uñjasitajjata, Diosan chʼama camächip catokatajj laycu, jumanacan chhojjriñchatamarjam khantʼañajjataqui, qhitinacatejj usuchjatäpqui ucanacan usuchjatanacap jucʼampstʼayañataqui, jupanacar chuymachañ lanti, kollañ lantiraqui. Qhitinacatejj jan usuchjatäpqui ucanacarusti, Diosan cusiscañ arupamp cusisiyañ lantjja cuchillompjam chuymanacap maysäjjat maysäjj junsuñataqui, jallallanqh amuyunacap usuchjañataquiraqui.

10. Uca lurañajjajj jachʼäc-chisa, Diosan chʼama camächitaparjam lurañajjawa. Ucatsti ñankhäpjjatamat parlañajjaw wactʼitu, uqhämarac ñankha luräwinacamata, ajjtcañ luräwinacamat khanañchas yatiyañajjawa, kʼoma chuymaninacan nayrakatapana, pʼaquintat chuymanin nayrakatapansa. Uqhämaraqui, Take Chʼaman Diosan uñtäw nayrakatapansa. Uca Diosan nayrapasti cawqharus uñjascaquistuwa.

11. Ucalaycu, Diosan khana aruparjamaw chek sañajjajj waquisi. Ucat nay Tatitur jisctʼquipan arojj nayar jutitu aqhäm sasa: Jacobo, kollan utar kharür saram. Ucatsti, cuna artejj nayajj churcäm uc aca jakenacar yatiyam –sasaw situ.

12. Jichhasti, jilanaca, jumanacaruw aca arunac yatiyapjjsma: Jumanacat waljaniw kori, kollke thakañ kalltapjjta, uqhämaraqui take cunayman metalan kalanac thakapjjaracta. Uqhäm kalanacajj waljapuniw aca orakenjj utji; aca orakesti jumanacataqui, wawanacamataqui arsüw orakewa.

13. Diosan amparapajj jumanacar walpin qhuyapayapjjtam; ucat cunayman walja cʼajquir yänac catupjjaracta. Jumanacat yakhepajj jilanacamats jucʼamp catupjjta, ucat jachʼa jachʼa tucupjjta; janiraquiw Dios nayrakatanjj altʼapcaractati. Jila alan isinac uscusisajj pʼek waytapjjta, jilanacamar arnakapjjaracta, jupanacat sipan sumäpcasmas uqhäm amuyasa.

14. Jichhasti, jilanaca, uca luräwinacamat Diosajj asquiptayapjjtamti? Nayasti, janiw walïquit– sapjjsmawa, Diosajj jumanacar juchañchapjjtamwa. Jumanacatejj uca luräwinac lurasipcaquïtajja, taripäwipajj acatjamat mäquiw jumanacjjar purini.

15. Diosatejj jumanacar maysäjjat maysäjj junsuñatac chʼamanïtap uñachtʼayapjjeristam ucatsti, nayrapamp may uñtas chʼalljtayañatac chʼamanïtap uñachtʼayapjjaraquiristam!

16. Aca ñankha luräwinacamat ajjtcañ luräwinacamat Diosajj jumanacar antutayapjjaquiristam. Jumanacatejj camächit arunacapar istʼapjjasma. Chuymanquir jachʼa jachʼa tucuñaman janirac almanacamar tucqhañap munapjjasm ucqha.

17. Jilanacamarojj jumanac quicpatacjam amuyapjjam, takenimp sum sarnakapjjam; jupanacan jumanacjam kamiriptañanacapatac yänacamat churapjjaraquim.

18. Ucampis cʼajquir yänac janïr thakcasajja, Diosan khapak marcap thakapjjam.

19. Ucat Cristor suyañ catokatam khepatjja, cʼajquir yänac catokapjjäta, jumanacatejj thakapjjät ucapacha, ucanacsti asc lurañataquiw thakapjjäta; isit jalstatanacar isiyañataqui, mankʼat awtjatanacar mankʼayañataqui, catuntatanacar antutayañatayañataqui, usutanacarus llaquitanacarus chuymachañataquiw ucanacjj thakapjjäta.

20. Jichhasti, jilanacajja, jachʼa jachʼa tucuñjjat parlapjjsma, ucatsti qhitinacatejj jumanacat jake masinacamar tʼakhesiyki ucanacata, cuntejj Diosajj churapctam uquïpan jake masinacamarojj arcnakapjjta, chuymanacaman jachʼa jachʼa tucuñar puripjjatam laycu. Camsapjjasmas ucanacjjatjja?

