1. Jichhasti, Cristor jan iyawsapqui ucanacjjat arsü.

2. Cunürutejj tumpatäcät ucürunjja, jumanacajj iyawsapjjätati? Cunapachatejj Tatitojj jutcani, jïsa, cuna jachʼa uruntejj orakes llawthaptcani, karkanacas jachʼa paramimpi umatatcani, jïsa, cuna jachʼa uruntejj jumanacajj Diosan Chitap nayrakatan saytʼañatac apcatatäpcät ucürunjja, janiw mä Diosajj utjquiti –sas sapjjätati?

3. Ucapachajj Cristor ajjalnucusipcaquïtati? Jan ucajja, Diosan Chitapar uñcatapjjätacha? Juch luratanacamat amuyasisin jupamp utjasipcasmas uqhämt lupʼipjjta? Cunapachatejj leyinacapar jan cunapachas jaysatanacamat llaquisiñampi amuyasiñam laycu jumanacajj cʼumuptatapcät ucapachajja, uca kollan Diosampejj cusisit utjasipcasmas uqhämt amuyasipjjta?

4. Nayaw jumanacar sapjjsma, jumanacatejj kʼañütamat amuyasis kollan asqui Diosamp utjasipjjasmajja, jucʼamp mutupjjasma, ñankhachatanacamp mankhapachan utjasipcasmas ucat sipana.

5. Cunalaycutejja, Dios nayrakatan kʼalalätamar uñjañamatac apatäpcäta, uqhämaraqui, Diosan khapak cancañaparu, Jesucriston kollan cancañapar uñjañamataquirac apatäpcät ucapachajja, mä jan apakcay ninaw jumanacjjar naqhayani.

6. Uqhämasti, juma jan iyawsirinacajja, Tatitur cutiquipstapjjam. Take chʼamamp Awquir artʼasipjjam, Jesusan sutipjjaru; ucat uca jachʼa khep khepa urun inas jumanacajj jicjjatasipjjchïta jan kʼañuni, kʼoma, khosi, jankʼo, Chitan wilapan kʼomachataraqui.

7. Wasitat jumanacar arsupjjsma, qhitinacatejj Diosan yatiyäwinacapar ajjalnucupcta ucanacaru, uqhämaraqui, qhitinacatejj; janiw Diosan yatiyäwinacapajj utjquiti sapcta ucanacaru, janiraqui yatiyäwinacasa, Diosan arjäwinacasa, churäwinacasa, cʼumaraptayäwinacasa, yakha lajjrat arsuñanacasa, yakha lajjranac khanañchañanacas utjcaraquiti sapctas ucanacaru.

8. Nayajj jumanacaruw sapjjsma, qhititejj; ucanacajj janiw utjquit sisqui ucajja, janiw Criston asqui yatiyäwipar uñtʼquiti. Janiraquiw kollan kellkatanac arsuycaraquiti, kellkat arsuychi ucasa, janiw ucanacat amuyquiti.

9. Janit kellkan aqhäm kellkatäquejja: Diosajj quipcawa, wasürus jichhürus wiñayasa; jupansti janiraquiw yakha yakha tucuñajj utjquiti, yakha tucuñ chʼiwis utjcaraquiti –sasajja?

10. Jumanacatejj mä yakhar tucur diosar jumanac pachpatac amuyasis ut-tʼayasipstajja, qhitintejj yakhar tucuñ chʼiwejj utjquejja, jumanacajj mä jan muspharcañ lurir dios jumanacataquejj ut-tʼayasipjjtajja.

11. Ucampis nayaw mä muspharcañ luräwinac lurir Diosar uñachayäma. Ucasti Abrahanan Diosapa, Isaacan Diosapa, Jacobon Diosaparaquiwa. Uca quipca Diosaraquiw alajjpachamp acapach orakemp luraraquïna, uqhämaraqui take cunanacatejj ucanacan utjqui ucanac luraraquïna.

12. Jupaw Adanar luräna, ucat Adan toketjja jaken tincüwipajj purïna. Jaken tincüwip laycuw Jesucristojj jutäna; jupasti Awquiwa, Yokaraquiwa. Jesucristo laycuw jaken cutsuyatäñapajj juti.

