6ri Jalja
Jared jakenacat jucʼamp kellkata – Barconacapan muspharcañjamaw khani – Pʼiya lamaranjam arsut oraker puripjje – Jakenacajj pʼekechir munapjje – Irpirinacapajj jan walinacan puriniñapat parlapjje, ucampis jakenacan munañaparjamaw lurayapjje – Jaredampin jilapampin jiwäwipa.
1. Jichhasti naya Moronejj, Jaredampin jilapampin sarnakäwip wastat kellkä.
2. Ucatsti, Jaredan jilapajj Tatitun waquichat kalanac kollu patar phojjtcän uca Jaredan jilapajj kollut sarakanïna. Ucatsti, waquichat barconacaruw uca kalanac uscüna; sapa barco thiyaruw mä kal uscüna. Ucanacaw barconacan khantäna.
3. Uqhämaw Tatitojj kalanac chʼamacan khantayäna, chachanacaru warminacaru wawanacar khantañataqui, jupanacan jachʼa umanac jan chʼamacan maqhatañapataquiraqui.
4. Ucatsti take cunayman mankʼanac waquichasinjja, ucamp umjjan jacañataqui, uqhämaraqui uywa tamanacapatac mankʼa waquichasina, apapcän take uca lakʼonacataqui, uywanacataqui, jamachʼinacataqui. Ucatsti take uc lurasinjja, barconacaruw mantapjjäna, Dios Tatitupar alcatasinsti, lamaranjam sarapjjäna.
5. Ucatsti Dios Tatitojj mä sinti jachʼa thay umanacjjar thaytayäna, arsut orak tokeru. Uqhämaw jupanacajj thayan lamar mathapinacan nayrakatar jaktatäpjjäna.
6. Walja cutiw jupanacajj lamar pʼiyanac mankhan umamp chhaktayat uñjasipjjäna, jupanacjjar chhaktaycän uca kolljam mathapinac laycu, uqhämaraqui, jachʼa chʼaman thayat sartcäns uca jachʼa ajjsarcañ jallunac laycuraqui.
7. Ucatsti jupanacajj uma pʼiyanacan chhaktayatäpcän ucqhajja, janiw umajj jupanacar camachcänti, barconacapan mä platjam uman jan mantcayätapata. Barconacasti Noen arcapjam jan uma mantcayaraquïnwa. Ucat umanac mankhan jicjjatasisinjja, jupanacajj Tatituruw artʼäna; jupasti wastat umanac patar apsüna.
8. Ucatsti jupanacajj uma patancapcän ucapachajja, thayajj jan tʼacurasaw arsut orak tokerojj thaytʼäna. Uqhämaw jupanacajj thayan nayrakatar apatäpjjäna.
9. Tatitur yupaychañanac kʼochupjjäna. Jïsa, Jaredan jilapajj Tatitur yupaychañanac kʼochünjja, ur pakariw Tatitur yuspagaräna, yupaycharaquïna. Arum puripansti, jupanacajj Tatitur yupaychañ janiraquiw tucuyapcänti.
10. Uqhämaw jupanacajj nayrakatar apatäpjjäna. Janiw cuna lamaranquir jachʼa lakʼonacas jupanacar jiscʼa jiscʼa tucqhirejj utjcänti, janiraquiw cuna jachʼa chawllas jupanacar cun camächiris utjcaraquïnti. Uma patancasas uma mankhancasasa, sapa cutiw khanajj jupanacatac utjäna.
11. Uqhämaw quimsa patac pusi tunc pusin urojj umanacjjan nayrakatar apatäpjjäna.
12. Ucatsti, arsut orak lacaruw puripjjäna. Cayunacapamp arsut oraker tactʼasinjja uca orakjjan quilltʼasipjjäna. Tatitun nayrakatapan llampʼuptapjjaraquïna, Tatitun nayrakatapan cusisiñat jachapjjaraquïna, jupan waltʼat qhuyapayäwinacapata.
