1. Jichhajja, naya Nefejja, Isaiasan lacapan arsut arunac kellkcta uca arunacjjat mä jucʼa parltʼä, cunalaycutejj Isaiasajj nayan jakenacajjan amuyasiñapatac walja chʼama arunac parli. Cunalaycutejj jupanacajj janiw judionacan jutir urunacan yatiyañapjjat amuyapquiti.

2. Cunalaycutejj naya Nefejja, janiw judionacan walja luräwinacapjjat jupanacar yatichcti, judionacan luräwinacapan chʼamacätap laycu, sarnakäwinacapan ajjtcañätap laycuraqui.

3. Ucatwa, marcajjar kellkcta jichhürut ucsar catokapcan take uca jakenacaruw kellkaracta, Diosan taripäwinacapan take marcanacar puriñap yatipjjañapataqui, cunjämtejj jupajj parlcän uca arurjama.

4. Uqhämasti istʼapjjam, Israelan utapanquir jakenacajjay; arunacajjar istʼapjjam. Isaiasan arunacapajj jumanacatac janis khanäc-chejja, take qhitinacatejj jutir urunacat yatiyañ ajayump phoktʼatäc ucanacataquejj jupan arunacapajj khanawa. Ucampis nayajj jutir urunacat yatiyapjjsma, nayan utjquis uca ajayurjama. Ucatwa, Jerusalenat awquijjamp mistuncta ucapachatjja, cuna khana cancañatejj nayan utjquejja uca khana cancañarjamaw jutir urunacat yatiyapjjäma; cunalaycutejj chuymajjajj cusisiwa, marcajjatac khanätapata, jupanacan yatekañapataqui.

5. Jïsa, chuymajjajj Isaiasan arunacapan cusisi, cunalaycutejj nayajj Jerusalenat mistunta. Nayrajjasti judionacan luräwinacap uñji. Diosan arjirinacapan yatiyäwinacapjjat judionacan amuyatap yatiracta. Judionacar arsutäpcän ucanacjjat janiraquiw yakha jakenacajj judionacjam amuyapquiti, janitejj uca jakenacajj judionacan cunjamätaparjam yatichatäpqui ucqhajja.

6. Ucampis naya Nefejja, janiw wawanacajjarojj judionacan cunjamätaparjam yatichcti. Ucampis naya pachpaw Jerusalenan utjta, ucar muytat orakenacjjat yatiracta. Judionac taypir purcänsa uca Diosan taripäwinacapjjat wawanacajjar parlta, take cuntejj Isaiasajj parlcän ucarjama. Ucampis ucanacjj janiw kellkcti.

7. Ucampis jutir urunacat nayan quipca yatiyäwijjarjamaw lurta, nayan khana cancañajjarjamaraqui. Uca khana cancañansti janiw qhitis pantjascaspati. Ucampis Isaiasan arsutaparjam phokhascan ucürunacana, cunapachatejj lurascan uca pachanjja, jakenacajj chekpachapuniw yatipjjani.

8. Uqhämasti, ucanacajj wali sumaw jaken wawanacapataquejja. Qhitinacatejj ucanacan jan uqhämäcaspa uqhäm amuyapcanejja, jupanacaruw ucjjat parlä, ucatsti quipca jakenacajjataquiquiw parlaraquï, khep khepürunacan take ucanacan jupanacatac sumäñap yatisina, cunalaycutejj ucürun jupanacajj ucanac amuyapjjani. Ucatwa, jupanacan asquipatac ucanac kellkta.

9. Cunjämatejj mä mitajj judionac taypit ñankha cancañ laycojj thant tucqhatäpquejja, uqhämaw mitanacat mitanacar jupanacajj ñankhätaparjam thant tucqhatäpjjäna. Jupanacat janiw qhitis tʼunjatäcänti, Tatitun arjirinacap toke janïr arsquipanjja.

10. Ucat awquijjajj Jerusalenat mistcän ucspachaw cuna tʼunjäwitejj judionacjjar puriñapäcän ucatjj jupanacar yatiyatäna, ucampis jupanacajj chuymanacap chʼollkheptayasipjjäna. Ucatsti yatiyäwijjarjamaw jupanacajj tʼunjatäpjje; qhitinacatejj Babiloniar catuntat irpatäpcän ucanacaquiw jan tucqhatäpquiti.

