1. Ucatsti Jaredampi, jilapampi, familianacapampi, Jaredampin jilapamp masinacapamp familianacapampejja, alay tokenquir valleruw sarakapjjäna. (Uca vallesti Nimrod satänwa; uca sutejj mankʼañatac suma jiwayirin sutipat apakatawa). Apthapipcän uca take casta uywa tamanacapamp-pachaw sarakapjjäna, orkompi kachumpi.

2. Sipitanac uscupjjäna, alayanquir jamachʼinac catuñataqui. Mä wacull lurapjjaraquïna, ucaruw jacquir chawllanac apapjjaraquïna.

3. Ucatsti, deseret apasipjjaraquïna. Ucajja misqʼichir mamuraya sañ muni. Ucat jupanacajj walja tama mamurayanac apapjjaraquïna, uqhämaraqui, uca oraken utjcän uca take cunayman casta jathanaca.

4. Nimrod kherwar puripcän ucqhasti, Tatitojj sarakanisin Jaredan jilapamp parläna. Jupasti mä kenay taypincänwa, Jaredan jilapasti janiw jupar uñjcänti.

5. Ucatsti Tatitojj camächit jupanacar churäna wasaranjam sarapjjañapataqui, jïsa, cawqharutejj jakejj jan cunapachas sarcän ucqharu. Ucatsti Tatitojj jupanac nayrakat saräna. Kenay taypinc-casaw jupanacar parläna, cawqharutejj sarapjjañapacän uc yatiyaraquïna.

6. Ucatsti wasaranjam sarapjjäna. Barconac lurapjjaraquïna; ucanacampiw jachʼa umanac maqhatapjjaraquïna, Tatitun amparapan sapa cut irpatäsina.

7. Lamar qhurcatanquir wasaran kheparapjjañapjja, janiw Tatitojj muncänti. Antisas arsut oraker jutañap munäna. Uca orakesti take yakha orakenacat sipan ajllitänwa. Dios Tatitusti uc imaraquïna mä asqui marcataqui.

8. Colerasiñampiw Jaredan jilapajj juräwi luräna: Ucapachat ucsarojj wiñayataqui, qhitinacatejj uca arsut orakenïcani ucanacan chekpach mayni sapa Diosar lokañapaw waquisini, jan ucajja, cunapachatejj jupan jachʼa colerasiñapajj jupanacjjar purcan ucapachajja, jupanacajj phatʼanucutäpjjaniwa.

9. Jichhasti Diosan aca orakjjat aqhäm arsüwinacap uñjapjjtan. Aca orakejj mä arsut orakewa. Qhitinacatejj aca orakenïpcan ucanacajja, Diosaruw lokapjjani, jan ucajja, cunapachatejj jupan jachʼa colerasiñapajj jupanacjjar purcan ucapachajja, jupanacajj phatʼanucutäpjjaniwa. Jupanacajj ñankha cancañan pokotäpcan ucapachajja, jachʼa colerasiñapajj jupanacjjaruw purini.

10. Cunalaycutejja, aca orakejj take yakha orakenacat sipan ajllit orakewa. Uqhämasti, qhititejj aca orakenïcan ucajja, Diosaruw lokani, jan ucasti phatʼanucutäniwa. Ucajja Diosan wiñay arsüwipawa. Aca oraken wawanacap taypin ñankha cancañajj phoktʼatäcan ucapachaquiw jupanacajj phatʼanucutäpjjani.

11. Acasti juma gentilenacar yatiyatawa, Diosan arsüwinacap uñtʼapjjañamataqui, jumanacan juchat cutiquipstapjjañamataqui, ñankha luräwinacaman phokharayañcam jan sarnakasipcaquiñamataqui, Diosan jachʼa colerasiñap jumanacjjar jan puriyasipjjañamataqui, uca orakenquirinacajj jichhacam lurapcänsa uqhäma.

12. Jïsa, acajj mä ajllit orakewa. Cawquïr marcatejj aca orakenïcan uca marcajja, janiw mitʼanïcaniti, catuntäwit antutatäpjjaniwa, take yakha alajjpachat aynachanquir orakenacat antutayatäpjjaraquini, jupanacatejj aca oraken Diosapar sapaqui lokapcani ucqha; jupasti Jesucristowa, nanacan kellkatanacajjan uñachayataraquiwa.

13. Jichhasti, cunatejj kellkañajjäqui uc jucʼamp kellkä. Ucatsti Tatituw Jaredampir jilanacapampirojj irpäna, orakenac jaljir uca jachʼa lamarcamajja. Lamarar purisinsti jupanacajj chʼujlljam carpanacap ut-tʼayapjjäna. Ucawjaruw Moriancumer sutiñchapjjaraquïna. Chʼujlljam carpanacan kamnokapjjäna. Lamar lacana, chʼujlljam carpanacanjja pusi maraw kamnokapjjäna.

