1. Take cunanacatejj jakenacajj taypina yatichatäcäna ucanacjj naya Nefejja janiw kellkquiristti. Janiraquiw nayajj kellkañataqui jachʼäcti arsuñatac jachʼäcta uqhama, cunalaycutejj mä jakejj Kollan Ajayun chʼamapampi arsu ucapachajja, Kollan Ajayun chʼamapajj uca arsüwip jaken wawanacapan chuymanacaparu api.

2. Ucampisa, waljaniw Kollan Ajay toke chuymanacap chʼollkheptayasipjje ucan jan jupanacancañapataqui. Ucatwa jupanacajj walja kellkata cunanacjj jakonucupjjewa, ucanacajj jan cunataquïcaspas uqham amuyasa.

3. Ucampis cuntejj kellkctjja ucjj naya Nefejj kellktwa. Jakenacajjataqui, uqhamaraqui yakhepanacataqui ucan sinti sumätapjj amuytwa. Jakenacajjataqui jan tucuyasaw urojj mayisipuntwa. Arumansti nayrajjajj chʼijmañajjaru jurichi jupanac laycu. Iyawsañampi Diosajjaru artʼaractwa. Uqhamasti nayajj yatiractwa, jupajj artʼäwejjar istʼani.

4. Uqhamasti yatiractwa, Dios Tatitojj mayisïwinacajjar kollanaptayani, jakenacajjan sum catokañapataqui. Cuntejj kellkcta ucajj jupanacaru amuyayi jupanacan sum lurañanacapataqui; uqhamaraqui awquinacapjjat jupanacar yatiyi; Jesusat arsu, jupar iyawsañanacapataqui jupanacaru amuyayaraqui; jupanacar amuyayaraqui tucusïwcam thurtʼasiñanacapataqui; ucasti wiñay jacañaraquiwa. Uca laycojja cunanactejj jan chʼamanïsa kellkcta uca arunacajj jupanacataqui chʼamañchatäniwa.

5. Ucasti chʼama arunacampi jucha toke arsu, chekan khanaparjama. ucatwa, kellkcta uca arunacataqui janiw qhitis colerascaspati, jan ucajja, qhititejj supayan ajayupanccani ucaquiw colerasini.

6. Khana cancañat nayajj wal cusistjja. Chekat nayajj wal cusistjja. Jesusajjat wal cusisiractwa, jupan nayaru mankhapachat cutsuyatap laycu.

7. Jakenacajjar qhuyapaytwa. Cristor wal iyawsaractwa, nayan walja phokhatpach kʼoma jakenacampi jiquisiñajjataqui jupan taripäw konuñapana.

8. Judionacar phuyapaytwa. Judio sasajja, cawqhat-tejj jutctjja ucanquirinac sañ muntwa.

9. Uqhamaraqui gentilenacar qhuyapaytwa. Ucampis janitejj jupanacajj Cristompi sumthapipcanejja, cʼullcʼu puncuru mantasa cheka wiñay jacañaru irpiri thaquinjam sarnakapcaraquinejja, yantʼañ urun tucusïwipcam uca thaquinjam sarapcaraquinejja, nayajj janiw qhiti jupanacataqui sumjj suyquiristti.

10. Jichhajja, nayan munat jilanacajja, uqhamaraqui judionaca, take acapach orak thiyanquirinacaraqui, aca arunacar iyawsapcstajja, Cristor iyawsapjjam. Ucampis aca arunacajj Criston arupawa, jupasti acanacjj nayaru churitu; aca arunacasti take jakenacar sum lurañapataquiw yaticharaqui. Ucatwa jumanacatejj Cristor iyawsapjjätajja, aca arunacar iyawsapjjaraquïtawa.

11. Acanacajj Criston arunacapat janicha ucjj amuyasipjjam. Cristosti chʼamampi jachʼa khapak cancañampiwa acanacan arupätapjj jumanacaru uñachayapjjätamjja khep khepa urunjja. Jumanacampi nayampejj purapat uñcatasisaw jupan taripäwip nayrakatana saytʼapjjañäni. Jumanacasti yatipjjätawa nayan camachitjj catokatajjatjja acanacjj kellkañajjataqui, nayan jan chʼamanïñampisa.

12. Criston sutipjjaru Awquit nayistjja jiwasanacat waljanin khespiyatäñasataqui, jan ucajja take jiwasanacan khespiyatäñasataqui jupan khapak marcapana uca jachʼa khep khepa urunjja.

13. Jichhasti munat jilanacajja, take Israelan utapanquirinaca, take acapach orak thiyanquirinaca, mä lakʼat artʼirin arupjamaw nayajj jumanacar arsupjjsma. Walic sarapjjam uca jachʼa urun puriñapcama.

14. Take qhitinacatejj Diosan sumätapat jan catokañ munapcta, judionacan arunacaparu nayan arunacajjaru Diosan Chitapat mistcani uca arunacar janiraqui wakaychañ munapcaracta take jumanacaru nayajj sarjjä sapjjsma, cunalaycutejja aca arunacajj khep khepa urunjja jumanacjjaru juchañchapjjätam.

15. Cunalaycutejja cuñntejj nayajj acapach oraken lluchʼintctjja ucajj jumanac toke khanañchañataqui aptatäniwa taripäwinjja. Uqham Tatitojj camachit churitu; nayasti jaysañajjawa. Uqhamäpan.