1. Ucatsti quimsa patac sojjta tunca quimsan maranjja, Nefi jakenacajj nuwasir tamanacapampiw Chʼusa Jaytanucut oraket Laman jakenacamp nuwasir maqhatapjjäna.

2. Ucatsti Nefi jakenacan nuwasir tamanacapajj Chʼusa Jaytanucut orakerojj wastatamp alisrantatäpjjänwa. Jupanac uqhäm karjatäquiriruw Laman jakenacan nuwasir yakha tamapajj jupanacjjar purïna, ucat mä wali ajjsarcay nuwasïwiw utjaraquïna. Laman jakenacasti Chʼusa Jaytanucut marcaruw catuntapjjäna, ucatsti, walja Nefi jakenacaruw jiwarayapjjäna, waljaniruraquiw catuntapjjaraquïna.

3. Jiltʼir Nefi jakenacasti ucsat jaltapjjänwa, Teancum marcanquir jakenacampiw mayachasipjjaraquïna. Teancum marcasti kota lamar laca thiyancänwa. Ucasti Chʼusa Jaytanucut marcat jacʼanquiriraquïnwa.

4. Nefi jakenacan nuwasir tamanacapan Laman jakenacan ucsar maqhatatap laycuw, Laman jakenacajj jupanacar atipjañ kalltäna. Janitejj uqhäm lurapcasapänjja, Laman jakenacajj janiw jupanacjjarojj chʼamanïpcasapänti.

5. Ucampis Diosan taripäwinacapajj ñankha jakenacjjaruw purinïna. Uqhämaraqui, ñankha jakenacajja, ñankha jakenacan mutuyatäpjjewa, cunalaycutejj ñankha jakenacajj jaken wawanacapan chuymanacaparuw tircuyapjje wil wartañapataqui.

6. Ucatsti Laman jakenacajj waquichasiñ kalltapjjäna Teancum marcar nuwasir sarañataqui.

7. Ucatsti quimsa patac sojjta tunca pusin maranjja, Laman jakenacajj Teancum marcar nuwasiriw sarapjjäna, Teancum marcar catuntañataquiraqui.

8. Ucampis Nefi jakenacajj jupanacar atipjapjjänwa, alisnucuñcama. Ucatsti Nefi jakenacajj Laman jakenacar alisnucutap amuyasinjja wastat jupanacan quipca chʼamanïtap amuyasisin jachʼachasiñ kalltapjjäna. Jupanacasti take chʼamapampiw mistupjjäna, wastatarac Chʼusa Jaytanucut marc catuntapjjaraquïna.

9. Take ucanacaw lurasïna. Warank warank jakenacaw jiwarayatäpjjaraquïna, paypach marcanjja, Nefi jakenacansa Laman jakenacansa.

10. Ucatsti quimsa patac sojjta tunca sojjtan mara sarakatatsti, Laman jakenacajj wastat Nefi jakenacamp nuwasiriw jutapjjäna. Ucampis Nefi jakenacajj janiw ñankha luräwinacapat cutiquipstapcänti, antisas jan tucuyasaw jupanacajj ñankhachasipcaquïna.

11. Cuntejj Nefi jakenacampin Laman jakenacampin taypipan sinti ajjtcañ wila wartäwinacampit jake jiwaratanacampitjja, janipiniw jake lajjrajj yatiycaspati, janipiniraquiw mä jakejj phokhat kellkäws kellkcaraquispati. Sapakat maynin chuymapasti chʼollkheptatänwa, jupanacajj wila wartañanjja, cusisipcaspas uqhamänwa.

12. Tatitun aruparjamasti janipiniw nayrapachanjja, uqhäm sinti ñankha luräwinacajj Lehin wawanacap taypin utjcänti. Janiraquiw take Israelan utapansa uqhäm ñankha luräwinacajj utjcaraquïnti, aca jakenac taypin utjquis uqhämajja.

13. Ucatsti Laman jakenacajj Chʼusa Jaytanucut marc catuntapjjäna, cunalaycutejj jakenacajj wali jilänwa, Nefi jakenacat sipana.

14. Jupanacasti Teancum marcaruraquiw sarapjjäna, uca marcanquirinacarusti ucsat alis-supjjaraquïnwa, walja warminacaru, wawanacaruw catuntapjjaraquïna, jupanacar jiwayasaw wacʼan diosanacapar loktapjjaraquïna.

15. Ucatsti quimsa patac sojjta tunc pakallkon maranjja, Nefi jakenacajj wal kʼapisipjjäna, warminacapar wawanacapar Laman jakenacan jiwayasin loktatapata. Ucat jupanacajj ancha kʼapisiñampiw Laman jakenac contrajj nuwasir sarapjjäna, ucatsti wastat jupanacarojj atipapjjäna orakenacapat alisnucuñcama.

16. Laman jakenacasti janiw wastatamp Nefi jakenacamp nuwasirejj jutapcänti, quimsa patac pakallk tunc pheskan maracamajja.

17. Uca maransti jupanacajj Nefi jakenacjjarojja, takpach chʼamanacapampiw sarakapjjäna. Jupanacan sinti waljanïtap laycusti, janiw jaqhutäpcänti.

18. Ucürut jichhürcamasti Nefi jakenacajja, janiw Laman jakenacjjar jucʼamp chʼamaniptapcänti. Antisasinsa cunjämatejj intejj sull chhaktayqui uqhäm Laman jakenacajj jupanacar chhaktayäna.

19. Ucatsti Laman jakenacajj Chʼusa Jaytanucut marc contra nuwasiriw sarakapjjäna. Chʼusa Jaytanucut orakensti, sinti jachʼa nuwasïwiw utjäna. Uca nuwasïwinsti Nefi jakenacaruw atipjapjjaraquïna.

20. Nefi jakenacasti, wastat jupanacan nayrakatapat jaltapjjäna, Boaz marcar puriñcama. Ucqhansti wali kamasan chuymampiw Laman jakenac contra nuwasiñataquejj saytʼasipjjäna. Ucat payïr cut jutapcän ucqhaw Laman jakenacajj jupanacar jan atipapcänti.

21. Ucatsti, payïr cuti jupanacjjar jutapcän ucapachaw Nefi jakenacarojj alisnucupjjäna, jiwarayapjjaraquïna. Jiwarayäwisti sinti jachʼaraquïnwa. Warminacaparu, wawanacaparu wasitat jiwayasaw jupanacarojj wacʼanacar loktapjjäna.

22. Ucatsti Nefi jakenacajj wastat jupanacan nayrakatapat jaltapjjäna. Take ucsa jachʼa marcanquirinacsa jiscʼa marcanquirinacsa jaltäwipanjja irpthapiwayapjjaraquïnwa.

23. Ucatsti naya Mormonajja, Laman jakenacan take orakjjar chʼamaniptirjamätap uñjasinjja, Shim kolluruw saräyäta. Ucatsti cunatejj Ammaronajj Tatitutac imantcän take uca kellkäwinac apsüyäta.