1. Ucatsti Coriantumrajj chhojjrinacapat waliptasinjja, Eterajj jupar arscänsa, uca arunac amtasiñ kalltäna.

2. Jakenacapatjja, niyapiniw pä millon jakenacan espadamp jiwayatätap amuyasïna. Ucat chuymapan jupajj llacthaptañ kalltäna. Jïsa, ni pä millon chʼaman jakenacaw jiwarayatäpjjäna, uqhämaraqui warminacapasa wawanacapasa.

3. Lurcänsa uca jan walit cutiquipstañ kalltäna. Take arjirinacan lacanacapan arsut arunac amtasiñ kalltaraquïna. Ucanacan ucqhacamajj kʼal phokhasitapjjat amuyasiraquïna. Chuymapasti sint llaquisïna, janiraquiw chuymachañjamäcänti.

4. Ucatsti, jupajj Sizar mä kellkat apayäna, jakenacapar jan jiwarayañap mayisa. Jakenacan jacañap laycusti, orak sarayäw catuyañ munjjaraquïna.

5. Ucatsti uca kellkat catokasinjja, Sizajj Coriantumrarojj mä kellkat apayaraquïna, aqhäm sasa: Jumatejj juma pachp catuyasitätajja, quipca espadamamp jumar jiwayañajjataquejja, janiw nayajj jakenacar jiwaraycäti.

6. Ucatsti jakenacajj janiw ñankha luräwinacapat cutiquipstapcänti. Coriantumran jakenacapasti Sizan jakenacapataquiw colerasiñapcam tircuyasipjjäna. Sizan jakenacapasti Coriantumran jakenacapataquejj colerasiñapcamaw tircuyasipjjaraquïna. Ucat Sizan jakenacapajj Coriantumran jakenacapampejj nuwasipjjäna.

7. Jupa pachpan tincurjamätapat amuyasisinsti, Coriantumrajj wastat Sizan jakenacapan nayrakatapat jaltjjäna.

8. Ucatsti Ripliancum umanacaruw purïna. Ucasti, jachʼa sañ muni, jan ucajja, take cunanacat sipan jachʼa. Uqhämasti, uca umanacar purisinjja, chʼujllanacap ut-tʼayapjjäna. Sizasti chʼujllanacap jacʼan ut-tʼayaraquïna. Ucatsti, uca khepärmanthejj nuwasiriw mistupjjäna.

9. Ucatsti sinti jachʼa nuwasïwiw utjäna. Uca nuwasïwinsti Coriantumrajj wastat chhojjriñchatänwa. Wil tucstayasitapatjja, chʼam thayjtayasiraquïna.

10. Ucat Coriantumran nuwasiri tamanacapajj Sizan nuwasiri tamanacaparuw jaljjatapjjäna. Ucatsti, kheparuw jit-tayapjjäna jupanacar atipjañcama. Nayrakatapatsti jupanacarojj jaltayapjjaraquïnwa. Ucatsti, aynach tokeruw jupanacajj jaltjjapjjäna. Ogat sat mayawjan chʼujllanacap ut-tʼayapjjaraquïna.

11. Ucatsti Coriantumran nuwasiri tamapajj Rama koll jacʼan chʼujllanacap ut-tʼayapjjäna. Mormon awquijjajj kollan kellkatanac Tatitutac imantcänjja, uca pachpa kolluraquïnwa.

12. Ucatsti take uc-chʼpach orakjjanquir jan jiwayat jakenac jupanacajj irpthapipjjäna. Eteraruquiw jan irpapcänti.

13. Ucatsti, Eterajj take jakenacapan luräwinacap uñjäna. Coriantumrar arquir jakenacan Coriantumran ejercitopar mayachthapisir jupajj uñjaraquïna. Ucatsti, Sizar arquir jakenacan Sizan nuwasiri tamapar mayachthapisir uñjaraquïna.

14. Uqhämasti, pusi maraw jakenacar irpthapipjjäna, taken uca orakjjanquirinac irpthapipjjañapataqui, uqhämat kawkhanimpitejj chʼamañchasipcaspajj uc catupjjañapataqui.

15. Ucatsti takeniw jupanacajj mayachthapisipjjäna. Sapakat maynisti, cawquïr nuwasiri tamarutejj mantañ munapcänjja, uca nuwasiri tamancapjjänwa, warminacapamp wawanacapampi. Chachanacampi warminacampi wawanacamp-pachaw nuwasiñ armanacanïpjjäna. Escudonacasa, chuymat jarqʼirinacasa, casconacas jupanacan utjäna; ucatsti, nuwasiñataquiw isthapisipjjäna. Ucat mayachthapisipcän ucqhajja, jupanacajj purapat nuwasiñataquiw mistupjjäna. Alwat jaypʼucamaw nuwasipjjäna; janiraquiw cawquïris atipascänti.

16. Ucatsti arumthapcän ucqhajja, karitäpjjänwa; utjnokäwinacaparuw cut-tapjjaraquïna. Utjnokäwinacapar cut-tasinsti, aykoñ jaqhusiñ kalltapjjäna, kawkha jakenacapatejj jiwayatäpcän ucanac laycu. Jupanacan warariñanacapas aykoñanacapas jaqhusiñanacapas sinti jachʼänwa, thayamp chicachasiñapcama.

