1. Ucatsti Jaredan jilapajj mä kolluruw saräna. Jupanacasti uca kollurojj Selem sutimpiw uchapjjäna, ucan sinti jachʼätapata. (Luratäcän uca barconacajj quimsakallkönwa). Ucat mä kalatjja tunca sojjtan kalanac umatatayasin luräna. Uca kalanacasti jankʼönwa, khanaraquïnwa, suma khespjama. Jupasti ucanacjj kollu patcamaw phojjtüna. Ucatsti wasitat Tatiturojj aqhäm sasaw artʼäna:

2. Tatay, mathapinacan muyuntatäpjjätaw –sistawa. Jichhasti Tata, jan colerasimti lokeriman nayrakataman tʼuqhätapata. Juman kollanätama, alajjpachanquirïtamjj yatipjjtwa. Nayrakatamanjj jan asquïtajj yatipjjaractwa. Tincüw laycojja, nanacan cunjamätajjajj sapa cutiw ñankhar tucuta. Ucampis Tata, jumajj mä camächit churapjjesta, jumar artʼañanacajjataqui, munañanacajjarjam jumat catokañanacajjataqui.

3. Tata, ñankha luräwinacajj laycuw nanacar jawkʼapjjesta, nayrakatar anaquipjjaraquista. Aca walja maranacaw aca wasarancapjjaracta. Ucampis nanacar qhuyapayapjjaraquistawa. Tatay, qhuyaptʼayasitay nayata. Aca jakenacamat colerasiñam apakasjjam; jan jupanacar jaytjamti, uca sinti khoru pʼiya lamar chʼamacan maqhatapjjañapataqui. Kalat umatatayas lurctsa uca kalanac uñjam.

4. Tata, juman take chʼamanïtamjj yat-twa. Uqhämaraqui, take cuntejj jaken sumancañapatac lurañ muncasma ucjj lurasmawa. Ucat Tata, aca kalanacar lucʼanamamp llamctʼam, ucanacar waquicham ucanacan chʼamacan khantañapataqui. Ucatsti waquichapcta uca barconacan ucanacajj nanacatac khantani, lamar maqhatcas nanacan khananïñajjataqui.

5. Tata, jumajj ucjj lurasmawa. Jachʼa chʼam uñachayañatac chʼamanïtamjj yatipjjtwa, ucasti jakenacan amuyunacaparjam jiscʼäcaspas uqhämaw uñsti.

6. Ucatsti Jaredan jilapan uca arunac arsutap khepatjja, Tatitojj amparap loktäna, ucat kalanacar mayat mayat lucʼanapamp llamctʼäna. Ucatsti jarcʼakajj Jaredan jilapan nayrapat apakatänwa. Jupasti Tatitun lucʼanap uñjäna. Jaken lucʼanapjamänwa, janchin wilanjamänwa. Jaredan jilapasti Tatitun nayrakatapan liwitat-tänwa, ajjsarthapiñan jawkʼantata.

7. Tatitusti Jaredan jilapan oraker liwitat-tatap uñjasajj juparojj sänwa: Saytʼam. Cunats liwitat-ta?

8. Jupasti Tatiturojj sänwa: Tatitun lucʼanapjj uñjtwa. Janiw Tatitun janchin wilanïtapjj yatcäyät-ti, ucat jupan nayar jawkʼañapat ajjsaräyäta.

9. Ucat Tatitojj jupar säna: Nayan mä urojj janchimp wilamp nayjjar catjjaruñajj uñjtawa, iyawsatam laycu. Juman utjquis uqhäm sinti iyawsañampejj janiw cunapachas mä jakejj nayrakatajjar jutquiti. Janitejj uqhamäcasapänjja, janiw lucʼanajjar uñjcasamänti. Ucat jucʼamp uñjtati?

10. Jupasti ucjjarojj arsünwa: Janiwa. Tata, nayar uñachayasita.

11. Tatitojj juparojj sänwa: Parlctsa uca arunacar iyawstati?

12. Jupasti ucjjarojj arsünwa: Jïs Tata, jumajj mä cheka cancañan Diosätawa. Janiw cunjämats cʼariscasmati, chek parlatamjj yat-twa.

13. Uca arunac arsquipanjam Tatitojj jupar uñachayasïna ucat juparojj saraquïna: Ucanac yatitam laycuw tincüwit cutsuyatätajja. Uqhämasti, nayan nayrakatajjar cut-tayanitäjjtawa. Ucalaycuw naya pachpajj jumar uñachayas-sma.

