1. Jichhasti, naya Moronejj sarnakäwinacat jucʼamp kellkä. Ucatsti, Aquisampin masinacapampin jamasat arustʼäwinacap laycuw jupanacajj Omeran sarayäwip apakapjjäna.

2. Ucampisa, Omeraru uqhämaraqui, jupar jan tucqhañ munir yokanacapampir phuchanacampirojj Tatitojj qhuyapayänwa.

3. Tatitusti Omerarojj mä samcan ewjjäna, oraket mistuñapataqui. Ucat Omerajj familiapamp uca oraket mistusin walja urunacaw saräna. Ucatsti Sim sata kollur purinisaw uca toket sararaquïna; ucat cawqhantejj Nefi jakenacajj tucqhatäpcän ucawjar purinisaw jalsu toker saräna. Ucat Ablom sat lamar lacanquir mayawjaruw purïna. Ucawjan jupamp take yokanacapampi phuchanacapampi, uqhämaraqui take familiapampejja, chʼujlljam carpanacap ut-tʼayapjjäna. Jaredampi familiapampiquiw jan ucancapcänti.

4. Ucatsti ñankha cancañan amparapana Jaredajj jakenacjjar pʼekechiritac jawtʼatänwa. Ucatsti, Aquisarojj phuchap warmipatac churaraquïna.

5. Ucatsti Aquisajj warmipan tataparuw jiwayañ munäna. Ucatjja nayra nayra jakenacan juräwip arsuycän uca jakenacaruw jupajj mayïna. Ucatsti warmipan tataparuw sarayäw konuñapan kontʼatäsquiriru, jakenacapamp parlasquiriruw jupanacajj pʼekep apakapjjäna.

6. Cunalaycutejj uca ñankha jamasat arustʼäwejj walpin mirantäna jakenacan chuymanacapar ñankhaptayañapcama. Uqhämasti, sarayäw konuñapan kontʼatäquiriruw Jaredajj jiwayatäna. Aquisasti jupa lantiw sarayäna.

7. Ucatsti Aquisajj yokapat pächasiñ kalltäna. Ucat carcelar jupar jakontäna. Ucansti mankʼatjam tʼakhesisaw jiwjjäna.

8. Ucatsti, jiwcänsa ucan jilapaw awquipataquejj colerasïna, awquejj jilapar lurcän ucata. (Jupan sutipasti Nimra satänwa).

9. Ucatsti Nimrajj mä kawkha jakenac irpthapisinjja, uca oraket jaltjjäna. Omeran ucsar jutasinjja Omerampiw utjasipjjaraquïna.

10. Ucatsti Aquisajj yakha yokall wawanac wawachayasïna. Jupanacajj take cunayman ñankha luräwinac jupan munañaparjam lurapjjañapatac jupatac jurament lurapc-chïnsa, jupanacajj jakenacan chuymanacapan munayasipjjäna.

11. Cunjämatejj Aquisajj chʼamanïñ muncänjja, uqhämaraquiw jakenacapajj kamiriptañ munapjjäna. Ucat Aquisan yokanacapajj jupanacar kollk churapjjäna. Uc lurasasti, chicatat jucʼamp jakenac jupanacar arcañapatac irpcatasipjjäna.

12. Ucatsti Aquisamp yokanacapampejj jupanac puraw nuwasiñ kalltapjjäna. Uca nuwasïwisti walja maranacaw utjäna, jïsa, niyapin take uca orakenquir jakenacan jiwayatäñapcama; jïsa, takeniwa, jan ucajja quimsa tunc jakequiw jan jiwayatäpcänti, uqhämaraqui Omeran utapamp jaltapcänsa ucanacajj janiraquiw jiwayatäpcänti.

13. Uqhämasti, Omerajj wasitat tuti orakepar cut-tayat uñjasïna.

14. Ucatsti Omerajj chuymaniptänwa. Ucampis chuymanïsajj jupajj Emer wawachayasïna. Ucatsti Emeraruw jawtʼaraquïna, jupa lant pʼekechirïñapataqui.

15. Emerar pʼekechirïñapatac jawtʼatap khepatsti, pä maraw oraken sumancañajj utjäna. Ucat sinti wali llaquimp phoktʼat urunac uñjasin jupajj jiwjjäna. Ucatsti Emeraw jupa lantejj sarayäna; jupasti awquipan sarnakäwip arcaraquïna.

16. Wasitat Tatitojj oraket uca ñankhachäw apakañ kalltäna. Emeran sarayatäsajja, Emeran utapajj sint jachʼaptäna. Sojjta tunc payan maranjja jupanacajj sint chʼamaniptapjjäna, sinti kamirïñapcama.

17. Jupanacan utjäna take cunayman achunaca, yarananaca, seda sawutanaca, ñutʼu lienzonaca, kori, kollke, jachʼa jila alaninacasa.

18. Utjaraquïnwa, take cunayman uywanaca, toronaca vacanaca, ovejanaca, qhuchinaca, chiwunaca, uqhämaraqui jaken mankʼañapatac walja yakha uywanacasa.

19. Jupanacan utjaraquïnwa, caballonaca, asnonaca. Utjaraquïnwa, elefantenaca, curelomanaca, cumomanaca. Take ucanacajj jaketac sumänwa, ucampis elefantenacampi, curelomanacampi, cumomanacampejj jucʼamp sumänwa.

