1. Ucatsti tunca maraw Laman jakenacajj jan wastat nuwasir jutapcänti. Ucampis nayajj Nefi jake marcajjan orakenacapamp armanacapamp nuwasiñ urutac waquichasiñanacapataquiw sarayäyäta.

2. Ucatsti Tatitojj nayar sitänwa: Aca marcar yatiyam, aqhäm sasa: Juchanacat cutiquipstapjjam, Tatitur jutapjjam, ucat bautisasipjjam, wastat Tatitun iyawsiri tamap ut-tʼayapjjaraquim; ucatsti jumanacajj imatäpjjätawa.

3. Nayaw aca jakenacarojj yatiyta, ucampis yatiyatajjajj inamayaquïnwa. Tatitun jupanacar khespiyatapa, juchanacapat cutiquipstañatac waquiyataps janiw amuyapcänti. Ucat jupanacajj chuymanacap chʼollkheptayapjjäna Dios Tatitupar jan yäkañataqui.

4. Ucasti uca tunquïr mara sarakepana, Criston jutatapat quimsa patac sojjta tuncan mara sarakatapata, Laman jakenacan pʼekechiripajj mä kellkäw nayar apayanitäna. Uca kellkäwisti Laman jakenacan wastat nanacamp nuwasir jutañapatac waquichasitap yatiyitäna.

5. Ucatsti jakenacajjan Chʼusa Jaytanucut sat oraker mä thiyanquir marcar tantachasiñapataquiw nayajj ewjjäyäta. Uca marcasti aynach toke orakemp jiquisir cʼullcʼu simpat jacʼancänwa.

6. Ucqharuw nuwasiri tamanacajj uchapjjäyäta, Laman jakenacan nuwasiri tamanacapar jarcʼañataqui, jupanacan mä kawkchʼa orakenacajj jan catuntasiñanacapataqui. Ucatjja, take chʼamajjampiw chʼamañchasipjjäyäta jupanacar jarcʼañanacajjataqui.

7. Ucatsti quimsa patac sojjta tunc mayan maranjja, Laman jakenacajj Chʼusa Jaytanucut sat marcaruw sarakapjjäna, nanacamp nuwasiñataqui. Ucatsti uca maran nanacajj jupanacar atipapjjta, ucat jupanacajj quipca orakenacapar wastat cut-tjjapjjäna.

8. Quimsa patac sojjta tunc payan maransti, jupanacajj wastat nuwasir mistunipjjäna, ucansti nanacajj wastat jupanacar atipapjjaraquicta; waljaniruraquiw jupanacat jiwarayapjjaracta. Amayanacapasti jachʼa lamarar jakontatäpjjaraquïnwa.

9. Ucatsti, Nefi jake marcajjan uca jachʼa atipäwip laycu, quipca chʼamanïtapat amuyasisaw jachʼa jachʼa tucuñ kalltapjjäna. Alajjpachan nayrakatapan jurament lurañ kalltapjjaraquïna timanacapan jiwarayat jilanacapan wilapat apsusiñ amtapjjaraquïna.

10. Jupanacasti alajjpach laycuw jurament lurapjjaraquïna, uqhämarac Diosan jilïr konuñap laycuw juräwi lurapjjaraquïna, timanacapar nuwasir maqhatañanacapataqui, orakjjat jupanacar tucqhañanacapataqui.

11. Ucatsti naya Mormonajj ucapachat ucsarojj janiw cunjämats uca marcan sarayiripäñs irpiripäñs muncäyät-ti, jupanacan ñankhätap laycu, ajjtcañ luräwinacap laycuraqui.

12. Nayajj jupanacan irpapäyätwa, jupanacajj ñankhäpc-chïnsa nayajj walja cutiw jupanacan nuwasiñapan irptäyäta. Jupanacarusti take chuymaw munaraquïyäta, nayan utjcän uca Diosan munañaparjama. Diosajjar takpach chʼamajjamp chuymajjamp loktasaw alwat jaypʼucam jupanacatac mayiraquïyäta, ucampis janiw iyawsañamp maycäyät-ti, jupanacan chʼollkhe chuymanïtanacap laycu.

13. Quimsa cutiraquiw timanacapan amparanacapat jupanacar khespiyäyäta, jupanacasti janiraquiw juchanacapat cutiquipstapcaraquïnti.

14. Cuntejj Khespiyir Tatitu Jesucristojj juräwi jan lurapjjañap muncän ucanac lurasa, timanacap contra nuwasir sarañataqui, jilanacapan wilapat apsusiñatac juräwi lurapcän ucqhaw, Tatitun arupajj nayar jutasin situ:

15. Nayanquiw uqhämat uqhäm apsusiñajja; nayaw ucanac cut-tayaraquï. Nayajj aca jakenacar cutsuycäyät uca khepatsa, janiw juchat cutiquipstapquiti. Uqhämasti, jupanacajj aca orakjjat tucqhatäpjjaniwa.

16. Uca khepatsti nayajj janiw timanacajj contrajj nuwasir maqhatañ muncäyät-ti. Cuntejj Tatitojj nayan lurañajjatac sisquitän uc luraraquïyäta. Mä ircatir jakëcasin jan cun lurasaw ucqhancäyäta, uñjcäyäts istʼcäyäts ucanacjjat acapach oraker jan yatiyasa, Ajayun jutir cunanacat khanañchir yatiyäwiparjama.

17. Uqhämasti, juma gentilenacaruw kellkapjjsma. Uqhämarac jumanac Israelan utaparuw kellkapjjaracsma, cunapachatejj luräwejj kalltcani ucürun jumanacan tuti orakemar cut-tañatac waquichasiñanacamataqui.

18. Jïsa, take orak thiyanacan utjir jakenacaruw kellkta. Jïsa, Jesusan Jerusalen oraken ajllit tunca payan yatekeripan luräwinacamarjam taripatäpcäta uca juma Israelan tunca payan tamaparuw kellkanipjjsma.

19. Kellkapjjaracsmawa aca marcat jiltʼirinacaru. Jesusajj aca oraken ajllcän uca tunca payan yatekerin taripatäpjjätawa. Jerusalen orakenjja Jesusan ajllitäcänsa uca tunca payaniraquiw aca orakenquir tunca payanirojj tariparaquini.

20. Ajayuw take ucanac yatiyaraquitu. Uqhämasti, takpach jumanacaruw kellkapjjsma. Acataquiw kellkapjjsma, sapakat maynin Criston taripañ konuñap nayrakatar saytʼañam waquisitap yatiñanacamataqui. Jïsa, sapakat mayni Adanan familiapanquir jakew uqhäm saytʼani. Luräwinacamajj asquïc-chisa ñankhäc-chisa, luräwinacamarjam taripatäñamataquiw saytʼapjjañama.

21. Jumanacar kellkapjjaracsmawa, Jesucriston yatichäwinacapar iyawsañanacamataqui, uca yatichäwinacasti jumanac taypincaraquiniwa. Tatitun judio arsüwi jakenacapajj uñjapcäns istʼapcaraquïns uca ircatirin jan sapaqui jupanac taypin utjañapataquiw kellkapjjaracsma, jan ucasti yakha ircatirin jupanacan utjañapataquiraqui; jupanacajj jiwayapcänsa uca Jesusan cheka Cristötapa cheka Diosätap ucajj ircatani.

22. Nayasti take juma thiya orak jakenacar juchat cutiquipstañamatac amuyayañ munapjjsma, Criston taripañ konuñap nayrakatar saytʼañatac waquichasiñanacamataqui.