1. Coman urunacapansti walja arjirinacaw purinipjjaraquïna. Uca jachʼa oraken tucqhatäñapjjat yatiyapjjäna. Janitejj uca jakenacajj juchanacat Tatiturojj cutiquipstapcaspa, jake jiwayañanacaps ñankhätaps apanucupcaraquispajj ucqhajja.

2. Ucatsti jakenacajj janiw arjirinacar iyawsapcänti. Arjirinacar tucqhañ chʼamtʼapjjaraquïna; ucat arjirinacajj arjjatayasiñataquiw Comar jaltjjapjjäna.

3. Jupanacasti Comar chekanjja, walja jutir cunanacjjat yatiyapjjäna. Take jiltʼir urunacapansti jupajj qhuyapayatänwa.

4. Wali chuymanïñapcamaw jupajj jacäna, Siblom wawachayasiraquïna; Siblomasti jupa lantiw sarayäna. Ucatsti Sibloman jilapaw jupar kallcatäna, ucat mä sinti jachʼa nuwasïwiw uc-chʼpach oraken kalltäna.

5. Ucatsti, take uca jakenacan tucqhatäñapjjat yatiyir arjirinacan jiwayatäñapataquiw Sibloman jilapajj arsuraquïna.

6. Ucatsti, chekpach jachʼa chijiw take orakjjan utjäna, cunalaycutejj arjirinacajj aqhäm sasaw ircatapjjatayna: Mä jachʼa ñankhachäwiw uca orakjjarojj purinini, uqhämarac jakenacjjaru; ucatsti, jupanac taypin jachʼa tʼunjäwiw utjani. Uqhäm tʼunjäwisti, janipuniw cunapachas orakjjan utjirïcänti. Chʼaqhanacapajj orakjjan lakʼar uñtat kotuchatäpjjaniwa. Ñankha luräwinacapat cutiquipstapjjan ucqhaquiw jan ucajj lurascaniti –sapjjänwa.

7. Jupanacasti janiw Tatitun arupar yäkapcänti, ñankha arustʼäwinacap laycu. Ucat uc-chʼpach orakenjja, nuwasïwinacamp chʼajjwäwinacampejj uñstäna. Walja machʼanacamp jachʼa usunacampiw uñstaraquïna mä jachʼa tʼunjäwin jutañapcama. Janiw cunapachas acapach orakjjan uqhäm mä tʼunjäwjj jakenacajj uñtʼapcänti. Take ucanacasti Sibloman urunacapan utjäna.

8. Ucatsti, jakenacajj ñankhätapat cutiquipstañ kalltapjjäna. Uqhäm lurapjjataparjamaw Tatitojj jupanacar qhuyapayaraquïna.

9. Ucatsti Siblomajj jiwayatänwa. Setasti catuntäwir irpantataraquïnwa. Take urunacapan jupajj catuntäwin jacäna.

10. Ucatsti jupan Ahah yokapaw orak sarayäw catüna. Take urunacapan jupajj jakenacarojj sarayäna. Urunacapansti take cunayman ñankha luräwinac luräna; waljanin wilap uqhämat wartayäna. Urunacapasti jucʼaquiraquïnwa.

11. Ucatsti Etemajja, mä Ahahat sarakerïsinjja, orak sarayäw catüna. Urunacapansti, ñankhäqui uc jupajj luraraquïna.

12. Eteman urunacapansti walja arjirinacaw uñstapjjäna, wastat jakenacar jutir cunanacjjat yatiyapjjaraquïna. Jïsa, aqhäm sasaw jakenacar yatiyapjjäna: Janitejj ñankha luräwinacamat cutiquipstapcätajja, Tatitojj acapach orakjjat kʼal jumanacar tucqhapjjätam –sasa.

13. Ucatsti jakenacajj chuymanacapar chʼollkheptayasipjjänwa, janiraquiw arunacapar yäkapcaraquïnti. Arjirinacasti wal llaquisipjjäna, jakenac taypit jithektapjjaraquïnwa.

14. Ucatsti take urunacapanjja, ñankh lurasaw Etemajj taripäwip sarayäna. Ucatsti, jupajj Moron wawachayasïna. Ucatsti Moronajj jupa lantiw sarayäna. Tatit nayrakatansti ñankhäqui ucaraquic Moronajj luräna.

15. Ucatsti, chʼamamp kamiriptañanacamp catuntañatac ut-tʼayatäcäns uca jamas arustʼäwitjja, jakenac taypin mä pitusiñaw uñstäna. Jupanac taypinjja mä jakew ñankha cancañan sartäna. Jupasti Moronaruw nuwasïna, ucat uca oraket chicat jupajj apakäna. Uca oraket chicatsti, walja maranacaw jupajj caturaquïna.

16. Ucatsti Moronajj jupar atipasinjja, orak sarayäwjja, wastat catünjja.

17. Ucatsti yakha chʼaman jakew uñstäna; jupasti Jaredan jilapat sarakerïnwa.

18. Ucatsti jupajj Moronar atipasin orak sarayäwjj caturaquïna. Ucat Moronajj take jiltʼir urunacapanjja, catuntäwin jacäna. Jupasti Coriantor wawachayasïna.

19. Ucatsti take urunacapan Coriantorajj catuntäwin jacäna.

20. Coriantoran urunacapansti walja arjirinacaw purinipjjaraquïna. Jupanacasti, jachʼa muspharcañ cunanacjjat yatiyapjjäna, ucatsti jakenacaruw artʼapjjäna, aqhäm sasa: Juchanacat cutiquipstapjjam, janitejj juchanacat cutiquipstapcätajja, Tatitojj jumanac contraw taripapjjätam, kʼal tucqhatäpjjañamataqui.

21. Ucat Dios Tatitojj yakha jakenacaruw chʼamapampejj apanini aca orak catjjapjjañapataqui, cunjämatejj awquinacamar irpancän uqhäma.

22. Jupanacasti arjirinacan arunacaparojj janiw iyawsapcänti, jupanacan jamasat arustʼäwinacap laycu, ñankha ajjtcañ luräwinacap laycuraqui.

23. Ucatsti Coriantorajj Eter wawachayasïna. Ucat take urunacapan catuntäwin jacasin jupajj jiwjjäna.