1. Ucatsti, Eterajj Coriantumran urunacapan jacäna. Coriantumrasti uc-chʼpach orakjjar pʼekechirïnwa.

2. Eterasti Tatitun arjiripänwa. Ucatsti Coriantumran urunacapanjja, Eterajj uñstasinjja, jakenacaruw jutir cunanacjjat yatiyäna. Jupanquir Tatitun Ajayup laycuw jan jarcʼañjamäcänti.

3. Alwat inti jalantcam arnakasaw jakenacar ewjjäna Diosar iyawsapjjañapataqui juchat cutiquipstapjjañapataqui, jupanacan jan tucqhatäpjjañapataqui. Jupanacarusti aqhäm sasaw parlaraquïna: Iyawsañ tokew take cunanacajj phokhasi.

4. Qhititejj Diosar iyawsqui ucajja, chekpachaw suyañapa, jucʼamp suma orakeru jan pächasisa. Jïsa, Diosan cupëjjapancañ suyaña. Uca suyañasti iyawsañat juti. Jaken chuymanacaparuw thurtʼayi; ucasti jupanacarojj jan pächasiriru, jan thayjtiriruw tucuyaspa, asqui luräwinac sapa cut wal lurañapataqui, Diosar jachʼar aptañapatac irpatäñapataqui.

5. Eterajj jachʼa muspharcañ cunanac jakenacar yatiyäna. Jupanacasti janiw ucanacar iyawsapcänti, jan ucanac uñjatapata.

6. Jichhasti naya Moronejja ucanacjjat mä jucʼa parlañ munirista: Acapach orakeruw aqhäm uñachayañ munirista: Iyawsañajja, jan uñjcasin suyat cunanacawa. Uqhämasti, jan uñjatamatjja jan jaychasipjjamti, cunalaycutejj iyawsañamajj janïr yantʼatäqui ucqhajja, janiw ircatäwjj catokcapcätati.

7. Cunalaycutejja, iyawsañ tokew Cristojj awquinacasar jupa pachp uñachayasïna, jiwatanacat jactatap khepatjja. Jupanacajj janïr jupar iyawsapquipanjja, janiw jupa pachpajj uñachayascänti. Uqhämasti, yakhepanacan jupar iyawsañapajj waquisïnwa, cunalaycutejj jupajj janiw take orakenquirinacar jupa pachp uñachayascänti.

8. Ucampis jakenacan iyawsañap laycojja, jupa pachpaw oraker uñachayasi, ucatsti Awquin sutip khapakaptayi, thac waquicharaqui, yakhanacan uca toket alajjpach churäwit catokerïpjjañapataqui, cunanactejj jupanacajj jan uñjapqui ucanac jupanacan suyapjjañapataqui.

9. Uqhämasti, jumanacatejj iyawsañanïpjjätajja, jumanacajj suyapjjätawa, churäwit catokerïpjjaraquïtawa.

10. Diosan kollan sucʼataparjam nayrapach jakenacan jawsatätapajj iyawsañ toketänwa.

11. Uqhämasti, iyawsañ tokew Moisesan leyipajj churasïna. Ucampis Diosajj Yokap churasajja, jucʼamp suma thac waquichi. Iyawsäw toketaraquiw ucajj phokhasïna.

12. Cunalaycutejja, janitejj jaken wawanacap taypin iyawsañajj utjquejja, Diosajj janiw cuna muspharcañ luräws jupanac taypin lurcaspati. Uqhämasti, janïr iyawsawinïpquipanjja, janiw jupajj uñachtʼayascänti.

13. Jïsa, carcelan oraker llokhesitapajja, Almampin Amulecampin iyawsäwipaw uqhämar puriyäna.

14. Jïsa, Laman jakenacan ninamp Kollan Ajayump bautisatäpjjañapataqui jupanacar turcaycäns ucajja, Nefin Lehin iyawsäwipänwa.

15. Jïsa, Laman jakenac taypin uca jachʼa muspharcañ luräw puriycän ucajja, Ammonampin jilanacapampin iyawsäwipänwa.

16. Cristojj janïr jutcän ucapach jaquirinacasa, jutatap khepat jaquirinacasa, muspharcañ luräwinac take luririnacajja, iyawsäw tokew ucanacjj lurapjjäna.

