1. Ucatsti naya Jacobojja, marcajjarojj walpun aru tok yatichäyäta (ucanacsti janiw kellkerjamäcti, tʼalpha lekʼetanacjjar arunac kellkañajj chʼamätap laycuw ucat mä jucʼac kellkta) nanacajj yatipjjtwa cunatejj tʼalpha lekʼetanacjjar kellkatäc ucan jan chhaktañapa.

2. Ucampis cunanactejj yakha cunaymaninacjjar kellkapct ucanacajja, tucusjjaquiniwa, chhaktjjaraquiniwa; ucampis mä kawkha arunacacs tʼalpha lekʼetanacjjar kellkapjjä ucajja, uca arunacajj wawanacajjarusa, munat jilanacajjarusa, nanacjjat mä jucʼ yatiyani, uqhämarac jupanacan lakʼa achilanacapatsa.

3. Ucat nanacajj cusisipjjta, jan karisaw trabajapjjaracta, aca arunac Tʼalpha Lekʼetanacjjar kellkañataqui. Uqhämaraquiw suyapjjaracta, munat jilanacajjamp wawanacajjampejj chuymanacapan yuspagaras acanac catokapjjañapataqui. Uqhämaraqui acanacar uñjasajj nayra awquipan taycapan sarnakäwip yatiñataqui, jan llaquisiñampi jan uñisiñampi.

4. Cunalaycutejj nanacajj mä amtäwimpiw acanac kellkapjjta, walja maranac Criston jutañapatac janïr purinquipan Cristot yatipjjta, ucatsti jachʼar aptatäñap suyapjjaracta; ucampis janiw nanacaquit uc suyapcäyätjja, jan ucasti nanacat nayräjj jaquir kollan arjirinacajj suyapjjaraquïnwa.

5. Uca nayra arjirinacajj Cristor iyawsapjjänwa, Awquirusti Criston sutiparuw yupaychapjjaraquïna; nanacasti Awquirojj Criston sutipjjaruw yupaychapjjaracta. Moisesan leyipajj Cristoruw uñtayapjjetu, ucat uca ley phokhapjjta. Ucatarac ucajj nanacarojj asqui luräwir kollanaptayapjjetu, cunjämatejj Abrahanajj chʼusa wasaran Isaac yokap loktasajj Diosan camächitapar phokcäna, ucat uca luräwisti Abrahanatac asqui luräwjam jaqhutäcän uqhäma. Uca Abrahanan loktäwipajja, Diosan Mä Sapa Jathachasit Yokap loktäw quipcawa.

6. Ucat arjirinacan kellkatanacapan thakapjjta. Jutir urunacat yatiyir ajayumpi Diosat walja yatiyäwipampejj nanac taypinquiwa. Take uca ircatirinacanïsaw suytʼañ jicjjatapjjta, iyawsañajjasti jan turc-cayaw tucu. Uqhäm tucutap laycusti Jesusan sutipjjarojj chekpachapuniw arsupjjerista, ucatsti kokanacas kollunacas lamar mathapinacas yäkapjjaraquituwa.

7. Ucampirus Tatit Diosajja, tʼuqhasïwinacajj uñachayapjjetu, churäwip laycuqui, jaken wawanacapar jachʼa qhuyapayäwip laycuquirac take ucanac lurañatac chʼamanipjjatajj yatipjjañapataqui.

8. Cunj jachʼanacas muspharcañanacas Tatitun luräwinacapajja! Cunj jan amuycayas imantäwinacapajja! Takpach luräwinacapajj jakenacataquejj jan yatjjatcayawa. Janitejj mä jakejj Tatitun yatiyatäqui ucajja, janiw jupan thaquinacap yatcaspati. Uqhämasti jilanaca, Diosan yatiyäwinacaparojj jan inamayarjam tucuyapjjamti.

