1. Ucatsti uca quipca maranjja, Nefi jakenacamp Laman jakenacampejj jupanac puraw nuwasiñ kalltapjjäna. Nayajj janis ancha waynäc-chïyätjja, jachʼa tansa waynäyätwa. Ucat Nefi jakenacajj nayar jupanacan irpiripat ut-tʼayitäna, jan ucajja, nuwasiri tamanacapar sarayiritaqui.

2. Ucatsti, tunca sojjtan maranïcäyät ucapachaw Nefi jakenacan mä nuwasiri tamapan nayrakatap saräyäta Laman jakenacamp nuwasiri. Ucapachcamasti, quimsa patac pä tunc sojjtan maraw sarakjjäna.

3. Ucatsti quimsa patac pä tunc pakallkon maranjja, Laman jakenacajj sinti jachʼa chʼamampiw nanacjjar jutapjjäna, nayan nuwasiri tamanacajjar ajjsarthapiyañcama. Uqhämasti, nuwasiri tamanacajjajj janiw nuwasiñ munapcänti; jupanacasti alay tokenquir orakenacaruw jaltapjjaraquïna.

4. Ucatsti Angola marcaruw puripjjäyäta, ucat marcar irpnakañataquiw chʼam catjjatapjjäyäta. Ucatsti waquichasipjjäyätwa Laman jakenacamp nuwasiñataqui, nanac quipca khespiyasiñajjataqui. Ucatsti take chʼamajjampiw uca marcar chʼamañchapjjäyäta, ucampis uqhäm chʼamañchapcäyät ucasa, Laman jakenacajj nanacjjaruw jutapjjäna, marcatsti alisnucupjjaraquitänwa.

5. Uqhämaraquiw Davidan orakepat alisnucupjjaraquitäna.

6. Nanacasti sarasipcaquïyätwa, ucat Josue oraker puripjjaraquïyäta. Uca orakesti inti jalant tok thiyanacancänwa, lamar kot lacana.

7. Ucatsti, mäquiw jakenacajjar ucsan tant-thapipjjäyäta, jupanacar mä tamar mayachthapiñataqui.

8. Ucampisa ucsa orakejj lunthatanacamp Laman jakenacampin phokhantatänwa. Nayan marcajjasti wali jachʼa tʼunjäwir jalantirjamänwa, ucampis jupanacajj janiw ñankha luräwinacapat cutiquipstapcänti. Uca laycuw Nefi jakenacampin Laman jakenacampin wilapajj wartasïna. Wilamp jake jiwatampisti, uc-chʼpach orakjjar willitatatäjjänwa. Uc-chʼpach orakesti jachʼa pitusïwimp phokhantataraquïnwa.

9. Ucatsti Laman jakenacan mä pʼekechiripaw utjäna. Ucasti Aaron sutinïnwa. Jupasti, pusi tunc pusin warank jaken nuwasiri tamampiw nanac contrajj jutäna. Nayasti, pusi tunc payan waranka jaken nuwasiri tamampiw saycat-ta. Ucatsti nuwasiri tamajjampiw jupar atipjta. Jupasti nayan nayrakatajjat jaltänwa. Take ucanacaw lurasïna; quimsa patac quimsa tuncan mara sarakataraquïnwa.

10. Ucatsti, Nefi jakenacajj ñankhätapat cutiquipstañ kalltapjjäna, jachañ kalltapjjaraquïna, cunjämatejj Samuel arjirijj yatiycän uqhäma, cunalaycutejj janiw qhitis jupanquir yänacap imcasapänti oraken lunthatanacan jake jiwayirinacan utjatap laycu, salamancanacan laykantäwinacan utjatap laycuraquejja.

11. Ucanac laycusti, llaquisiñamp jaqhusiñampiw uc-chʼpach oraken utjäna. Llaquisiñamp jaqhusiñampejj Nefi jakenac taypin jucʼamp utjaraquïna Laman jakenacat sipana.

12. Ucatsti naya Mormonajja, jupanacan Tatitun nayrakatapan jaqhusiñap llaquisiñap jachañap uñjasinjja, chuymajjajj cusisiñ kalltäna, cunalaycutejj nayajj Tatitun qhuyapayasïwip pʼek jan mäc pasayasirïtap yatïyäta. Ucat amuyaraquïyätjja, Tatitojj jupanacar qhuyapaycaspa uqhäma, jupanacan wastat asqui marcar cut-tañapataqui.

13. Ucampis uca cusisiñajjajj inamayaquïnwa, cunalaycutejj jakenacan llaquisïwipajj janiw Tatitun asquïtap laycu cutiquipstañar irpcänti. Jan ucasti, jupanacan llaquisiñapajj ñankhachat jaken llaquisiñapänwa, cunalaycutejja, jupanacajj jucha taypin jacapcän uc-chañcamajja, Tatitojj janiw juchapan cusisiñap muncänti.

14. Janiraquiw jupanacajj pʼaquintat altʼat chuymanacamp Jesusar jutapcänti, antisaw jupanacajj Diosar ñankha arump arusis jiwañ munapjjäna. Espadamp jupanacan jacañap arjjatascasasa.