11. Nayancqui uca ajayüpan acjj parlta. Jupanacajj irpsutäpc-chïnsa, wastat cut-tapjjani, Jerusalen orak catusjjapjjani, uqhämat tuti churat orakepar wastat cut-tayatäpjjani.

12. Ucampis jupanac taypinjja, nuwasïwinacamp nuwasïwit istʼañanacampiw utjani. Cunüruntejj Awquin mä Sapa Jathachasitapajja, jïsa, alajjpachampin orakempin Awquipajja, jupanacar janchin uñstcani ucürunjja, janiw jupanacajj jupar catokapcaniti, ñankha luräwinacapata chuymanacapan chʼollkhëtapata, pʼekenacapan jan altʼirïtapata.

13. Jïsa, jupanacajj cruzjjaruw jupar chʼac-catapjjani. Jupan quimsüru sepulturancatap khepatsti, jiwatanac taypit jactani; chhekhapansti khespiyasiñaw utjani. Take jupan sutipar iyawsirinacajj Diosan khapak marcapan khespiyatäpjjani. Ucat jupjjat yatiyasajj chuymajjajj cusisi. Urupjja uñjtwa, chuymajjasti kollan sutiparuw jachʼar aptaraqui.

14. Ucatsti, Mesiasan jiwatanac taypit jactatapatjja, jakenacapampir take qhitinacatejj jupar iyawsapcan ucanacar uñstatap khepatjja, Jerusalenaw wastat tʼunjasini. Ay qhitinacatejj Diosampiru tamapanquir jakenacampiru nuwasipcani ucanacata!

15. Uqhämasti, judionacajj take marcanac taypin chʼeketatatäpjjaniwa. Jïsa, Babiloniajj tʼunjataraquïniwa; ucatjja judionacajj yakha marcanacan chʼeketatatäpjjaniwa.

16. Jupanacan chʼeketatatap khepatsti, Dios Tatitun yakha marcanac toke jupanacar walja mitanac sarakcani uc-chañcam tʼakhesiyatap khepatsti, jïsa, mitanacat mitanacarusa, jupanacan Diosan Cristo Yokaparu iyawsañ amuyatäñapcama, takpach jakenacataqui jan watïqui uca juchanacan tʼakhesiyäwipar phokhañaru iyawsañ amuyayatäñapcama, ucat cunüruntejj jupanacajj Cristor iyawsapcani, jupan sutipjjar kʼoma chuymamp kʼoma amparamp Awquir yupaychapcani, janirac jucʼamp suyapcani, yakha Mesiasan jutañapataqui, ucapachaw purini cunürutejj ucanacar iyawsañapajj waquiscan ucürojja.

17. Tatitojj payïr cutiw amparap jakenacapar loktani; chhakata, tincuta utjäwipat cut-tayañataqui. Ucat jupajj jaken wawanacap taypin mä muspharcañ luräwimp muspharäwimp lurani.

18. Ucat jupajj arunacap jupanacar khanstayani. Uca arunacaw khep khepa urunjja jupanacar taripani; uca arunacajj churatäniwa, qhitirutejj jan catokapqui uca chekpach Mesiasat jupanacar amuyayañataqui. Uqhämaraqui jupanacar amuyayañataqui, janiw jucʼamp mä Mesiasan jutañap suyañapajj waquisquiti, cunalaycutejj janiw yakhajj jutcaniti, inas mä cʼari Mesiasajj jutchispa, marcar sallkjjeri. Arjirinacajj mä Mesiasjjatac parlapjje. Uca Mesiasasti judionacan jan catokatäcan ucawa.

19. Arjirinacan arunacaparjamajja, awquijjajj Jerusalenat mistuncän ucapachatjja, sojjta patac mararuw Mesiasajj jutani. Arjirinacan arunacaparjama, Diosan qhitapan aruparjamaraquiw sutipajj Jesucristo Diosan Yokapa satäni.

