1. Jichhasti, qhitinacat-tejj kellkctjja uca jakenacan tʼunjäwipjjat kellkäwijjar naya Moronejj tucuyä.

2. Janiw Eteran cuna arunacaparus jupanacajj iyawsapcänti. Jaken kalltäwipatpach take cunanacjjat jupajj chekpachaw jupanacar yatiyäna. Umanacan aca orakjjat wañakatap khepatjja, aca oraken take yakha orakenacat sipan mä ajllit orakeruw tucüna, Tatitutac mä ajllit orakeruw tucüna. Uqhämasti, Tatitojj take aca orakjjan utjir jakenacan jupar loktapjjañap muni.

3. Machak Jerusalenäcän ucawjajj alajjpachat saraktaspawa, Tatitun kollan utjäwipäc ucqhata.

4. Eterasti Criston urunacap uñjänwa. Jupajj mä Machak Jerusalenan aca oraken utjañapjjat parlaraquïna.

5. Israelan utapjjat parlaraquïna, Lehejj jutcan uca Jerusalenjjatsa, ucan tucqhatäñap khepatjja wasitat ut-tʼayatäniwa, Tatitutac mä kollan marca. Uqhämasti, ucajj janiw mä Machak Jerusalenäcaspati, nayrapach utjatap laycu. Jan ucasti, wasitat ut-tʼayatäniwa. Ucatsti, Tatitutaquiw mä kollan marcar tucuni, Israelan utapataquiw ut-tʼayataraquïni.

6. Machak Jerusalenasti aca orakjjan ut-tʼayatäniwa, Josean jathapat jiltʼirinacataqui. Ucjjatjja ucar uñtasitaw utji.

7. Cunalaycutejja, cunjämatejj Joseajj awquipar Egipto oraker irpänjja, uqhämaraquiw jupajj ucan jiwäna. Uqhämasti, cunjämatejj Tatitojj Josean awquipar qhuyapaycän jupan jan tucusiñapataquejja, uqhämaraquiw Tatitojj Josean jathapat jiltʼir jakenac Jerusalen oraket irpsüna, Josean jathapar qhuyapayañataqui jupanacan jan tucusipjjañapataqui.

8. Uqhämasti, Josean utapat jiltʼir jakenacajj aca oraken ut-tʼayatäpjjani; acasti jupanacan tuti orakeparaquïniwa. Jupanacasti mä nayrapach Jerusalenjam kollan marcjja Tatitutac ut-tʼayapjjani. Janiraquiw jupanacajj pejjtuntatäpcaniti, tucusïwin puriñapcamajja, orakejj tucuscan ucapachcamasa.

9. Mä machak alajjpachamp machak orakempiw utjaraquini. Ucanacasti nayrapach alajjpachjamäniwa, orakjamaraquïniwa, ucampis nayrapach cunanacajj tucusitäjjaniwa. Take cunanacasti machakaruw tucuni.

10. Ucapachaw Machak Jerusalenajj jutani. Qhuyapayataraquiw ucan utjasirinacajja, cunalaycutejj jupanacan isinacapajja, Chitan wilap laycuw jankʼojja; jupanacaw Josean jathapat jiltʼirinacamp jaqhutäpjje; ucanacasti Israelan utapanquirïpjjänwa.

11. Ucapachaw nayrapach Jerusalenajj puriniraquini. Ucanquirinacajj qhuyapayatäpjjewa, Chitan wilapan tʼajjsutäpjjatap laycu. Jupanacaw chʼeketatatäpcäna, oraken pusi thiyapata, alay tokenquir orakenacat apthapitäpcaraqui ucanacajja; Diosajj Abrahan awquipamp lurcän uca arsüwir phokhañat catokapcani, ucanacaraquiw jupanacajja.

12. Ucanac purcan ucapachajja, aqhäm sir kellkat phokhapjjani: Nayrïrinacäc ucajja, khepïrinacawa. Khepïrinacasti nayrïrinacaraquiwa.

13. Jucʼamp kellkerjamäyätwa, ucampis jarcʼatätwa. Eteran jutir urunacat yatiyäwinacapajja, jachʼänwa muspharcañaraquïnwa. Ucampis jan cunäcaspas uqhäm jupanacajj jupat amuyapjjäna; jupar alis-supjjaraquïna. Jupasti urunacajj mä karka pʼiyan imantasïna. Arumanacasti cunatejj jakenac taypin lurascän ucanac uñjañataquiw mistüna.

14. Mä karka pʼiyan utjasajja, jakenacjjar purcänsa uca tucqhäwinac arumanacajj uñjasin, aca kellkatan utjquis uca khepïr cunanac kellkäna.