20. Uqhämaw Tatitojj aca orakjjarojj bendiciönanac wartäna. Aca orakesti yakha orakenacat sipan ajllitänwa. Jupasti camächit churaraquïna take aca orakeninacajj Tatitutac aca orakenïpjjañapataqui. Jan ucasti, cunapachatejj jupanacajj ñankha cancañan pokotäpcaspa ucqhajja, tucqhatäpjjaspawa, cunalaycutejj uqhäm jakenacjjarojj phokhatpach colerasiñajj warjjatä –siw Tatitojja.

21. Emerasti take urunacapan asc lurasaw taripasajj sarayäna. Walja yokall wawanac imill wawanac wawachayasïna. Ucatsti, Coriantum wawachayasiraquïna. Ucat jupa lant sarayañapataquejj Coriantumar jawtʼäna.

22. Coriantumar jupa lant sarayañatac jawtʼatap khepatjja, pusi marampiw jacascäna. Uca orakensti sumancañ uñjäna; jïsa, jupajj Asqui Cancañan Yokaparuw uñjäna. Urupat jupajj sinti cusisisaw yupaycharaquïna. Ucatsti sumancasaw jupajj jiwawayjjäna.

23. Ucatsti Coriantumajj awquipan sarnakäwip arcasaw sarnakäna. Walja jachʼa chʼaman marcanac jupajj ut-tʼayäna. Cunjämatejj walïqui uqhämaruw jakenacaparojj apnakäna, take urunacapanjja. Jupajj janiw walja wawanïcänti. Chuyman tokeruquiw wawanïna.

24. Ucatsti patac payan maraniruw warmipajj jiwjjäna. Ucatsti Coriantumajj uqhämat chuyman tokerojj mä tawakompiw jakechasïna. Ucat jupajj yokall wawanac imill wawanac wawachayasïna. Jupasti patac pusi tunc payan maranïñapcamaw jacäna.

25. Ucatsti, jupajj Com wawachayasïna. Comasti jupa lantiw sarayäna. Jupasti pusi tunc llätuncan maraw sarayäna, ucat Het wawachayasïna. Yakha yokall wawanac imill wawanac jupajj wawachayasiraquïna.

26. Jakenacasti wasitat uc-chʼpach orakjjaruw chʼekentapjjäna. Ucatsti, mä sinti jachʼa ñankhäñaw orakjjan wasitat kalltäna. Hetasti uca nayra jamasat arustʼanac lurañ kalltäna, awquipar tucqhañataqui.

27. Ucatsti awquipat sarayäw apakäna. Quipca espadampiw awquipar jiwayäna. Ucatsti jupa lantiw sarayäna.

28. Ucatsti, wasitat arjirinacajj uca oraker puripjjäna, juchat cutiquipstapjjañapataquiw jupanacar arnakapjjaraquïna, aqhäm sasa: Tatitun thaquip waquichapjjañamawa. Janitejj uc lurapcätajja, mä ñankhachäwiw aca orakjjar purinini. Jïsa, janitejj juchanacat cutiquipstapcätajja, mä jachʼa machʼaw purinini. Ucansti jumanacajj tucqhatäpjjätawa.

29. Ucampis jakenacajj janiw arjirinacan arunacapar iyawsapcänti, antisas jupanacarojj alis-supjjänwa. Yakhepanacarusti jachʼa pʼiyanacaruw jakontapjjäna, ucan jiwañanacapataquiw jaytanucupjjaraquïna. Het pʼekechirin säwinacaparjamaw take ucanac lurapjjäna.

30. Ucatsti mä jachʼa machʼaw uca orakjjar purïna. Janiw jallojj uc-chʼpach orakjjarojj purcänti, ucat ucan utjirinacajj sinti lakaw tucqhäwir puriñ kalltapjjäna.

31. Uca orakjjanjja jiwayir catarinacaw uñstaraquïna, walja jakenacaruw jiwayapjjaraquïna. Ucatsti uywa tamanacapajj jiwayir catarinacan nayrakatapat aynach tokenquir Nefi jakenacan Zarahemla sat orak tokeruw jaltapjjäna.

32. Ucatsti waljaniw jupanacat thaquin jiwapjjäna. Ucampis mä kawkhanacajj aynach tokenquir orakeruw jaltapjjäna.

33. Ucatsti Tatitojj jiwayir catarinacan jan jucʼamp jupanacar arctapjjañapataquiw luräna, antisas thaquin jarcʼapjjañapataquiw utjayäna, jakenacan jan ucsa toket maqhatañanacapataqui, take qhitinacatejj ucsa toket maqhatañatac chʼamachascasp ucanacar jiwayir catarinacan jiwayañapataqui.

34. Ucatsti jakenacajj uywanacan cayup arctapjjäna, thaquin jiwat uywanacan aychanacap mankʼapjjaraquïna, take ucanac mankʼantañanacapcama. Ucatsti jakenacajj jiwañar puriñapat amuyasisinjja, ñankha luräwinacapat cutiquipstañ kalltasaw Tatitur artʼasipjjäna.

35. Ucatsti Tatitun nayrakatapan suma llampʼuptapcäns ucqhajja, jupajj orakjjarojj jall puriyäna. Ucatsti jakenacajj wasitat chʼam catupjjäna. Ucatsti alay tokenquir orakenacana, uqhämaraqui take muytat orakenacan achojj utjaraquïna. Tatitusti machʼat jupanacar khespiyasinjja, chʼamap uñachayäna.