20. Jichhasti, jilanacajjay, jan pantasiñamataquiw khanpach parlapjjsma. Dios Tatitojj chekpachaw jaqui; jupaw Israelarojj Egipto oraket irpsuni, Moisesarusti chʼam churi, jakenacar jiwayir catarinacan achjat marcanacar cʼumaraptayañapataqui, jupanacatejj nayrakatapan aptat catarir uñcatapcasp ucapacha; ucatsti juparuw chʼam churaraquïna, karkar jawkʼantañapataqui ucat um jalsuñapataqui. Jïsa, nayajj jumanacaruw sapjjsma, cunjämatejj ucanacajj chekäquejja, Dios Tatitojj chekpachapuniw jacasqui, uqhämasti janiw yakha sutejj alajjpachat churatäquiti, jan ucasti, parlcta uca Jesucristo sutiquiwa, jakejj uca tokequiw khespiyasispa.

21. Ucatwa, Dios Tatitojj nayar arsutu: Kellkcta ucanacan jan chhaktañapjjata; ucanacan imatäñapjjata, sarakerinacajjar mitat mitar churatäñapataqui. Diosajj acataquiw uc arsutu: Josear churatäcän uca arsüwin phokhasiñapataqui, jupan sarakeripan jan cunapachas tucusiñapataqui orakejj utjcan uc-chañcama.

22. Uqhämasti, acanacajj mitanacat mitanacar churatäniwa, orakejj utjcan uc-chañcamajja. Diosan munañaparjam cusisiñaparjamaw churatäpjjani. Cawquïr marcanacatejj aca kellkatanac catupcan uca marcanacajja, aca kellkat arunacarjam taripatäpjjaniwa.

23. Cunalaycutejj nanacajj wali amuytʼasaw kellkañataquejj chʼamachasipjjta, wawanacajjampir jilanacajjampir Cristor jaysjjañap iyawsayañataqui, Diosamp sumancjjañapataquiraqui; nanacajj yatipjjtwa, Diosan churäwipïpanac khespiyastan, take cunatejj lurañjamäc ucanac lurasina.

24. Cristorus iyawsapcstjja, Moisesan leyip phokhasipcactwa, jan pÁchasisaw Cristor suyasipcaquiracta, leyejj phokhascan ucapachcama.

25. Cunalaycutejj leyejj ucataquiw churatänjja. Ucat nanacataquejj leyejj jiwatjam tucu. Iyawsañajj laycuw nanacajj Criston jacayatäpjjta. Ucampis camächitanac laycuw ley imapjjta.

26. Ucampis Cristot parlapjjta, Cristot wal cusisipjjta, Cristot yatichapjjta, Cristot yatiyapjjta, jutir urunacat yatiyäwinacajjarjam kellkapjjta, wawanacajjan yatiñapataqui cunarutejj uñjañapäcan juchanacap pʼampʼachayasiñapataqui.

27. Ucat leyit parlapjjta, wawanacajjan leyin jan chʼamanïtap yatiñapataqui; leyin jan chʼamanïtap yatisinsti, Cristoncqui uca jacañar suyañapataqui, cunataquitejj leyejj churatäcän uc yatiñapataqui; ucatjja, Cristo laycu leyin phokhasiñap khepatsti, cunapachatejj leyejj jaytanucutäñapäcani ucapachan juparu chuymanacap jan chʼollkheptayasiñapataquiraqui.

28. Jichhasti, jakenacajjay, jumanacajj mä jan altʼir pʼeken jakenacäpjjtawa. Ucat khanpach jumanacar parlapjjsma, jumanacan jan pantasiñamataqui. Uca arunacajj take jakeruw cheka thaquit yatichaspa. Ucatsti jumanacar parlapcsma uca arunacajj jumanacat ircatapjjani. Cheka thaquejja Cristor iyawsañawa, jupar catokañaraquiwa, cunalaycutejj jan jupar catokasajja, janiraquiw arjirinacarus leyirus catokapcaraquismati.

29. Jichhasti, jumanacaruw sapjjsma: cheka thaquejj Cristor iyawsañawa, jupar catokañaraquiwa. Cristosti Israelan Kollanapawa. Ucat jupa nayrakatar quilltʼasis jupar yupaychañama take chʼamtʼañampi, amuyumampi, chʼamamampi, take chuymamampi. Jumanacatejj uqhäm lurapjjätajja, janiw cunjämats jakonucutäpcätati.

30. Cunapachcamatejj waquiscan ucapachcamajja, Diosan luräwinacapamp leyinacapamp phokhapjjañamawa, Moisesar churatäcän uca leyin phokhasiñapcama.