15. Ucatsti jupajj jakenac taypit alis-sutäcänsa uca pachpa maran jakenac taypinjja mä jachʼa nuwasïwejj kalltäna, cunalaycutejj walja chʼaman jakenacaw sartapjjäna; niy parlctsa uca jamasat ñankha arustʼanacampiw jupanacajj Coriantumrar tucqhañ chʼamtʼapjjaraquïna.

16. Coriantumr pachpasti, take nuwasiñ cunaymananacjja, take oraken sallka yatïwinacap yatekatäsinjja, ucat jupar tucqhañ munirinac contraw jupajj nuwasiraquïna.

17. Ucampis janiw jupajj juchanacat cutiquipstcänti. Janiraquiw suma uyñaktʼan yokanacapas phuchanacapas, Cohoran suma uyñaktʼan yokanacapasa phuchanacapasa, Corihoran suma uyñaktʼan yokanacapasa phuchanacapasa, janiw juchanacat cutiquipstapcänti. Jïsa, take orakjjanquir suma uyñaktʼan yokanacapat phuchanacapatjja, janiw qhitis juchanacat cutiquipstcänti.

18. Ucatsti, Eterajj karka pʼiyan utjcän uca nayrïr maranjja, orak sarayäwjj catuñatac Coriantumrar nuwascänsa uca jamasat arustʼäwinacan espadapan walja jakenacaw jiwarayatäpjjäna.

19. Coriantumran yokanacapasti wal nuwasipjjäna, walpun wil sarayasipjjäna.

20. Ucatsti payïr maranjja, Tatitun arupajj Eteraruw purïna, Coriantumrar aqhäm sas yatiyañapataqui: Jumatejj take utamanquirinacamp juchat cutiquipstätajja, Tatitojj sarayäwimjj jumar churätamwa, jakenacarusti janiraquiw tucjcaraquiniti.

21. Janitejj uqhäm lurapcätajja, take jupanacajj tucqhatäpjjaniwa, uqhämaraqui take utamanquirinacajja. Jumaquiw jan tucqhatäcätati. Yakha marcan aca orakjj tutipatac catokañapjjat yatiyquisa uca yatiyäwinacan phokhasiñap uñjañamcamaw jumajj jacäta. Jiwcät ucqhasti jupanacaw imantapjjätam. Sapakat mayniw tucqhatäni. Jumaquiw jan tucqhatäcätati.

22. Ucatsti Coriantumrajj janiw juchanacat cutiquipstcänti. Utapanquirinacas jakenacas janiw cutiquipstapcaraquïnti. Nuwasïwinacasti janiraquiw tucuscänti. Ucatsti, jupanacajj Eterar jiwayañ chʼamtʼapjjäna, ucampis jupanac nayrakatat jupajj jaltjjänwa, ucat wastat karka pʼiyan imantasiraquïna.

23. Ucatsti Saredaw sartäna. Jupasti Coriantumr contraw nuwasiraquïna, ucatsti, juparojj atipjaraquïnwa, quimsïr maran jupar catuntäwir puriyañapcama.

24. Pusïr maransti Coriantumran yokanacapajj Saredaruw atipjapjjäna. Ucat wastat awquipataquiw sarayäwjj catupjjäna.

25. Ucatsti uc-chʼpach orakjjan nuwasiñajj utjäna. Sapakat mayniw tamapampejj nuwasipjjäna, jupajj muncäns ucataqui.

26. Lunthatanacasti utjänwa. Jïsa, take cunayman ñankha luräwinacajj uc-chʼpach orakjjan utjäna.

27. Ucatsti Coriantumrajj Saredataquiw sint colerasïna. Ucat jupaaru nuwasiriw nuwasiri tamanacapamp saräna. Jachʼa colerasiñampiw jupanacajj jiquisipjjäna. Gilgal kherwan jupanacajj jiquisipjjäna. Nuwasïwisti sinti ajjsarcayaruw tucüna.

28. Ucatsti, quimsa uruw Saredajj juparu nuwasïna. Ucatsti Coriantumraw juparojj atipjäna, ucatsti, jupar arctaraquïna, Heslon pampanacar puriñapcama.

29. Ucatsti pampanacan Saredajj wastat jupamp nuwasïna. Ucatsti jupajj Coriantumraruw atipjäna, Gilgal kherwaruw wastat jupar jit-tayäna.

30. Coriantumrasti Gilgal kherwan wastat Saredamp nuwasïna. Uca nuwasïwinsti Saredar atipasin jupar jiwayäna.

31. Saredasti Coriantumrarojj lanqhu charapat chhojjriñchäna. Ucatjja pä maraw jupajj jan nuwasir mistcänti. Uca pä maransti taken orakjjanquir jakenacajj wil wartapjjäna. Janiw qhitis jupanacar jarqʼirejj utjcaraquïnti.