1. Hetampi take utapanquirinacampejj machʼïpan jiwarapjjäna, jan ucajja, Sezaquiw jan jiwcänti. Ucat Hetat Sez sarakerejja, wastat amuy chhaktat jakenacarojj apthapisin ut-tʼayäna.

2. Sezasti awquinacapan tucqhatätap amtäna. Jaredampir jilapampir pʼiya lamar qhurcatat apanisajj cuntejj Tatitojj lurcän uc amtaraquïna. Ucat mä asqui marc jupajj ut-tʼayäna. Ucatsti, Tatitun thaquinacapanjam jupajj sarnakäna. Yokall wawanac imill wawanac jupajj wawachayasiraquïna.

3. Ucatsti, jupan Sez sat jilïr yokapaw jupar kallantäna. Ucampis mä lunthataw Sezarojj jawkʼantäna, jupan sinti kamirïtap laycu. Ucasti wastat awquipar sumancañ puriyäna.

4. Ucatsti awquipajj walja marcanac uca oraken ut-tʼayäna. Jakenacasti uc-chʼpach orakjjaruw wastat chʼekentañ kalltapjjaraquïna. Sezasti sinti chuymanïñapcamaw jacäna. Ucatsti, Riplaquis wawachayasiraquïna. Ucatsti, jupajj jiwjjänwa, ucat jupa lantejj Riplaquisaw sarayjjäna.

5. Ucatsti, Riplaquisajj janiw Tatitun uñjataparjamajj cunatejj chekapäc uc lurcänti, cunalaycutejj jupajj walja warminïnwa, uñtʼatanacaniraquïnwa. Uqhämaraqui cuntejj apañajj chʼamäqui, uc jakenacan callachinacapjjarojj uscüna; jïsa, jila tasanac jupanacat apsünjja. Tasa kollkempisti jupajj walja jachʼa suma utanac luräna.

6. Ucatsti sinti suma sarayäw konuñ jupa pachpataquejj luräna. Walja carcelanac utachayaraquïna. Take tasa churañ jan munirinacarusti carcelaruw jakontäna. Take qhitinacatejj tas churañatac jan kollkenïpcän ucanacarusti, carcelaruw jakontaraquïna. Mankʼañ catokañapataquisti jan inactʼasaw trabajayaraquïna. Jan trabajañ munirirusti jiwayayänwa.

7. Uqhämasti, carcelan utjatapatjja, take cunap sumaptayäna. Jïsa, suma koripamp-pach carcelan jupajj sumaptayäna. Take cunayman suma luratanac carcelan lurayaraquïna. Ucatsti jupan kʼañusiñ wachokañanacapampi, ajjtcañ luräwinacapampiw jakenacarojj tʼakhesiyäna.

8. Pusi tunc payan mar sarayatap khepatsti, jakenacajj jupar kallcatapjjänwa. Ucatsti, wastat uca oraken nuwasiñajj utjäna, Riplaquisan jiwayatäñapcama, jupat saraker jakenacan oraket alis-sutäpjjañapcamaraqui.

9. Ucatsti walja maranac khepatjja, Moriantonaw uca alis-sut jakenac anthapisin mä nuwasiri tama ut-tʼayäna. (Jupasti Riplaquisat mä sarakerïnwa). Ucat mistusin jakenacamp nuwasïna. Ucatsti, walja marcanacaruw catuntäna. Nuwasïwisti jucʼampstʼaraquïnwa, walja maranacaw utjaraquïna. Jupasti take orakjjaruw chʼamaniptäna, take orakjjar pʼekechirit jupa pachpajj ut-tʼayasiraquïna.

10. Jupa pachpa pʼekechiritac ut-tʼayasitap khepatsti, jakenacan lurañanacap sujaptayäna. Uc lurasaw jakempejj munayasïna, ucat jupanacajj pʼekechiripäñapataquiw ut-tʼayapjjäna.

11. Jupasti, jakenacarojj asc luräna, ucampis jupa pachpataquejj janiw asc lurascänti, jupan kʼañusiñanacap laycu. Ucalaycuw Tatitun nayrakatapat jupajj jarcʼakatäna.

12. Moriantonasti walja marcanac ut-tʼayäna. Jachʼa utanacampi, korimpi, kollkempi, yaran cosechanacampi, uywa tamanacampi, take cunanacatejj jupanacar cut-tayatäcän ucanacampiw jakenacajj jupan sarayatäsajj sint kamiriptapjjäna.

13. Moriantonajja sinti chuymanïñapcamaw jacäna, ucatsti Quim wawachayasïna. Quimasti awquip lantiw sarayäna. Quimsakallk maraw jupajj sarayäna ucat awquipajj jiwjjäna. Ucatsti Quimajj janiw asc luras saraycänti, ucat jupajj Tatitun jan bendicitäcänti.

14. Jilapasti jupa contraw saytʼasïna ucat kallcataraquïna, catuntäwir puriyañcama. Jupasti jiltʼir jacañ urunacapan catuntäwin jacäna. Ucatsti yokall wawanac imill wawanac jupajj catuntäwin wawachayasïna. Chuyman tokerusti, jupajj Leví wawachayasïna. Ucat jupajj jiwjjäna.

15. Awquin jiwatap khepatsti, Levejj pusi tunc payan maraw catuntäwin trabajäna. Ucat jupajj uca oraken pʼekechiriparuw nuwasïna. Uc lurasaw jupa pachpataquejj sarayäw catüna.