13. Jesucristo toket utjqui uca jake cutsuyañ laycuw jakenacajj Tatitun ucar wasitat irpatäpjje. Jïsa, ucaw take jakenacar cutsuyañajja, cunalaycutejja, Criston jiwäwipajj jactäw ut-tʼayi. Jactäwisti jan tucusir iquiñat cutsuyäw puriyaraqui. Diosan chʼamapasti take jakenacaruw uca iquiñat pʼarjjtayani, cunapachatejj pututojj phustʼcani ucapacha. Jupanacasti taripäwip nayrakataruw jutapjjani, jiscʼanacasa jachʼanacasa. Takeniraquiw jupan taripäwip nayrakatar cutsuyatäsin saytʼapjjani, janchi jiwañäqui uca jiwañan wiñay chinuñapat antutatäsinsa.

14. Ucatsti Kollanan taripañapajj jupanacjjaruw jutani. Ucat urojj purininiwa, ucürojj kʼañu jakejj kʼañüscaquiniwa, asqui jakesti asquïscaquiniwa, cusisit jakejj cusisitäscaquiniwa, llaquisit jakesti llaquisitäscaquiniwa.

15. Jichhasti, take qhitinacatejj mä jan muspharcañ lurir dios jumanacatac amuyasis ut-tʼayapcta, take jumanacaruw jisctʼapjjerisma, cunanacat-tejj arsctsa take ucanacajj niy lurasjjeti? Tucusïwisti niy purjjeti? Janiw sapjjsmawa. Diosasti muspharcañ luräwinac lurir Diosäñjja, janiw tucuyquiti.

16. Diosajj lurcän ucanacajja, janit jiwasanacan amuyañasarjamajj muspharcañäqui? Jïsa, qhitis Diosan muspharcañ luräwinacap amuyaspa?

17. Qhitis sanejja, jupan arup toket alajjpachan acapach oraken utjatapajj janiw muspharcañ luräwïquit –sasajja? Qhitiraquis sanejja: Arupan chʼamap toketjja, jaker orake lakʼapat luratajj janiw muspharcañ lurawïquiti –sasa? Qhitiraquis sanejja: Arupan chʼamap toketjja muspharcañ luräwinac luratanacajj janiraquiw muspharcañ luräwinacäquit –sasajja?

18. Qhitis sanejja: Jesucristojj janiw jachʼa muspharcañ luräwinac wal lurcänti –sasajja? Uqhämaraquiw, apostolonacan amparanacap tokejj walja jachʼa muspharcañ luräwinacajj lurataraquïna.

19. Muspharcañ luräwinacatejj ucapachan lurasïnjja, cunats Diosajj jichhajj muspharcañ luräwinac lurañ tucuyaspajja, jan yakhar tucur Diosäsinjja? Nayajj sapjjsmawa: Jupajj janiw yakhar tucquiti. Jupatejj yakhar tucuspajja, Diosäñapajj tucusispawa. Ucampis janiw jupan Diosäñapajj tucusquiti; muspharcañ luräwinac lurir Diosäscaquiwa.

20. Jaken wawanacapan jan iyawsañar puripjjatap laycu, cheka thaquit saranucutap laycu, qhitirutejj jaysañapäqui uca Diosar jan uñtʼatap laycuraquiw jupajja, jupanac taypin muspharcañ luräwinac lurañjj apanucu.

21. Nayaw jumanacar sapjjsma: Qhititejj jan cun pächasis Cristor iyawsqui ucarojja, churatäniwa, cuntejj Criston sutipjjar Awquit mayisqui ucajja. Uca arsüwisti takpachanitaquiwa, acapach orak thiyanacanquirinacamp-pachataquiwa.

22. Cunalaycutejja, Diosan Jesucristo yokapaw aca oraken kheparapjjañapäcän uca yatekerinacapar arsüna, jïsa, take yatekerinacaparuraqui, jake tamanacan istʼañapataquiraquiw säna: Takpach oraker sarapjjam, asqui yatiyäw yatichapjjaraquim take jaquirinacaru.

23. Qhititejj iyawscani, bautisascaraquin ucajja, khespiyatäniwa. Ucampis qhititejj jan iyawscani ucajja, ñankhachatäniwa.

24. Aca unañchanacasti iyawsirinacaruw arcani. Nayan sutijj-jjaruw jupanacajj supayanac alis-supjjani; machak lajjranacat parlapjjani; catarinac waytapjjani; jiwayir uma umapcanisa, janiw ucajj cuna ñankhs jupanacar lurcaniti; usutanacjjar amparanacap lokjjatapjjan ucanacasti, cʼumaraptapjjaniwa.

