1. Ucampis naya Jacobojj juma kʼoma chuymaninacaruw parlapjjerisma. Diosar cheka amuyump uñtapjjam, jachʼa iyawsäwimp jupat mayisipjjam. Jupasti llaquinacam taypin chuymachapjjätamwa, arjjatapjjaraquïtamwa. Cawquïrinacatejj jumanacar tucqhañ munapctam ucanacarojja, chekapar uñjañ apayanini.

2. Takpach kʼoma chuymaninaca, pʼekenacam waytapjjam, Diosan cusisiyir arup catokapjjaraquim, jupan munasiñapamp chʼamañchasipjjam; amuyunacamatejj thurtʼatächi ucqhajja, wiñayataquiw ucanac lurapjjasma.

3. Ucampis ay juma jan kʼoma chuymaninacata, cawquïrinacatejj jichhürojj Dios nayrakatan kʼañüpcta ucanaca; janitejj jumanacajj juchanacamat cutiquipstapcätajja, orakejj jumanacatac ñankhachatäniwa. Laman jakenacajj janiw jumanacjam kʼañüpquiti, ucampis jupanacajj mutuyir tʼakhesïwinïpjjewa. Jupanacasti jiwañcamaw jumanacar tʼakhesiyapjjaraquïtam.

4. Uqhämaraqui, janitejj jumanacajj jancʼac Diosar cutiquipstapcätajja, Laman jakenacajj tuti orakenacam catupjjani. Dios Tatitusti asqui jakenacaruw jumanac taypit irpsuni.

5. Qhitinacarutejj kʼañu jakenacätapat uñisipcta, janchipjjar ñankhachäwin puritap laycu uñisipcaract uca Laman jake jilanacamajja, jumanacat sipan jucʼamp asqui jakenacawa; cunalaycutejj janiw Tatitun camächinacap armasipquiti, cunanacatejj awquinacasar churatäcäna, mayat jucʼamp jan warminïñapataqui, janirac cuna uñtʼatanïsa; jupanac taypin kʼañusiñanac jan utjañapataquiraqui.

6. Jichhasti, jupanacajj uca camächitar phokhañataquiw chʼamachasisipqui. Uca camächit phokhañatac chʼamachasipjjatap laycuw Dios Tatitojj jupanacarojj jan tucjcaniti, jan ucasti jupanacarojj qhuyapayaniwa; mä khepürunsti jupanacajj qhuyapayata marcaruw tucuni.

7. Warmin chachanacajj warminacaparojj munasipjjewa, warminacasti chachanacaparojj munapjjaraquiwa. Ucatsti chacha warmiw wawanacaparojj munasipjjaraqui. Jupanacan jumanacar uñisitanacapas jan iyawsatapasa awquinacapan ñankhätap laycuwa. Ucalaycu, cunanarac jumanacast jupanacat sipan jucʼamp sumäpjjtasti, jachʼa Luririman amuyäwiparjamasti?

8. Ay jilanacajja! Janitejj jumanacajj juchanacamat cutiquipstapcätajja, jumanacajj Diosan jilïr konuñap nayrakatar Laman jakenacamp chic irpcatatäpcät ucqhäjja, jupanacan janchipajja, janchinacamat sipan jucʼamp jankʼöniwa. Ucaw nayar llaquisiyitu.

9. Ucat mä camächit jumanacar churapjjsma, ucasti Diosan arupawa: Janchipan chʼamacätap laycojja, jupanacatjja, jan ñankhanac jucʼamp parlapjjamti. Janirac kʼañütap laycus ñankhanac jucʼamp parlapjjamti. Jan ucasti jumanacan quipca kʼañütam amuyasipjjam. Amtasipjjam, jupanacan kʼañütapajja, awquinacap laycuw puri.

10. Uqhämasti wawanacamat amtasipjjam. Cunjämtejj jupanacan chuymanacaparojj llacthapiyapjjta, jan wali uñachtʼäwinac churasa; ucatsti amtasipjjaraquim; jumanacan quipca kʼañütam laycojja, wawanacamarojj tucqhañaruw aptʼapjjasma; jupanacan juchanacapasti khep khepa urunjja, pʼekenacamjjaruw kotjjatatäni;

11. Ay jilanacajja! arunacajjar yäkapjjam, chuymanacaman chʼamapar pʼarjjtayapjjam, jiwañ iquiñat sartapjjañamatac thalarasipjjam. Mankhapach usunacar jiqhanucupjjam, supayaru lokerinacapar jan tucupjjañamataqui. Ucanacajj nina azufre kotar jakontatäpjjaniwa; ucasti payïr jiwañawa.

12. Jichhasti, naya Jacobojj walja jucʼamp cunaymaninac Nefi jakenacar sista; kʼañusiñatsa jan tupump munapayañatsa, take casta juchat ewjjasa, ucanacan tʼakhesïwinacapat jupanacar yatiyasa.

13. Aca jakenacajj waljaniruw tucupjje. Jupanacan sapa patac sarnakäwipatjja, janiw mayas aca tʼalpha lekʼetanacjjarojj kellkatäcaspati; ucampis jupanacan sarnakäwipatjja, waljaw jucʼamp jachʼa tʼalpha lekʼetanacjjar kellkata. Ucansti nuwasïwinacapampita, chʼajjwanacapampita pʼekechirinacapan sarayäwinacapampit kellkatawa.

14. Aca tʼalpha lekʼetanacajj Jacobon tʼalpha lekʼetanacap satawa; ucasti Nefin amparapan luratawa. Aca arunac parlañjj tucuyjjaractwa.