1. Ucatsti, jakenacan ñankhätapata mä jachʼa ñankhachäwejj uc-chʼpach oraken uñstäna. Ucatjja mä jaketejj herramientapsa espadapsa tʼojjopan usc-chïnsa, jan ucajja, imañatac mä cawqhar usc-chïnsa, khepärmanthejj janiw jupajj ucjj jicjjatcänti. Uqhämaw ñankhachäwejj sinti jachʼäna.

2. Uqhämasti, sapakat mayni jakew cunatejj jupanc-cän ucjj quipca amparapan catjjäsisipjjäna. Janiraquiw mayisipcänti, maytʼasipcaraquïnsa. Sapakat mayni jakew cupi amparapampejj espad arjjatasiñatac catupunïna, yänacapa, quipca jacañapa, warminacapans wawanacapans jacañanacap arjjatañataquiraqui.

3. Ucatsti pä mar sarakatatjja, uqhämaraqui, Saredan jiwatap khepatjja Saredan jilapaw sartäna, ucat Coriantumrar nuwasiraquïna. Coriantumrasti jupar atipjasaw Aquis wasarcam jupar arctäna.

4. Ucatsti Aquis wasaranjja, Saredan jilapajj juparuw nuwasïna. Nuwasïwisti sinti jachʼaruw tucüna, walja warankanacaw espadan jiwayatäpjjäna.

5. Ucatsti Coriantumrajj uca wasar thiyanacan nuwasiriw kheparäna. Sared jilapasti wasarat arumaw mistüna, ucatsti Coriantumran nuwasiri tamapat mä kawkhanacaruw jiwayaraquïna, jupanac machatïpana.

6. Jupasti Moron oraker sarasinjja, Coriantumran sarayäw konuñapjjaruw ut-tʼayasïna.

7. Ucatsti pä maraw Coriantumrajj ejercitopamp wasaran kamäna. Ucapachansti nuwasiri tamapajj wal chʼamaniptäna.

8. Saredan jilapajj Gilead satänwa; jupan nuwasiri tamapasti jamasat arustʼäwinacampiw wal chʼamaniptaraquïna.

9. Ucatsti sarayäw konuñapjjar kontʼipana, jupan jilïr sacerdotepajj jupar jiwayäna.

10. Ucatsti jamasat mä arustʼäwinquirejja, juparuw jiwayaraquïna, mä jamas apachitana; ucatsti, jupa pachpataquiw orak sarayäwjj caturaquïna. Jupan sutipasti Lib satänwa. Libasti jachʼa tansa jakënwa, take uca jakenac taypin utjcänsa take ucanacat sipana.

11. Ucatsti Liban nayrïr sarayäw marapanjja, Coriantumrajj Moron oraker maqhatasin Libamp nuwasïna.

12. Ucatsti Libamp nuwasïwipansti, Libajj amparapat jawkʼantasaw jupar chhojjriñchäna. Ucampis Coriantumran nuwasiri tamapajj Libjjar kheparuw jit-tayapjjäna, jupan kota lac thiyanacar jaltañapcama.

13. Ucatsti Coriantumrajj juparojj arctänwa. Libasti kota lacan jupamp nuwasïna.

14. Ucatsti Libajj Coriantumran nuwasiri tamaparuw jawkʼantäna, jupanacan wastat Aquis wasarar jaltapjjañapcama.

15. Ucatsti Libajj arctänwa, Agos pampanacar puriñapcama. Coriantumrasti Liban nayrakatapat jaltasajja, take uca orak thiyanquir jakenac jupajj irpthapiwayatayna.

16. Agos pampanacar purisinsti, Libaruw nuwasïna. Ucatsti jawkʼantänwa, jupan jiwañapcama. Ucampis Liban jilapajj jupa lantiw Coriantumrar nuwasir jutäna. Nuwasïwisti sinti ajjsarcañaruw tucüna. Ucat Liban jilapan ejercitopan nayrakatapat Coriantumrajj wastat jaltjjäna.

17. Liban jilapan sutipasti Siz satänwa. Ucatsti Sizajj Coriantumraruw arcnakäna. Walja marcanac tucqharaquïna, warminacaru, wawanacaruw jupajj jiwarayaraquïna, marcanacsti naqhantayaraquïnwa.