9. Diosan arupan chʼamapampiw jakenacajj oraker ut-tʼayatäna; orakesti arupan chʼamapamp lurataraquïnwa. Uqhämasti, Diosatejj arschïna ucat orakejj utjänjja, aruparjamarac jakejj utjaraquïnjja, cunatarac jupast jan oraker saraycaspa? Jan ucajj cuntejj amparapamp oraken lurcän ucanacarojj, cunats jan munañaparjam apnakcaspajja?

10. Uqhämasti, jilanaca, Tatiturojj jan amuytʼayañ munapjjamti, jan ucasti jupan amparapat amuyjj catokapjjam. Jumanac pachpaw yatipjjtajja, jupajj yatiñ cancañampi, cheka cancañampi, jachʼa qhuyapayasïwimpiw ewjje, take luräwinacapansa.

11. Uqhämasti munat jilanaca, jupamp sumthapipjjam, Mä Sapa Jathachasit Yokapa Criston juchanac lanti tʼakhesiñar phokhäwip laycu. Jumanacajj jiwañat jactañ jicjjatapjjañamataqui, Cristoncqui uca chʼaman jacatatäwirjama. Ucatsti Criston nayrïr achupjam Diosar uñtʼayatäpjjañamataqui, iyawsañanïsa, jupan khapakapar suma suyañ catokasaraqui, jupajj janïr janchin uñtʼayasquipana.

12. Jichhasti, munat jilanaca, ucanac jumanacar satajjat jan muspharapjjamti. Cunats Criston juchanac lanti tʼakhesiñ phokhäwipat jan parlañäcaspajja? Ucat jupat phokhatpach yatiñ jicjjatañataqui, uqhämarac jactäwit jutir jacäwit yatiñ jicjjataña.

13. Jilanacajjay, qhititejj jutir urunacat yatiyqui ucajja, jaken amuyañaparjam yatiypan; cunalaycutejj Ajayojj chek parli, janiraquiw cʼarisquiti. Cunjämäquitejj chekpachan take cunanacajja, cunjamäcaraquinitejj khepürunjja, uqhäm parlam. Ucat ucanacajj jiwasanacarojj khan yatiyata, jiwasanacan khespiyasiñasataqui. Ucampis janiw jiwas sapaqui ircatirïctanti; jan ucasti Diosajj ucanacjja, nayrapach arjirinacaruw parlaraquïna.

14. Ucampis judionacajj janiw Dios nayrakatanjj altʼapcänti; jupanacajj khana arunacarojj uñisipjjänwa, arjirinacarusti jiwarayapjjaraquïnwa. Cuntejj jupanacajj jan amuyirjamäpcan ucanac munapjjaraquïna; ucat jupanacan uynakquir juyqhütap laycuw tincupjjañapa, cunalaycutejj Diosajj jupanacat khanap aparjje, ucatsti cunanactejj jan amuyirjamäpqui ucanac wal catuyi, uqhäm munapjjatap laycu, uqhäm suyapjjatap laycuraquiw Diosajj ucjj luri, jupanacan lanktasiñapataqui.

15. Jichhasti, cawquïr Ajayutejj naya Jacobor chʼamachquitu, jutir urunacat yatiyañajjataqui, nayan chuymajjancqui uca Ajayun irpatap tokew amuyta, judionacan lanktasitap laycojja, kalarojj jakonucupjjaniwa, cunjjarutejj utachapcaspan mä suma thurtʼat takananïñataki.

16. Ucampis kellkatanacarjamaw uca kalajj jachʼar tucuni, mä sapa suma chʼollkhe takanar tucuraquini, judionacan ucjjar utachañapataqui.

17. Jichhasti, munat jilanaca, suma chʼollkhe takan jan catokasinsti, cunjämarac jupanacast ucjjar utachapjjaspa, ucan kʼachhi kalapjam tucuñapataquisti?

18. Jichhasti, munat jilanacajja, nayaw aca imantäw khanstayapjjäma, Ajayuncqui uca thurtʼasiñajjajj inas cunjämat tʼuqhaschispa, jumanac laycu jachʼa llaquisiñajjat lanktasirist ucqhaquiw jan ucjj phokhquirist-ti.