1. Ucatsti, Sulejj Omer wawachayasïna. Omerasti jupa lantiw sarayäna. Omerajj Jared wawachayasïna. Jaredasti yokall wawanac imill wawanac wawachayasiraquïna.

2. Jaredasti awquipar kallcatasin Het oraker sarjjäna, ucatsti ucqhan utjasïna. Ucatsti walja jakenacaruw sallka arunacamp maysat parläna, oraket chicatpach jupan catuñapcama.

3. Oraket chicat catutapatjja awquip contraw nuwasïna. Ucatsti awquiparuw catuntäna. Awquiparusti catuntäwin jupar lokayasïna.

4. Omeran chicatpach sarayäw urunacapanjja, jupajj catuntatänwa. Ucatsti yokall wawanac imill wawanac jupajj wawachayasïna. ucanac taypin utjäna Esromampi Coriantumrampi.

5. Jared jilapan luräwinacapat jupanacajj sint colerasipjjäna, mä nuwasiri tama ut-tʼayañapcama, Jaredar nuwasiñapcama. Ucatsti arumaw jupjjar nuwasipjjäna.

6. Ucatsti Jaredan nuwasiri tamap jiwarayasinjja, juparuraquiw jiwayirjamäpjjäna. Ucat jupajj jupanacar achicäna jupar jan jiwayañapataqui; sarayäwjj awquipar cut-tayañataquiw arsuraquïna. Ucatsti janiw jupar jiwayapcänti.

7. Ucatsti sarayäwip aparayasitapatjja Jaredajj sinti llaquisiñaruw purïna, cunalaycutejj jupan chuymapajj sarayäwir churatänwa, acapachan jachʼar aptatäñar churataraquïnwa.

8. Jaredan phuchapasti sinti chʼiqhi yatsutänwa. Ucat awquipan llaquinacap uñjasinjja mä arustʼa amuyäna, sarayäw awquipatac cutsuyañataqui.

9. Jaredan phuchapasti sinti jiwaquïnwa. Ucatsti awquipamp parlasaw jupar säna: Cunats tatajjajj aqhäm llaquisi? Awquinacasajj uca jachʼa pʼiya lamar qhurcatat apanipcänsa, uca kellkat janit leequi? Janit ucanjj yatiyqui, nayra nayra jakenacjjata, jupanacan jamas arustʼanacap toketa, orakenac jicjjatapcäna, jachʼar aptatäñ jicjjatapcaraquïnjja?

10. Jichhasti, Quimnoran Aquis yokapan jutañapatac yatiyir qhitam. Amuyam, nayajj jiwaquïtwa; ucat jupataquiw thoktʼarapï, jupar cusisiyaraquï, nayamp jakechasiñ munañapataqui. Uqhämasti, jupatejj jumar mayïtam jupan warmipäñajjataquejja, jumajj aqhäm sätawa: Jumatejj pʼekechir awquijjan pʼekep apanitätajja, phuchajjarojj churämawa.

11. Omerasti Aquisan masipänwa. Ucat Jaredajj Aquisan jutañapatac yatiyir qhitäna. Ucat Jaredan phuchapajj jupan nayrakatapan thoktʼäna, jupar cusisiyañapcama, jupamp jakechasiñ munañapcamaraqui. Ucat jupajj Jaredar säna: Warmijjatac nayar jup churita.

12. Jaredasti juparojj sänwa: Jumatejj pʼekechir awquijjan pʼekep nayar apanitätajja, nayajj jupjj churämawa.

13. Ucatsti Aquisajj Jaredan utaparuw take familiapar jawsthapïna, ucat jupanacar säna: Cuntejj nayajj mayipcäm uc lurapjjañamataquipun jurament lurapjjätati?

14. Ucatsti alajjpachanquir Dios laycu, alajjpachanac laycu, acapach orak laycu, pʼekenacap laycuraquiw jupanacajj jupatac jurament lurapjjäna; cawquïritejj Aquisan jan munañaparjam jupar yanapcaspa ucajja, pʼekep chhakañapänwa. Uqhämaraqui, cuntejj Aquisajj jupanacar yatiycaspa ucjjat yakhar yatiyirejj jacañap aptʼasiñapänwa.

15. Ucatsti, uqhäm Aquisamp arustʼapjjäna. Nayra chʼam thaker jakenacajj lurapcän uca juräwinac Aquisajj jupanacar churäna. Uca juräwinacasti Cainat ucapachcam catuyatänwa. Uca Cainasti kalltäwitjja mä jak jiwayirïnwa.