17. Ucatsti khepärmanthejj wastat nuwasir mistupjjäna. Ucürusti jachʼänwa ajjsarcañaraquïnwa. Ucampis janiw cawquïris atipascänti. Ucatsti, wastat arumäcän ucqhajja, warariñanacapampi aykoñanacapampi jaqhusiñanacapampejj thayan apatänwa, kawkha jakenacatejj ucürojj jiwapcän ucata.

18. Ucatsti Coriantumrajja wastat Sizar mä kellkat apayäna, jupan wastat jan nuwasir mistuñapataqui, antisas orak sarayäw catuñapataqui, jakenacar jan jiwarayañapatac mayisa.

19. Ucampis Tatitun Ajayupajj jupanacamp kʼewtasiñ tucuyänwa. Satanasasti jakenacan chuymanacapjjar phokhat chʼamaniraquïnwa, cunalaycutejj chuymanacapan chʼollkhëtaparu, amuyunacapan juyqhütaparuw jupanac pachpajj churasipjjäna jupanacan tucqhatäpjjañapataqui. Ucat wasitat nuwasir mistupjjäna.

20. Alwat jaypʼucamaw jupanacajj nuwasipjjäna. Arumthapcän ucqhasti, espadanacapjjaruw iquipjjaraquïna.

21. Khepärmanthisti nuwasipjjaraquiquïnwa arumthapiñcama.

22. Arumthapcän ucqhasti coleratjja, machatjamäpjjänwa, mä jakejj vinomp machatäquis uqhämapuni. Ucatsti wastat jupanacajj espadanacapjjar iquipjjäna.

23. Khepärmanthisti wastat nuwasipjjäna. Arumthapirusti takenjamaw espadan jiwayatäpjjäna. Coriantumran jakenacapatjja pheska tunc payaniquiw jiltʼäna. Sizan jakenacapatsti sojjta tunc llätuncaniw jiltʼaraquitayna.

24. Ucatsti ucärmajj jupanacajj wastat espadanacapjjar iquipjjäna. Khepärmanthisti wastat nuwasipjjäna. Ucürojj jaypʼucamajj espadanacapamp escudonacapampejj take chʼamapampiw nuwasipjjäna.

25. Arumthapcän ucqhasti, Sizan jakenacapatjja, quimsa tunc payaniquiw utj-jjäna. Coriantumran jakenacapatsti pä tunc pakallkoniquiw utj-jjaraquïna.

26. Ucatsti jupanacajj mankʼapjjänwa, iquipjjaraquïnwa, khepärmanthisti jiwañataquiw waquichasipjjaraquïna. Jaken chʼamaparjamajja, jupanacajj jachʼa chʼaman jakenacäpjjänwa.

27. Ucatsti quimsa horaw jupanacajj nuwasipjjäna. Ucatsti wil tucstayasitap laycojj chʼam thayjtayasipjjäna.

28. Ucatsti Coriantumran jakenacapajj sarnakañatac chʼam catusinjja, quipca jacañap khespiyasiñ laycojja, jaltirjamäpjjänwa. Ucampis Sizajj sartasiscaquïnwa, jakenacapas sartasipjjaraquïnwa. Jupasti colerasiñapampiw mä juräwi luräna Coriantumrar jiwayañataqui, jan ucasti, jupan espadamp jiwayatäñapataqui.

29. Uqhämasti, jupanacarojj arctänwa; khepärmanthisti jupanacarojj catjaraquïnwa. Ucatsti wastat jupanacajj espadamp nuwasipjjäna. Ucatsti takeniw espadan jiwayatäpjjäna. Sizamp Coriantumrampiquiw jan jiwayatäcänti. Ucat Sizajj wil tucstayasitapat chʼam thayjtayasïna.

30. Ucatsti mä jucʼa samartʼañataquiw espadapjjar kemtʼasiscäna, ucat mä jucʼa chʼam catjjatasaw Coriantumrajj Sizan pʼekep jawkʼantasaw thokokayäna.

31. Ucatsti Coriantumrajj Sizan pʼekep jawkʼantas thokokayatapatjja, Sizajj uqhämpachaw amparapamp sartañatac thurtʼasïna, ucampis liwitat-tänwa. Ucat samanap jan chhaktayañatac chʼamachasisaw jiwawayjjäna.

32. Ucatsti Coriantumrajj orakeruw liwitat-täna, jiwatäcaspas uqhäma.

33. Ucatsti, Tatitojj Eterar parlasaw säna: Mistum. Ucat jupajj mistüna. Ucatsti Tatitun arunacap kʼal phokhasitap uñjäna. Ucat kellkatapjj tucuyäna. (Patacatjja janiw mays nayajj kellkcti). Jupasti ucanacjj imantänwa. Limhin jakenacapaw ucanacjj jicjjatapjjäna.

34. Eteran khep khepa kellkat arunacapajj acanacawa: Tatitojj nayan khep khepa urcam jan jiwañ chek pasaquipañajj munchejja, Tatitun munañaparjamäpan, janchin tʼakhesiñajj munchisti, uqhämaraquïpan. Nayac Diosan khapak marcapan khespiyatäyäjja. Uqhamäpan.