13. Ucatsti uca orakjjaruw sarapjjäna, orak yapuchañ kalltapjjaraquïna.
14. Jaredan yokapasti pusinïnwa. Jupanacajj Jacom, Gilga, Maha, Oria satäpjjänwa.
15. Jaredan jilapajj yokall wawanac imill wawanac wawachayasiraquïna.
16. Jaredampin jilapampin masinacapasti niyapuniw pä tunc payanïpjjäna. Jupanacasti arsut oraker janïr purcasinjja, yokall wawanac imill wawanac wawachayasipjjaraquïna. Ucat jupanacajj yatichatäpjjaraquïna.
17. Ucatsti, Tatitun nayrakatapan llampʼu chuymamp sarnakañaw yatichatäpjjäna; alajjpachatsti yatichäwinac catokapjjaraquïnwa.
18. Ucatsti orakjjar chʼeketatañ kalltapjjäna, ucatsti miratatapjjaraquïnwa, orak yapuchapjjaraquïna. Uca orakensti jupanacajj jachʼaptapjjaraquïnwa.
19. Jaredan jilapasti chuymaniptjjänwa, sepulturar sarakerjamätapjjat amuyasiraquïna. Ucat Jaredar jupajj säna: Jakenacajjar mayachthapiyañäni, jupanacar jaqhuñasataqui, jupanacajj cuntejj jiwasat munapqui uc yatiñasataqui, sepulturanacasar janïr sarakcasina.
20. Uqhämasti, jakenacajj mayachthapisipjjänwa. Jaredan jilapan yokanacapamp phuchanacapampejj pä tunc payanïpjjänwa. Jaredan yokanacapamp phuchanacapampisti tunca payanïnwa. Jupan utjän pusi yokajja.
21. Ucatsti jakenacaparuw jaqhupjjäna. Jaqhutap khepatsti, cunanactejj sepulturanacapar janïr sarakcas lurañapatac munapcän ucanacjjat jisctʼasipjjäna.
22. Ucatsti, yokanacapat mayniruw jupanacan pʼekechiripatac jawtʼañap jakenacajj munapjjäna.
23. Ucampis ucajj jupanacatac jachʼa llaquïnwa. Jaredan jilapasti jupanacarojj sänwa: Ucajj chekpachaw catuntäwir irpi.
24. Ucampis Jaredajj jilaparojj sänwa: Mä pʼekechirinïpjjañapatac jaysam. Ucat jupajj jupanacar säna: Qhitirutejj pʼekechiritac munapcta ucar yokanacajjat ajllisipjjam.
25. Ucatsti Jaredan jilapan tayna yokaparuw ajllipjjäna. Jupan sutipasti Pagag satänwa. Jupasti jan pʼekechiripäñ munasajja, janiw muncti –sänwa. Ucatsti jakenacajj awquipan yokapar sañap munapjjäna, yokapan pʼekechirïñapataqui, ucampis awquipajj janiw ucjj lurañ muncaraquïnti. Antisas jupajj camächit jupanacar churäna jan qhiti jan munir jakerus pʼekechiripäñatac ut-tʼayapjjañapataqui.
26. Ucatsti take Pagagan jilanacaparuw ajllipjjäna. Janiw maynis muncaraquïnti.
27. Jaredan yokanacapasti janiraquiw munapcänti, mayniquiw iyawsäna. Ucat Oriajja uca jakenacjjar pʼekechirïñatac jawtʼatäna.
28. Ucapachat jupajj sarayäna. Jakenacasti jachʼaptapjjaraquïnwa. Jupanacasti sinti kamiriruw tucupjjaraquïna.
29. Ucatsti Jaredajj jiwjjänwa, jilapasti jiwjjaraquïnwa.
30. Oriasti llampʼu chuymampiw Tatitun nayrakatapan sarnakäna. Tatitojj awquipatac lurcän uca jachʼa cunanac amtasiraquïna. Tatitojj awquinacapatac lurcänsa uca jachʼa cunanacjjat jakenacapar jupajj yaticharaquïna.