1. Ucatsti quimsa tunc pusin mara uqhamaraqui quimsa tunc pheskani mara sarakjjäna. Jesusan yatekerinacapasti mä Criston iyawsiri tamap uttʼayapjjäna take muytat orakenacana. Take qhitinacatejj jupanacaru jutapcänjja, juchanacapat chekpach cutiquipstapcänsa take ucanacajja Jesucriston sutpjjaru bautizasipjjäna, Kollan Ajayu catokapjjaraquïnwa.

2. Ucatsti quimsa tunca sojjtani maranjja, uc-chʼpach orakjjana takpach orakenquirinacaw Tatitur cutiquipstapjjäna, Nefi jakenacamp Laman jakenacamp-pacha. Janiraquiw pitusïwinacas chʼajjwäwinacas jupanacpurajj utjcänti. Sapakat maynejj masinacapar asc lurapjjaraquïna.

3. Take cunanacajj takenincänwa. Uca laycojja janiw kamiris jan kollkenis utjcänti, mitʼanis jan mitʼanis utjcaraquïnti. Antisas takenejj antutatäpjjäna, alajjpach churäwit catokapjjaraquïna.

4. Ucatsti quimsa tunca pakallkon maraw sarakaraquïna; sumanacañasti oraken utjascaquïnwa.

5. Jesusan yatekerinacapasti jachʼa muspharcañ luräwinaca lurapjjaraquïna, usutanacaru cʼumaraptayañcama, jiwatanacaru sartayañcama, cayu cʼucʼunacaru sarnakayañcama, juyqhunacaru uñjayañcama, okaranacaru istʼayañcama. Take cunayman muspharcañ luräwinacwa jaken wawanacap-pur lurapjjaraquïna. Janiraquiw cuna yakha chʼamampi muspharcañanac lurapcänti, jan ucajja Jesusan sutipjjaruquiw musqharcañ luräwinac lurapjjäna.

6. Uqhamaw quimsa tuñnc quimsakallkoni marajj sarakäna, quimsa tunca llatuncani mararaqui, pusi tunc mayani, pusi tunc payani, jisa, pusi tunca llatuncani maran sarakatapcama, uqhamaraqui pheska tunc mayani pheska tunca payaniraqui; jisa, pheska tunca llatuncan mara sarakatäqui ucapachcamajja uqhamaraquïnwa.

7. Tatituw jupanacar sinti jachʼaptayäna uca orakenjja. Jisa, jachʼaptayatap laycu, cawqhantejj nayra marcanacajj nakhantcänjja uca chekanacjjar wastat marcanac uttʼayapjjäna.

8. Jisa, jachʼa Zarahemla marcarusa wastat ut-tʼayapjjäna.

9. Ucampis walja marcanacaw umana chhakayatänjja. Cawqhantejj uca marcanacajj nayrapach utjcänjja, uca chekanacjjaru umajj chhakayañcamaw maqhataraquïna. Uca laycojja uca marcanacajj janiw wasitat uttʼayañjamäcänti.

10. Nefin jakenacapasti wali chʼamaniruw tucüna. Sinti lakaraquiw miratatapjjaraquïna. Sinti khosi, jiwaqui uyñaktʼani jakenacaru tucupjjaraquïna.

11. Jupanacasti jakechasipjjäna, jakechasiñataqui churatäpjjaraquïna. Tatitojj arscänjja uca allojja arsüwinacaparjamaw jupanacajj qhuyapayatäpjjaraquïna.

12. Janiraquiw Moisesan leyipan luräwinacaparjam sarnakapcaraquïnti, kollan luräwinacaparjamas lurapcaraquïnti. Ucatsipansa Tatitupat Diosapat catokapcäna uca camachitanacarjamaw sarnakapjjäna. Uc lurasajja jupanacajj ayunasipcaquïna, mayisisipcaquiraquïna, wali tantachasipjjaraquïnwa Diosat mayisiñataqui, Tatitun arupjj istʼañataquiraqui.

13. Ucatsti take orakenjja, take jakenacanjja janiw chʼajjwañajj utjcänti. Ucatsipana Jesusan arquirinacap-puranjja jachʼa muspharcañ luräwinaca lurapjjäna.