14. Jïsa, oraken ut-tʼayäwipatpach jakenacajjar cutsuyañatac waquichatäqui ucätwa. Jïsa, nayajj Jesucristötwa. Awquïtwa, Yokaraquïtwa. Nayan take jakenacajj khananïpjjani; wiñayatac khananïpjjaniwa, take qhitinacatejj nayan sutijjar iyawsapcan ucanacajja. Jupanacasti yokanacajjampir phuchanacajjampiruw tucupjjaraquini.

15. Janiw cunapachas mä jakejj jumjam nayar iyawsquituti. Uca laycojj janiw cunapachas nayan lurat jaker naya pachpajj uñachayascti. Naya quipcjam luratätamjj uñjastati? Jïsa, kalltäwinjja take jakenacajj naya quipcjam luratäpjjänwa.

16. Niy uñjctasa ucajj ajayojjawa. Jakerojj nayar uñstataw lurta. Cunjämatejj jumar ajayunjj uñstcsma, uqhämaraquiw jakenacajjar janchin uñstäjja.

17. Jichhajja, naya Mormonajja janiw uca kellkatanacat phokhatpach kellkat lurquirist-ti säyätwa, ucat jichhajj acqhac sañajjawa: Jesus pachpaw uca jaker ajayun uñachayasïna, cunjämatejj Nefi jakenacar uñachayascän uca quipca janchir uñtata.

18. Cunjämatejj Nefi jakenacar yanapas tumpcänjja, uqhämaraquiw uca jaker yanapasajj tumpäna. Take uc luräna, Diosätap uca jaken yatiñapataqui, Tatitojj jupar uñachaycän uca walja jachʼa luräwinac laycu.

19. Uca jaken yatïwipata, jarcʼak khepäjjar uñjañapatac janiw jarcʼañjamäcänti. Jupasti Jesusan lucʼanapjj uñjänwa. Uc uñjcasaw jupajj ajjsarasin liwitat-täna, ucan Tatitun lucʼanapätap yatitapata. Ucapachat iyawsäwipajj tucusïna jan cunar pächasis yatitap laycu.

20. Ucalaycu, Diosat phokhatpach yatiñanïsaw jarcʼakat khepäjjar jan jarcʼañjamäcänti. Ucat Jesusar uñjäna. Jesusasti juparojj chʼamampiw qhuyapayäna.

21. Ucatsti Tatitojj Jaredan jilaparojj sänwa: Jumajj uñjctasa istʼctasa ucanacan oraker mistuñapatac janiw antutätati, nayajj sutijjar janchin khapakaptaycä ucapachcamajja. Uqhämasti, uñjctas istʼctasa ucanac imantäta. Janiw qhiti jakerus ucanac uñachaycaraquïtati.

22. Ucatsti, nayar jutcätas ucqhajja, ucanac kellkasin lluchʼintäta jan qhitin ucanac uñtʼat lajjrar arsuyañapataqui, cunalaycutejj jumajj ucanacjja, mä jan leeñjam lajjrat kellkäta.

23. Jichhasti, aca pä kal jumar churäma. Kellkcätas ucanacamp chic aca kalanac lluchʼintäta.

24. Cunalaycutejj kellkcäta uca lajjrarojj nayajj pejjtunt-twa. Uqhämasti, quipca munañajjarjam waquiscan ucapachaw aca kalanacajj cunanactejj kellkcäta ucanac jakenacar khanstayani.

25. Uca arunac arsusinsti, Tatitojj Jaredan jilaparuw uñachayäna, acapach oraken jacapcän take ucanaca, uqhämaraqui acapach oraken jacapcan take ucanacsa. Janiraquiw nayrapat imantcänti take qhitinacatejj orak thiyanacans jacapcän ucanacatsa.

26. Cunalaycutejj nayra pachanjja juparojj sänwa: Jumatejj nayar iyawsitätajja, take cunanac jumar uñachayäma. Take cunas jumar uñachayatäniwa. Uqhämasti, jupajj yatïnwa Tatitun chʼamanïtapa, take cunanac jupar uñachayañataqui. Ucat Tatitojj jan cuns juparojj imantcänti.

27. Tatitusti juparojj sänwa: Acanac kellkam, ucatsti lluchʼintaraquim. Cunapachatejj quipca amuyujjarjam waquiscan ucapachaw ucanacjj jaken wawanacapar uñachayä.

28. Ucatsti, catokcän uca pä kal lluchʼintañapataquiw Tatitojj jupar camächit churäna. Ucatsti, camächit churaraquïna, ucanac jan uñachayañapataqui, Tatitun ucanac jakenacar uñachayañapcama.