1. Ucatsti nayajj Nefi jakenac taypiruw sarta; cuna juräwitejj lurcäyät jan jucʼamp jupanacar yanapañajjataqui uca juräwit cutiquipstäyäta. Jupanacasti wastat nuwasiri tamanacapar sarayäw churapjjetäna, cunalaycutejj nayajj jupanacar llaquinacapat khespiyquiristjja uqhäm amuyapjjäna.

2. Ucampis janiw nayajj atipañatac suycäyät-ti, cunalaycutejj jutañapacänsa uca Tatitun taripäwinacapjjat yatïyätwa, cunalaycutejj jupanacajj janiw ñankha luräwinacapat cutiquipstapcänti, antisas jupanacar uchcän uca Diosat jan mayisisaw jupanacajj quipca jacañapatac nuwasipjjäna.

3. Ucatsti, nanac Jordan marcar jaltquiriruw Laman jakenacajj nanacamp nuwasir jutapjjäna. Ucampis jupanacarojj kheparuw jit-tʼayapjjäyäta. Jupanacasti janiw ucapachajj marc catuntapcänti.

4. Ucatsti wastat nanacamp nuwasir jutapjjäna, nanacasti janiw uca marc antutapcäyät-ti. Nefi jakenacajj yakha marcanac catuscaquiraquïnwa; uca wali chʼaman marcanacasti Laman jakenacarojj jarcʼapjjänwa, jupanacan nayrakatajjanquir oraker jan mantañanacapataqui, orakijjan utjirinacar jan jiwarayañanacapataquiraqui.

5. Ucampisa, cuna orakenacat-tejj jaltapcäyäta, janirac ucanquir jakenac apthapipcäyät uca orakenacaruw Laman jakenacajj tʼunjapjjäna. Jachʼa marcanacapa jiscʼa marcanacapsa ninampiw phichhantapjjaraquïna. Uqhämaw quimsa patac pakallk tunc llätuncan marajj sarakäna.

6. Ucat quimsa patac quimsakallk tuncan maransti, Laman jakenacajj wastat nanacamp nuwasir jutapjjäna. Nanacasti jan ajjsarañ chuymampiw jupanacamp nuwasir thurtʼasipjjäyäta. Ucampis chʼamtʼatajjajj inamayaquïnwa, cunalaycutejj jupanacajj sinti waljapjjänwa, Nefi jakenacjjar cayunacapamp tacjjatañapcama.

7. Ucatsti nanacajj wastat jaltañ kalltapjjäyäta. Qhitinacatejj Laman jakenacat jucʼamp lak jaltcän ucanacajja, khespiyasipjjänwa. Qhitinacatejj Laman jakenacat jan jucʼamp lak jaltcän ucanacasti, sucʼtatäpjjänwa jiwarayatäpjjaraquïnwa.

8. Jichhajja, nayan nayranacajjamp uñjcäyät uca wila wartäwinacampit jake jiwayäwinacampitjja, janiw naya Mormonajj jakenacan chuymanacapar onjjtayañatac yatiyañ muncti. Ucampis nayajj yat-twa, uca luräwinacajj yatiyatäniwa; uqhämaraqui, take cunayman jamasat luratanacajj uta patanacat khanañchataraquïniwa.

9. Uqhämaraqui, uca marcanacat jiltʼir jakenacajj ucanacjjat yatipjjaraquiniwa. Tatitun sataparjamasti, aca marcar chʼeketatayapcan uca gentilenacajj yatipjjaraquiniwa. Aca marcajj jan cunatac walïcaspas uqhäm jupanacajj amuyapjjaraquini. Ucat nayajj take cunatejj lurascän ucanacat mä jucʼac kellkta. Janiw nayajj cunanactejj uñjcäyät ucanacat phokhatpach kellkcaraquirist-ti, cunalaycutejj mä camächit catokta, uqhämaraqui aca marcan ñankhätapat jan anch llaquisiñanacamataqui.

10. Jichhasti, acjj säw nayajja, jupanacan jathanacaparu, Israelan utapar uñjañapatac ewjjat gentilenacaruraqui, qhitinacatejj amuyapqui yatipcaraqui cawqhats qhuyapayäwinacapajj jutqui ucjja.

