1. Jichhasti nayajja, Nefi jakenaca sat marcajjan tʼunjäwipat kellkäwijjar tucuyä. Nanacasti Laman jakenacan nayrakataparuw cut-tapjjta.

2. Naya Mormonasti, mä kellkäwi Laman jakenacan pʼekechiripar kellkta, nanacan take marcajjar mayachthapiñajjatac jaysañapataqui, ucatsti Cumora sat orakena, Cumora sat kollu jacʼana. Ucqhan nanacajj jupanacamp nuwasipjjañajjataquiraqui.

3. Ucatsti cuntejj nayajj muncäyät uqhämaruw Laman jakenacan pʼekechiripajj jaysitu.

4. Ucatsti Cumora orakeruw sarapjjäyäta. Cumora kollu muytasinsti chʼujllanac ut-tʼayasipjjaraquïyäta. Uca orakensti umanacampi, jawiranacampi, uma jalsunacampisti, waltʼatänwa. Ucqhanarac Laman jakenacatac chʼamaniptañ suyapjjäyäta.

5. Quimsa patac quimsakallk tunc pusin mara sarakatatjja, nanacaw take marcajjat jiltʼir jakenacarojj Cumora sat oraken mayachthapipjjäyäta.

6. Ucat Cumora sat orakena take jakenacajjar mayachthapitajjatjja, naya Mormonajj chuymaniptañ kalltjjäyäta. Ucan marcajjan khepïr nuwasïwipätap yatiraquïyäta. Uqhämaraqui awquinacajjan catuyat kollan kellkäwinacjja jan Laman jakenacan amparanacapar puriñap jaytañajjataquiw nayajj Tatitut camächit catokäyäta, (cunalaycutejj Laman jakenacajj kellkäwinacarojj tʼunjapjjasapänwa). Ucat Nefin tʼalpha lekʼetanacapat aca kellkäw luräyäta. Nayan uñjañajjataqui Tatitun amparapan churatäquis take uca kellkatanac Cumora sat kolluruw imant-ta. Ucampis aca kawkha tʼalpha lekʼetanacjj janiw imantcti, antisas acanacjj Moroni yokajjaruw catuyta.

7. Ucatsti jakenacajjajj warminacapamp wawanacapampiw Laman jakenacan nuwasir tamanacap jupanac toker jutasipquir uñjapjjäna. Take ñankha jaken chuymapan phokhantatäqui uca jiwañat ajjsarasaw jakenacajjajj Laman jakenacan puriniñap suyapjjäna.

8. Ucat jupanacajj nanacamp nuwasiriw jutapjjäna. Sapakat mayniraquiw sint ajjsarthapipjjäyäta jupanacan sinti waltʼatätapata.

9. Ucatsti jupanacajj jakenacajjaruw jaljjatapjjäna, espadanacampi, michʼinacampi, michʼi illaptʼañanacampi, hachanacampi, take cunayman nuwasiñanacampi.

10. Ucatsti jakenacajjajj kʼala jiwarayatäpjjänwa, jïsa, nayampïcän uca tunca warankasa. Nayasti jupanac taypinjja usuchjataw liwisïyäta. Laman jakenacasti nay ucqhanc-cäyät ucqhatjja maysaruw saraquipapjje, ucat jan jiwayapquituti.

11. Ucatsti jupanacajj nanac taypinjam saraquipasinsti, take jakenacajjaruw kʼal sucʼtapjjaraquïna, pä tunc pusiniquiw jan jiwayatäpcäyät-ti. (Moroni yokajjasti uca pä tunc pusinit maynïrïnwa). Ucatsti jiwarayat marcajj taypit nanacajj jiltʼapjjäyäta. Khepärmanthisti, Laman jakenacan utjnokäwipar cut-tatap khepatjja, irpirïcäyät uca nayan tunca warank sucʼtata jakenacajjaruw nanacajj Cumora sat kollu apachitat uñatatapjjäyäta.

12. Nayan marcajjat yakha tunca warankaniruw uñjapjjaraquïyäta, ucanacarusti Moroni yokajjaw irpäna.

13. Uqhämaraquiw Gidgidonan tunca warankapajj sucʼtataraquïna, jupasti jupanac taypinjj jiwayataraquïnwa.

14. Lamasti tunca warankapampiw sucʼtataraquïna. Gilgalasti tunca warankapampiw sucʼtataraquïna. Limhasti tunca warankapamp sucʼtataraquïnwa. Joneamasti tunca warankapamp sucʼtataraquïnwa. Camenihasti, Moronihasti, Antionumasti, Shiblomasti, Shemasti, Joshasti, sapakat mayni jupanacat tunca warankapampiw sucʼtatäpjjaraquïna.

15. Uqhämaraqui yakha tuncanimpiw espadan jiwayatäpjjäna, sapakat maynisti tunca warankapampi. Jïsa, takpach marcajjaw jiwarayatäpjjäna. Nayampïcän uca pä tunc pusiniquiw jiltʼapjjäyäta, aynach toke orakenacar jaltapcän uca mä jucʼanimpi, uqhämaraqui Laman jakenacar tucupcän ucanacat mä kawkhanimpi. Jakenacajjan janchinacapasa, chʼaqhanacapasa, wilanacapasa, orakjjar willitatatänwa. Jupanacar jiwarayapcän ucanacan amparanacapan jaytanucutaraquïnwa, uca oraken thujsantañapataqui, lakʼar tucuñapataqui, oraker cut-tañapataqui.

16. Jiwarayat jakenacajjat chuymajjajj sinti llaquisiñat payarus jaljtcaspajj uqhämänwa. Ucat nayajj artʼaraquïyäta aqhäm sasa:

17. Ay juma suma uynaktʼan jakenacajja, cunjämats Tatitun thaquinacapat saranucupjjta! Ay juma suma uynaktʼan jakenacajja, amparanac loktas jumanacar catokañatac suycän uca Jesusarojj cunjämats jan catokapcta!

18. Janitejj jumanacajj ucanac lurapcasamänjja, janiw tincupcasamänti. Ucampis tincutäjjapjjtawa, nayasti tincutanacamat jaqhusta.

19. Ay juma suma uynaktʼan yokanacamp phuchanacampi, awquinacamp taycanacampi, chachanacamp warminacampi! Suma uynaktʼan jakenacajja, cunjämats tincupjjtajja?

20. Ucampis niy chhakatäjjapjjtawa; nayan llaquinacajjasti janiw wasitat cut-tayapquiristamti.

21. Cunürutejj janchinacaman jan jiwquir tucuñapajj waquiscani, uqhämaraqui, jichha thujsantapquis uca janchinacaman jan thujsquir tucuñapajj waquiscaraquini ucürojj lakaw purinini. Ucat jumanacajj Criston taripañ konuñap nayrakatar saytʼapjjañamäniwa, luräwinacamarjam taripatäñamataqui. Jumanacatejj asqui jakëpstajja, nayra awquinacamampiw asc catokapjjäta.

22. Ay, jumanacajj juchanacamat cutiquipstapjjaquisamäna janïr jachʼa jiwarayäwi jumanacjjar purincäns ucapachajja. Ucampis niy chhakatäjjapjjtawa; Awquisti, jïsa, alajjpachanquir Wiñay Awquiw jumanacan cunjamätams yati. Chekapäñaparjama, qhuyapayañaparjamaw jupajj jumanacamp lurani.