1. Wawanacajja, munat jilanacajjay, Criston jiwatanacat jactatap khepatsti, jumanacar pachpaw uñachayasini. Jupajj jumanacar parlapcätam uca arunacajj leyïniwa. Uca leyirjamaw sarnakapjjaraquïta.

2. Nayajj jumanacaruw sapjjsma: walja mitanac saraker uñjta. Jakenacajj taypinsti jachʼa nuwasïwinacamp chʼajjwäwinacampiw utjani.

3. Mesiasan jutatap khepatjja, unañchanacajj jakenacajjar churatäniwa; nacitapjjata, jiwatapjjata, jiwañat jactatapjjata. Ñankha jakenacataquisti ucürojj jachʼäniwa, ajjsarcañaraquïniwa; jupanacajj tucusipjjaniwa. Diosan arjirinacampir kollan jakenacampir jakonucutapata, kalamp cʼupjatapata, jiwayatapat jupanacajj tucusipjjani. Ucat kollan jakenacan wilapan artʼäwipajj lakʼatpach Diosar maqhatani jupanacar ircatiri.

4. Ucat purcan ucürojja aytat chuymaninacaru, ñankh luririnacaruw phichhantani –siw nuwasiri tamanacan Tatitupajja. Jupanacasti yawit alinacjamäniwa.

5. Oraken pʼiyanacapajja, Diosan arjirinacampir kollan jakenacampir jiwayirinacaruw mankʼantapjjani –siw nuwasiri taman Tatitupajja. Kollunacasti jupanacjjaruw alljjat-tani; tutucanacasti jupanacaruw apsupjjaraquini; jachʼa utanacajj jupanacjjaruw tincjjat-tani, tʼun tʼunjapjjani, ñutʼu ñutʼjapjjaraquini.

6. Tatitun colerasiñapan ninapajj jupanacjjaruw aktayatäni; ucat khejjokhejjonacampi, llijullijunacampi, orak onjjtäwinacampi, take cunayman tʼunjäwinacampiw jupanacjjar jutani. Jupanacasti yawit alinacjamäniwa. Purincan ucürusti, jupanacaruw japuntani –siw nuwasiri tamanacan Tatitupajja.

7. Ay chuymajjan llaquisiñapa, tʼakhesiñapa, jiwayat jakenacajjan chhaktatapata! Cunalaycutejj naya Nefiw uc uñjta; ucasti niyapiniw nayar naqhantitu Tatitun nayrakatapana. Ucampis Diosajjaruw artʼasiñajja: Thaquinacamajj chekapawa! –sasa.

8. Ucampis cawquïr asqui jakenacatejj arjirinacan arunacapar yäkapqui, ucat janirac jupanac tucqhapcanejja, antisas jan pächasis Cristor suyapcani arsut unañchanacan phokhasiñapa, take arcnakäwinac utjquipansa, jupanacapí jan tucusipcanitejja.

9. Antisas Asqui Cancañan Yokapaw jupanacar uñstani, ucatsti jupanacar cʼumaraptayani. Jupanacasti jupampiw sumancapjjani, quimsa mitanac saraquipcan ucapachcamajja. Ucatsti waljaniw pusïr mitanacat asqui cancañan jiwapjjaraquini.

10. Ucanacan lurasitap khepatjja, acatjamatac mä tʼunjäwejj jakenacjjar purini. Chuymajjan tʼakhescasasa, nayaw ucjj uñjta. Ucat nayajj yat-ta ucan puriniñapjja. Jachʼa jachʼa chuymanïtapata tʼajjmarätapata, jupajj tʼunjäw catokani, ucat jupanac pachpaw jan cunatac aljantasipjjani. Cunalaycutejj Supayampiw catuntayasipjje, chʼamac luräwinac khana luräwinac lantjja ajllisipjje. Uqhämasti, mankhapachar sarapjjañapäniwa.

11. Cunalaycutejj Tatitun Ajayupajj janiw wiñayatac jakemp kʼewtascaniti. Cunapachatejj Ajayojj jakemp kʼewtasiñ tucuyqui ucapachaw acatjamat mäc tʼunjañajj juti. Ucasti chuymajjaruw wal llaquisiyi.

