1. Jichhasti, Diosatejj arunacajj jupanacar churaspajja, nayaw aca marcat jiltʼir jakenacarojj mä jucʼa arsurista, awquinacapan sarnakäwipat jupanacan yatiñanacapataqui. Jïsa, juma Israelan utapat jiltʼir jathanacaruw arsupjjsma. Aca arunacsti arsupjjaracsmawa:

2. Yatipjjam, jumanacajj Israelan utapanquirinacäpjjtawa.

3. Yatipjjam, juchanacamat cutiquipstañamawa. Janitejj uqhäm lurapcätajja, janiraquiw khespiyasipcätati.

4. Yatipjjam, janiw wila wartañampejj cusisipjjañamäquiti; nuwasiñanacam jaytanucuñamawa; janiraquiw wastat ucanac catjjaruñamäquiti, jan ucasti cunapachatejj catjjaruñamatac Diosajj camächit churapcätam ucqhaquiw ucanac catjjarupjjäta.

5. Yatipjjam, awquinacamat yatiñ catokapjjañamawa, take juchanacamat ñankha luräwinacamats cutiquipstapjjañamaraquiwa. Jesucristor jupan Diosan Yokapätaparu, judionacan jupar jiwayataparu, Awquin chʼamapampi wastat jactataparu iyawsapjjañamawa. Uc lurasasti jupajj amay imäwiruw atipi; jiwañan michʼintäwipasti jupan chhaktjje.

6. Jupasti jiwatanacan jactäwip ut-tʼayi. Ucat jakenacajj jactapjjani, jupan taripañ konuñap nayrakatan saytʼañanacapataqui.

7. Jupasti oraker khespiyañ ut-tʼayi, ucat qhititejj taripañ urunjja jupan nayrakatapan jan juchan jicjjatatäcan ucaruw churatäni, jupan jan tucusir cusisiñan Diosamp utjañapataqui, Diosan khapak marcapana, jachʼar aptir kʼochunac jan tucuyas kʼochuñapataqui, alayanquir kʼochurinacampi Awquimpiru, Yokampiru, Kollan Ajayumpiru; jupanacasti mä Diosaquiwa.

8. Uqhämasti, juchanacat cutiquipstapjjam, Jesusan sutipjjar bautisasipjjaraquim. Nayrakataman aca kellkatan uchatäcan uca Criston asqui yatiyäwip catupjjaraquim. Uqhämaraqui, cuna kellkatatejj judionacat gentilenacar jutcani, gentilenacat jumanacar jutcaraquin uca kellkatan uca asqui yatiyäwejj jumanac nayrakatan uchataraquïniwa.

9. Cunalaycutejja, acajj kellkatawa, juman uca yakha kellkatar iyawsañamataqui. Ucat, jumanacatejj uca yakha kellkatar iyawsapjjätajja aca kellkatarojj iyawsapjjaraquïtawa. Acarutejj iyawsapjjätajja awquinacamjjat yatipjjätawa, uqhämaraqui Diosan chʼamapamp jupanac taypin luratäcän uca muspharcañ luräwinacat yatipjjaraquïta.

10. Ucat jumanacan Jacobon jathapat jiltʼirinacätamat yatjjapjjäta. Ucalaycu, nayrïr amtäwir mantapcänsa uca jakenacamp jaqhutäpjjtaw jumanacajja. Jumanacatejj Cristor iyawsapjjätajja, bautisasipjjaraquïtajja, nayrakat umampi ucjjarusti ninampi Kollan Ajayumpiraqui, camisatejj Khespiyirisajj lurcän uqhäm lurasajja, cunjämatejj lurañasataquejj camächit churquistän uqhämarjama, ucat jumanacatejj uqhäm lurapjjätajja, taripañ urunjja jumanacatac take cunas asquïniwa. Uqhamäpan.