1. Ucatsti Oriajj take urunacapan asquïsaw orakjjan taripasajj sarayäna. Urunacapasti sinti waljaraquïnwa.

2. Yokall wawanac imill wawanac jupajj wawachayasiraquïna. Jïsa, quimsa tunc mayan wawachayasïna. Ucanac taypinsti pä tunc quimsan yokallaw utjäna.

3. Ucatsti chuyman tokeruw Quib sutin wawap wawachayasïna. Ucatsti Quibajj jupa lantiw sarayäna. Quibasti Corihor wawachayasïna.

4. Corihorasti quimsa tunc payan maranïsaw awquipar kallcatäna. Sarjjasinsti, Nehor oraken kamaraquïna. Ucatsti, yokall wawanac imill wawanac wawachayasiraquïna. Jupanacasti sinti suma uynaktʼaniruw tucupjjaraquïna. Ucat Corihorajj walja jakenacar jupar arcañapatac amuyayäna.

5. Jupan nuwasiri tama apthapitap khepatsti, Moron orakeruw maqhatanïna, pʼekechirejj utjascän ucqharu. Juparusti catuntaraquïnwa. Ucasti phokhasïnwa, Jaredan jilapan aqhäm sas arsüwiparu: Jumanacajj catuntäwir irpatäpjjätawa.

6. Pʼekechirejj utjascän uca Moron orakejja, Nefi jakenacan Chʼusa Jaytanucut sat oraket jacʼancänwa.

7. Ucatsti Quibajj catuntäwin utjasïna. Jakenacapasti Corihor yokapan sarayatäpjjänwa, Quiban sinti chuymaniptañapcama. Ucampisa, catuntäwin jacasajja, chuyman tokeruw Quibajj Sule wawachayasïna.

8. Ucatsti Sulejj jilapatac colerasïnwa. Sulejj chʼamaniptaraquïnwa. Jakjamaw jupajj chʼamaniptäna. Uqhämaraqui amuyasiñan jupajj jachʼaptaraquïna.

9. Uqhämasti, jupajj Efrain kolluruw saräna, ucatsti ucan kollut apsusajj metal umatatayäna. Jupar arcañapatac irpcän ucanacataquisti, acerot espadanac luraraquïna. Jupanacar espadanac churatap khepatsti, Nehor marcar cut-tasaw Corihor jilapar nuwasïna. Uqhämat orak sarayäw catüna, ucatsti Quib awquiparuw ucjj cut-tayjjaraquïna.

10. Sulen luräwipat awquipajj uca orak sarayäw jupar churäna. Ucatsti jupaw awqui lant sarayañ kalltäna.

11. Ucatsti chekapar uñjasaw marcarojj apnakäna. Jakenacasti sinti waljaniruw tucupjjäna, ucat jupajj marcap uc-chʼpach orakjjar chʼekentayäna.

12. Ucatsti Sulejj walja yokall wawanacamp imill wawanacamp wawachayasiraquïna.

13. Corihorasti, lurcän uca walja ñankha luräwinacat cutiquipstänwa, ucat Sulejj sarayäwipan jupar chʼam churäna.

14. Ucatsti Corihorajj walja yokanacani phuchanacanïnwa. Corihoran yokanacap taypinjja Noe sat mä yokaw utjäna.

15. Ucatsti Noejj Sule pʼekechir contra, uqhämaraqui, Corihor awquip contraraquiw kallcatäna. Ucatsti jupar arcañapataquiw Cohor jilaparu, uqhämaraqui takpach jilanacaparu, walja jakenacar irpcatasïna.

16. Ucatsti Sule pʼekechirimpiw mä chʼajjwäwin nuwasïna. Uca nuwasïw tokew jupanacan nayrïr tutjam catokat orakep catusjjäna. Ucatsti, ucawjar sarayir pʼekechirir tucuraquïna.

17. Ucatsti wastat Sule pʼekechirir nuwasïna, ucatsti Sule pʼekechirirojj catuntäna. Ucat jupar catuntasin Moron oraker apäna.

18. Ucatsti jupar jiwayirjamäcäns ucqhaw, Sulen yokanacapajj Noen utapar arum toker lluscuntasin jupar jiwayapjjäna. Carcel punc tʼunsusin awquipar ankar irpsupjjäna. Ucatsti quipca sarayäw konuñapjjaruw jupar kontʼayapjjäna, quipca marcapana.

19. Ucat Noen yokapajj jupa lantiw marcap chʼamañchäna. Ucampis janiw Sule pʼekechirjjar jucʼamp chʼamaniptapcänti. Sule pʼekechirin sarayat jakenacasti sint jachʼaptapjjäna, chʼamaniruw tucupjjaraquïna.

20. Uca orakesti jaljatänwa. Pä sarayäwiw utjäna, Sulen sarayäwipa, uqhämaraqui, Noen Cohor yokapan sarayäwipa.

21. Noen Cohor yokapasti Suler nuwasiñatac jakenacap irpäna. Uca nuwasïwinsti Sulejj jupanacaruw atipäna, Cohorarusti jiwayaraquïnwa.

22. Cohoran utjäna Nimrod sat mä yokapajja. Nimrodasti Cohoran sarayäwip Suler catuyäna. Uca laycuw Sulejj jupar munäna, ucat Sulejj jupar wal qhuyapayäna. Jupasti munañaparjamaw Sulen marcapan cunanacs luräna.

23. Sulejj saraycäns ucqhajja, Tatitun qhitanit walja arjirinacaw jakenac taypir jutapjjäna. Jakenacan ñankhätapana, wacʼan diosanacar yupaychañapan, uca orakjjar mä ñankhachäw puriyañapjjat jakenacar yatiyapjjäna. Janitejj ucanacat cutiquipstapcaspa ucajja, tucqhatäpjjañapat yatiyapjjaraquïna.

24. Ucatsti jakenacajj arjirinacarojj tʼakhesiyapjjänwa, sawc-chʼuquipjjaraquïnwa. Ucatsti, Sule pʼekechirejj arjirinacar tokerinacarojj taripasin mutuyäna.

25. Uc-chʼpach orakjjan jupajj mä ley ut-tʼayaraquïna. Uca leyisti arjirinacar chʼam churäna, munañaparjam cawqharus sarañapataqui. Uca luräwinac tokew jakenacajj juchat cutiquipstañatac amuyayatäpjjäna.

26. Ñankha luräwinacapat wacʼan diosanacar yupaychañapat jakenacan cutiquipstatap laycuw Tatitojj jupanacarojj jan tucjcänti. Ucatsti, jupanacajj wastat uca oraken jachʼaptapjjäna. Ucatsti Sulejj yokall wawanac imill wawanac chuyman tokerojj wawachayasïna.

27. Sulen urunacapansti janiw jucʼamp nuwasïwinacajj utjcänti. Tatitojj awquinacap jachʼa pʼiya lamar qhurcatat arsut oraker irpanisajj, jupanacatac lurcän uca jachʼa luräwinacat jupajj amtäna. Ucat take urunacapan chekapar uñjasaw sarayäna.