12. Cunjämatejj Jesusan Cristötapat judionacar amuyayañjjat parlctjja, uqhämaraquiw Jesusan Cristötapata, Wiñay Diosätapat gentilenacar amuyayañajj waquisiraqui.

13. Kollan Ajayun chʼamapampiw jupajj uñsti take qhitinacatejj jupar iyawsapqui ucanacaru. Jïsa, take orakeru, familiaru, lajjraru, marcaru. Jaken wawanacap taypin uñsti jachʼa muspharcañanac lurasa, unañchanaca, muspharcäwinac lurasaraqui, jupanacan iyawsañaparjama.

14. Ucampis khep khepürunacat jumanacar yatiyapjjsma, cunürunacatejj Dios Tatitojj ucanac jaken wawanacapar khanstaycan ucürunacata.

15. Nayan sarakerinacajjampin jilanacajjan sarakerinacapampin jan iyawsirïpjjatapan jucʼampstʼatap khepata, ucatsti gentilenacamp tʼakhesiyasis khepata, jïsa, Tatit Diosajj jupanacar nuwasiñatac muyuntas utjantascan uca khepata, ucatsti jupanacan mistuñapar jarcʼaker pucaramp muyuntaycan uca khepata, jupanacaru nuwasiñatac pucaranac ut-tʼaycän uca khepata, ucatsti lakʼar tucuyañcam tucjcani, jupanacan jan utjañapcam uca khepata, take uqhämäquipansa asqui jakenacan arunacapajj kellkantatäniwa, iyawsirinacan mayisitanacapasti istʼatäniwa. Ucampis jan iyawsirïpjjatap jucʼampstʼayirinacajj janiw maynis armatäcaniti.

16. Cunalaycutejj tʼunjatäpcan ucanacajja, lakʼatpach jupanacar parljjayapjjani. Arunacapasti lakʼatpach jiscʼat istʼasini. Arupasti jiwatanac taypit maynis parlcaspajj uqhamäniwa, cunalaycutejj Diosaw juparojj chʼam churani, jupanacjjat jiscʼat arsuñapataqui, lakʼats mistcaspajj uqhäma. Ucat jupanacajj lakʼatpach jiscʼat arsupjjani.

17. Cunalaycutejj aqhäm siw Dios Tatitojja: Cunanacatejj jupanac taypin luratäcan ucanac kellkapjjani. Ucanacasti kellkatäniwa, mä libron imantataraquïniwa. Ucatsti, qhitinacatejj jan iyawsirïñar jaltʼapcan ucanacajja, janiw ucanacanïpcaniti, Diosan yänacap tucqhañ chʼamtʼatap laycu.

18. Uqhämasti, cunjämatejj tʼunjatäpqui uca jakenacajj acatjamat mäc tucqhatapcänjja, uqhämaraquiw jupanacan ajjsarcañ jake tamanacapajj tucusir chʼallpjam tucusipjjaraquini. Jïsa, ucajj acatjamat mäquiw phokhasini. Uqhäm Dios Tatitojj arsu.

19. Ucatsti jan iyawsirïñar jaltʼapqui ucanacajja, gentilenacan amparapamp jawkʼantatäpjjaniwa.

20. Gentilenacasti quicpa jachʼa jachʼa tucuñapan pʼek waytapjje, lanktañ kalapan sinti jachʼätap laycuw lanktasipjje, cunalaycutejj walja iyawsiri tamanac ut-tʼayapjje. Ucampis Diosan chʼamapampir muspharcañ luräwinacapampirojj jiscʼachapjjewa, jupanacan quipca yatiñ cancañapat parlapjje, jupanacan quicpa yatekañapat parlapjjaraqui, kamiriptañataqui, jan utjirininacan ajanunacap usuchjañataquiraqui.

21. Walja iyawsiri tamanacaw ut-tʼayasi, ucanacaw munapayañ utjayi; uñisisiña, ñankha amuyunïñ utjayaraqui.

22. Nayra pachanjamaraquiw jamasat arustʼäwinacajj utji, supayan arustʼäwinacaparjama. Jupaw take ucanacan takanapajja. Jïsa, jupaw jaker jiwayañ uñstayirejja, chʼamac luräwinacan takanapasa. Jïsa, jupaw jupanacarojj cuncat mä koña phalamp jisqhi, jupanacar wiñayatac jan tʼakjjcay phalanacapamp ñachʼantañapcama.