16. Supayan chʼamapaw ucanacarojj catjjäsïna, uca juräwinac jakenacar churañataqui, ucanacar chʼamacan imañataqui, qhitinacatejj chʼam thakapcän ucanacan chʼamaniptañapataqui, jak jiwayañapataqui, lunthatjañapataqui, cʼarisiñapataqui, take cunayman ñankha luräwinac lurañapataqui, kʼañusiñ wachokäwinac lurañapataqui.

17. Jaredan phuchapasti jupan chuymaparuw uchäna aca nayra cunanac thakañapataqui. Jaredasti Aquisan chuymaparuw uc lurañataquejj ucharaquïna. Ucatwa, Aquisajj familiaparu masinacaparu ucjj churaraquïna. Suma arsüwinacampiw jupanacarojj irpantäna, cunanactejj jupajj muncän take ucanac jupanacan lurapjjañapataqui.

18. Ucatsti, cunjämatejj nayra nayra jakenacajj lurcän uqhämaw jupanacajj mä jamas arustʼäw ut-tʼayapjjäna. Diosan nayrapanjja uca arustʼäwejj take cunanacat sipan wali ajjtcañawa, ñankharaquiwa.

19. Cunalaycutejj Tatitojj jamas arustʼäwinac contrajj janiw cuns lurquiti. Janiraquiw jaken wil wartañap munquiti. Antisas jaken kalltäwipatpach take cunanacan ucjj jan lurañapataquiw camächit churi.

20. Naya Moronisti juräwinacapan arustʼäwinacapan cunjamätap janiw kellkcti, cunalaycutejj ucanacan take jakenac taypin utjatapajj nayar yatiyatawa. Laman jakenac taypin ucanacajj utjaraquiwa.

21. Niy parlcjjtsa uca jakenacan tucqhäwipaw ucanac puriyäna. Uqhämaraqui Nefi jakenacan tucqhäwip puriyaraquïna.

22. Cawquïr orakenacatejj chʼamaniptañapatac kamiriptañapatac uqhäm jamas arustʼäwinac ut-tʼayapcani ucanacan uca orakjjar chʼekentañapcamajja, take uca orakenacajj tucqhatäpjjaniwa, cunalaycutejj jupanacajj wartapcani uca Tatitun kollan jakenacapan wilapan jupanacar wilat cut-tayañapatac sapa cut artʼataparojj Tatitojj janiw alekac istʼcaniti, jupanacan wila wartatap jan apsuscasajja.

23. Uqhämasti gentilenaca, ucanacan jumanacar uñachayatäñapajj Diosan suma amuyuparjamawa, jumanacan uc yatisin juchanacamat cutiquipstañanacamataqui, uca chʼam thakañatac kamiriptañatac ut-tʼayat jiwayir arustʼäwinacan jan jumanacjjar chʼamanïñapataqui. Jumanacatejj ucanacan utjañap munapjjätajja, tʼunjañapäc ucajja, jumanacjjaruw purini, jïsa, Wiñay Diosan chekapar uñjañapan espadapajj jumanacjjaruw purini, jumanacan chʼam chhaktapjjañamcama, tʼunjatäñamcama.

24. Uqhämasti, ucanacan jumanac taypir puritap uñjapcät ucqhajja, jumanac taypinquir jamas arustʼäw laycu ajjsarcañ utjatamjjat amuyasis pʼarjjtapjjañamataquiw Tatitojj camächit churapjjtam. Jan ucasti, ay ucata, jiwayatanacan wilanacap laycu. Jupanacajj lakʼatpach artʼapjje wilapat apsusiñ munasa, uqhämaraqui uc ut-tʼayirinacat quipca apsusiñataqui.

25. Uc jachʼaptayir jakenacasti, take orakenacana, marcanacana, jakenacan antutäwip apakañ chʼamtapjje. Ucasti take jakenacan tucqhatäñaparuw puriyi, cunalaycutejj ucajj supayan ut-tʼayatawa. Jupasti take cʼarinacan awquipawa. Nayrïr awquis taycasar sallkjjcän uca pachpa cʼariw jupajja. Jïsa, kalltäwitpach jak jiwayañatac jaker amuyaycäna, jakenacan chuymanacap chʼollkheptaycäna, jupanacan kalltäwitpach arjirinacar jiwayañanacapataqui, kalamp cʼupjañanacapataqui, alis-suñanacapatac amtaycän uca pachpa cʼariw jupajja.

26. Ucat naya Moronejj ucanac kellkañajjatac camächit catokta, ñankha cancañan tucusiyatäñapataqui, mä urun puriñapataqui cunapachatejj Satanasajj jaken wawanacapan chuymanacapar jan chʼamanïcan ucqha. Ucatsipana, jupanacar sapa cuti asc lurapjjañapatac amuyayañataqui, take asqui cancañan jalsupar jutasin khespiyatäpjjañapataqui.