Jacobon Kellkatapa
Jupajj Nefin Jilapänwa

1. Jichhasti, Lehin Jerusalen marcat mistunitapatjja, pheska tunc pheskan maraw sarakjjäna. Ucat Nefejj naya Jacobor ewjjetu, uca jiscʼa tʼalpha lekʼetanacjjata, cunjjarutejj acanacajj kellkatäqui ucjjata.

2. Ucat jupajj naya Jacobor ewjjetuy cunanacatejj nayatac jila suma munatäqui ucanacat mä kawkhanac aca tʼalpha lekʼetanacjjar kellkañajjataqui. Ucampis janiw nayajj aca Nefi jakenac sat marcapan sarnakäwinacapat waljanac kellkañajjäquiti; jan ucasti mä kawkhanacaqui.

3. Cunalaycutejj Nefejj siwa: Marcajjan sarnakäwinacapajj nayan yakha tʼalpha lekʼetanacjjar kellkatäñapawa. Jumasti aca Tʼalpha Lekʼetanac imañamawa; sarakerinacamaru, mitat mitar catuyañamaraquiwa.

4. Kollan yatiyäwejj utjchisapänsa, Diosat jachʼa yatiyäwejj utjchisapänsa, jutir urunacat yatiyäwejj utjarac-chisapänsa, nayajj ucanacjjat jilïr cunanac aca tʼalpha lekʼetanacjjar kellkañajjäna. Ucanacasti kawkhanactejj lurquirista, uqhäm kellkañajjäna, Cristotaqui, nanacan marcajjataqui.

5. Cunalaycutejj iyawsäw laycu, yatiñ wal munatajj laycuraquiw chekpachan yatiyatäpjjta marcajjan sarnäkawipjjata, cunatejj camächcan ucampita.

6. Uqhamaraquiw Diosat walja yatiyäwinacajj nanacar jutapjjaraquitu; jutir urunacat yatiyir ajayojj nanacan utjaraqui. Ucat Cristompit jutcan uca khapak marcapampit yatipjjaracta.

7. Ucat jan karis marcajj taypin jupanacan Cristor jutañ munapjjañapatac trabajapjjta, Diosan qhuyapayasiñapat jupanacan cusisipjjañapataqui. Uqhämat Diosan samaräwipar mantañanacapataqui. Jan uqhäm lurapquiristjja, Diosajj colerasïwipanjja, janiw mantapcasmat saspaw jupanacarojja, cunjämatejj Israelan wawanacapar siscänjja, cunapachatejj jupanacajj chʼusa wasarancapcän ucqhajj yantʼäwi urunacan siscän uqhäma.

8. Ucalaycu, anchatí take jakenacarojj Diosar jan kallcatañapatac iyawsayapjjsnajja, jupanacan jupar jan colerayañanacapataqui. Antisas takpach jakenacajj Cristor iyawsapjjpan, jiwäwip uñjapjjpan, jupajj cruzan tʼakhescänjja, uqhämarac tʼakhesipjjpan, oraken pʼenkap mutupjjaracpan; ucat naya Jacobojj, Nefi jilajjan sataparjam phokhañ catokta.

9. Nefisti, chʼama karit awquirquipstjjänwa. Jupan jiwañapan jacʼätapjj amuyasjjänwa; ucat jupajj mä jaker jawtʼi pʼekechirin sarayäwiparjama, marcan pʼekechiripäjjañapataqui, uca jakenacan sarayiripäjjañapataquiraqui.

10. Jakenacajj walpun Nefirojj munasipjjäna, cunalaycutejj jupajj jupanacataquejj jachʼa arjjatirïnwa. Jupanacar arjjatasajj Labanan espadapampiw nuwasïna, uqhämaraquiw takpach urunacapan jupanacan asquïñapatac luraraquïna.

11. Ucat jakenacajj jupan sutip amtañ munapjjäna; ucatjja qhititejj Nefi lant marcar saraycänjja, ucajj pʼekechirin sarayäwinacaparjamajja, payïr Nefi, quimsir Nefi, sutimpiw sutiñchatäna.

12. Ucatsti, Nefejj jiwjjänwa.

13. Jichhasti, cawquïrinacatejj jan Laman jakenacäpcän ucanacajja, Nefi jakenacäpjjänwa, ucampis jupanacajj Nefi jakenaca, Jacob jakenaca, uqhäm cunayman sutinïpjjaraquïnwa.

14. Ucampis naya Jacobojj jichhat ucsarojj janiw jupanacar uca sutinacapat chhijllcäti; antisas cawquïrinacatejj Nefi jakenacar jiwarayañ munapqui ucanacarojja, Laman sutimpiw sutiñchä; uqhämaraqui cawquïrinacatejj Nefi jakemp sumancapqui ucanacarojj Nefi jakenaca, jan ucajj Nefi jakenaca, sutimpiw sutiñcharaquï, pʼekechirinacan sarayäwinacaparjama.

15. Ucat payïr pʼekechirin sarayäwipan Nefi jakenacajja, chʼollkhe chuymanïñ kalltapjjäna; mä kawkha jan wali luräwinac lurapjjaraquïna. Cunjämatejj nayrapach Davidajj walja warminïñ uñtʼatanïñ muncäna, ucat Salomon yokapajj uca pachparac muncaraquïnjja, uqhämaraquiw uca marcajj munaraquïna.

16. Jïsa, walja kori, kollke thakañ kalltapjjäna, ucatsti jachʼa jachʼaw tucupjjäna.

17. Ucat naya Jacobojj jupanacar kollan utan yatichcasaw aca arunac jupanacar parlta, cunatejj lurañajjäqui uc Tatitut nayrakat catokasa.

18. Cunalaycutejj naya Jacobomp Jose jilajjampejj aca jakenacataquejj sacerdotepampit yatichiripampit, Nefin amparapamp yakhachatäpjjäyäta.

19. Nanacasti Tatit nayrakatanjja, cuna lurañanacatejj wactʼapquit ucanac catokasaw, jawsäwip jachʼaptayapjjta. Janitejj nanacajj Diosan arup jakenacar jan karis yatichapquiriscäyätjja, jupanacan juchanacapajj nanacan quipca pʼekenacajjar apjjatatäsapänwa; ucat takpach chʼamanacajjamp nanac trabajipana, wilapajj janiw isinacajjar kʼañuchcaspati. Jan uqhäm lurapquiriscäyätjja, jupanacan wilapajj isinacajjaruw kʼañuchaspa, nanacasti khep khepa urunjja, janiw kʼom jicjjatasipquirist-ti.