23. Munat jilanacajjay, nayajj jumanacaruw sapjjsma: Tatitojj janiw chʼamacan lurquiti.

24. Janiw cuns lurquiti, jan ucajja, oraketac sumäquis ucac luri, cunalaycutejj jupajj orakeruw wal muni, ucat jupajj pachpa jacañap catuyi, take jakenacar jupar puriyañataqui. Ucalaycu, janiw qhitirus camächit churquiti khespiyañap jupanacan jan catokañapataquejja.

25. Qhitiruch jupajj sejja: Nayat jithektasit –sasajja? Nayajj jumanacar sapjjsmawa: Janiw uqhäm siscaspati. Antisas jupajj siwa: Take orake thiyapanquirinaca, nayar jutapjjam, jan alampi jan kollkempi: lechemp mamuray misqʼimp alasipjjam –sasa.

26. Mä qhitiruch camächit churi, sinagoganacata, yupaychañ utanacat mistuñapataquejja? Nayajj sapjjsmawa: Janiw uqhäm camächit churquiti.

27. Qhitiruch jupajj camächit churi, khespiyasiñap jan catokañapataquejja? Nayajj jumanacar sapjjsmawa: Janiw uqhäm lurquiti, antisas take jakenacaruw ucjj inac churi. Jakenacaparusti camächit churaraqui, jupanacan take jakenacar amuyayañapataqui, juchanacat cutiquipstapjjañapataqui.

28. Qhitiruch Tatitojj camächit churi, sumätap jan catokañapataquejja? Nayajj jumanacaruw sapjjsma: Janiw uqhäm lurquiti, antisas sapa mayni jakejj maynjam catokañapajj wactʼaraquiwa. Janiraquiw qhitis jarcʼatäquiti.

29. Jupaw camächit churi sallka sacerdotëñanacan jan utjañapataqui, cunalaycutejj sallka sacerdotëñajja jakenacan yatichañanacapaquiwa, jupanac pachpar oraketac khanjam ut-tʼayatanacapawa, jupanacan kamiriptañapataqui oraken jachʼar aptañap catokañapataqui. Ucampis jupanacajj janiw Sionan asquip thakapquiti.

30. Tatituw ucan jan utjañapatac camächit churi. Ucat Dios Tatitojj camächit churi take jakenacan qhuyapayasiñanïñapataqui; uca qhuyapayasiñasti munasiñawa. Janitejj jupanacan qhuyapayasiñajj utjcaspajja, jupanacajj janiw cunäpquisa. Uqhämasti, jupanacatejj qhuyapayasiñanïpjjaspajja, Sionan trabajiripan tucusiñapjja janiw munapcaniti.

31. Ucampis Sionan trabajirirojj Sionataquiw trabajani; jupatejj kollke layc trabajanejja, tucusiniwa.

32. Uqhämaraqui, Dios Tatitojj jakenacar camächit churi, jupanacan jak jan jiwayañapataqui, jan cʼarisiñapataqui, jan lunthatasiñapataqui, Dios Tatitupan sutip jan inamay aytasiñapataqui, yänac jan munapayañapataqui, jan uñisiñapataqui, jan jupanac pur chʼajjwañapataqui, kʼañusiñan jan sarnakapjjañapataqui, ucanacat jan cuns lurañapataqui, cunalaycutejj qhitinacatejj ucanac lurapqui ucanacajj tucusiniwa.

33. Cunalaycutejj janiw mayas uca ñankha luräwinacajj Tatitut jutquiti. Jupajj cunatejj sumäqui uc jaken wawanacap taypin luri, cunatejj jaken wawanacapatac jan khan amuyañjamäqui ucjja, janiw jupajj lurquiti. Takeniruw mayi jupar jutañapataqui, sumätapan cusisiñapataqui; jupar jutirirojj janiw qhitirus jarcʼquiti; chʼiyärarus jankʼorusa, mitʼanirus jan mitʼanirusa, chacharus warmirusa. Chʼunchʼunacat amtasiraquiwa; takeniw Diosan nayrakatapanjj mayaqui, gentilenacasa, judionacasa.