1. Jichhasti, naya Moronejja, Mormon awquijjan kellkatap tucuyä. Mä kawkha cunanacaquiw kellkañajjatac utji. Awquijjaw ucanac kellkañajjataquejj camächit churitu.

2. Ucatsti Cumoranquir jachʼa muspharcan nuwasïw khepatjja, take aynach toke oraker jaltir Nefi jakenacaruw Laman jakenacajj thakapjjäna kʼal jupanacar jiwarayañapcama.

3. Jupanacasti awquijjarojj jiwayapjjaraquïnwa. Nayasti saparstʼataw acan jicjjatasta marcajjan llaquiscay tʼunjäwipat kellkañajjataqui. Ucampis jupanacajj chhakatäjjapjjewa. Nayasti awquijjan camächitap phokhä. Nayarojj jiwayapjjchitan jan jiwayapc-chitani, janiw nayajj yatcti.

4. Ucatsti nayajj kellkäwa, kellkatanac oraker imantaraquï. Cunatejj nayamp lurascan ucajja janiw nayataquejj cunäquisa.

5. Awquijjaw aca kellkat luräna; aca kellkatan cunataquïtap ucan kellkaraquïna. Nayaraquiw ucjj kellkaraquirista tʼalpha lekʼetanacantejj uc kellkañatac utjaspa ucajja, ucampis janiw utjquiti. Koristi janiraquiw utjquituti, nayan saparstʼatajj laycu. Awquijjajj nuwasïwin jiwayatänwa, uqhämaraqui takpach familianacajjasa. Janiw masinacajjajj utjquituti, janiraquiw qhitir sartʼañas utjcaraquituti. Cunapachcamajj Tatitojj nayan jacañajjatac jaytchitu ucjj janiraquiw yatcti.

6. Niy pusi patac maraw Tatitu Khespiyirisan jutatapat acsarojj sarakatäjje.

7. Laman jakenacasti nayan Nefi jakenacajjarojj maysat maysa, marcat marca thakapjjäna jucʼamp jan utjañapcama. Jupanacan tucusiñapajj sinti jachʼänwa. Jïsa, wali jachʼawa, muspharcañaraquiwa Nefi jakenacajjan tʼunjäwipajja.

8. Tatitun amparap laycuw ucajj uqhäm lurasïna. Jichhasti, Laman jakenacajj jupanac puraw nuwasipjje. Ac-chʼpach orakenarac jiwayañanacampi wila wartañanacampejj sapür utjascaraqui. Janiw qhitis aca nuwasiñan tucusiñap yatquiti.

9. Jichhasti, janiw jucʼamp jupanacjjat parlcäti, cunalaycutejj Laman jakenacamp lunthatanacampiquiw aca oraken utj-jje.

10. Janiraquiw qhitis cheka Diosar uñtʼquiti, Jesusan yatekerinacapaquiw uñtʼi; jupanacasti aca oraken khepaktapjjäna cunapachcamatejj jakenacan sinti ñankhätap laycu Tatitojj jupanacan jakenacamp jan kheparañap muncan ucürcama. Jichhasti, aca orakencapjjchi; janis aca orakencapc-chisa, janiw qhitis yatquiti.

11. Ucampis awquijjamp nayampejj jupanacar uñjapjjtwa. Jupanacasti nanacarojj chʼamampiw yanaptʼapjjaraquitu.

12. Qhitinacatejj aca kellkat catupcani, ucat janiraqui jiscʼachapcani aca kellkatan pantasitanacapata, ucanacajj jucʼamp jila cunanacjjat yatjjatapjjaraquini acanacat sipana. Nayajj Moronïtwa. Waquisispa ucajja, take cunanacjjat yatiyapjjerisma.

13. Jichhasti, aca marcjjat parlañ tucuytwa. Nayajj Mormonan yokapätwa. Awquijjasti Nefin jathapawa.

14. Naya quipcaw aca sarnakäwit kellkäwi Tatitutac imant-ta. Tatitun camächitap laycusti uca tʼalpha lekʼetanacajj janiraquiw cuna alanïquisa; cunalaycutejj jupaw sï: Janiw qhitis kamiriptañatac ucanac catcaniti. Ucampis tʼalpha lekʼetanacjjar kellkatäqui uca kellkäwejj sinti yäkatawa. Qhititejj uc uñstaycaraquini ucaruw Tatitojj qhuyapayani.

15. Cunalaycutejja, janitejj chʼamajj Diosan jupar churatäcanejja, janiw qhitins chʼamajj utjcaniti ac uñstayañataquejja. Cunalaycutejja, Diosan khapak cancañapataquiquiw ucan luratäñap Diosajj muni, jan ucasti, nayrapachat chʼeketatayata, nayrapachat utjiri, Tatitun amtäwi marcapan sumancañapataqui.

