Eteran Kellkatapa

1. Jichhasti, naya Moronejj aca alay tokenquir orakjjan Tatitun amparapan tucqhatäpcän uca nayra nayra jakenacjjat kellkä.

2. Limhin jakenacapajj jicjjatcänsa uca pä tunc pusin tʼalpha lekʼetat kellkatajj kellkta. Ucanacasti Eteran Kellkatapa sutiniwa.

3. Uca kellkatan nayrïr kellkatanacajja, orak luräwita Adanat parlqui, uqhämaraqui, ucapachat jachʼa saytʼu pucara utjcän ucapachcama, take cunanacatejj jaken wawanacap taypin lurascän ucanacat parlcaraqui, uca kellkatanacan judionacan utjatap amuyta.

4. Ucalaycu, cunanacatejj Adanan urunacapat ucapachcam lurascän ucanacjjat janiw kellkcti. Ucampis ucanacajj tʼalpha lekʼetanacan utji. Qhititejj ucanacar jicjjatcani uca pachpaw chʼamanïni, phokhatpach sarnakäwinac catuñapataqui.

5. Ucampis nayajj janiw phokhatpach kellkat kellkcti, antisasa, uca kellkatatjja mä jucʼa kellkatac kellkta, saytʼu pucara utjcäns ucapachat jupanacan tucqhäwipcama.

6. Uqhämaw uca kellkatjj kellkta. Uca kellkat kellkcänsa ucajj Eter satänwa. Jupasti Coriantorat sarakerïnwa.

7. Coriantorajj Moronan yokapänwa.

8. Moronasti Eteman yokapänwa.

9. Etemasti Ahahan yokapänwa.

10. Ahahasti Setan yokapänwa.

11. Setasti Siblonan yokapänwa.

12. Siblonasti Coman yokapänwa.

13. Comasti Coriantuman yokapänwa.

14. Coriantumasti Amnigadan yokapänwa.

15. Amnigadasti Aaronan yokapänwa.

16. Aaronasti Heartoman Het yokapat sarakerïnwa.

17. Heartomasti Liban yokapänwa.

18. Libasti Quisan yokapänwa.

19. Quisasti Coroman yokapänwa.

20. Coromasti Levin yokapänwa.

21. Levisti Quiman yokapänwa.

22. Quimasti Moriantonan yokapänwa.

23. Moriantonasti Riplaquisat sarakerïnwa.

24. Riplaquisasti Sezan yokapänwa.

25. Sezasti Hetan yokapänwa.

26. Hetasti Coman yokapänwa.

27. Comasti Coriantuman yokapänwa.

28. Coriantumasti Emeran yokapänwa.

29. Emerasti Omeran yokapänwa.

30. Omerasti Sulen yokapänwa.

31. Sulesti Quiban yokapänwa.

32. Quibasti Orian yokapänwa. Jupasti Jaredan yokapänwa.

33. Cunapachatejj Tatitojj jakenacan lajjrap pejjtuntcäna, jupanacan take orakjjar chʼeketatatäñapatac colerasis juräwi lurcaraquïn ucapachaw uca Jaredajj jilapamp familianacapampi mä kawkhaninacampi familianacapamp uca jachʼa saytʼu pucaräqui ucqhat mistunipjjäna. Tatitun aruparjamaraquiw jakenacajj chʼeketatatäpjjaraquïna.

34. Jaredan jilapasti jachʼa chʼaman jakënwa; Tatitun wali qhuyapayataraquïnwa. Ucat Jared jilapajj jupar säna: Tatitur artʼam jan jiwasar pejjtuntañapataqui jiwasan arunacasat jan amuyasiñascama.

35. Ucatsti Jaredan jilapajj Tatituruw artʼäna. Tatitusti Jaredarojj qhuyapayänwa, ucat Jaredan lajjrap jan pejjtuntcänti; Jaredamp jilapampisti janiw pejjtuntatäcänti.

36. Ucat Jaredajj jilapar säna: Tatitur wastat artʼam, ucat inas masinacajjatac jan colerasc-chiniti, janirac lajjrap pejjtuntcarac-chiniti.

37. Ucatsti, Jaredan jilapajj Tatituruw artʼäna. Tatitusti jupanacan masinacaparu, familianacaparuw qhuyapayaraquïna, jupanacan jan pejjtuntatäñapataqui.

38. Ucatsti Jaredajj jilaparuw wasitat parläna, aqhäm sasa: Saram ucat Tatitur jisctʼanim, aca oraket alis-staniti. Alisnucstan ucajja, jupar jisctʼam: Cawqhar sarañasas waquisi uca. Inas Tatitojj take oraket sipan jucʼamp suma ajllit oraker irpapchistani. Qhitis ucjj yati? Uqhamächisp ucasti, Tatitur iyawsas sarnakapjjañäni, tutisatac uc catokañasataqui.

39. Ucatsti Jaredan lacapan arsutäcänsa ucarjamaw, Jaredan jilapajj Tatitur artʼäna.

40. Ucatsti Tatitojj Jaredan jilapar istʼasin jupar qhuyapayäna, ucat jupar saraquïna:

41. Saram, take casta uywa tamanacamar apthapim: orko kachu, uqhämaraqui, orakenquir take casta jathanaca. Familianacam irpthapim, uqhämaraqui Jared jilamampir familiapampiru, uqhämaraqui masinacamampir familianacapampiru, Jaredan masinacapampir familianacapampirusa.

42. Uc lurasinsti, jupanac nayrakatan irpat alay tokenquir valleruw sarakäta. Ucqhan nayamp jumampejj jiquisiñäni. Ucat take acapach orakenquir orakenacat sipan jucʼamp suma ajllit orakeruw nayajj nayrakataman irpapjjäma.

43. Ucqhan jumampir jathamampirojj bendicipjjäma. Ucatsti jathamampita jilaman jathapampita, jumamp sarapcanis ucanacan jathapatsa, nayajj mä jachʼa marc nayatac ut-tʼayä. Jathamat nayatac ut-tʼaycä uca marcat sipan janiw jucʼamp jachʼa marcajj utjcaniti take acapach orakjjana. Uqhäm jumatac lurä, walja pach nayar artʼasitamata.