17. Quimsa yatekerin jiwañ jan malltʼañapatac arsüw catokañapajj iyawsäw toketänwa. Uca arsüwjja, janiw catokapcänti janïr iyawsapcasinjja.

18. Janiw cunapachas janïr iyawsäwinïcasinjja qhiti jakes muspharcañanac lurquiti. Ucat nayrakatjja jupanacajj Diosan yokapar iyawsapjje.

19. Cristojj janïr jutcän ucapachajja, waljanin iyawsäwipaw sinti jachʼäna. Uca laycuw jarcʼak khepäjjar uñjañapataquejj jupanacar jan jarcʼañjamäpcänti. Cunatejj iyawsañ nayramp nayrapach uñjapcän uc jupanacajj quipca nayranacapamp chekpach uñjapjjäna. Jupanacasti cusisipjjänwa.

20. Jïsa, aca kellkatanjja Jaredan jilapan jupanacat maynïrïtap uñjapjjtan. Jupan Diosar iyawsañapajj sinti jachʼänwa. Uca laycuw Diosajj lucʼanap loktasajja, Jaredan jilapan uñjatapat ucjj jan imantcänti, jupar parlcänsa, uca arup laycu; uca arsti iyawsäw toket catokäna.

21. Jaredan jilapan Tatitun lucʼanap uñjatap khepatsti, iyawsäw toket Jaredan jilapajj catokcäns uca arsüw laycojja, Tatitojj janiw cuns uñjatapat imantcänti.

22. Iyawsäw toket awquinacajjajj arsüw catokapjje, acanacan gentilenac toke jilanacapar jutañapataqui. Uca laycuw Tatitojja, jïsa, Jesucristow nayar camächit churitu.

23. Nayasti juparojj säyätwa: Tata, gentilenacajj acanacat sawcasipjjaniwa, nanacan kellkañatac tʼuqhätajj laycu. Tata, iyawsäw toketjja arsuñatac jachʼa chʼam churapjjesta, ucampis kellkañataquejj janiw jachʼa chʼamjj churapquistati. Jïsa, take aca jakenacarojj chʼam churta, wal parlapjjañapataqui, jupanacar churctas uca Kollan Ajay laycu.

24. Jumasti nanacarojj jucʼac kellkapjjañajjataquiw churapjjesta, amparanacajjan jan sum kellkerïtapata. Jaredan jilapar chʼam churctas uqhämjja, janiw kellkañatac nanacar jachʼa chʼam churapquistati. Jupajj kellkcän ucanacan jumjam chʼamanïñapataquiw chʼam churäyätajja, uca kellkatanacan leetʼir jaker atipañapcama.

25. Uqhämaraqui, arunacajjarojj chʼamaniptaytawa, jachʼaptayaractawa, ucanacan jan kellkcay tucuñapcama. Kellkapcta ucqhajja, tʼuqhätajj amuyasipjjta, lanktasipjjaractwa arunacajj ucar uchasajja. Nayasti ajjsartwa, gentilenacajj inas arunacajjat sawcasipjjchini –sasa.

26. Uc satajjatsti, Tatitojj aqhäm sasaw parlitu: Tʼajjmaranacajj sawcasipjjewa, ucampis jupanacajj llaquisipjjaniwa. Nayan qhuyapayañajjasti llampʼu chuymaninacataquiw walïni. Uqhämasti, janiw juman tʼuqhätam laycojj uqhäm lurapcaniti.

27. Jakenacatejj nayar jutapjjetanejja, jupanacan tʼuqhätanacap jupanacar uñachayä. Tʼuqha cancañjj jakenacaruw churta, jupanacan llampʼu chuymanïpjjañapataqui. Jakenacatejj naya nayrakatan llampʼuptayasipjjani, nayar iyawsapjjaraquitanejja, tʼuqhäqui ucanac jupanacataquejj chʼamaniptayä. Ucat naya nayrakatan take llampʼuptir jakenacataquejj qhuyapayañajjajj walïni.