14. Ucatsti pusi mar sarakepana, Tatitojj wasitat Jaredan jilapar jutäna, mä kenay taypit jupamp parlaraquïna. Quimsa horaw Tatitojj Jaredan jilapamp parläna, juparojj tokenokaraquïnwa, Tatitun sutipjjar artʼasiñ jan amtatapata.

15. Lurcäns uca ñankhat Jaredan jilapajj cutiquipstäna. Tatitun sutiparuw artʼasiraquïna, jupampïcäns uca jilanacapataqui. Ucat Tatitojj jupar säna: Jumampin jilanacamampin juchanacam pʼampʼachä. Ucampis janiw jucʼamp juchachasipjjätati. Ajayujjan jan wiñayatac jakemp kʼewtasiñapat amtapjjäta. Uqhämasti, jumanacatejj juchan pokotäñapcam juchachasipjjätajja, Tatitun nayrakatapat jarcʼakatäpjjätawa. Tutimatac churapcäm uca orakjjat uqhämaw lupʼïwinacajjajja, cunalaycutejj aca orakejj take yakha orakenacat sipan ajllitäniwa.

16. Tatitojj saraquïnwa: Nayrakat lurapctas uqhäm barconac chʼamachasis lurapjjam. Ucatsti Jaredan jilapajj chʼamachasïnwa, jilanacapajj chʼamachasipjjaraquïnwa, nayrakat lurapcäns uqhäm barconac lurapjjañapataqui, Tatitun yatiyäwinacaparjama. Barconacasti jiscʼaquïnwa, umjjansti sujaquiraquïnwa, mä uma jamachʼejj tuyquis uqhäm sujaraquïnwa.

17. Ucanacasti luratänwa, jan uma mantcayapuni, mä vasor uñtat um catokañapcama. Tactʼañapajj mä platjam jan uma mantcayapunïnwa. Saytʼanacapasti mä platjam jan uma mantcayaraquïnwa. Thiyanacapasti arinïnwa. Khopjjatañapasti mä platjam uman jan mantcayaraquïnwa. Sayarusti mä kok uc-chʼänwa. Jistʼantat puncupasti mä platjam jan uma mantcayaraquïnwa.

18. Ucatsti Jaredan jilapajj Tatituruw aqhäm sas artʼäna: Tatay, lurañajjatac camächit churquista uca luräw tucuytwa. Nayar yatiyatamarjamaw barconac lurta.

19. Jichhasti Tata, ucanac mankhanjja khanajj janiw utjquiti. Cawcsarus barconac sarayapjjäjja? Uqhämaraquiw jiwarapjjä, cunalaycutejj ucanac mankhancasajja, samanamp ajjscatañjamawa, janiw jucʼamp samañjamäquiti. Uqhämasti, jiwarapjjäwa.

20. Tatitusti Jaredan jilaparojj sänwa: Alayans aynachansa, pʼiyanac pʼiysüta. Ucat samanatejj pistʼanejja, pʼiy llupharäta ucat thay catokaraquïta. Ucampis umatejj mantaspajja, pʼiy lluptʼjjäta uman jan jiwarañanacamataqui.

21. Ucatsti Jaredan jilapajj uqhäm luräna, Tatitun camächit churataparjama.

22. Wasitat Tatiturojj aqhäm sas artʼäna: Tata, cunjämatejj camächit churquistajj uqhäm lurta. Barconacjj jakenacajjatac waquichjjtwa, ucampis janiw ucanacan khanajj utjquiti. Jichhasti Tata, uca jachʼa umanac chʼamacan maqhatir jaytjapjjetätati?

23. Tatitusti Jaredan jilaparojj sänwa: Barconacaman khan utjañapatac cuna lurañajjs munista? Cunalaycutejj ventananacajj tʼun tʼunjatäspawa, ucat ventananacan utjañapajj janiw walïcaspati. Janiw jumanacamp chic nin apapcätati, cunalaycutejj janiw nina khanamp irpatajj sarapcätati.

24. Cunalaycutejja, lamar taypinquir jachʼa chawlljamäpjjätawa, kolljam mathapinacaw jumanacjjar jawkʼapjjätam. Ucampis thayanacajj nayan lacajjat mistu. Jallunacamp jachʼa jallunacampjj nayaw puriyta. Ucatsti, lamar pʼiyanacat wasitat apsupjjäma.

25. Jumanacaruw waquichapjjsma, ucanacar atipañamataqui. Janitejj nayajj jumanacar waquichapquirismajja, lamar mathapinaca, thaytʼir thayanaca, jachʼa jallunacar atipañamataquejj, janiw uca jachʼa pʼiya lamar maqhatapcasmati. Ucatsti, cuna jumanacatac waquichañajjs munista, khananïpjjañamataqui cunapachatejj lamar pʼiyanacan mankʼantatäpcät ucqhajja?