1. Nayajj jutir urunacat yatiyapjjäm sapjjsmawa. Ucat jilanaca, acaw yatiyäwijjajja: Cunanactejj Zenos arjirejj Israelan utapat mä aceitun alitjam yatiyqui, ucanacajj phokhasipuniniwa.

2. Uca urojj cunapachatejj jupajj marcapjj wastat payïr cutin apthapiñatac amparap lokatatcan ucqhajja, khep khepa cutïniwa, patronan trabajirinacapan jupan chʼamapamp sarapjjañapataqui. Jupanacasti uva yapuparuw khechʼapjjani, jan wali layminac laymirapjjaraquini; uca khepatsti tucuy urojj lakaw purinini.

3. Cawquirïnacatejj jan karis uva yapun trabajcän ucanacajj sinti bendicitawa; cawquïrinacatejj pachpa chekar waranucutäcan ucanacajja, sinti ñankhachatawa, orakesti ninamp nactayataraquïniwa!

4. Diosajj walpin jiwasar qhuyapayistu; jupajj Israelan utapat amtasi, uqhämarac saphipat laymipat amtasiraqui, amparap jupanacarojj ur jornalaw lokatataraqui. Jupanacasti jan altʼirinacäpjjewa, chʼajjwirinacäpjjaraquiwa; ucampis cawquïrinacatejj chuymanacap jan chʼollkheptayapc ucanacajja, Diosan khapak marcapan khespiyatäniwa.

5. Ucat munat jilanaca, kollan arunacampiw achictʼapjjsma, juchanacamat cutiquipstañanacamataqui. Ucatsti take chuymamp jutapjjam, cunjämatejj Diosajj jumanacarojj jacʼachasipctam, uqhämarac jupar jacʼachasipjjaraquim. Jupan qhuyapayasir amparapajj uru khanan jumanacarojj lokatatapcätam ucqhajja, chuymanacamjj jan chʼollkheptayapjjamti.

6. Ucat jichhürojja, jupan arup istʼapcät ucqhajja, chuymanacamjj jan chʼollkheptayapjjamti; cunatrac jiwañ munapjjtasti?

7. Ucat ur pakariw jumanacajj Diosan arupamp mankʼayatäpcta uca khepatjja, jan wali acht churapjjäta, tincsuyatäpjjañamataqui, ninar jakontatäpjjañamataquisa?

8. Janit aca arunacar jaysapcäta? Arjirinacan arunacapar janit jaysapcaraquïta? Cristot parlasqui, take uca arunacarojj janit iyawsapcäta? Diosan chʼamapas Criston suma arupas janiw chekäquit sapjjaraquïtati? Kollan Ajayur jarcʼapjjätati? Jumanacatac waquichatäc uca jachʼa khespiyäwjj inamayarut tucuyapjjäta?

9. Janit yatipcta, jumanacatejj khespiyäwin chʼamapamp uqhäm lurapjjätajja, uqhämarac Cristoncqui uca jiwatanacat jacatatañamp lurapjjaraquïtajja, Diosan taripäwiparojj pʼenkasiñamp jachʼa juchanpachaw uñstapjjäta.

10. Chekapar uñjañajj janiw alekac mistcaspati; uca chekapar uñjañan chʼamaparjamajja, nina azufre kotar sarapjjañamäniwa; ucan nina lawrapasti jan tucuscayawa, jewkʼepasti wiñay wiñayaw jewkʼe. Uca nina azufre kotajj wiñay tʼakhesiñawa.

11. Ucat munat jilanaca, juchanacamat cutiquipstapjjam, cʼullcʼu puncunjam mantapjjaraquim. Ucat cʼullcʼu thaquinjam sarasipcaquim wiñay jacañ catokañamcama.

12. Sum amuyasipjjam, cunamps jucʼamp siristjja?

13. Ucat sarjjä sapjjsma, Diosan cusisiyir taripäw chek nayrakatan jiquisiñascama; uca chekasti ñankhanacarojj ajjsarcañ ajjsarthapiyiriwa. Uqhamäpan.