25. Qhititejj jan cun pächasis sutijjar iyawscan ucataquejja, take arunacajj phokhä, orak thiyanac-camasa.

26. Ucalaycu, qhitis Tatitun luräwinacap jarqʼir saytʼaspa? Qhitis jupan satanacapar ajjalnucuspajja? Qhitis Tatitun take chʼaman chʼamapar jarqʼir sartani? Qhitis Tatitun luräwinacapar uñisini? Qhitis Criston wawanacapar uñisini? Amuyasipjjam, Tatitun luräwinacap uñisirinaca, cunalaycutejj jumanacajj muspharapjjätawa, jiwapjjaraquïtawa.

27. Uqhämasti, jan uñisipjjamti, janirac muspharapjjamsa. Antisas Tatitun arunacapar yäkapjjam, Jesusan sutipjjar Awquit mayisipjjaraquim take cunanacatejj waquisipctam ucanacataqui. Jan pächasimti, antisas iyawsapjjam; nayra pachanacanjam kalltapjjam; take chuymamp Tatitur jutapjjaraquim, quipca khespiyasiñamatac chʼamachasipjjam, jupan nayrakatapan ajjsarasa, qhathatisa.

28. Aca juman yantʼäwi urunacamanjja, wali amuytʼanïpjjam; take kʼañu lurañanacat jaltapjjam; munapayañamar cusisiyañataquejj jan mayisipjjamti, antisasa, jan pächasiñamp mayisipjjam, jan yantʼäwinacar yäkañamataqui, ucatsipana cheka jacquir Diosar lokañamataqui.

29. Amuyasipjjam, jan waquichasitäsin bautisayasiñata. Amuyasipjjam jan waquichatäsin Criston kollan amtäwip jan mankʼañamatac umañamataqui. Amuyasipjjaraquim, take cunanac waquichatäsin lurañamataqui. Ucsti jurapjjaraquim, jacquir Diosan Jesucristo Yokapan sutipjjaru. Jumanacatejj uc tucusïwcam chʼamachasis lurapjjätajja, janipiniw cunjämats jakonucutäpcätati.

30. Nayasti, jiwatanac taypit parlapquirismas uqhämaw parlapjjsma, cunalaycutejj yat-twa, jumanacajj arunacajjarojj istʼapjjätawa.

31. Jan nayan pantasitanacajjat jiscʼachapjjestati, janirac awquijjarus jupan pantasitanacap laycu, janirac qhitinacarutejj jupat nayra kellkapcän ucanacarusa. Ucatsipana, nanacan pantasitanacajj Diosan jumanacar uñachayatapat jupar yuspagarapjjam nanacat sipana, jumanacan suma amuyunïñ yatekañamataqui.

32. Nanacan yatitajjarjamaw aca kellkat kellkapjjta, asquichat egipto nanacan satäqui uca kellkanacampiw kellkapjjta. Ucanacasti nayra pachatjja maynit maynir catuyatawa; nanacan parlañajjarjam jakoquipataraquiwa.

33. Tʼalpha Lekʼetanacajjatejj hebreot kellkañatac jachʼäsapänjja hebreot kellkapjjeriscäyäta. Ucampis uca hebreojj nanacan turcayataraquiwa. Nanacatejj hebreot kellkapjjeriscäyätjja, janiw pantjasitanacajj jumanacatac kellkatajjan utjcasapänti.

34. Ucampis kellkapctsa ucanacjja, Tatitojj yatiwa, uqhämaraqui janiw yakha marcajj nanacan lajjrajj yatquiti. Ucat jupajj aca lajjra yakha lajjrar cunjäm jakoquipañs waquichi.

35. Acanacajj kellkataraquiwa, jan iyawsañar purir jilanacajjan wilap nanacan isinacajjat tʼajjsuñanacajjataqui.

36. Ucatjja, jilanacajjatac munapcta uc jupanacan Cristjjat yatiñar cut-tayatäñapajja, uca munatanacajjajj take aca oraken utjapcänsa, take uca kollan jakenacan mayisitanacaparjamawa.

37. Jesucrist Tatitojja jupanacan mayisitanacapan phokhatäñapatac churpan, jupanacan iyawsañaparjama. Dios Awquisti amtaracpan, Israelan utapamp amtäwir mantcän uca amtäwita. Jupanacar wiñayatac qhuyapaypan, Jesucriston sutipjjar iyawsatap laycu. Uqhamäpan.