1. Ucat Tatitojj Jaredan jilapar camächit churäna, kollut sarakaniñapataqui, Tatitun nayrakatapat sarakaniñapataqui, uñjcänsa ucanac kellkañapataquiraqui. Ucanacasti jaken wawanacapar puriñat jarcʼatänwa, jupan cruzjjar aptatäñapcama. Uca laycuw Mosia pʼekechirejj ucanac imäna, ucanacan oraker jan puriñapataqui, Criston jakenacapar uñachayasiñapcama.

2. Criston jakenacapar jupa pachp chekpach uñachayasitap khepatsti, ucanacan uñachayatäñapataquiw camächit churäna.

3. Jichhasti, uca khepatjja takeniw jupanacajj jan iyawsañar puripjje. Janiraquiw qhitis utjquiti, jan ucasti, Laman jakenacaquiw utji. Jupanacasti Criston yatichäwip janiw catokapcaraquiti. Ucat nayajj camächit catokta, ucanac wasitat oraken imantañajjataqui.

4. Cunanactejj Jaredan jilapajj uñjcän uca pachpanac aca tʼalpha lekʼetanacjjar kellkta. Jaredan jilapar uñachayatäcänsa ucanacat sipan jucʼampejja, janiw cunapachas jucʼamp jachʼa cunanacajj uñachayatäcänti.

5. Uqhämasti, Tatitojj camächit churitu, ucanac kellkañajjataqui. Ucatsti, ucanac lluchʼintañajjataquiw camächit churaraquitu. Ucanacat uñtʼat lajjrar jakoquipatäqui uc lluchʼintañajjataquiw camächit churaraquitu. Uqhämasti, uca arsuyirinac lluchʼint-ta, Tatitun camächitaparjamajja.

6. Cunalaycutejj Tatitojj situwa: Cunüruntejj gentilenacajj ñankhätapat cutiquipstapcani, Tatitun nayrakatapan kʼomar tucupcaraquini, janïr ucürojj purcan ucqhacamajj janiw ucanacajj gentilenacar purcaniti.

7. Cunüruntejj jupanacajj nayar iyawsas sarnakapcani, –siw Tatitojja, cunjämatejj Jaredan jilapajj lurcän uqhämjja, jupanacan nayan kollanaptayatäñapataqui, ucapachaw Jaredan jilapajj uñjcän ucanacjj jupanacar uñachayä, take nayan yatiyäwijj jupanacar khanañchañajjcama –siw Jesucristojja, Diosan Yokapajja, alajjpachanacansa acapachansa, take ucanacan utjqui ucanacan Awquipa.

8. Qhititejj Tatitun arupar chʼajjwcani ucajja, ñankhachatäpan. Qhititejj, acanacajj janiw chekäquit siscani ucajj ñankhachatäpan. Jupanacarojj janiw jucʼamp jachʼa cunanac uñachaycäti –siw Jesucristojja, cunalaycutejj parlqui ucajja, nayätwa.

9. Nayan camächit churatajjarjamaw alajjpachanacajj jistʼarti, jistʼcatasiraqui. Arujjarjamaw acapach orakejj qhathatini. Nayan camächit churatajjarjamaw ucanquir jakenacajj ninamp nakhantapcaspas uqhäm jiwarapjjani.

10. Arunacajjar jan iyawsirejja, janiw yatekerinacajjar iyawsquiti. Jan ucajj janich nayajj parlctjja, uc taripapjjam. Qhititejj parlqui ucan nayätajj khep khepa urun yatipjjäta.

11. Ucampis, parlctsa ucanacar qhititejj iyawscan ucaruw Ajayujjan uñachayäwinacapamp tumpä. Jupasti yatiniwa ircataraquiniwa. Cunalaycutejj nayan Ajayujjat ucanacan chekätap yatini, ucan jakenacar asc lurañatac amuyayatapata.

12. Take cunanacatejj asc lurañatac jakenacar amuyayqui ucanacajja, nayat juti. Naya pachpaw asqui tokerojj jakenac irpta. Qhititejj arunacajjar jan iyawscani ucajja, janiraquiw nayarusa, nayan utjatajjarus iyawscaraquiniti. Qhititejj nayar jan iyawsquitanejja, janiraquiw nayar qhitanquitu uca Awquirojj iyawscaniti, cunalaycutejj nayajj Awquïtwa. Nayaw acapach oraken khanapätjja, jacañapätsa, chekapätsa.

13. Nayar jutapjjam, juma gentilenaca. Nayasti jucʼamp jachʼa cunanac uñachayapjjäma. Ucanacjjat yatiñasti imantatawa, jan iyawsañ laycu.

14. Nayar jutapjjam, juma Israelan utapa, ucat cunanactejj orak kalltäwitpach Awquejj jumanacatac imquejja, ucanacan jachʼätapajj jumanacar uñachayatäniwa. Ucasti janïraw jumanacar purquiti jan iyawsañ laycu.

15. Ucampisa, uca ajjsarcañ ñankha cancañamanjja, chʼollkhe chuymanïñamansa, juyqhu amuyunïñamans kheparayapctamjja, uca jan iyawsañ jarcʼak chʼiyjapcätas ucqhajja, jachʼa muspharcañ cunanacajja, orak ut-tʼayäwitpach jumanacat imantatäqui ucanacajj uñachayatäniwa. Jïsa, cunapachatejj pʼaquintat altʼir chuymamp nayan sutijj-jjar Awquit mayisipjjätajja, Israelan utapa, ucapachaw yatipjjäta, Awquejj awquinacamatac lurcänsa uca arsüwit jupan amtasitapata.

16. Ucapachaw Juan lokerijjar kellkayctsa, uca nayan yatiyäwijjajj take jakenacan nayranacapar khanañchatäni. Amtasipjjam, cunapachatejj ucanac uñjapcäta ucapachaw yatipjjäta, cunüruntejj ucanacarjam cunanacajj camächcani ucürun niy purirjamätapjja.

17. Uqhämasti, aca kellkat catokapcät ucqhajja, jumanacajj take orakjjan Awquin luräwipan niy kalltatap yatipjjäta.

18. Uqhämasti, juchat cutiquipstapjjam take orak thiyanacanquirinaca; nayar jutapjjam; yatichäwejjar iyawsapjjam; sutijj-jjar bautisasipjjam. Cunalaycutejja, qhititejj iyawsqui bautisascaraqui ucajja, khespiyatäniwa. Ucampisa, jan iyawsirejj ñankhachatäniwa. Unañchanacasti nayan sutijjar iyawsirinacan utjani.

19. Qhititejj khep khepa urun nayan sutijjar iyawsas thurtʼasir jicjjatatäcan ucajja, qhuyapayatawa. Orake ut-tʼayäwitpach jupatac waquichatäcän uca khapak marcan utjañapataquiw jupajj alayar aptatäni. Uc parlquis ucajja, nayätwa. Uqhamäpan.