14. Ucatsti pakallk tunc mayani mara sarakäna uqhamaraqui pakallk tunca payani. Jisa, uqham maranacajj sarakäna pakallk tunca llatuncani maran sarakañapcama. Jisa, patac maras sarakjjaraquïna. Take Jesusan ajllita yatekerinacapasti Diosan cusisiñpachaparu niy sarjjapjaraquïnwa, jan ucajja, qhititejj aca orakena khepaktirïcänsa uca quimsaniquiw acapachan khepaktapjjaraquïna. Yakha yatekerinacasti jupanac lanti uttʼayatäpjjaraquïnwa. Waljaniraquiwa jupa mitanacajja niy jiwarjjapjjaraquïna.

15. Ucatsti, Diosan munasiñapajj jakenacan chuymanacapan utjatapata, janiw chʼajjwäwinacajj uca oraken utjcänti.

16. Janiraquiw kʼenasiñajj utjcänti. Janiraqui chʼajjwäwinacasa, ojjtäwinacasa kʼañusiña wachokäwinacasa cʼarisïwinacasa jak jiwayäwinacas utjcänti, janiraquiw cunaymana jan tupump munapayañas utjcaraquïnti. Chekpachawa, takpach Diosan amparapan lurata jakenacatjja janiw jucʼamp cusisit marcajj utjcasapänti uca marcatsipanjja.

17. Janiw lunthatanacasa jak jiwayirinacasa utjcaraquïnti, janiraquiw Laman jakenacasa yakha cunayman jakenacas utjcaraquïnti. Ucatsipana jupanacajj mayaquïpjjänwa, Criston wawanacapäpjjäna, Diosan khapak marcapa catokerïpjjaraquïnwa.

18. Cunja Diosan jachʼaptayatäpjjänsa jupanacajja! Cunalaycutejj Tatitojj jupanacar qhuyapayäna take luräwinacapanwa. Jisa, patac tuncani marajj sarakcäna ucapachcamasa jupanacajj Diosan qhuyapayatäpjjäna, jachʼaptayatäpjjaraquïna. Cristo jutcäns ucapachatjja nayrïri mitajj jiwarjjapjjaraquïnwa. Janiraquiw chʼajjwäwinacajj utjcänti ucchʼpach orakenjja.

19. Ucatsti, qhititejj Nefin tʼalpha lekʼetanacapjjaru uca khepa sarnakäwinac kellkcänjja uca Nefejj jiwjjänwa. Amos yokapasti jupa lanti sarnakäwinac kellkaraquïnjja. Jupasti Nefin tʼalpha lekʼetanacapjjaruw kellkaraquïna.

20. Quimsakallk tuñnca pusini maraw jupajj sarnakäwinac kellkäna. Sumancañasti oraken utjascaquïnwa, ucampis mä kawkha jakenacajj aynisisina iyawsiri tamat mistupjjäna, Laman jakenaca sutimpi jupanacajj apjjatasipjjaraquïna. Ucatwa wastat Laman jakenacajj orakenjj uñstäna.

21. Ucatsti Amosajj jiwjjaraquïna. (Patac llatunc tunca pusini mara sarakjjaraquïna Criston jutäwipatjja.) Ucatsti jupa lanti Amos yokapawa sarnakäwinac kellkäna. Juparaquiw Nefin tʼalpha lekʼetanacapjjar kellkaraquïna, ucasti Nefin kellkatapanjj kellkataraquïnwa; Nefin kellkatapasti aca kellkatawa.

22. Ucatsti pä patac maraw sarakjjäna. Cristojj jutcäns ucapachat payïri mitajj kʼala jiwarjjapjjäna, jan ucajja mä kawkhaniquiw jacjjapjjaraquïna.

23. Jichhasti naya Mormonajj yatiñamjj muniristwa, jakenacajj Criston jachʼaptayatap laycu miratatapjjäna ucchʼpach orakjjar chʼekentañapcama, sinti kamiriptañapcama.

24. Ucatsti uca pä patac mayani maranjja yakhepajj jupanacata jachʼa jachʼa tucupjjäna, jila alani isinac uscusisa, take cunayman qhusa munat perla kalanac apasa, aca orakenjja cunanacatejj qhusäquejja ucanac uchasisaraqui.