21. Janit amuyapcta, take janch lurqui ucatac take ucanacan ajjtcañätapjja? Cunalaycutejj sapakat mayniw jupataquejj quipcjam munata; take janchiw lakʼat lurata. Uca quicpa amuyumpiw takenirus uchistu: Camächitanacapar phokhañasataqui, jachʼar aptañasataquiraqui.

22. Jichhasti jachʼa jachʼa tucuñjjat parlañjj tucuytwa: Janitejj mä jucʼamp ñankha juchamat jumanacar parlañajjäcaspas ucqhäjja, chuymajjajj jumanacat cusisispawa.

23. Ucampis Diosan arupajja, pʼenkascay ñankha juchanacam laycuw llaquisiyitu. Aqhäm siw Tatitojja: Aca marcajj ñankha luräwinacapamp jachʼaptañ kallti; jupanacajj janiw kellkatanac amuyapquiti, cunalaycutejj jupanacajj wachokañas kʼañusiñas janis juchäcaspajj uqhäm tucuyapjje. Davidampit Salomon yokapampit kellkascän uca laycu.

24. Davidamp Salomonampejj chekpach walja warminïnwa, walja uñtʼataniraquïnwa. Ucanacasti nayataquejj ajjtcañawa –siw Tatitojja.

25. Ucat Tatitojj aqhäm sï: Aca jakenacarojja, Jerusalen oraket amparajjan chʼamapampiw irpsunta. Josean wawanacapat mä asqui koka ayrjam jilayañajjataquiw uc lurta.

26. Ucat naya Dios Tatitojja, janiw aca jakenacarojj nayrapach jakenacjam luraycäti.

27. Uqhämasti, jilanacajja, istʼapjjeta, Tatitun arupar yäkapjjam: Janiw jumanacat maynis mayat jucʼamp warminïpcätati, janiraquiw mä uñtʼatanïpcaraquïtasa.

28. Cunalaycutejj naya Dios Tatitojj warminacan kʼomätapat cusista; kʼañusiñas wachokañas ajjtcañaw nayataquejja –siw nuwasiri tamanacan Tatitupajja.

29. Ucat aca marcajj camächitanacajj phokapjjani, jan ucasti orakejj jupanacataquejj ñankhachatäniwa –siw nuwasiri tamanacan Tatitupajja.

30. Nuwasiri tamanacan Tatitupajj saraquiwa: Nayatejj sarakerinac nayatac utjayañ munäjja, nayajj marcajjaruw uqhäm camächit churä; jan ucasti uca camächitanacajjaruw phokhapjjani.

31. Cunalaycutejj naya Tatitojja, Jerusalen oraken jakenacajjan phuchanacapan aykotap istʼta, jaqhusitaparus istʼaractwa. Ucasti chachanacapan ñankhätap ajjtcañ lurirïpjjatap laycuwa; take jakenacajjan orakenacapan ucanacjj uñjaracta.

32. Nuwasiri tamanacan Tatitupajj sascaquiwa: Nayaw aca marcarojj Jerusalen oraket irpsunta; ucalaycusti, janiw aca marcan suma uynaktʼan phuchanacapan arnakasiñap muncäti, janiraquiw chachanacaparu artʼäwinacap nayar maqhatayancäti.

33. Jupanacatejj marcajjan phuchanacapar jupanacan qhuyapayasïwip laycu catuntat irpapjjanejja, nayajj jupanacarojj tucqhatäñapcamaw khoru ñankhachäwimp sartʼä. Cunalaycutejj janiw jupanacajj nayrapach jakenacjam kʼañusipcaniti, wachokapcaraquinisa –siw nuwasiri tamanacan Tatitupajja.

34. Jichhasti, jilanaca, uca camächitanacan Lehi awquisar churatätap yatipjjtawa; nayrasti jumanacajj ucanac yatipjjaraquïyätawa. Uqhäm yatcasasa, cuntejj jan lurañäqui ucanac lurapjjta, uca laycusti jachʼa juchañchäwiruw puripjjaracta.

35. Jiwasan Laman jake jilanacasat sipan jucʼamp jachʼa ñankhanac lurapjjta. Qhuyapayir warminacaman chuymanacap pʼaquintapjjta; wawanacam nayrakatan jan wali uñachayäwinacam laycuw jumanacar iyawsañap chhaktayapjjta. Chuymanacapan jachäwinacapasti jumanac contraw Diosar maqhati. Uqhämaraqui jumanacjjar jutapctam uca Diosan arupan chʼamätap laycuw walja chhojjriñchat chuymanacajj jiwari.