15. Ucatsti llaquisiñajjajj nayjjarojj wastat cutiquipstitäna. Nayajj amuyaraquïyätwa, acapach janchitac ajayutac qhuyapayasïw urun jupanacatac tucusitapa, cunalaycutejj nayajj uñjäyätwa, warank warankaw jupanacat Diosapar wal chʼurqhisisinjja, jiwarat sucʼtatäpjjäna, wanjam orak patjjar kot-thapitäpjjaraquïnwa. Quimsa patac pusi tunc pusin maraw sarakjjaraquïna.

16. Ucatsti quimsa patac pusi tunca pheskan maranjja, Nefi jakenacajj Laman jakenacan nayrakatapat jaltañ kalltapjjäna. Laman jakenacasti jupanacarojj arctapjjänwa, Jason oraker puriñapcama. Nefi jakenacasti janiraquiw saytʼasipcänti uca oraker puriñapcamajja.

17. Ammaronajj Tatitutac kellkatanacan jan tʼunjatäñapatac imantcän ucawjatjja, Jason marcajj jacʼaquïnwa. Nayasti Ammaronan aruparjam ucsar sarasinjja, Nefin tʼalpha lekʼetanacap apsuraquïyäta. Ucatsti mä kellkat luraraquïyäta Ammaronan aruparjama.

18. Nefin tʼalpha lekʼetanacapjjarojja, take ñankha cancañanacata, ajjtcañ luräwinacatsa, mä phokhatpach sarnakäwi kellkäyäta. Ucampis aquïr tʼalpha lekʼetanacjjarojja, janiw ñankha cancañapat ajjtcañ luräwinacapats phokhatpach sarnakäw kellkcti, cunalaycutejj jaken sarnakäwipjja uñjañajjatac amuy catokcäyät ucürut jichhürcamaw ñankha cancañanacamp ajjtcañ luräwinacamp nayranacajjamp sapür uñjapinta.

19. Ay nayata, jupanacan ñankha cancañanacap laycu! Cunalaycutejja, jiscʼatpach jichhürcamaw llaquinacajj nayan chuymajjan phokha, ñankha cancañanacapata. Ucampis nayajj yat-twa, khep khepa urunjja, nayajj alayar apcatatäyäwa.

20. Ucatsti uca maran Nefi jakenacar jiwayañatac thakapjjetäna, alisnakapjjaraquitäna. Ucatsti nanacarojj alay tokeruw aliscatapjjetäna Sem sat oraker puriñanacajjcama.

21. Ucatsti Sem marcaruw chʼamaniptayapjjäyäta, kawkhacamatejj chʼamajj utjcäna, ucqharuw jakenacajjarojj mayachthapipjjaraquïyäta. Ucsti jupanacar tʼunjañat khespiyañataquiw lurapjjäyäta.

22. Ucat quimsa patac pusi tunc sojjtan maransti Laman jakenacajj wastat nanac contra nuwasirejj jutañ kalltapjjäna.

23. Ucatsti nayaw marcajjar parläyäta, wali chʼamampiw jupanacar ewjjaraquïyäta, jan ajjsaras Laman jakenacan nayrakatapan saytʼasipjjañapataqui, nuwasipjjañapataquiraqui, warminacapataqui wawanacapataqui utanacapataqui familianacapataqui.

24. Arunacajjasti jupanacarojj mä jucʼa pʼarjjtayänwa, ucat jupanacajj Laman jakenacan nayrakatapat janiw jaltapcänti; antisaw jan ajjsarañ chuymamp thurtʼasipjjäna.

25. Ucatsti quimsa tunc warank jaken nuwasiri tamajjampiw nanacajj saytʼasipjjäyäta, pheska tunc warank jaken nuwasiri tamapampi. Ucatsti sinti chʼamampiw nayrakatapan thurtʼasipjjäyäta, nayrakatajjat jupanacan jaltañapcama.

26. Ucatsti jupanac jaltapcän ucqhajja, nanacajj nuwasiri tamanacajjampiw jupanacar arctapjjäyäta, jupanacar wastat jicjjatañcama. Ucat wastat jupanacar atipjapjjaraquïyäta. Ucampis Tatitun chʼamapajj janiw nanacampïcänti. Jïsa, jithektataw uñjasipjjäyäta. Ucat Tatitun Ajayupajj jan nanacampïtapata, jilanacajjar uñtataw jan chʼaman tucupjjäyäta.

27. Aca marcajjan jan walincatapaw chuymajjar llaquisiyäna. Uca jan walincañasti utjänwa, ñankhätap laycu ajjtcañ luräwinacap laycuraqui. Ucampisa, nanacajj Laman jakenac contra Gadianton lunthatanac contra nuwasirejj sarasipcaquïyätwa, takpach tuti orakenacajj wastat catuñanacajjcama.

28. Quimsa patac pusi tunc llätuncan maraw sarakjjäna. Quimsa patac pheska tuncan maransti, Laman jakenacampi Gadianton lunthatanacampejj mä amtäwiruw mantapjjäyäta. Uca amtäwi tokew tuti orakenacajjajj jalanokasïna.

29. Aynach tokenquir orakemp jiquiscän uca cʼullcʼu simpacamaw Laman jakenacajj alay tokenquir orak churapjjetäna. Nanacasti take aynach tokenquir orak Laman jakenacar churapjjaraquïyäta.