25. Ucapachatjja cunanacapamp yänacapampejja janiw takeninc-cänti.

26. Cunayman jakenacaruw jaljtapjjäna; cunayman iyawsiri tamanac jupanac quipcanacataqui uttʼayasiñ kalltapjjaraquïna kamiriptapjjañanacapataqui. Criston cheka tamaparojj janiw chekäquiti sañ kalltapjjaraquïna.

27. Ucatsti pä patac tuñncan mara sarakatatjja iyawsiri tamanacajj oraken waltʼatänwa. Jisa, walja iyawsiri tamanacajj Cristor uñtʼapjjtwa sasaw arsupjjäna, ucampis jupanacajj asqui yateyäwipat jilpacharu ajjalnucupjjäna. Ucatjja take cunayman ñankha cancañwa catupjjaraquïna. Qhitinacarutejj ñankhätap laycu cunatejj kollanäqui uc churañajj jarcʼatäcänjja ucanacarojja uc churapjjaraquïna.

28. Uca iyawsiri tamasti wali jachʼaru tucusïna ñankha cancañ laycu, Satanasan chʼamap laycuraqui; jupasti jupanacan chuymanacapar catünjja.

29. Uqhamaraqui, yakha tamajj utjaraquïna. Uca tamasti Cristoru ajjalnucupjjäna. Jupanacasti Criston cheka iyawsiri tamapar arcanakapjjäna, Criston iyawsiri tamapanquirinacan llampʼu chuymanïtapata, Cristor iyawsañanïtapata. Walja muspharcañ luräwinac jupanac taypin lurapjjatapataraqui jupanacar uñisipjjaraquïnwa.

30. Uca laycojja cawquïri Jesusan yatekerinacapatejj jupanacampi chica kheparapcäna ucanacarojja munañaparjamaw chʼamapamp sarayapjjäna, carcelar jakontapjjaraquïna. Ucampisa jupanacanquiri Diosan arupan chʼamapajj carcelanacar payaru jaljtayänwa. Jupanacasti muspharcañ luräwinac lurasajja jupanac taypiru sarapjjaraquïna.

31. Ucampis, take uca muspharcañanac uñjasinsa, jakenacajj chuymanacapjj chʼollkeptayäna, jupanacar jiwayañ chʼamtʼapjjaraquïna, cunjamatejj Jesusan aruparjama, Jerusalenanquir judionacajj jupar jiwayañ munapcänjja uqhamaraqui.

32. Jupanacaru jakontapjjänwa nina naqhiri hornoru. Jupanacasti mistsupjjaraquïna, janiraquiw naqhatäpcaraquïnti.

33. Ajjsarcañ lakʼonacan phutuparojj jupanacar jakontapjjaraquïna. Jupanacasti uca ajjsarcañ lakʼonacampejj anatapjjäna, cunjamatejj mä jiscʼalalajj ovej kallump anatquejj uqhama. Ucat jupanacajj lakʼonac taypit mistupjjäna, janiraquiw chhojjriñchatäpcaraquïnti.

34. Ucampisa, jakenacajj chuymanacapjj chʼollkheptayasipcänwa cunalaycutejja walja sacerdotenacamp cʼari arjirinacampejj jupanacaru irpapjjänwa walja iyawsiri tamanac ut-tʼayañataqui, take cunayman ñankha luräwinacjj lurañanacapataqui. Jupanacasti Jesusan jakenacapjjaru jawkʼapjjänwa, ucampis Jesusan jakenacapajj janiw jupanacar jawkʼapcaraquïnti. Uqhamaw jupanacajj marat mararu jan iyawsas ñankha cancañampi tʼuqhartapjjäna, pä patac quimsa tuncani maran sarakañapcama.

35. Ucatsti uca maranjja, jisa, pä patac quimsa tunca mayani maranjja, jachʼa jaljtäwiw utjäna jakenac taypina.

36. Ucatsti uca maranjja Nefi jakenac sat jakenacajj uñstapjjänwa. Ucanacasti Cristoru cheka iyawsirinacäpjjänwa. Jupanac taypinsti mayni jakenacajj utjaraquïnwa; jupanacasti Jacob jakenaca, Jose jakenaca, Zoram jakenaca Laman jakenacan satäpjjäna.