18. Sizar ajjsarañajja, uc-chʼpach oraken yatisïna. Jïsa, aqhäm sasaw mä artʼäwejj uc-chʼpach oraken istʼasïna: Qhitis Sizan ejercitop contrajj saytʼaspa? Jupaw cawqha chekatejj saraquipqui uca orakjj pichsusqui!

19. Ucatsti jakenacajj nuwasiri tamanacar mayachthapiñ kalltapjjäna uc-chʼpach orakena.

20. Jupanacasti jaljtatäpjjänwa. Mayninacasti Sizan nuwasiri tamaparuw jalcatjjapjjäna. Mayninacasti Coriantumran nuwasiri tamaparuw jaltapjjaraquïna.

21. Uca nuwasïwisti sinti jachʼänwa, wali jaya maranacaraquïnwa. Wila wartäwinacampi janch qharinokäwinacampejj jayapachaw utjaraquïna, uc-chʼpach orakjjan jiwat janchinacan phoktʼañapcama.

22. Uca nuwasïwejj sinti mäquïnwa, lakaraquïnwa, janiw qhitis jiwatanacar imantirejj utjcänti. Antisas jupanacajj wila wartäwitjja, yakha wila wartäwiruw sarapjjaraquïna, jakenacans warminacans wawanacans janchinacap orakjjan acsan ucsan jaytanucusa, lakʼonacan janchejj mankʼantatäñanacapataqui.

23. Ucan kʼaphipasti orakjjaruw kʼaphitatäna, jïsa, uc-chʼpach orakjjaru. Ucatsti urus arumasa, jakenacajj uca kʼaphin kʼapcatatäpjjänwa.

24. Ucampis Sizajj janiw Coriantumrar arcnakañ tucuycänti, cunalaycutejj jupajj jurament luräna jilapan wilapat Coriantumran cut-tayañapataqui. Uqhämaraqui, Tatitun arupasti Eterarojj yatiyataynawa, Coriantumran espadan jan jiwayañjamätapata.

25. Uqhämaw Tatitun phokhatpach colerasiñapamp jupanacar sartʼatap uñjapjjtan. Jupanacan ñankhätapampi ajjtcañ luräwinacapampejja, mä thac waquicharaquïna, jupanacan wiñay tucqhäwipataqui.

26. Ucatsti Sizajj Coriantumrar jalsu tokeruw arctäna, lamar lacanac-cama. Ucqhan jupajj quimsüruw Sizaru nuwasïna.

27. Sizan nuwasiri tamanacap taypin tucqhäwejj sinti ajjsarcañänwa, jakenacan ajjsarañapcama. Ucat jupanacajj Coriantumran nuwasiri tamanacapan nayrakatapat jaltañ kalltapjjäna. Corihor orakeruw jupanacajj jaltjjapjjäna, ucanquir jakenacata, jan jupanacamp chicäñ munapcän take ucanac jiwarayapjjaraquïna.

28. Corihor kherwansti chʼujllanacap ut-tʼayapjjäna. Coriantumrasti chʼujllanacap Shurr kherwan ut-tʼayaraquïna. Shurr kherwasti Comnor kollu jacʼänwa. Ucat Comnor kolljjaruw Coriantumrajj nuwasiri tamanacap irpthapïna, mä trompet phustʼaraquïna, Sizan nuwasiri tamanacaparu, jupanacan nuwasir jutapjjañapataqui.

29. Ucat jupanacajj nayrakataruw jutantapjjäna, ucampis khepar cut-tayatäpjjänwa. Ucatsti payïr cutiw jutantapjjaraquïna, ucat wasitat khepar cut-tayatäpjjäna. Ucatsti quimsïr cutiw jutantapjjaraquïna; nuwasïwisti sinti jachʼaruw tucüna.

30. Ucatsti Sizajj Coriantumraruw jawkʼantäna, ucat walja mankha chhojjrinac chhojjriñcharaquïna. Coriantumrasti, wil tucstayasisin chʼam thayjtayasïna, ucatsti, jiwatäcaspas uqhäm calljjapjjäna.

31. Paypach nuwasiri tamanacan jiwaratanacajj waljanipunïnwa; chachanaca, warminaca, wawanaca. Sizasti jakenacaparojj sisjjänwa, Coriantumran nuwasiri tamanacapar jan arcnakañapataqui. Uqhämasti, quipca utjnokäwiparuw cut-tjjapjjäna.