28. Jïsa, gentilenacan tʼuqhätap jupanacar uñachayä. Ucatsti, iyawsañamp suyañampi qhuyapayasiñampejj naya tokeruw asqui cancañ jalsur irpirïtap jupanacar uñachayaraquï.

29. Naya Moronisti, uca arunac istʼasinjja, chuymachatäyätwa, ucat sista: Tatay, asqui munañamajj luratäpan, cunalaycutejj jaken wawanacapan iyawsañaparjam jupanacatac take cun lurañamjj yat-twa.

30. Cunalaycutejj Jaredan jilapajj Zerin kollurojj jit-tam –sänwa. Kollusti jit-tänwa. Janitejj jupajj iyawsäwinïcasapänjja, janiw ucajj jit-tcasapänti. Uqhämasti, jakenacan iyawsañanïpjjatap khepat jumajj ucanac lurtajja.

31. Uqhämaw yatekerinacamarojj uñstäyätajja; jupanacan iyawsatap khepatjja, juman sutimjjar parlatap khepatsa, juma pachpaw jachʼa chʼamamp jupanacar uñachayasïyätajja.

32. Juman mä ut jaketac waquichatamjjat parlatamjj amtaractwa, jïsa; Awquiman khapak utanacap taypina, ucansti jakejj mä jucʼamp phokhatpach suyañanïspawa. Ucatwa, jakejj suyañapa, janitejj suycanejja, jumajj waquichcta ucawjanjja, janiw jupajj tutjj catokcaniti.

33. Uqhämaraqui, aqhäm satamjj amtastwa: Oraker muntwa, oraketac jacañ jaytañajjcama, nayan ucjj wastat catjjaruñajjataqui, jaken wawanacapatac mayawj waquichañataqui.

34. Jichhasti, nayajj yat-twa, juman utjquis uca jaken wawanacapar munasiñan qhuyapayasiñätapa. Uqhämasti janitejj jakenacajj qhuyapayasiñanïpcanejja, jumajj Awquiman khapak utanacapan waquichcta ucawj janiw jupanacajj tutjam catokapcaniti.

35. Ucatwa, jumajj sisctas ucat nayajj yat-ta, janitejj gentilenacajj qhuyapayasiñanïpquejja, nanacan tʼuqhätajj laycojja, jupanacarojj yantʼätawa, sum lurañ yatïwinacap apakaraquïta, jïsa, niy catokapqui ucs apakätawa, jucʼamp jilarquir catokapcan ucanacaruw churaraquïta.

36. Ucatsti Tatitut mayisïyäta, jupan gentilenacar qhuyapayañ churañapataqui, jupanacan qhuyapayasiñanïpjjañapataqui.

37. Ucatsti Tatitojj situwa: Janitejj jupanacajj qhuyapayasiñanïpquejja, janiw ucajj cunäquis jumataquejja. Jumajj thurtʼastawa, ucat isinacamajj kʼomachatäni. Tʼuqhätam uñjasitamat chʼamaniptayatäyätawa, Awquijjan khapak utanacapan waquichctsa ucawjan kontʼasiñamcamasa.

38. Jichhasti, naya Moronejj gentilenacaru, uqhämaraqui nayan munat jilanacajjaruw jiquisiñcam sapjjsma, Criston taripañ konuñap nayrakatan jiquisiñascama; isinacajjan wilanacamamp jan kʼañütap take jakenacajj ucan yatipjjani.

39. Ucapachajj yatipjjätawa, nayan Jesusar uñjatajjsa, jupan nayamp ajanuy ajanu parlatapsa, chekpach llampʼu chuymamp nayar acanac yatiyatapsa, cunjämatejj maynejj maynirojj yatiyqui nayan quicpa lajjrajjan uqhäma.

40. Nayan kellkañatac tʼuqhätajjata, mä jucʼac ucanacat kellkta.

41. Jichhasti, jumanacaruw ewjjapjjerisma, aca Jesusar thakapjjañamataqui, qhitit-tejj arjirinacamp apostolonacampejj kellkapcäna, Dios Awquimpina Jesucristo Tatitumpina jupanacat ircatir Kollan Ajayumpin qhuyapayañapan wiñay jumanacan utjañapataqui jumanacancañapataquiraqui. Uqhamäpan.