16. Qhititejj acjj khanar uñstaycan ucajja, qhuyapayatäniwa, cunalaycutejj Diosan aruparjamaw acajja, chʼamacat khanar apsutäni. Jïsa, lakʼat apsutäniwa, chʼamacanjj khanaraquïniwa, jakenacasti ucjjat yatipjjaraquini. Ucasti Diosan chʼamapan lurataraquïniwa.

17. Aca kellkäwin pantasitanacajj utjchi ucanacajja, jakenacan pantasïwinacapawa. Ucampis janiw pantasitanacan utjatap yatipcti. Ucampis Diosaw take cunanac yati; uqhämasti, qhititejj jiscʼachqui ucajja, amuyaspan, jupan jan mankhapach ninar tincuñapataqui.

18. Uqhämaraqui, qhititejj siscaspa: Nayar uñachayita, jan ucasti jawkʼantatäyätawa, jupajj amuyaspan, cuntejj jan lurañatac Tatitun uchatäqui uc jan lurañapataqui.

19. Cunalaycutejja, qhititejj jan amuyump taripqui ucajja, jan amuyump taripataraquïniwa, cunalaycutejj luratanacaparjamaw catokani. Uqhämasti, qhititejj jawkʼantqui ucajja, Tatitun jawkʼantataraquïniwa.

20. Cuntejj kellkatanacajj yatiyqui uc uñjjatam: Jakejj janiw jawkʼantañapäquiti, janiraquiw taripañapäquisa, cunalaycutejj taripañajj nayanquiwa –siw Tatitojja; nuwatat apsusiñasti nayancaraquiwa. Nayaw ucanacat cut-tayaraquï –saraquiw Tatitojja.

21. Qhititejj colerasiñamp chʼajjwañamp Tatitun luräwipjjat aruscani, Tatitun Israelan utapanquir amtäwi marcapjjats aruscaraquini, qhititejj siscaraquini: Tatitun luräwip chhaktayañäni; ucatsti, Israelan utapamp mantcäns uca amtäwipat Tatitojj armasjjaniwa, –sasa. Uca jakejja, phatʼsutäsin ninar jakontañjamäniwa.

22. Cunanactejj Diosajj wiñay lurañatac amtqui ucanacajja, utjascaquiniwa, take jupan arsüwinacapajj phokhatäcani ucapachcama.

23. Isaiasan arjäwinacapan thakapjjam. Nayajj janiw ucanac kellkcäti. Jumanacaruw sapjjsma, nayat nayra sarnakeri, aca orak catcän uca kollananacaw artʼapjjani; jïsa, lakʼats jupanacajj Tatituruw artʼapjjani. Tatitojj chekpachaw jacasqui, uqhäm chekampiw jupajj amtapunini jupanacamp lurcän uca amtäwitjja.

24. Jupasti mayitanacapan jilanacapataquïtap yati. Iyawsañap uñtʼaraqui, cunalaycutejj jupanacajj jupan sutipjjar kollunac jithiyañataqui, oraker onjjtayañataquiw chʼamanïpjjäna; uqhämaraqui, jupan arupan chʼamapampiw carcelanac tincuyapjjaraquïna; jïsa, naqhasquir hornos janiraquiw jupanacar naqhantcänti; janiraquiw ajjsarcañ lakʼonacas jiwayir catarinacas jupanacar chhojjriñchcänti, jupan arupan chʼamap laycu.

25. Uqhämaraqui, qhitirutejj Tatitojj acanac uñstayañatac jaytcani ucataquiw jupanacajj mayipjjaraquïna.

26. Janiw qhitisa, aca kellkatanacajj janiw uñstcaniti –sañapäquiti, cunalaycutejj uñstapuniniwa, Tatitun uc arsutap laycu. Tatitun amparapaw ucanac oraket mistuyani; janiw qhitis ucjj jarcʼcaraquiniti. Cunapachatejj jakenacajj sapcani: Janiw muspharcañ luräwinacajj utjcjjet jichhajja –sasajja, ucürun ucajj puriniraquini. Mä jakejj jiwatat parlcaspas uqhämaw puriraquini.

27. Cunapachatejj jamas arustʼäwinac laycu, chʼamac luratanac laycuraqui, kollan jakenacan wilanacapajj Tatitur artʼapcani, ucürun ucanacajj purinini.

28. Jïsa, ucanacajj mä urun purinini, cunapachatejj jakenacajj Diosan chʼamapar ajjalnucupcani ucürojja. Cunüruntejj iyawsir tamanacajj ñankhaptayascani, tamanquirinacasti chuymanacapan jachʼa jachʼa tucutapat aytʼasipcani ucürun purini. Jïsa, purininiwa, mä urunjja cunapachatejj yatichirinacasa, iyawsir tamanac irpirinacasa chuymanacapan jachʼa jachʼa tucutapat aytʼasipcani, quipca tamanacapanquir jakenacar kʼenasiñapcama.

