Mormonan Kellkatapa

1. Jichhasti, cunanactejj uñjcäyäta, istʼcäyäta ucanacat naya Mormonajj mä kellkäw kellkta. Uca kellkäwiruraquiw Mormonan Kellkatapa sas sutiñcharacta.

2. Ammaronajj uca kellkäwinac Tatitutac imantcäna ucürunacan jupajj nayar jutitäna. (Ucapachajja nayajj tunca maranïpachäyätwa, mä jucʼa yatiñ kalltaraquïyäta, marcajjan yatïwiparjama.) Ucatsti Ammaronajj nayar sitänwa: Juman wali amuyun waynätam amuyta. Uqhämaraqui wali amuyumpi take cun uñjatams amuyaracta –sasaw situ.

3. Ucatsti sascaquituwa: Pä tunc pusin maranïcät ucapachajja, cunanactejj aca jakenac taypin camächquiri uñjcätas ucanacjjat amtañam munta. Ucapachanarac Antum sat marcar saräta, ucatsti Shim sata kolluruw sararaquïta. Ucqharuw nayajj Tatitutac take aca marcjjat yatiyir kollan kellkantatanac imant-ta.

4. Ucatsti, Nefin tʼalpha lekʼetanacap jumamp chicajj apäta. Ucatsti, cawqhantejj imantatäqui ucjjaruw jaytaraquïta. Nefin tʼalpha lekʼetanacapjjaruw kellkaraquïta take cunanactejj aca jakenac taypin camächquir uñjcäta ucanacjjata.

5. Naya Mormonasti Nefin jathapätwa; (awquijjan sutipasti Mormonaraquïnwa); ucat cunanactejj Ammaronajj nayan lurañajjataqui sisquitänjja, take ucanac amtäyäta.

6. Ucatsti nayajj tunca mayan maranïcäyäts ucapachaw awquijjajj nayar irpitäna, aynach toke orakeru, Zarahemla sat orakcama.

7. Uc-chʼpach orakjjansti jachʼa utanacajj qʼiqʼi phokhantatänwa; cunjämatejj jachʼa kota lamaran chʼallanacapajj waljäquejja, uqhämaraquiw jakenacajj niyapun waljaraquïna.

8. Ucatsti uca maranjja mä nuwasïwiw kalltäna Nefi jakenacanjja; Nefi jakenacasti; Nefi jakenaca, Jacob jakenaca, Jose jakenaca, Zoram jakenacänwa. Uca nuwasïwinsti Nefi jakenacajja, nuwasipjjänwa, Laman jakenacampi, Lemuel jakenacampi, Ismael jakenacampi.

9. Laman jakenacampi, Lemuel jakenacampi, Ismael jakenacampejja, Laman jakenac satapjjänwa. Nuwasir marcanacasti Nefi jakenacamp Laman jakenacampïnwa.

10. Ucatsti nuwasïwejj jupanac taypin kalltäna Zarahemlan thiyanacapana, Sidon sat umanac jacʼana.

11. Ucatsti Nefi jakenacajj walja chachanac jawsthapipjjäna, quimsa tunc warankat jila. Ucatsti, uca quipca maran jupanacajj walja cutinacajj nuwasipjjäna. Uca nuwasïwinacansti Nefi jakenacajj Laman jakenacaruw atipjapjjäna, waljaniruraquiw jupanacat jiwarayapjjäna.

12. Ucat Laman jakenacajj jan jucʼamp nuwasiñataquiw arustʼasipjjäna. Sumancañasti orakjjaruw puriraquïna, pusi marjamaw utjaraquïna; ucapachan wila wartañajj janiw utjcaraquïnti.

13. Ucampis ñankha cancañajj take uc-chʼpach orakjjan utjascaquïnwa; ucat Tatitojj munat yatekerinacaparojj ucsat apsüna. Jaken ñankhätap laycuw muspharcañ luräwinacampi cʼumaraptayañanacampejj tucusiraquïna.

14. Janiw jucʼamp Tatitun churäwinacapajj utjcjjänti; Kollan Ajayusti janiw qhitjjarus purcaraquïnti jupanacan ñankhäpjjatap laycu, jan iyawsirïpjjatap laycuraqui.

15. Nayasti tunca pheskan maranir purisina, mä jucʼa amuytʼa pʼekenïraquïyät ucqhaw Tatitojj nayar sartʼitu. Nayasti Jesusan asquïtap yantʼäyäta yatiraquïyäta.

16. Ucatsti aca jakenacar yatichañ chʼamtʼaraquïyäta. Ucampis lacajjajj jistʼthapiyatänwa; jupanacar jan yatichañajjataquiw camächit catokaraquïyäta, cunalaycutejj jupanacajj munañaparjamaw Diosapar kallasipjjäna. Jupanacan ñankhätap laycuraquiw munat yatekerinacajj uca oraket irpsutäjjaraquïna.

17. Ucampis nayajj jupanac taypin utjascaquïyätwa. Jupanacan chʼollkhe chuymanïtanacap laycu, jan yatichañajjatac camächit churatäc-chïyät ucasa. Chʼollkhe chuymanïtanacap laycuraquiw orakejj jupanacatac ñankhachatänjja.

18. Uca Laman jakenac taypinquir Gadianton lunthatanacasti orakjjaruw chʼekentapjjäna. Ucatsti ucanquirinacajj jachʼa alan yänacap oraker imantañ kalltapjjäna. Yänacasti llustʼa llustʼaw tucupjjäna, cunalaycutejj Tatitojj orakerojj ñankhachänwa, yänacap jupanacan jan catuñapataqui jan wastat jicjjatañapataquiraqui.

19. Ucatsti, laykantäwinacampi chʼirintäwinacampi salamancjäwinacampiw utjäna. Ñankhäqui ucan chʼamapajj take uc-chʼpach orakjjar willintatänwa, take Abinadin arunacapans Samuel sat Laman jaken arunacapans phokhasiñapcama.