37. Ucatwa, Cristor cheka iyawsirinacampi cheka yupaychirinacampejja Nefi jakenaca Jacob jakenaca Jose jakenaca Zoram jakenaca satäpjjänwa. Jupanacampïpjjaraquïna Jesusan quimsa khepariri yatekeripajja.

38. Ucatsti, asqui yatiyäwjj jan catokerinacajj Laman jakenaca Lemuel jakenaca Ismael jakenac satäpjjänwa. Jupanacasti janiw cʼachhat cʼachhat jan iyawsasa tʼuqhartapcänti, antisasinsa, amuyuparjamawa Criston evangeliopar amanuta chʼurqhisipjjäna. Wawanacaparusti yatichapjjaraquïna jan iyawsañapataqui, cunjamatejj awquinacapajj kalltäwitpach tʼuqhartas lurapcänjja uqhama.

39. Uqhamänwa awquinacapan ñankhätapampi ajjtcañ luräwinacapamp laycojja; cunjamäns kalltäwinjja uqhamäscaquïnwa. Jupanacasti yatichrantatäpjjänwa Diosan wawanacapar uñisiñanacapataqui, cunjamatejj kalltäwitpach Laman jakenacajj yatichatäpjjaraquïna Nefin wawanacapar uñisiñanacapataqui jay uqhamawa.

40. Ucatsti pä pataca pusi tunc pusini marajj sarakjjäna; uqhamaraquÍnwa jakenacan sarnakäwinacapajja. Jucʼamp ñankha jakenacasti chʼamaniptapjjäna, sinti waljaniru tucupjjaraquïnwa Diosan jakenacapatsipana.

41. Jupanacajj iyawsiri tamanac jupanac pachpataqui ut-tʼayasipcaquïnwa, uca iyawsiri tamanacaru take cunayman jachʼa alani yänacamp cʼachachasipcaquiraquïna. Uqhamasti pä patac pheska tuncani mara sarakäna. Uqhamaraqui pä patac sojjta tuncani marajja sarakaraquïnwa.

42. Ucatsti ñankha jakenacajj Gadiantonan jamas juräwinacapjj arustʼäwinacaps wastat ut-tʼayañ kalltapjjänwa.

43. Uqhamaraquejja Nefin jakenacapa sat jakenacan sinti kamirïtap laycu jupanacajj chuymanacapan jachʼa jachʼa tucuñ kalltapjjänwa. Laman jake jilanacapjama alek jachʼaruw aptatäñ kalltapjjaraquïna.

44. Ucapachatjja yatekerinacajj oraken juchanacapata llaquisiñ kalltapjjänwa.

45. Ucatsti quimsa patac mara sarakcäna ucapachajja Nefin jakenacapampi Laman jakenacamppacha quipca sinti ñankhar tucupjjäna, maynejj maynjamäsinwa.

46. Ucatsti Gadianton lunthatanacajj uc-chʼpach orakjjaruw chʼekentapjjäna. Janiraquiw asqui jakenacas utjcänti jan ucajja Jesusan yatekerinacapaquiw utjäna. Jakenacajj walja korimp kollkempjj imapjjäna. Take cunaymananacjj aljapjjäna alasipjjaraquïna.

47. Ucatsti quimsa patac pheskan mara sarakatatjja Amosajj jiwjjänwa. (Jakenacasti ñankhancasipcaquïnwa.) Ucatsti Amosan Ammaron sat jilapaw sarnakäwinacjj kellkäna Amos lanti.

48. Ucatsti quimsa patac pä tuncani mara sarakatatjja, Kollan Ajayojj Ammaronar yatiyäna, kollan kellkäwinac imantañapataquiwa. Ucat Ammaronajj uca kollan kellkäwinac imantäna. Jisa, cawquïr kellkäwinactejj nayrapachatjja Criston jutatapat quimsa patac pä tuncani maran sarakañapcamajja awquit yokaru churatäcänsa, take uca kollan kellkäwinacjja imantänwa.

49. Tatitutaquiw jupajj ucanac imantänwa, wastat Jacobon utapat jiltʼirinacar uñstañapataqui, Tatitun arjäwinacaparjama, arsüwinacaparjamaraqui. Uqhamawa Ammaronan kellkatapan tucusïwipajja.