11. Cunalaycutejj yat-twa, Israelan utapan jan walir puritapat uca gentilenacajj llaquisipjjani. Jïsa, aca marcan tʼunjatätapat jupanacajj llaquisipjjani. Llaquisipjjaraquiniwa, cunalaycutejj aca jakenacajj janiw juchanacapat cutiquipstapcänti, Jesusan amparapan khomthapitäñanacapataqui.

12. Jacobon utapat jiltʼirinacataquiw acanacajj kellkatajja. Uqhämat kellkatawa, cunalaycutejj Diosan yatitawa: Janiw ñankha cancañajj jupanacar uca kellkäwinac uñstaycaniti. Tatitun amuyuparjam asquïcan ucapachan mistuñapataquiw aca kellkatanacajj Tatitutac imantatäni.

13. Ucajja, catokctsa uca camächitawa. Kellkatanacasti Tatitun camächit churañaparjamaw uñstapjjani, cunürutejj jupajj wali amuyump uñstayañatac amuycan ucüruna.

14. Ucatsti acanacajj jan iyawsir judionacaruw uñstani, Jesusan Cristötapa jacquir Diosan Yokapätap jupanacan amuyañapataqui, Awquin sinti jachʼa wiñay luräwip takenit sipan jucʼamp Munatap toke lurañapataqui, Diosajj jupanacar churcän uca orakepar judionacaru, jan ucajja, take Israelan utapar cut-tayasa. Ucasti jupan arsüwipan phokhasiñapataquiwa.

15. Aca jakenacajj chʼeketatatäpjjaniwa; aca jakenacajj chʼamac kʼañu ajjtcañ jakenacaruw tucuni, jiwasanac taypin utjcän ucat jucʼampi, jïsa, Laman jakenac taypin uñjctan ucat jucʼampiraqui. Jupanacan jan iyawsatapata, wacʼan diosanacar yupaychatapat uqhäm tucuni. Ucatsti, kellkatanacaw uñstaraquini aca marcan jathanacapan jucʼamp jupan yatichäwipar iyawsañanacapataqui. Uca yatichäwisti gentilenacat jupanacar jutani.

16. Cunalaycutejja, Tatitun Ajayupajj niy awquinacapamp kʼewtasiñ apanucjjewa. Jupanacasti jan Cristoni jan Diosaniw acapach orakencapjje. Chʼallphanacajj thayan ucs acs apnakatäquis uqhäm jupanacajj apnakatäpjjewa.

17. Mä pachanjja, jupanacajj suma munat jakenacapjjänwa; Cristosti jupanacan awatiriparaquïnwa; jïsa, Dios Awquiw jupanacarojj irpäna.

18. Ucampis jichhajja, Satanasan ucs acs irpnakatäpjjewa, cunjämatejj chʼallphanacajj thayan ucs acs apnakatäqui uqhäma, cunjämatejj mä jan achiwani, jan timon lawani, jan anclan barcojj mathapinacan ucs acs jaktatäquejj uqhamäpjjew jupanacajja.

19. Cuna qhuyapayäwinactejj Tatitojj aca oraken jupanacar churcasapän uca qhuyapayäwinac jupaw imjjäsisqui aca orak catupcan uca gentilenacataqui.

20. Ucampis mä urojja, gentilenacaw jupanacarojj alisnucupjjani chʼeketatayapjjaraquini. Ucat gentilenacajj jupanacar alisnucupcani, chʼeketatayapcan uca khepatjja, Tatitojj Abrahanampi take Israelan utapamp mantcänsa uca arsüwit jupajj amtasini.

21. Uqhämaraqui asqui jakenacajj jupanacatac Tatitur loktapqui uca mayisitanacapat Tatitojj amtasiraquini.

22. Ucatsti, juma gentilenaca, janitejj ñankha sarnakäwinacamat cutiquipstapcäta ucasti, cunjämarac ucürun Diosan chʼamap nayrakatan jan cutiquipstasast saytʼapjjäta?

23. Janit Diosan amparanacapancatam yatipcta? Janiraquit yatipcta jupan take chʼamanïtapa, uqhämaraqui cunapachatejj jupajj jachʼa camächit churcan ucapachajj oraken llawthapit tucuñapatsa?

24. Uqhämasti, juchanacat cutiquipstapjjam, jupan nayrakatapan chuymanacam altʼayapjjam, jupan jumanacjjar chekapar uñjas jan jutañapataqui, Jacobon jathapat jiltʼirinacan jumanac taypir jan leonjam wiqhanoker sarañapataqui, jan qhiti khespiyir jicjjatcasa.