16. Jupa pachpatac sarayäw catusinjja, Tatitun uñjataparjam asquïcän uc luräna. Jakenacasti oraken jachʼaptapjjänwa. Jupasti wali chuymanïñapcamaw jacäna. Yokall wawanac imill wawanac jupajj wawachayasïna; Corom wawachayasiraquïnjja. Coromarusti jupa lant pʼekechirïñapataquiw ut-tʼayaraquïna.

17. Ucatsti Tatitun uñjataparjam asquïcän uc Coromajj take urunacapan luräna. Jupasti walja yokall wawanac imill wawanac wawachayasiraquïna. Walja urunac jacatap khepat jupajj jiwjjäna take acapach orakenquirinacjama. Ucatsti, Quisaw jupa lantejj sarayäna.

18. Ucatsti Quisajj jiwjjaraquïnwa. Jibaw jupa lantejj sarayäna.

19. Libasti, Tatitun nayrakatapanjja, cunatejj asquïqui ucarac luräna. Lib satan urunacapan, michʼisir catarinacajj tucjatäpjjäna; uqhämat marcajj aynach tokenquir orakenacarojj mankʼañanac jicjjatañataquejj mantapjjäna, cunalaycutejj ucsa tokenacanjja, cunayman animalanacaw chʼumi mankhanacan utjäna.

20. Ucatsti, mä jachʼa marc saytʼayapjjäna, cawqhantejj lamar kotan umanacapajj uca orakerojj jaljtaycän uca lajjrar uñtat jiscʼa orakjjana.

21. Ucatsti, ucsa aynach tok orakerojja, mankʼañatac animalanac jiwayasiñataquiw puchuyasipjjäna. Ucampis, alajj tok orakenacajja, jakenacamp phokhantatänwa.

22. Jupanacasti, take cun luririnacaw tucupjjäna; luratanacapat walja catokatap laycusti, alaquipasipjjänwa, aljapjjaraquïnwa. Jupanac-camaw alaquipasipjjäna.

23. Take castat cunaymaninac lurapjjaraquïna: korita, kollketa, hierrota, bronceta, oraket apsupcän uca yakha metalanacata; lakʼanacsti, kollur uñtat kotuchsupjjaraquïna; kori, kollke, hierro, cobre apsuñataquejja; ucatsti, cunaymaninac ucanacat lurapjjäna.

24. Ucatsti, suma seda sawutanacanïpjjänwa, linot sawutanacanïpjjaraquïnwa; isisiñataquisti, cunayman telanac sawupjjäna.

25. Yapunac yapuchañataquisti, cunayman herramientanac lurapjjäna; kholliñataqui, satañataqui, yawiñataqui, cʼuphañataqui.

26. Uywanacapan trabajañapataquisti, cunaymaninac lurapjjaraquïna.

27. Guerran nuwasiñataquisti, cunaymaninac waquichapjjäna. Cunayman yänac lurapjjaraquïna, ucanacasti, wali muspharcañänwa.

28. Janiw yakha marcajj jupanacjam bendicitajj utjcänti, janiraquiw uca marcjam Tatitump qhuyapayatajj utjcaraquïnti; cunjämtejj Tatitojj siscän uqhämarjamaw jupanacajj mä suma ajllit oraken utjasipjjäna.

29. Libajj, walja maranacaw jacäna. Jupasti yokall wawanacamp imill wawanacamp wawachayasïna; uqhämaraquiw Heartom sat wawachayasiraquïna.

30. Heartom sat yokasti, awquip lantiw marcarojj sarayäna. Pä tunc pusin maraw jupajj marcarojj sarayäna. Ucapachaw juparojj marcar sarayañapajj apakatäjjäna. Ucatsti, walja maranacaw jupajj yakha marcan catuntat uñjasisajj jaken marcapan jacäna, yakha marcaruw sirviraquïna, jïsa, jiwañapcamaw ukhäm sarnakawayäna.

31. Ucatsti, Het sat wawachayasïna; Het sat yokapasti, jaken orakepan, jacañapcamaw catuntat jacawayäna. Het satasti, Aaron sat wawachayasïna. Aaron satasti, yakha marcan catuntataw jacañapcamajj sarnakaraquïna; jupasti Amnigadda sat wawachayasïna. Ucasti, jacañapcamajj yakha marcan catuntataw jacawayaraquïna; ucatsti, Coriantum sat wawachayasïna. Coriantum satasti, jiwañapcamaw catuntatajj sarnakawayäna. Jupasti Com sat wawachayasïna.

32. Ucatsti, Com satajj chicatpach sarayañ orakerojj catuntasïna. Uca chicat orakensti, pusi tunc payan maraw uca orakerojj apnakäna; ucatsti, Amgid sata pʼekechiriruw nuwasir mistüna, walja maranacaraquiw jupanacajj nuwasipjjäna. Uca nuwasïwinacan Com satajj Amgid pʼekechirirojj atipjäna, uqhämat chicat orakemp-pach catuntasjjäna.

33. Com satan urunacapansti, lunthatanacaw uca oraken utjañ kalltäna. Jupanacasti, cunjämatejj nayra pachanacan jakenacajj lurapcänjja, ucarjamaw sartapjjäna, juräwinac lurasa, uqhämat marcar sum apnakañanacjja, wasitat tʼunjañ munapjjäna.

34. Com satasti, jupanacarojj tucjañ munäna; ucampis janiw jupanacarojj atipjcänti.