29. Jïsa, mä urunjja, cunapachatejj yakha orakenquir ninanacjjata jachʼa llijullijun jallunacjjata, urpu jewkʼenacjjats jakenacajj istʼapcan ucürun purinini.

30. Jupanacajj istʼapjjaraquiniwa nuwasïwinacjjata, nuwasïwit istʼatanacjjata, cunayman chekanquir orak onjjtäwinacjjatsa.

31. Ucasti puriniraquiniwa, cuna uruntejj jachʼa kʼañu lurañanacajj orakjjan utjcan ucürojja. Utjaraquiniw jake jiwayañanaca, lunthatañanaca, cʼarisiñanaca, sallkjañanaca, kʼañusiñ wachokañanaca, take cunayman ajjtcañ luräwinacasa. Ucürunaracwa waljanejj sapjjani: Uc luram, jan ucajja, ac luram. Janiraquiw cunas uc luratam laycojj camachcätamti, cunalaycutejj khep khepürunjja, Tatituw ucanacjj arjjatani. Ucampis, ay uqhäm parlirinaca! Jupanacajj cʼallcʼu mulljam cʼallcʼuncapjjaniwa, ñankha cancañan chinuñanacapancaraquiniwa.

32. Jïsa, ucajj purininiwa, cunapachatejj mä urun iyawsir tamanacajj ut-tʼayatäni ucat aqhäm sapjjaraquini: Nayar jutam, kollkem churita, ucat juchanacamajj pampachatäni.

33. Ay juma ñankha, asquit cutekata, jan pʼek altʼir jakenaca, cunats jumanac pachpataqui, iyawsir tamanac ut-tʼayasipjjta kamiriptañanacamataqui? Cunats Diosan kollan arup maysar uñtayapjjta, jumanac pachpar juchañchayasiñanacamataqui? Diosan yatiyäwinacapar uñjapjjam, cunalaycutejj ucürun take ucanacajj phokhasini.

34. Cunapachatejj acanacajj jumanac taypir uñstcan ucüruna, cunatejj niy jutirjamäqui ucjjat Tatitojj jachʼa muspharcañ cunanac uñachayitu.

35. Jumanacajj acancapcasmas uqhämaw parlapjjsma, ucampis janiw acancapctati. Ucampis Jesucristojj jumanac nayarojj uñachayitu, nayasti luräwinacamat yat-twa.

36. Nayajj yat-twa, jumanacajj chuymanacaman jachʼa jachʼa tucutaparjamaw sarnakapjjta. Take jumanacajja, jan ucajja, niyapun takeniw chuymanacaman jachʼa jachʼa tucutapat jachʼaptapjjtajja, wali suma isinacamp uscusisa, kʼenasisa, chʼajjwasa, masimar ñankhachasa, yakhar arcanakasa, take cunayman ñankha luräw lurasaraqui. Iyawsir tamanacamasti, jïsa, sapakat mayaw kʼañuptjje, chuymanacaman jachʼa jachʼa tucutap laycu.

37. Cunalaycutejja, jumanacajj kollkeruw munapjjta; yänacamaru, qhusa isinacamaru, yupaychäwi utanacamar cʼachachañ jucʼamp munapjjaracta, tʼakhen sarnakerinacar munañat sipana, jan cunaninacaru, usutanacaru, llaquininacaru munañamat sipanaraqui.

38. Ay juma kʼañu jakenaca, cʼari chuymaninaca, yatichirinaca, cunatejj lakʼar tuc-cani ucatac jumanac pachp aljasirinaca, cunats Diosan kollan tamap kʼañuptayapjjta? Cunats Criston sutip jumanacjjar catjjaruñat pʼenkasipjjta? Cunats aca orakenquirinacan jachʼachasiñap laycu jumanacajj lupʼipjjta, jan tucusir cusisiñajj jucʼa alaniw –sasa, jan jiwquir mutuñat sipana?

39. Cunats jan jacañanïquis ucanacamp jumanac pachpar cʼachachasipjjta, ucampis awtjatanacaru, pistʼayasirinacaru, jan isininacaru, usutanacaru, llaquininacaru sarnakasquirir jaytanucupjjta, jupanacar janis uñjcasmas uqhäma?

40. Jïsa, cunats jamas ajjtcañanacam kamiriptañatac ut-tʼayapjjta, ijma warminacar Tatit nayrakatan jachayapjjta, wajchanacarus Tatit nayrakatan jachayapjjaracta? Cunats jupanacan awquinacapans chachanacapans wilanacap Tatitur oraketpach artʼayapjjta, jumanacan pʼekenacamjjar timasiñapataqui?

41. Nuwasiñ cut-tayir espadajj jumanacjjar aytatawa. Jancʼaw jutaraquini, cunürutejj jupajj kollan jakenacan wilanacapat jumanacjjar nuwasiñ cut-tayapcätam ucajja, cunalaycutejja, janiw archʼuquisitanacap jucʼamp istʼcaniti.